ಮಾನವರೂಪಿ ಮುಖ ಹೊಂದಿದ ರಹಸ್ಯಮಯ ಬೆಕ್ಕು ಪತ್ತೆ! ಇದು ನಿಜವೇ?

ಈ ವಿಡಿಯೋ ವೈರಲ್ ಆಗಿಬಿಟ್ಟಿದೆ

ಇಂತಹ ವಿಚಿತ್ರವಾದುದೇನಾದರೂ ಕಂಡುಬಂದರೆ ನಮ್ಮಲ್ಲಿ ಹೆಚ್ಚಿನವರಿಗೆ ಇನ್ನಿಲ್ಲದ ಕುತೂಹಲ. ಈ ಕುತೂಹಲವೇ ಈ ಬೆಕ್ಕಿನ ವಿಡಿಯೋವನ್ನು ಜಗತ್ತಿನಾದ್ಯಂತ ಕ್ಷಿಪ್ರವಾಗಿ ಹರಡಲು ನೆರವಾಗಿದೆ. ಈ ವಿಡಿಯೋವನ್ನು ಮಲೇಶಿಯಾದ ಪಶ್ಚಿಮ ಭಾಗದಲ್ಲಿರುವ ಪಹಾಂಗ್ ಎಂಬಲ್ಲಿನ ಅಜ್ಞಾತ ಸ್ಥಳವೊಂದರಲ್ಲಿ ಚಿತ್ರೀಕರಿಸಲಾಗಿದೆ ಎಂದು ಹೇಳಲಾಗುತ್ತದೆ.

ಈ ವಿಡಿಯೋದಲ್ಲಿ ಏನನ್ನು ತೋರಿಸಲಾಗಿದೆ?

ಮೂಲಗಳ ಪ್ರಕಾರ ಈ ವೀಡಿಯೋದಲ್ಲಿ ವಿರಳ ತಲೆಗೂದಲಿರುವ, ಗುಲಾಬಿ ಬಣ್ಣದ ಚರ್ಮದ, ನಾಲ್ಕು ಕಾಲಿನ, ಬಾಲವುಳ್ಳ, ಆದರೆ ಮುಖ ಮಾನವರನ್ನು ಹೋಲುವ ಮತ್ತು ಎರಡು ಪ್ರಮುಖ ಕೋರೆಹಲ್ಲುಗಳು ತುಟಿಯಿಂದ ಹೊರಚಾಚಿರುವ ಜೀವಿಯನ್ನು ಚಿತ್ರಿಸಲಾಗಿದೆ. ಎರಡು ಬೆರಳುಗಳಷ್ಟೇ ಉದ್ದವಿರುವ ಶರೀರದ ಕಾಲುಗಳ ತುದಿಯಲ್ಲಿ ಚೂಪಾದ ಉಗುರುಗಳಿವೆ.

ಈ ಜೀವಿಯ ವಾಸ್ತವ

ಈ ವಿಡಿಯೋವನ್ನು ಕಂಡ ಜನರು ಇದನ್ನು ನಿಜವೆಂದು ನಂಬುತ್ತಿದ್ದು ಮುಂದೆ ಬರಲಿರುವ ಯಾವುದೋ ಆಪತ್ತಿನ ಸಂಕೇತವೆಂಬಂತೆ ಭಯಭೀತರಾಗುತ್ತಿದ್ದಾರೆ. ಆದರೆ ತಜ್ಞರು ನೀಡಿರುವ ವಿವರಣೆಯ ಪ್ರಕಾರ ಇದು ನಿಜವಾದ ಜೀವಿಯಲ್ಲ, ಬದಲಿಗೆ ಸಿಲಿಕಾನ್ ಮೂಲವಸ್ತುವನ್ನು ಬಳಸಿ ನಿರ್ಮಿಸಲಾದ ಗೊಂಬೆಯಾಗಿದ್ದು ಆನ್ಲೈನ್ ನಲ್ಲಿ ಮಾರಾಟಕ್ಕೂ ಲಭ್ಯವಿದೆ.

ಇದು ದೊಡ್ಡ ಸುಳ್ಳು!

