ಮೇ ತಿಂಗಳಿನಲ್ಲಿದೆ ರಕ್ತ ಚಂದ್ರಗ್ರಹಣ: ಯಾವಾಗ ಸಂಭವಿಸಲಿದೆ? ಭಾರತದಲ್ಲಿ ಕಂಡು ಬರುವುದೇ?

ಚಂದ್ರಗ್ರಹಣ ಎಂದರೇನು?

ಚಂದ್ರಗ್ರಹಣವನ್ನು ವೈಜ್ಞಾನಿಕವಾಗಿ ಹೇಳುವುದಾದರೆ ಸೂರ್ಯ ಮತ್ತು ಚಂದ್ರನ ಮಧ್ಯೆ ಭೂಮಿ ಬಂದಾಗ ಚಂದ್ರಗ್ರಹಣವು ನಡೆಯುವುದು. ಯಾಕೆಂದರೆ ಈ ವೇಳೆ ಸೂರ್ಯನ ಬೆಳಕು ಚಂದ್ರನ ಮೇಲೆ ಬೀಳುವುದಿಲ್ಲ, ಭೂಮಿಯ ನೆರಳು ಚಂದ್ರನ ಮೇಲೆ ಬೀಳುತ್ತದೆ. ಇದರಿಂದಾಗಿ ಚಂದ್ರನಿಗೆ ಗ್ರಹಣ ಉಂಟಾಗುವುದು.

ಈ ಬಾರಿ ಸಂಭವಿಸಲಿರುವುದು ರಕ್ತ ಚಂದ್ರಗ್ರಹಣ.

ಚಂದ್ರಗ್ರಹಣ ಯಾವಾಗ? ಎಷ್ಟು ಹೊತ್ತಿಗೆ ಗೋಚರಿಸಲಿದೆ?

ಚಂದ್ರಗ್ರಹಣ ಮೇ, 15-16ಕ್ಕೆ ಸಂಭವಿಸಲಿದೆ. ಅಂದರೆ ನಿಮ್ಮ ಪ್ರದೇಶಕ್ಕೆ ಅದು ಯಾವಾಗ ಗೋಚರಿಸಲಿದೆ ಎಂಬುವುದು ನಿಮ್ಮ ಪ್ರದೇಶವನ್ನು ಅವಲಂಬಿಸಿದೆ. ಭಾರತದ ಕಾಲಮಾನ ಪ್ರಕಾರ ಮೇ.16ಕ್ಕೆ ಸಂಭವಿಸಲಿದೆ.

ಎಷ್ಟು ಹೊತ್ತಿಗೆ ಗೋಚರಿಸಲಿದೆ?

ಭಾರತದ ಕಾಲಮಾನ ಪ್ರಕಾರ ಬೆಳಗ್ಗೆ 07:02ಕ್ಕೆ ಚಂದ್ರಗ್ರಹಣ ಪ್ರಾರಂಭವಾಗಿ 12:20ಕ್ಕೆ ಮುಕ್ತಾಯವಾಗುತ್ತದೆ. ನಮ್ಮ ಕಾಲಮಾನ 08:59ರ ಹೊತ್ತಿಗೆ ಸಂಪೂರ್ಣ ರಕ್ತಚಂದ್ರಗ್ರಹಣ ಸಂಭವಿಸಲಿದೆ.

ಸಂಪೂರ್ಣ ಚಂದ್ರಗ್ರಹಣ ಎಂದರೇನು?

ಸೂರ್ಯ ಮತ್ತು ಚಂದ್ರನ ಮಧ್ಯ ಭೂಮಿ ಬಂದಾಗ ಭೂಮಿಯ ನೆರಳು ಚಂದ್ರನ ಮೇಲೆ ಬಿದ್ದು ಚಂದ್ರಗ್ರಹಣ ಸಂಭವಿಸುತ್ತದೆ. ಭೂಮಿಯ ನೆರಳು ಸಂಪೂರ್ಣವಾಗಿ ಚಂದ್ರನ ಮೇಲೆ ಬಿದ್ದಾಗ ಸಂಪೂರ್ಣ ಚಂದ್ರಗ್ರಹಣ ಆವರಿಸುತ್ತದೆ.

