ಯಾರೇ ಕೂಗಾಡಲಿ, ಆದರೆ ನಾವು ಮಾತ್ರ ಇರುವುದೇ ಹೀಗೆ!

ಬೈಕಿನ ಮೇಲೇ ಸಂತೆ

ಏನು ಮಾಡುವುದು ಸಂತೆಗೆ ತರಕಾರಿ ಹಾಕಲು ರಿಕ್ಷಾದಲ್ಲಿ ಹೋದರೆ ಐನೂರು ರೂಪಾಯಿ ಕೊಡಬೇಕು. ಐನೂರು ರೂಪಾಯಿ ಉಳಿಸಬೇಕೆಂದರೆ ಕೊಂಚ ರಿಸ್ಕ್ ತೆಗೆದುಕೊಳ್ಳಬೇಕಲ್ಲಾ. ಹಾಗಾಗಿ ಪೋಲೀಸ್ ಇಲ್ಲದ ಹೊತ್ತಿನಲ್ಲಿ ಬೈಕಿನಲ್ಲಿಯೇ ಕೊಂಡು ಹೋದರಾಯಿತು, ಹಿಂದೆ ಕುಳಿತವಳು ಕೊಂಚ ಗಟ್ಟಿ ಹಿಡಿದುಕೊಂಡರೆ ಸಾಕು.

ಅಯ್ಯೋ, ಸಾಕಾಪ್ಪಾ ಎನ್ನುತ್ತಿದೆಯೇ ರೈಲು?

ಒಂದು ಬಸ್ಸಿನಲ್ಲಿ ಎಷ್ಟು ಜನರು ಹತ್ತಬಹುದು? ಬಸ್ಸಿನ ತೂಕ ತಾಳಿಕೊಳ್ಳುವ ಕ್ಷಮತೆ ಹತ್ತು ಟನ್. ಓರ್ವ ವ್ಯಕ್ತಿಯ ಸರಾಸರಿ ತೂಕ ಅರವತ್ತು ಕೇಜಿ ಇದೆ ಎಂದರೂ ನೂರು ಜನರು ಹತ್ತಿದರೂ ಆರು ಟನ್ ಆಗಬಹುದು. ಹಾಗಾದರೆ ರೈಲು? ಇದಕ್ಕೆ ಇಷ್ಟೇ ತೂಕ ಹಾಕಬೇಕೆಂದು ಯಾವುದೇ ಮಾನದಂಡ ಇದ್ದಂತಿಲ್ಲ, ಇದ್ದರೂ ಇದನ್ನು ಹತ್ತುವವರಿಗೆ ಇದರ ಬಗ್ಗೆ ಯಾವುದೇ ಕಾಳಜಿ ಇಲ್ಲ. ಒಟ್ಟಾರೆ ರೈಲು ಎಷ್ಟೇ ಭರ್ತಿಯಾಗಿರಲಿ, ನಾನೊಬ್ಬ, ನಾನೊಬ್ಬ ಎಂದು ಎಲ್ಲರೂ ರೈಲು ಹತ್ತುವವರೇ. ಪಾಪ ರೈಲಿನ ಗೋಳನ್ನು ಕೇಳುವವರೇ ಇಲ್ಲ. ಹಾಗಿದ್ದಾಗ ಇಷ್ಟು ಜನರಿಗೆ ಟಿಕೆಟ್ ಏಕೆ ಕೊಟ್ಟರು?

ಉಗಿಯಬೇಡಿ ಎಂದಿರುವಲ್ಲೇ ಉಗಿಯುವುದು ನಮ್ಮ ಜಾಯಮಾನ

ಉತ್ತರ ಭಾರತದ ರೈಲ್ವೇಸ್ಟೇಷನ್‌ಗಳಲ್ಲಿ ಯಾವುದೇ ಮೂಲೆ ನೋಡಬೇಡಿ ಎಂದು ಅಲ್ಲಿಂದ ಬಂದವರು ತಿಳಿಸುತ್ತಾರೆ. ಏಕೆಂದರೆ ಭಾರತೀಯರ ನೆಚ್ಚಿನ ಪಾನ್ ಜಗಿದ ಬಳಿಕ ಇದನ್ನು ಉಗಿಯಲು ಮೂಲೆಗಳೇ ಶ್ರೇಷ್ಠ ಸ್ಥಳ. ಇಲ್ಲಿ ಉಗಿಯಬೇಡಿ ಎಂದು ಬರೆದಿದ್ದರೂ ಅಲ್ಲಿಯೇ ಉಗಿಯುವುದು ಭಾರತೀಯರ ಭಂಡಧೈರ್ಯದ ಸ್ಪಷ್ಟ ನಿದರ್ಶನವಾಗಿದೆ.

ಸಿಲಿಂಡರ್ ಮ್ಯಾನ್!

