ಈ ವ್ಯಕ್ತಿಯ ಹೊಟ್ಟೆಯಲ್ಲಿ 263 ನಾಣ್ಯಗಳು, ಸೂಜಿ ಮತ್ತು ಬ್ಲೇಡ್‌ಗಳು ಪತ್ತೆ!!

ರೋಗಿ ಯಾರು?

ಉತ್ತರ ಪ್ರದೇಶದ ಸತ್ನಾ ಜಿಲ್ಲೆಯ ಸೊಹಾವಲ್ ನಲ್ಲಿ ವಾಸಿಸುವ 32ರ ಹರೆಯದ ಮೊಹಮ್ಮದ್ ಮಕ್ಸೂದ್ ಎಂಬಾತನೇ ಈ ವ್ಯಕ್ತಿ. ಹೊಟ್ಟೆಯಲ್ಲಿ ತೀವ್ರ ನೋವು ಕಾಣಿಸಿಕೊಂಡ ಬಳಿಕ ಆತನನ್ನು ಸಂಜಯ್ ಗಾಂಧಿ ಮೆಡಿಕಲ್ ಕಾಲೇಜ್ ಮತ್ತು ಆಸ್ಪತ್ರೆಗೆ ಸೇರಿಸಲಾಯಿತು. ಮೂರು ಗಂಟೆ ದೀರ್ಘ ಕಾಲ ಶಸ್ತ್ರಚಿಕಿತ್ಸೆ ನಡೆಸಿ ಹೊಟ್ಟೆಯಲ್ಲಿದ್ದ ವಸ್ತುಗಳನ್ನು ತೆಗೆಯಲಾಯಿತು.

ಹೊಟ್ಟೆ ನೋವಿಗೆ ಕಾರಣ

ನವಂಬರ್ 18ರಂದು ಮೊಹಮ್ಮದ್ ಮಕ್ಸೂದ್ ತೀವ್ರ ಹೊಟ್ಟೆ ನೋವೆಂದು ಆಸ್ಪತ್ರೆಗೆ ದಾಖಲಾಗಿದ್ದ. ಎಕ್ಸರೇ ತೆಗೆದ ಬಳಿಕ ಆತನ ಹೊಟ್ಟೆ ನೋವಿಗೆ ಕಾರಣ ತಿಳಿದುಬಂದಿದೆ. ಆದರೆ ಶಸ್ತ್ರಚಿಕಿತ್ಸೆ ವೇಳೆ ನಾಣ್ಯ ಮತ್ತು ಇತರ ಲೋಹದ ವಸ್ತುಗಳನ್ನು ತೆಗೆಯುವಾಗ ವೈದ್ಯರಿಗೆ ಅಚ್ಚರಿಯಾಗಿದೆ.

ನಾಣ್ಯಗಳು ಹೊಟ್ಟೆಯೊಳಗೆ ಹೋಗಿದ್ದಾದರೂ ಹೇಗೆ?

ಆ ವ್ಯಕ್ತಿಯು ಯಾರಿಗೂ ತಿಳಿಯದಂತೆ ನಾಣ್ಯಗಳನ್ನು ತಿನ್ನುತ್ತಿದ್ದ. ರೋಗಿಯ ಮಾನಸಿಕ ಸ್ಥಿತಿ ಸರಿಯಾಗಿ ಇಲ್ಲದೆ ಇರುವ ಕಾರಣದಿಂದ ಆತ ನಾಣ್ಯ, ಬ್ಲೇಡ್, ಸೂಜಿ ಮತ್ತು ಇತರ ಲೋಹದ ವಸ್ತುಗಳನ್ನು ತಿಂದಿದ್ದಾನೆ. ನಾಣ್ಯ ಮತ್ತು ಬ್ಲೇಡ್ ಗಳು ಹೊಟ್ಟೆಯೊಳಗಿನ ಯಾವುದೇ ಭಾಗಕ್ಕೆ ಹಾನಿಯುಂಟು ಮಾಡದೆ ಇರುವ ಕಾರಣದಿಂದ ರೋಗಿ ಸುರಕ್ಷಿತವಾಗಿದ್ದಾನೆ ಎಂದು ವೈದ್ಯರು ತಿಳಿಸಿದ್ದಾರೆ. ಇನ್ನು ಮುಂದೆ ತಾನು ಈ ರೀತಿಯ ಕೆಲಸ ಮಾಡುವುದಿಲ್ಲವೆಂದು ಖಾನ್ ವೈದ್ಯರಿಗೆ ಭರವಸೆ ನೀಡಿದ್ದಾನೆ

