ವಿಶ್ವದ ಅತ್ಯಂತ ದುಬಾರಿ ಟಾಯ್ಲೆಟ್ 'ಅಮೆರಿಕ' ಹರಾಜು! ಬೆಲೆ ಎಷ್ಟು ಗೊತ್ತಾ? ಟ್ರಂಪ್‌ಗೂ ಆಫರ್ ಸಿಕ್ಕಿತ್ತು

ವಿಶ್ವದ ಅತ್ಯಂತ ದುಬಾರಿ ಟಾಯ್ಲೆಟ್ 'ಅಮೆರಿಕಾ' ಹರಾಜು! ಇದರ ಬೆಲೆ ಎಷ್ಟು ಗೊತ್ತಾ? ಹೌದು, ವಿಶ್ವದ ಅತ್ಯಂತ ದುಬಾರಿ ಟಾಯ್ಲೆಟ್ (World Most Expensive Toilet) 'ಅಮೆರಿಕಾ' ಈಗ ಹರಾಜಿಗೆ ಸಜ್ಜಾಗಿದೆ. ಇದನ್ನು 101 ಕಿಲೋ ಘನ ಚಿನ್ನದಿಂದ ನಿರ್ಮಿಸಲಾಗಿದೆ. ಕಲಾವಿದ ಮೌರಿಜಿಯೊ ಕ್ಯಾಟೆಲನ್ ಅವರು ಈ ವಿಶಿಷ್ಟ ಕಲಾಕೃತಿಯನ್ನು ತಯಾರಿಸಿದ್ದಾರೆ. ಇದನ್ನು ಸೋಥೆಬೀಸ್‌ನಲ್ಲಿ ಬರೋಬ್ಬರಿ 83 ಕೋಟಿ ರೂಪಾಯಿ ಮೂಲ ಬೆಲೆಗೆ ಹರಾಜು ಮಾಡಲಾಗುತ್ತದೆ. ಇದು ಐಷಾರಾಮಿ, ಕಲೆ ಮತ್ತು ವಿಡಂಬನೆಯ ಸಂಕೇತವಾಗಿ ಗಮನ ಸೆಳೆದಿದೆ.

ಹೌದು, ಪೂರ್ಣವಾಗಿ ಚಿನ್ನದಿಂದ ನಿರ್ಮಿಸಿದ ಸುಮಾರು 83 ಕೋಟಿ ಮೌಲ್ಯದ ಟಾಯ್ಲೆಟ್ ಅನ್ನು ಊಹಿಸುವುದು ಸಿನಿಮಾದ ಕಥೆಯಂತೆ ಕಾಣಿಸಬಹುದು. ಆದರೆ, ಇದು ಇಟಾಲಿಯನ್ ಕಲಾವಿದ ಮೌರಿಜಿಯೊ ಕ್ಯಾಟೆಲನ್ ಅವರ ವಾಸ್ತವ ಸೃಷ್ಟಿ. 'ಅಮೆರಿಕಾ' ಹೆಸರಿನ ಈ ಕಲಾಕೃತಿಯನ್ನು ಈಗ ಸೋಥೆಬೀಸ್ ಹರಾಜು ಮನೆಯಲ್ಲಿ ಮಾರಾಟ (Gold toilet auction) ಮಾಡಲಾಗುತ್ತಿದೆ.

