ಈ ಜೈಲಿನಲ್ಲಿರುವವರು ಖೈದಿಗಳಾಗಿದ್ದರೂ ಸಿಗುವುದು 'ರಾಜ ಮರ್ಯಾದೆ'!

ಜೈಲಿನ ಇತಿಹಾಸ

ನಾರ್ವೆಯಲ್ಲಿರುವ ಈ ಜೈಲಿನಲ್ಲಿ ಮೊದಲು ಕ್ರೂರ ರೀತಿಯ ಶಿಕ್ಷೆ ನೀಡಲಾಗುತ್ತಿತ್ತು. ನಿರಾಶ್ರಿತ ಅಪರಾಧಿಗಳು, ತಂದೆತಾಯಿಗಳ ನಿರ್ಲಕ್ಷಕ್ಕೆ ಒಳಗಾದ ಖೈದಿಗಳು ಮತ್ತು ಬಡತನಕ್ಕೆ ಸೋತು ಬಂದ ಅಪರಾಧಿಗಳಿಗೆ ನರಕ ತಾಣವಾಗಿತ್ತು.

ಜೈಲಿನ ಕಥೆ

1915ರ ವೇಳೆಯಲ್ಲಿ ಇಲ್ಲಿ ಬಂಧಿತರಾದ ಅಪರಾಧಿಗಳು ಶಿಕ್ಷೆಯನ್ನು ಸಹಿಸಲಾಗದೇ ದಂಗೆಗೇಳುವುದು ಮತ್ತು ತಪ್ಪಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದರು. ದ್ವೀಪ ಪ್ರದೇಶದಲ್ಲಿದ್ದ ಈ ಜೈಲಿಗೆ ಮಿಲಿಟರಿ ಕಾವಲನ್ನು ಸಹ ನೀಡಲಾಗಿತ್ತು. 1953ರಲ್ಲಿ ಮಹಿಳೆಯರಿಗಾಗಿ ಇದ್ದ ಜೈಲನ್ನು ಮುಚ್ಚಲಾಯಿತು. 1970ರಲ್ಲಿ ಆ ಪ್ರದೇಶವನ್ನು ಸರ್ಕಾರ ವಶಕ್ಕೆ ಪಡೆದುಕೊಂಡಿತು.

ಮರು ಸ್ಥಾಪನೆ

1982ರಲ್ಲಿ ಜೈಲಿನ ಮರು ಸ್ಥಾಪನೆಯಾಯಿತು. ಸುಮಾರು 115 ಅಪರಾಧಿಗಳನ್ನು ಹೊಂದಿರುವ ಈ ಜೈಲು ವಿಶ್ವದ ಅತ್ಯಂತ ಉದಾರವಾದ ಕಾರಾಗೃಹ ಎಂದು ಗುರುತಿಸಲಾಯಿತು.

ಸೆರೆಮನೆಯ ವಿಶೇಷತೆ

ಇಲ್ಲಿ ಅಪರಾಧಿಗಳಿಗಾಗಿ ಟಿವಿ, ಅಡುಗೆ ಮನೆ, ಹಾಲ್, ಖಾಸಗಿ ಬೆಡ್‍ರೂಮ್‍ಗಳ ವ್ಯವಸ್ಥೆಯಿದೆ. ಮನೆಯ ಕೆಲಸವನ್ನು ಪ್ರತಿಯೊಬ್ಬರು ಬೆಳಗ್ಗೆ 8.30 ರಿಂದ 3.30ರ ವರೆಗೆ ಮಾಡಬೇಕು.

ವಿಶೇಷ ಚಟುವಟಿಕೆಗಳು

ಬಿಡುವಿನ ಸಮಯದಲ್ಲಿ ಖೈದಿಗಳು ತಮಗಿಷ್ಟವಾಗುವ ಕುದುರೆ ಸವಾರಿ, ಮೀನು ಹಿಡಿಯುವುದು, ಟೆನ್ನಿಸ್ ಆಟ, ಸಮುದ್ರ ತೀರದಲ್ಲಿ ಓಡಾಡುವುದು ಮತ್ತು ಈಜುವ ಕೆಲಸವನ್ನು ಮಾಡಬಹುದು.

ಮೇಲ್ವಿಚಾರಣಾ ಸಿಬ್ಬಂದಿಗಳು

ಈ ಜೈಲಿನಲ್ಲಿ ಅಪರಾಧಿಗಳನ್ನು ಕಾಯಲು ಕೇವಲ 5 ಸಿಬ್ಬಂದಿಗಳಿದ್ದಾರೆ. ಈ ಖೈದಿಗಳಿಗೆ ಯಾವುದೇ ಸಮವಸ್ತ್ರಗಳಿಲ್ಲ. ಇವರು ದ್ವೀಪದೆಲ್ಲೆಡೆಯೂ ಓಡಾಡುತ್ತಾರೆ.

ವಿಚಿತ್ರವಾದ ಸಂಗತಿ

ಇಲ್ಲಿ ಅಪರಾಧಿಗಳಿಗೆ ಒಳ್ಳೆಯ ಸೌಲಭ್ಯ ಹಾಗೂ ಚಿಕಿತ್ಸೆಯನ್ನು ನೀಡುತ್ತಿದೆಯಾದರೂ ಅಪರಾಧಿಗಳ ಸಂಖ್ಯೆ ಗಣನೀಯವಾಗಿ ಇಳಿಕೆಯಾಗಿವೆ. ಮೊದಲು ಶೇ.70 ರಷ್ಟಿದ್ದ ಅಪರಾಧಗಳು ಶೇ. 16ಕ್ಕೆ ಇಳಿದಿದೆ. ಕಳೆದ 33 ವರ್ಷಗಳಿಂದ ತೆರೆದುಕೊಂಡಿದ್ದ ಈ ಸೆರೆಮನೆಯಲ್ಲಿ ಕೇವಲ ಒಬ್ಬ ವ್ಯಕ್ತಿ ಮಾತ್ರ ತಪ್ಪಿಸಿಕೊಂಡು ಹೋಗಿರುವುದು ವರದಿಯಾಗಿದೆ. ಒಟ್ಟಿನಲ್ಲಿ ಈ ಸೆರೆಮನೆ ಅದ್ಭುತ ಮತ್ತು ಆಶ್ವರ್ಯವನ್ನು ಸೃಷ್ಟಿಸುತ್ತದೆ.