ಗ್ಯಾಸ್ ಸಿಲಿಂಡರುಗಳನ್ನು ನೇರವಾಗಿಯೇ ಇರಿಸಬೇಕು, ನಿಗದಿತ ವಾಹನಗಳಲ್ಲೇ ಸಾಗಿಸಬೇಕು ಎಂದೆಲ್ಲಾ ಭಾರತದಲ್ಲಿ ಕಾನೂನಿದೆ. ಆದರೆ ಇದಕ್ಕೆಲ್ಲಾ ತುಂಬಾ ಖರ್ಚಾಗುತ್ತದಲ್ಲಾ? ಹಾಗಿದ್ದಾಗ ಹಣ ಉಳಿಸಬೇಕೆಂದರೆ ಅಡ್ಡಾದಿಡ್ಡಿಯಾಗಿ ಸಿಲಿಂಡರುಗಳನ್ನು ಹಳೆಯ ಬಜಾಜ್ ಸ್ಕೂಟರಿನ ಮೇಲೆ ರಾಜಾ ರೋಷವಾಗಿ ಕೊಂಡೊಯ್ಯುತ್ತಿರುವುದನ್ನು ಕಂಡಾಗ ಈತನನ್ನು ಸಿಲಿಂಡರ್ ಮ್ಯಾನ್ ಎಂದು ಕರೆಯದೇ ಇರಲಾಗುವುದಿಲ್ಲ. ಅಂದ ಹಾಗೆ ಸಿಲಿಂಡರ್ ಬ್ಲಾಸ್ಟ್ ಆದರೆ ಈತ ತೊಟ್ಟ ಹೆಲ್ಮೆಟ್ ಜೀವ ರಕ್ಷಿಸುತ್ತದೆಯೇ?

ಫುಟ್ ಪಾತ್‌ಗಳಲ್ಲಿ ಬೈಕುಗಳಿಗೇನು ಕೆಲಸ?

ಫುಟ್ ಪಾತ್‌ ಅಥವಾ ಪಾದಾಚಾರಿಗಳ ರಸ್ತೆ ಕೇವಲ ಪಾದಾಚಾರಿಗಳಿಗೆ ಮಾತ್ರ ಎಂದು ಯಾರು ಹೇಳಿದರು? ಯಾರೂ ನೋಡುತ್ತಿಲ್ಲವೆಂದರೆ ನಮ್ಮ ಬೈಕುಸವಾರರು ಕೆಲವೊಮ್ಮೆ ದೂಡಿಕೊಂಡು, ಕೆಲವೊಮ್ಮೆ ಸವಾರಿ ಮಾಡಿಕೊಂಡು ರಾಜಾರೋಷವಾಗಿ ಕಾನೂನು ಮುರಿಯುತ್ತಾರೆ.

ಟ್ರಾಫಿಕ್ ಜಾಂ? ಇದೆಲ್ಲಾ ನಿಮಗೆ, ನಮಗಲ್ಲ!

ರಸ್ತೆಯ ಇನ್ನೊಂದು ಬದಿ ಬಳಸಿ ಬರಬೇಕೆಂದರೆ ಮುಂದಿನ ಸಿಗ್ನಲ್ ವರೆಗೆ ಹೋಗಿ ಹಸಿರು ದೀಪವಾದ ಬಳಿಕ ಬಳಸಿ ಬರಬೇಕು. ಒಂದು ವೇಳೆ ಅಲ್ಲಿ ಟ್ರಾಫಿಕ್ ಜಾಂ ಆಗಿದ್ದರೆ? ರಸ್ತೆ ಪಕ್ಕಕ್ಕೆ ಮಾತ್ರ ಬರಬೇಕಲ್ಲವೇ? ಇದನ್ನು ತಡೆಯಲೇನಿದೆ? ಎರಡಡಿ ಎತ್ತರದ ಮೋಟು ಗೋಡೆಯಲ್ಲವೇ? ರಸ್ತೆ ದಾಟಬಾರದೆಂದು ಕಾನೂನಿದೆ. ಈ ಗೋಡೆ ದಾಟಬಾರದೆಂದು ಕಾನೂನು ಎಲ್ಲಿದೆ? ಹೀಗೆ ಯೋಚಿಸಿದ ವ್ಯಕ್ತಿ ತನ್ನ ಬೈಕನ್ನು ಹೇಗೆ ಗೋಡೆ ದಾಟಿಸಿ ಕಾನೂನು ಮುರಿಯುತ್ತಿದ್ದಾನೆ ನೋಡಿ.

ಪುರುಷರು ಎಂದಿಗೂ ಪುರುಷರೇ?

ಮಹಿಳೆಯರಿಗೆ ಮೀಸಲಾದ ಆಸನಗಳು ಮಹಿಳೆಯರಿಗೆ ಮಾತ್ರ ಎಂದು ಕಾನೂನಿದೆ. ಆದರೆ ಮಹಿಳೆಯರು ಇಲ್ಲದಿದ್ದಾಗ ಕುಳಿತುಕೊಳ್ಳಬಾರದು ಎಂದು ಎಲ್ಲಿ ಬರೆದಿದೆ? ಈ ವಾದವನ್ನು ಮುಂದಿಟ್ಟು ಪುರುಷರು ಮಹಿಳೆಯರಿಗೆ ಮೀಸಲಾದ ಬಸ್ಸುಗಳಲ್ಲಿ, ಮಹಿಳೆಯರಿಗೆ ಮೀಸಲಾದ ಸೀಟುಗಳಲ್ಲಿಯೇ ರಾಜಾರೋಶವಾಗಿ ಕುಳಿತು ಪಯಣಿಸುತ್ತಿದ್ದಾರೆ. ಎಷ್ಟೆಂದರೂ ಪುರುಷರು ಪುರುಷರೇ!