ಯಾವಾಗ ಇದು ಸುಳ್ಳು ಎಂದು ತಜ್ಞರು ಸ್ಪಷ್ಟಪಡಿಸಿದರೋ ಆಗ ಇದಕ್ಕೂ ಹಿಂದೆ ಇದೇ ರೀತಿಯ ಸುಳ್ಳುಗಳಿಗೆ ಬೇಸ್ತು ಬಿದ್ದಿರುವ ನೂರಾರು ಸಂಗತಿಗಳು ಬೆಳಕಿಗೆ ಬಂದಿವೆ. ಇದಕ್ಕೂ ಮುನ್ನ ಭಾರತದ ಹಳ್ಳಿಯೊಂದರಲ್ಲಿ ಮಾನವ ಮುಖದ ಕುರಿಮರಿಯೊಂದು ಜನಿಸಿದ್ದು ಸಹಾ ದೊಡ್ಡ ಸುದ್ದಿ ಮಾಡಿತ್ತು.

ನಿರ್ಣಯ

ಈ ವರದಿಯ ಸತ್ಯಾಸತ್ಯತೆಯನ್ನು ಕಂಡುಕೊಳ್ಳಲು ಮಲೇಶಿಯಾ ಪೋಲೀಸ್ ಇಲಾಖೆಯೂ ತನಿಖೆ ನಡೆಸಿದ್ದು ಯಾವುದೇ ಸಾಕ್ಷ್ಯವಾಗಲೀ, ಜೀವಿಯಾಗಲೀ ಕಂಡುಬರದೇ ಇದ್ದ ಕಾರಣ ಇದೊಂದು ಊಹಾಪೋಹದ ಸುಳ್ಳು ಎಂದು ಡೇಲಿಮೇಲ್ ವರದಿ ಮಾಡಿದೆ. ಸರ್ಕಾರದ ಕಡೆಯಿಂದಲೂ ಇಂತಹ ಸುಳ್ಳು ಸುದ್ದಿ ಹಾಗೂ ಊಹಾಪೋಹಗಳನ್ನು ಹರಡದಿರುವಂತೆ ಮನವಿಗಳು ಪ್ರಕಟಗೊಂಡಿವೆ. ವಾಸ್ತವವಾಗಿ ಸುಮ್ಮನೇ ಸುಳ್ಳು ಸುದ್ದಿಯೊಂದನ್ನು ಅಂತರ್ಜಾಲದಲ್ಲಿ ಹಾಕಿ

ಎಲ್ಲೆಡೆ ಪಸರಿರುವಂತೆ ಮಾಡಿ ತಮಾಷೆ ನೋಡುವ ಕಿಡಿಗೇಡಿಗಳ ಕುತಂತ್ರವೇ ಹೊರತು ಇನ್ನೇನಿಲ್ಲ ಎಂದು ಸ್ಪಷ್ಟಪಡಿಸಿದೆ. ಇದು ಕೇವಲ ಮಲೇಶಿಯನ್ನರಿಗೆ ಮಾತ್ರವಲ್ಲ, ಜಗತ್ತಿನ ಎಲ್ಲರಿಗೂ ಅನ್ವಯಿಸುತ್ತದೆ. ಕೆಟ್ಟ ಕುತೂಹಲದಿಂದ ಯಾವುದೇ ಸುದ್ದಿಯ ಸತ್ಯಾಸತ್ಯತೆಗಳನ್ನು ಕಂಡುಕೊಳ್ಳದೇ ನೇರವಾಗಿ ಇನ್ನೊಬ್ಬರಿಗೆ ದಾಟಿಸಿ ನಮ್ಮ ಬೆನ್ನನ್ನು ನಾವೇ ತಟ್ಟಿಕೊಳ್ಳುವ ಬಯಕೆಯೇ ಈ ಪರಿಯ ತೊಂದರೆಗೆ ಮೂಲವಾಗಿದೆ. ಈ ಬಗ್ಗೆ ನಿಮ್ಮ ಅನಿಸಿಕೆಗಳನ್ನು ಕೆಳಗಿನ ಕಮೆಂಟ್ಸ್ ಭಾಗದಲ್ಲಿ ಬರೆದು ತಿಳಿಸಿ.

All images Source: Asiawire.com