2022ರಲ್ಲಿ 2 ಸಂಪೂರ್ಣ ಚಂದ್ರಗ್ರಹಣವಿದೆ. ಒಂದು ಮೇ 16ಕ್ಕೆ ಸಂಭವಿಸಲಿದೆ, ಮತ್ತೊಂದು ನವೆಂಬರ್‌ 8ಕ್ಕೆ ಇರಲಿದೆ.

ರಕ್ತ ಚಂದ್ರಗ್ರಹಣವೆಂದರೇನು?

ಗ್ರಹಣದ ಸಮಯದಲ್ಲಿ ಸೂರ್ಯ ಮತ್ತು ಚಂದ್ರ ನಡುವೆ ಭೂಮಿ ಅಡ್ಡ ಬಂದಾಗ ಭೂಮಿಯ ನೆರಳು ಚಂದ್ರನ ಮೇಲೆ ಬಿದ್ದು ಚಂದ್ರ ಕಾಂತಿ ಕಳೆದುಕೊಳ್ಳುತ್ತಾನೆ. ಖಗ್ರಾಸ ಚಂದ್ರ ಗ್ರಹಣದಲ್ಲಿ ಭೂಮಿಯ ಸಂಪೂರ್ಣ ನೆರಳು ಚಂದ್ರನ ಮೇಲೆ ಬಿದ್ದು, ನಂತರ ಭೂಮಿ ಕೊಂಚ ಸರಿದಾಗ ಸೂರ್ಯ ಕಿರಣಗಳು ಭೂಮಿಯ ಅಂಚಿನಿಂದ ಚಂದ್ರನ ಮೇಲೆ ಬೀಳುತ್ತವೆ. ಆಗ ವಾತಾವರಣದ ಧೂಳಿನ ಕಣಗಳು ಸೂರ್ಯನ ಬೆಳಕಿಗೆ ಅಡ್ಡಬಂದು ಚಂದ್ರ ರಕ್ತವರ್ಣದಲ್ಲಿ ಕಾಣಿಸುತ್ತಾನೆ. ಇದನ್ನು 'ಬ್ಲಡ್ ಮೂನ್ ಅಥವಾ ರಕ್ತ ಚಂದ್ರ ಎಂದು ಕರೆಯಲಾಗುವುದು. ಆದ್ದರಿಂದ ಬಣ್ಣದ ಕಾರಣಕ್ಕೆ ಆತಂಕ ಪಡಬೇಕಾಗಿಲ್ಲ.

ಭಾರತದಲ್ಲಿ ಚಂದ್ರಗ್ರಹಣ ಗೋಚರಿಸುವುದೇ?

ಚಂದ್ರಗ್ರಹಣ ಸಮಯದಲ್ಲಿ ಭಾರತದಲ್ಲಿ ಸೂರ್ಯ ಹುಟ್ಟಿರುತ್ತಾನೆ. ಆದ್ದರಿಂದಾಗಿ ಭಾರತದಲ್ಲಿ ಚಂದ್ರಗ್ರಹಣ ಕಂಡು ಬರುವುದಿಲ್ಲ.

ರಕ್ತ ಚಂದ್ರಗ್ರಹಣ ಎಲ್ಲೆಲ್ಲಿ ಕಂಡು ಬರಲಿದೆ?

ಅಮೆರಿಕ, ಅಂಟಾರ್ಟಿಕಾ, ಯುರೋಪ್‌, ಆಫ್ರಿಕಾ, ಪೂರ್ವ ಫೆಸಿಫಿಕ್, ನ್ಯೂಜೆಲ್ಯಾಂಡ್, ಪೂರ್ವ ಯುರೋಪ್ ಮತ್ತು ಮಧ್ಯಪ್ರಾಚ್ಯದಲ್ಲಿ ಕಂಡು ಬರಲಿದೆ.