ಪಳ ಪಳ ಹೊಳೆಯುವ ಕೆಂಪು ನಾಗರ ನೋಡಿದ್ದೀರಾ..? ವೈರಲ್ ಆಗ್ತಿದೆ ವಿಡಿಯೋ..!

ನಾಗರ ಹಾವುಗಳನ್ನು ಹಿಂದೂ ಧರ್ಮದಲ್ಲಿ ಪೂಜ್ಯನೀಯ ಎಂದು ಪರಿಗಣಿಸಲಾಗಿದೆ. ಪ್ರತಿಯೊಂದು ಊರಿನಲ್ಲೂ ನಾಗರ ದೇವಾಲಯಗಳು, ಗುಡಿಗಳು, ಕಲ್ಲುಗಳನ್ನು ನಾವಿಂದು ಕಾಣಬಹುದು. ಪ್ರಾಚೀನ ಕಾಲದಲ್ಲೂ ನಾಗರ ಹಾವಿಗೆ ಪೂಜೆ ನಡೆಯುತ್ತಿತ್ತು ಎಂಬುದಕ್ಕೆ ಹಲವು ಪುರಾವೆಗಳು ಸಹ ಸಿಕ್ಕಿವೆ.

ಆದ್ರೆ ನಾಗರಹಾವಿನ ಕುರಿತಾಗಿ ಹಲವು ಕಥೆಗಳು, ನಂಬಿಕೆಗಳು ಇಂದಿಗೂ ನಮ್ಮ ನಡುವೆ ಜೀವಂತವಾಗಿವೆ. ಇನ್ನು ನಾಗರ ಹಾವಿನಲ್ಲಿ ನಾವು ಹಲವಾರು ಜಾತಿಯನ್ನು ನೋಡಬಹುದು. ಸಮಾನ್ಯವಾಗಿ ಗಿಡ್ಡ ನಾಗರ, ಕಪ್ಪು ನಾಗರ, ಬಿಳಿ ನಾಗರ ಕಾಳಿಂಗ ಸರ್ಪ, ಹೀಗೆ ಹಲವು ರೀತಿಯ ಜಾತಿಗಳಿವೆ. ಆದ್ರೆ ನೀವೆಂದಾದ್ರು ಕಡು ಕೆಂಪು ಬಣ್ಣದ ನಾಗರ ಹಾವನ್ನೂ ನೋಡಿದ್ದೀರಾ?

ಹೌದು ಇಲ್ಲೊಂದು ವಿಡಿಯೋದಲ್ಲಿ ಕೆಂಪು ಬಣ್ಣದ ನಾಗರಹಾವು ಕಂಡುಬಂದಿದ್ದು ಎಲ್ಲರ ಗಮನ ಸೆಳೆದಿದೆ. ಜೊತೆಗೆ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿದ್ದು, ಈ ಕಡು ಕೆಂಪು ಬಣ್ಣದ ನಾಗರ ಹಾವನ್ನು ಕಂಡ ಜನರು ಅಚ್ಚರಿಗೆ ಒಳಗಾಗಿದ್ದಾರೆ.

ವಿಡಿಯೋದಲ್ಲಿ ಒಬ್ಬ ಹಾವನ್ನು ಹಿಡಿಯುತ್ತಿರುವುದನ್ನು ನಾವು ನೋಡಬಹುದು. ಆದರೆ ಈ ವಿಡಿಯೋ ಯಾವಾಗ ಮತ್ತು ಯಾವ ಸ್ಥಳದಲ್ಲಿ ಚಿತ್ರಿಸಲಾಗಿದೆ ಎಂಬುದು ಸ್ಪಷ್ಟವಾಗಿಲ್ಲ. ಆದರೆ ಆತ ಹಾವನ್ನು ಎಳೆದು ಹೊರಗೆ ತೆಗೆದಾಗ ಅದು ಸುಂದರ ಕೆಂಪು ಬಣ್ಣದಲ್ಲಿರುವುದು ಕಂಡುಬರುತ್ತದೆ. ನೋಡಲು ಒಮ್ಮೆ ಅಚ್ಚರಿಯಾದರು ಕೆಂಪು ಬಣ್ಣದ ಹಾವು ಬಲು ಅಪರೂಪವಾಗಿದೆ.

ಆ ನಾಗರ ಹಾವು ಹೆಡೆ ಬಿಚ್ಚಿ ಮುಂದಕ್ಕೆ ಸಾಗಲು ಯತ್ನಿಸುತ್ತಿರುವುದು ಸಹ ಕಂಡುಬರುತ್ತದೆ. ಆದರೆ ಆತ ಆ ಕೆಂಪು ಹಾವನ್ನು ಹಿಡಿದು ರಕ್ಷಿಸಿದ್ದಾನೆ. ವಿಡಿಯೋದ ಮೇಲೆ ಸಹ ಹಾವನ್ನು ಹಿಡಿದು ರಕ್ಷಿಸಲಾಗಿದೆ ಎಂದು ಬರೆಯಲಾಗಿದೆ. ಆದ್ರೆ ಈ ವಿಡಿಯೋ ಹಲವರು ಹುಬ್ಬೇರುವಂತೆ ಮಾಡಿದೆ.

ಹಾವಿಗೆ ಕೆಂಪು ಬಣ್ಣ ಬಳಿದರೆ?