Photo Credit: ಸಂಗ್ರಹ ಚಿತ್ರ

223 ಪೌಂಡ್ ಚಿನ್ನದಿಂದ ಸೃಷ್ಟಿ

ಈ ಟಾಯ್ಲೆಟ್‌ನ ಹೊಳಪು ಅದರ ಹಿಂದಿನ ವಿಡಂಬನಾತ್ಮಕ ಚಿಂತನೆಯಷ್ಟೇ ಪ್ರಖರವಾಗಿದೆ. ಸಂಪತ್ತು ಮತ್ತು ಕಲೆಯ ನಡುವಿನ ಸಂಬಂಧವು ಇಂದು ಒಂದೇ ಆಸನದ ಮೇಲೆ ಹೇಗೆ ಅಸಂಗತವಾಗಿ ಕುಳಿತಿದೆ ಅನ್ನೋದನ್ನು ಇದು ಪ್ರತಿಬಿಂಬಿಸುತ್ತದೆ. ಈ 'ಅಮೆರಿಕಾ' ಕಲಾಕೃತಿಯು (gold toilet america) 223 ಪೌಂಡ್ ಅಂದರೆ 101.2 ಕಿಲೋಗ್ರಾಂ ಚಿನ್ನದಿಂದ ಮಾಡಲ್ಪಟ್ಟಿದೆ.

ಹರಾಜಿನ ಆರಂಭಿಕ ಬೆಲೆ ಚಿನ್ನದ ಮೌಲ್ಯದಷ್ಟೇ ಇರಲಿದೆ. ಸುಮಾರು 10 ಮಿಲಿಯನ್ ಡಾಲರ್ (ಅಂದಾಜು 83 ಕೋಟಿ ರೂಪಾಯಿ) ಎಂದು ನಿಗದಿಪಡಿಸಲಾಗಿದೆ. ಸೋಥೆಬೀಸ್‌ನ ಸಮಕಾಲೀನ ಕಲೆ ವಿಭಾಗದ ಮುಖ್ಯಸ್ಥ ಡೇವಿಡ್ ಗ್ಯಾಲ್ಪಿರಿನ್, ಕ್ಯಾಟೆಲನ್ ಅವರನ್ನು 'ಕಲೆಯ ಜಗತ್ತಿನ ನಿಜವಾದ ಪ್ರಚೋದಕ ಕಲಾವಿದ' ಎಂದು ಬಣ್ಣಿಸಿದ್ದಾರೆ.

ಈ ಕಲಾಕೃತಿಗೆ 'ಅಮೆರಿಕಾ' ಎಂದು ಹೆಸರು

ಮೌರಿಜಿಯೊ ಕ್ಯಾಟೆಲನ್ ಈ ಕಲಾಕೃತಿಗೆ 'ಅಮೆರಿಕಾ' ಎಂದು ಹೆಸರಿಟ್ಟಿದ್ದಾರೆ. ತೀವ್ರ ಐಷಾರಾಮಿ ಮತ್ತು ಪ್ರದರ್ಶನವನ್ನು ವಿಡಂಬಿಸುವ ಉದ್ದೇಶ ಇದರ ಹಿಂದಿದೆ ಎಂದು ಅವರು ಹೇಳಿದ್ದಾರೆ. 200 ಡಾಲರ್ ಊಟ ಅಥವಾ 2 ಡಾಲರ್ ಹಾಟ್‌ಡಾಗ್ ಆಗಿರಲಿ, ಅಂತಿಮ ಫಲಿತಾಂಶವು ಟಾಯ್ಲೆಟ್‌ನಲ್ಲಿ ಒಂದೇ ಆಗಿರುತ್ತದೆ ಎಂದು ಅವರು ತಿಳಿಸಿದ್ದಾರೆ.

ಅರಮನೆಯಿಂದ ಇದೇ ಟಾಯ್ಲೆಟ್‌ ಕಳವು

ಇದರ ಮೂಲಕ, ಮಾನವನು ಎಷ್ಟು ಶ್ರೀಮಂತನಾದರೂ, ಅವನ ಅಂತ್ಯವು ಒಂದೇ ಸತ್ಯದೊಂದಿಗೆ ಇರುತ್ತದೆ ಎಂಬುದನ್ನು ಅವರು ಸ್ಪಷ್ಟಪಡಿಸಲು ಪ್ರಯತ್ನಿಸಿದ್ದರು. 2019 ರಲ್ಲಿ ಇಂಗ್ಲೆಂಡ್‌ನ ಬ್ಲೆನ್‌ಹೈಮ್ ಅರಮನೆಯಿಂದ ಇದೇ 'ಅಮೆರಿಕಾ' ಟಾಯ್ಲೆಟ್‌ನ ಒಂದು ಪ್ರತಿಯನ್ನು ಕಳವು ಮಾಡಲಾಗಿತ್ತು.

