Raksha Bandhan 2025: ರಕ್ಷಾ ಬಂಧನ ಯಾವಾಗ? ಆಗಸ್ಟ್ 8 ಅಥವಾ 9? ರಾಖಿ ಕಟ್ಟೋಕೆ ಇದು ಶುಭ ಸಮಯ

ರಕ್ಷಾ ಬಂಧನವು ಸಹೋದರ ಮತ್ತು ಸಹೋದರಿಯರ ನಡುವಿನ ಅಚಲವಾದ ಪ್ರೀತಿ, ವಿಶ್ವಾಸ ಮತ್ತು ವಾತ್ಸಲ್ಯದ ಹಬ್ಬ. ಶ್ರಾವಣ ಮಾಸದಲ್ಲಿ ಆಚರಿಸಲಾಗುವ ಪ್ರಮುಖ ಹಬ್ಬಗಳಲ್ಲಿ ರಕ್ಷಾ ಬಂಧನ (Raksha Bandhan) ಅಥವಾ ರಾಖಿ ಹಬ್ಬ (Rakhi) ಕೂಡ ಒಂದು. ಈ ದಿನದಂದು ಸಹೋದರಿಯರು ತಮ್ಮ ಸಹೋದರರ ಕೈಗೆ ರಾಖಿಯನ್ನು ಕಟ್ಟಿ, ಅವರು ದೀರ್ಘಾಯುಷ್ಯ ಮತ್ತು ಸಂತೋಷದ ಜೀವನ ಸಿಗಲಿ ಎಂದು ಹಾರೈಸುತ್ತಾರೆ. ಪ್ರತಿಯೊಬ್ಬ ಸಹೋದರಿಯೂ ಈ ದಿನಕ್ಕಾಗಿ ಕಾತರದಿಂದ ಕಾಯುತ್ತಾಳೆ. 2025ರಲ್ಲಿಯೂ ಸಹ ಈ ರಕ್ಷಾ ಬಂಧನವು (Raksha Bandhan 2025) ಸಂತೋಷವನ್ನು ತರಲಿದೆ. ಆದರೆ, ರಾಖಿ ಹಬ್ಬದ ದಿನಾಂಕದ ಬಗ್ಗೆ ಹಲವರಿಗೆ ಗೊಂದಲವಿದೆ.

ಹೌದು, ಆಗಸ್ಟ್ 8 ರಂದು ರಕ್ಷಾ ಬಂಧನ ಎಂದು ಕೆಲವರು ಹೇಳುತ್ತಿದ್ದಾರೆ. ಮತ್ತೆ ಕೆಲವರು ಆಗಸ್ಟ್ 9 ರಂದು ಎಂದು ಹೇಳುತ್ತಿದ್ದಾರೆ. ಅನೇಕ ಪಂಚಾಂಗಗಳಲ್ಲಿ ಆಗಸ್ಟ್ 8 ಮತ್ತು 9 ರಂದು ರಕ್ಷಾಬಂಧನವನ್ನು ಆಚರಿಸುವ ಬಗ್ಗೆ ಗೊಂದಲಗಳಿವೆ. ಹಾಗಾಗಿ, ರಾಖಿಯನ್ನು ಕಟ್ಟಲು ಸರಿಯಾದ ಮುಹೂರ್ತ ಮತ್ತು ದಿನವನ್ನು ತಿಳಿದುಕೊಳ್ಳುವುದು ಬಹಳ ಮುಖ್ಯ. ಸಹೋದರಿಯರು ತಮ್ಮ ಸಹೋದರರಿಗೆ ಶುಭ ಸಮಯದಲ್ಲಿ ರಕ್ಷಾ ಸೂತ್ರವನ್ನು ಕಟ್ಟಬಹುದು. ಸಹೋದರಿಯ ಬಾಂಧವ್ಯ ಬೆಸೆಯುವ ರಕ್ಷಾ ಬಂಧನ ಹಬ್ಬವನ್ನು 2025ರಲ್ಲಿ ಯಾವ ದಿನ ಆಚರಿಸಲಾಗುವುದು? ರಕ್ಷಾ ಬಂಧನ ಆಚರಿಸುವುದು ಹೇಗೆ? ಈ ಹಬ್ಬದ ಮಹತ್ವದ ಬಗ್ಗೆ ಇಲ್ಲಿವೆ ಮಾಹಿತಿ.