ಇತ್ತೀಚಿಗೆ ಸಾಮಾಜಿಕ ಜಾಲತಾಣಗಳಲ್ಲಿ ಜನರು ಲೈಕ್ಸ್ ಮತ್ತು ವೀವ್ಸ್‌ಗಾಗಿ ಎಂತಹ ಹುಚ್ಚುತನಕ್ಕೆ ಬೇಕಾದರು ಕೈ ಹಾಕುತ್ತಿದ್ದಾರೆ. ಕೆಲವರಂತು ಜೀವಕ್ಕೆ ಹಾನಿ ಮಾಡಿಕೊಳ್ಳಬಹುದಾದ ಕೆಲಸಕ್ಕೂ ಮುಂದಾಗಿ ಅನಾಹುತ ಮಾಡಿಕೊಳ್ಳುತ್ತಾರೆ. ಈ ಕೆಂಪು ನಾಗರದ ವಿಚಾರದಲ್ಲೂ ಈಗ ಇಂತಹ ಪ್ರಶ್ನೆಗಳು ಎದ್ದಿವೆ.

ಹಲ್ಲು ಕಿತ್ತಿರುವ ವಿಷವಲ್ಲದ ಹಾವಿಗೆ ಇವರು ಕೆಂಪು ಬಣ್ಣವನ್ನು ಹಚ್ಚಿ ವಿಡಿಯೋ ವೈರಲ್ ಆಗುವಂತೆ ಮಾಡಿದ್ದಾರೆ ಎಂದು ನೆಟ್ಟಿಗರು ಆರೋಪಿಸಿದ್ದಾರೆ. ಒಂದು ವೇಳೆ ಕೆಂಪು ನಾಗರ ಇದ್ದರೆ ಇದಕ್ಕೂ ಮೊದಲು ಎಲ್ಲಿಯಾದರು ಕಂಡುಬರಬೇಕಿತ್ತು. ಇದೇ ಮೊದಲು ಸಿಕ್ಕಿದ್ದರೂ ಆತ ಅದನ್ನು ಹಿಡಿಯುವ ಮುನ್ನ ಎಚ್ಚರಿಕೆ ತೆಗೆದುಕೊಳ್ಳುತ್ತಿದ್ದ. ಆದರೆ ಅನಾಯಾಸವಾಗಿ ಸಾಮಾನ್ಯ ಹಾವು ಹಿಡಿದಂತೆ ಅದನ್ನು ಹಿಡಿದಿರುವುದು ಅನುಮಾನಕ್ಕೆ ಕಾರಣವಾಗಿದೆ ಎಂಬುದು ನೆಟ್ಟಿಗರ ವಾದ.

ದಕ್ಷಿಣ ಆಫ್ರಿಕಾ ಹಾಗೂ ಆಫ್ರಿಕಾ ಖಂಡದಲ್ಲಿ ನಾವು ಹಳದಿ ಬಣ್ಣದ ನಾಗರ ಹಾವನ್ನು ಕಾಣಬಹುದಾಗಿದೆ. ಅತ್ಯಂತ ವಿಷಕಾರಿ ಹಾವಾದ ಈ ಹಳದಿ ನಾಗರ ಆಫ್ರಿಕಾದಲ್ಲಿ ಮಾತ್ರ ಕಂಡುಬರುತ್ತವೆ. ಇದನ್ನು ಕೇಪ್ ಕೋಬ್ರಾ ಅಂತಲೂ ಅವರು ಕರೆಯುತ್ತಾರೆ. ಹೆಚ್ಚಾಗಿ ಹುಲ್ಲುಗಾವಲು ಮತ್ತು ಒಂ ಪ್ರದೇಶದಲ್ಲಿ ಇವು ಕಂಡುಬರುತ್ತದೆ. ಆದರೆ ಭಾರತದಲ್ಲಿ ಕಾಣಸಿಗುವ ಹಾವುಗಳು ಕಂದು ಇಲ್ಲವೆ ಬೂದು ಬಣ್ಣದ್ದಾಗಿವೆ. ಕಾಳಿಂಗ ಸರ್ಪವನ್ನು ಹೊರತುಪಡಿಸಿ ಉಳಿದ ನಾಗರಹಾವುಗಳು ಹೆಚ್ಚು ದೊಡ್ಡದಾಗಿರುವುದಿಲ್ಲ. ಅಲ್ಲದೆ ಒಂದೇ ಬಣ್ಣದಲ್ಲಿರುತ್ತವೆ.

ಹೀಗಾಗಿ ಈ ವಿಡಿಯೋದಲ್ಲಿ ಕಂಡುಬಂದಿರುವ ಕೆಂಪು ನಾಗರದ ಕುರಿತು ಹಲವು ಅನುಮಾನಗಳು ಮೂಡಿವೆ. ಆದರೆ ಉರಗ ತಜ್ಞರು ಈ ಕುರಿತು ಮುಂದಿನ ದಿನಗಳಲ್ಲಿ ಮಾಹಿತಿ ನೀಡುವ ಮೂಲಕ ಜನರಲ್ಲಿರುವ ಕುತೂಹಲಕ್ಕೆ ತೆರೆ ಎಳೆಯಬೇಕಿದೆ.