ವಿನ್‌ಸ್ಟನ್ ಚರ್ಚಿಲ್ ಜನಿಸಿದ ಅರಮನೆ ಇದು. ರಾತ್ರಿಯ ವೇಳೆ ಅರಮನೆಗೆ ನುಗ್ಗಿದ ಕಳ್ಳರು ಪೈಪ್‌ಗಳನ್ನು ಕಡಿದು ಚಿನ್ನದ ಟಾಯ್ಲೆಟ್‌ನೊಂದಿಗೆ ಪರಾರಿಯಾಗಿದ್ದರು. ನಂತರ ಇಬ್ಬರನ್ನು ಬಂಧಿಸಲಾಯಿತು. ಆದರೂ, ಟಾಯ್ಲೆಟ್ ಮಾತ್ರ ಪತ್ತೆಯಾಗಲಿಲ್ಲ. ಅದನ್ನು ಕರಗಿಸಿ ಚಿನ್ನವನ್ನಾಗಿ ಪರಿವರ್ತಿಸಲಾಗಿದೆ.

Photo Credit: ಸಂಗ್ರಹ ಚಿತ್ರ

ವಿವಾದ ಮತ್ತು ಹಾಸ್ಯ ಎರಡೂ ನೆನಪು

ಮೌರಿಜಿಯೊ ಕ್ಯಾಟೆಲನ್ ಅವರ ಹೆಸರು ಕೇಳಿದಾಕ್ಷಣ ವಿವಾದ ಮತ್ತು ಹಾಸ್ಯ ಎರಡೂ ನೆನಪಿಗೆ ಬರುತ್ತವೆ. ಅವರ 'ಹಾಸ್ಯಗಾರ' ಕಲಾಕೃತಿಯಲ್ಲಿ ಬಾಳೆಹಣ್ಣನ್ನು ಗೋಡೆಗೆ ಟೇಪ್‌ನಿಂದ ಅಂಟಿಸಲಾಗಿತ್ತು. ಅದು $6.2 ಮಿಲಿಯನ್‌ಗೆ ಮಾರಾಟವಾಯಿತು. ಅದೇ ರೀತಿ, ಹಿಟ್ಲರ್ ಮೊಣಕಾಲೂರಿ ಕುಳಿತಿರುವುದನ್ನು ತೋರಿಸುವ ಕೃತಿ $17.2 ಮಿಲಿಯನ್‌ಗೆ ಮಾರಾಟವಾಯಿತು. ಕ್ಯಾಟೆಲನ್ ಕಲೆ ಎಷ್ಟು ವಿಭಿನ್ನವೋ, ಅದರ ಬೆಲೆ ಅಷ್ಟೇ ಹೆಚ್ಚಿರುತ್ತದೆ.

ಡೊನಾಲ್ಡ್ ಟ್ರಂಪ್ ಏಕೆ 'ನೋ' ಅಂದ್ರು?