ರಕ್ಷಾ ಬಂಧನ ಯಾವಾಗ?

2025 ರಲ್ಲಿ ರಕ್ಷಾ ಬಂಧನವನ್ನು ಆಗಸ್ಟ್ 9 ರಂದು ಆಚರಿಸಲಾಗುತ್ತದೆ. ಪ್ರತಿ ವರ್ಷ ರಕ್ಷಾಬಂಧನದಂದು ಭದ್ರಾ ಕಾಲ ಇರುತ್ತದೆ. ಆದರೆ, ಈ ವರ್ಷ ಹಾಗೇನೂ ಇಲ್ಲ. ಈ ವರ್ಷ ಭದ್ರಾ ಕಾಲವು ಒಂದು ದಿನ ಮುಂಚಿತವಾಗಿ ಅಂದರೆ ಆಗಸ್ಟ್ 8 ರಂದು ಮಧ್ಯಾಹ್ನ 2.12ಕ್ಕೆ ಪ್ರಾರಂಭವಾಗಿ ಆಗಸ್ಟ್ 9 ರಂದು ಬೆಳಗ್ಗೆ 1.52ಕ್ಕೆ ಕೊನೆಗೊಳ್ಳುತ್ತದೆ. ಇದರಿಂದಾಗಿ ಆಗಸ್ಟ್ 9 ರಂದು ಭದ್ರಾ ಕಾಲದ ಭಯ ಇರುವುದಿಲ್ಲ.

ರಾಖಿ ಕಟ್ಟಲು ಶುಭ ಮುಹೂರ್ತ

2025 ರಲ್ಲಿ ರಕ್ಷಾ ಬಂಧನದ ದಿನದಂದು ಭದ್ರಾ ಕಾಲ ಇರುವುದಿಲ್ಲ. ಆದರೆ, ರಾಖಿ ಕಟ್ಟಲು ಒಂದು ಶುಭ ಸಮಯ ಇರುತ್ತದೆ. ಆಗಸ್ಟ್ 9 ರಂದು ನಿಮ್ಮ ಸಹೋದರನಿಗೆ ಬೆಳಗ್ಗೆ 5.35 ರಿಂದ ಮಧ್ಯಾಹ್ನ 1.24ರ ಒಳಗಿನ ಶುಭ ಮುಹೂರ್ತದಲ್ಲಿ ರಾಖಿ ಕಟ್ಟಬಹುದು. ರಾಖಿ ಕಟ್ಟುವ ಅಭಿಜಿತ್ ಮುಹೂರ್ತವು ಮಧ್ಯಾಹ್ನ 12.00 ಗಂಟೆಯಿಂದ 12.53 ರವರೆಗೆ ಇರುತ್ತದೆ. ಈ ಸಮಯದಲ್ಲಿ ರಾಖಿ ಕಟ್ಟುವುದು ಬಹಳ ಶುಭ ಎಂದು ಪರಿಗಣಿಸಲಾಗುತ್ತದೆ.

ಭದ್ರಾ ಕಾಲ ಯಾವಾಗ?