2016ರಲ್ಲಿ, ಈ ಚಿನ್ನದ ಟಾಯ್ಲೆಟ್‌ನ ಇನ್ನೊಂದು ಆವೃತ್ತಿಯನ್ನು ನ್ಯೂಯಾರ್ಕ್‌ನ ಗುಗೆನ್‌ಹೈಮ್ ಮ್ಯೂಸಿಯಂನಲ್ಲಿ ಸ್ಥಾಪಿಸಲಾಗಿತ್ತು. ಅಲ್ಲಿ ಒಂದು ಲಕ್ಷಕ್ಕೂ ಹೆಚ್ಚು ಜನರು ಇದನ್ನು ನೋಡಲು ಮತ್ತು ಬಳಸಲು ಬಂದಿದ್ದರು. ಜನರಿಗೆ ಮೂರು ನಿಮಿಷಗಳ ಬುಕಿಂಗ್ ನೀಡಿ ಅದನ್ನು ನಿಜವಾಗಿಯೂ ಬಳಸಲು ಅವಕಾಶ ಕಲ್ಪಿಸಲಾಗಿತ್ತು. ನಂತರ ಡೊನಾಲ್ಡ್ ಟ್ರಂಪ್ (donald trump) ವೈಟ್ ಹೌಸ್‌ಗಾಗಿ ವ್ಯಾನ್ ಗೋ ಅವರ ವರ್ಣಚಿತ್ರವನ್ನು ಕೇಳಿದಾಗ, ಗುಗೆನ್‌ಹೈಮ್ ಮ್ಯೂಸಿಯಂ ತಮಾಷೆಯಾಗಿ ಅವರಿಗೆ 'ಅಮೆರಿಕಾ' ಟಾಯ್ಲೆಟ್ ಅನ್ನು ನೀಡಿತು. ಆದರೆ, ಅವರು ಆ ಪ್ರಸ್ತಾಪವನ್ನು ನಿರಾಕರಿಸಿದರು.

ಈ ಟಾಯ್ಲೆಟ್ ಕೇವಲ ಒಂದು ಶಿಲ್ಪವಲ್ಲ!

ಸೋಥೆಬೀಸ್‌ನ ಡೇವಿಡ್ ಗ್ಯಾಲ್ಪಿರಿನ್ ಪ್ರಕಾರ, ಕ್ಯಾಟೆಲನ್ ಅವರ ಬಾಳೆಹಣ್ಣಿನ ಕಲಾಕೃತಿಯಲ್ಲಿ ಯಾವುದೇ ನಿಜವಾದ ಮೌಲ್ಯವಿರಲಿಲ್ಲ; ಅದರ ಮೌಲ್ಯ ಕೇವಲ ಕಲ್ಪನೆಯಲ್ಲಿತ್ತು. ಆದರೆ 'ಅಮೆರಿಕಾ' ಸ್ವತಃ ಚಿನ್ನವನ್ನು ಹೊಂದಿದೆ. ಇದು ಕಲೆಯ ನಿಜವಾದ ಬೆಲೆ ಕಲ್ಪನೆಯಲ್ಲಿ ಇದೆಯೇ ಅಥವಾ ಅದರ ವಸ್ತುವಿನಲ್ಲಿ ಇದೆಯೇ ಎಂಬ ಪ್ರಶ್ನೆಯನ್ನು ಹುಟ್ಟುಹಾಕುತ್ತದೆ. ಅಂದರೆ, ಈ ಟಾಯ್ಲೆಟ್ ಕೇವಲ ಒಂದು ಶಿಲ್ಪವಲ್ಲ, ಬದಲಿಗೆ ಚಿಂತನೆಗೆ ಒಳಪಡಿಸುವ ಪರೀಕ್ಷೆಯಾಗಿದೆ.

ನೋಡಬಹುದು, ಬಳಸುವಂತಿಲ್ಲ!

ಈ ಕಲಾಕೃತಿಯನ್ನು ಈಗ ಸೋಥೆಬೀಸ್‌ನ ಹೊಸ ನ್ಯೂಯಾರ್ಕ್ ಪ್ರಧಾನ ಕಚೇರಿಯಲ್ಲಿ (ಬ್ರೂಯರ್ ಕಟ್ಟಡ) ಇರಿಸಲಾಗುವುದು. ನವೆಂಬರ್ 8ರ ಹರಾಜಿಗೆ ಮುನ್ನ ಸಾರ್ವಜನಿಕರು ಇದನ್ನು ನೋಡಬಹುದು. ಈ ಬಾರಿ ಇದನ್ನು ನಿಜವಾದ ಸ್ನಾನಗೃಹದಲ್ಲಿ ಇರಿಸಲಾಗುತ್ತದೆ. ಆದರೂ, ನಿಯಮ ಸ್ಪಷ್ಟವಾಗಿದೆ. ನೋಡಬಹುದು, ಬಳಸುವಂತಿಲ್ಲ.