ಈ ವರ್ಷ ಭದ್ರಾ ಕಾಲವು ಆಗಸ್ಟ್ 8 ರಂದು ಇರುತ್ತದೆ ಮತ್ತು ಆಗಸ್ಟ್ 9ರ ಬೆಳಗ್ಗೆ ಮುಕ್ತಾಯವಾಗುತ್ತದೆ. ಆದ್ದರಿಂದ, ಆಗಸ್ಟ್ 9 ರಂದು ಇಡೀ ದಿನ ರಾಖಿ ಕಟ್ಟಲು ಶುಭವಾಗಿರುತ್ತದೆ. ಅದರಲ್ಲೂ ವಿಶೇಷವಾಗಿ ಮಧ್ಯಾಹ್ನದ ಸಮಯದಲ್ಲಿ ರಾಖಿ ಕಟ್ಟುವುದು ಒಳ್ಳೆಯದು.

ಶುಭ ಮುಹೂರ್ತವನ್ನು ಏಕೆ ನೋಡಬೇಕು?

ಪ್ರತಿಯೊಬ್ಬರೂ ರಾಖಿ ಕಟ್ಟಲು ಶುಭ ಮುಹೂರ್ತವನ್ನು ನೋಡುತ್ತಾರೆ. ರಾಖಿ ಒಂದು ಧಾರ್ಮಿಕ ಸಂಪ್ರದಾಯವಾಗಿದೆ. ಇದನ್ನು ಭದ್ರಾ ಕಾಲ ಅಥವಾ ಅಶುಭ ಸಮಯದಲ್ಲಿ ಕಟ್ಟಿದರೆ, ಅದರ ಪುಣ್ಯ ಫಲ ಕಡಿಮೆಯಾಗುತ್ತದೆ. ಶುಭ ಮುಹೂರ್ತದಲ್ಲಿ ರಾಖಿ ಕಟ್ಟುವುದರಿಂದ ಸಹೋದರನ ಆಯಸ್ಸು ಹೆಚ್ಚಾಗುತ್ತದೆ. ಇದಲ್ಲದೆ, ಸಹೋದರ ಸಹೋದರಿಯರ ಸಂಬಂಧದಲ್ಲಿ ಮಾಧುರ್ಯ ಉಳಿಯುತ್ತದೆ.

ಎಷ್ಟು ದಿನ ರಾಖಿ ಧರಿಸಬೇಕು?

ಇದಕ್ಕೆ ಯಾವುದೇ ಕಟ್ಟುನಿಟ್ಟಾದ ನಿಯಮವಿಲ್ಲ. ಸಾಂಪ್ರದಾಯಿಕವಾಗಿ, ರಾಖಿಯನ್ನು 24 ಗಂಟೆಗಳ ನಂತರ ಅಥವಾ ಕೃಷ್ಣ ಜನ್ಮಾಷ್ಟಮಿಯಂದು ತೆಗೆಯಬಹುದು. ಈ ದಿನ ಭಗವಾನ್ ಕೃಷ್ಣನ ಜನ್ಮದಿನವಾಗಿದ್ದು, ಇದು ಶೀಘ್ರದಲ್ಲೇ ಬರುತ್ತದೆ. ಗೌರವ ಅಥವಾ ವಾತ್ಸಲ್ಯದ ಸಂಕೇತವಾಗಿ ಕೆಲವರು ಅದು ತನ್ನಿಂತಾನೇ ಕಳಚಿ ಬೀಳುವವರೆಗೆ ಅದನ್ನು ಧರಿಸಲು ಬಯಸುತ್ತಾರೆ.

ಒಟ್ಟಾರೆ, ರಕ್ಷಾಬಂಧನವು ಭಾರತೀಯ ಸಂಸ್ಕೃತಿಯಲ್ಲಿ ಸಹೋದರ ಮತ್ತು ಸಹೋದರಿಯರ ಬಾಂಧವ್ಯವನ್ನು ಗಟ್ಟಿಗೊಳಿಸುವ ಒಂದು ಸುಂದರ ಆಚರಣೆಯಾಗಿದೆ. ಈ ಹಬ್ಬವು ಪ್ರೀತಿ, ವಿಶ್ವಾಸ ಮತ್ತು ರಕ್ಷಣೆಯ ಸಂಕೇತವಾಗಿದೆ.