ಕಠಿಣ ಶಸ್ತ್ರಚಿಕಿತ್ಸೆ

ಸುಮಾರು ಆರು ಮಂದಿ ತಜ್ಞ ವೈದ್ಯರ ತಂಡವು ಮೊಹಮ್ಮದ್ ಮಕ್ಸೂದ್ ಹೊಟ್ಟೆಯೊಳಗೆ ಇದ್ದ ಲೋಹಗಳನ್ನು ತೆಗೆಯಲು ಶಸ್ತ್ರಚಿಕಿತ್ಸೆಯಲ್ಲಿ ಭಾಗಿಯಾಯಿತು. ಸುಮಾರು 5 ಕೆಜಿ ಭಾರದ ಲೋಹಗಳನ್ನು ವೈದ್ಯರ ತಂಡವು ಹೊಟ್ಟೆಯಿಂದ ಹೊರತೆಗೆದಿದೆ. ಮಕ್ಸೂದ್ ಹೊಟ್ಟೆಯಿಂದ ನಾಲ್ಕು ದೊಡ್ಡ ಸೂಜಿ, ಒಂದು ಸರ, 263 ನಾಣ್ಯ, 10-12 ಬ್ಲೇಡ್ ಗಳು ಮತ್ತು ಕೆಲವು ತುಂಡು ಗಾಜುಗಳಿದ್ದವು. ಇದು ತುಂಬಾ ಆಘಾತಕಾರಿ ಪ್ರಕರಣವಾಗಿದೆ ಮತ್ತು ವೃತ್ತಿಯಲ್ಲಿ ಇದೇ ಮೊದಲ ಸಲ ಇಂತಹ ಪ್ರಕರಣ ನೋಡುತ್ತಿದ್ದೇವೆ ಎಂದು ವೈದ್ಯರು ತಿಳಿಸಿದ್ದಾರೆ. ಶಸ್ತ್ರಚಿಕಿತ್ಸೆ ತುಂಬಾ ಬೇಗನೆ ಮಾಡಬೇಕಿತ್ತು. ಯಾಕೆಂದರೆ ಕೆಲವು ಲೋಹಗಳು ಹೊಟ್ಟೆಯಲ್ಲಿ ಚುಚ್ಚಿಕೊಂಡು ರಕ್ತಸ್ರಾವವಾಗುತ್ತಿತ್ತು. ಇದರಿಂದ ಹಿಮೋಗ್ಲೋಬಿನ್ ಕಡಿಮೆಯಾಗುತ್ತಿತ್ತು ಎಂದು ವೈದ್ಯರು ತಿಳಿಸಿದ್ದಾರೆ.

ರೋಗಿಯ ಪರಿಸ್ಥಿತಿ

ಮೊಹಮ್ಮದ್ ಮಕ್ಸೂದ್ ಸ್ಥಿತಿ ಈಗ ಉತ್ತಮವಾಗಿದೆ ಮತ್ತು ವೈದ್ಯರ ನಿಗಾದಲ್ಲಿದ್ದಾನೆ. ಆರು ತಿಂಗಳ ಕಾಲ ಮಕ್ಸೂದ್ ಗೆ ಸತ್ನಾದಲ್ಲಿ ಚಿಕಿತ್ಸೆ ನೀಡಿದ ಬಳಿಕ ರೆವಾಗೆ ತರಲಾಗಿತ್ತು ಎಂದು ವೈದ್ಯರು ತಿಳಿಸಿದ್ದಾರೆ. ಹೊಟ್ಟೆಯಿಂದ ತೆಗೆದ ಲೋಹಗಳು ಆರು ತಿಂಗಳ ಹಿಂದ ಹೊಟ್ಟೆ ಸೇರಿದ್ದವು. ಆತ ತುಂಬಾ ದೀರ್ಘ ಸಮಯದಿಂದ ಇದನ್ನು ತಿನ್ನುತ್ತಿದ್ದ ಎಂದು ವೈದ್ಯರು ವಿವರಿಸಿದ್ದಾರೆ.

ತುಂಬಾ ವಿಚಿತ್ರ ಅಭ್ಯಾಸ

ಮಕ್ಸೂದ್ ಕುಟುಂಬದವರು ಹೇಳುವ ಪ್ರಕಾರ ಆತ ಖಿನ್ನತೆಗೆ ತೆರಳುವ ಮೊದಲೇ ಲೋಹದ ವಸ್ತುಗಳನ್ನು ತಿನ್ನಲು ಆರಂಭಿಸಿದ್ದ. ಇದರ ಬಗ್ಗೆ ಆತ ಕುಟುಂಬದ ಯಾರೊಬ್ಬರಿಗೂ ತಿಳಿಸಿರಲಿಲ್ಲ. ಆತ ಚಾಲಕನಾಗಿ ಕೆಲಸ ಮಾಡುತ್ತಿದ್ದ ಮತ್ತು ಜನರು ನೀಡುತ್ತಿದ್ದ ನಾಣ್ಯಗಳನ್ನು ತಿಂದು ಬಿಡುತ್ತಿದ್ದ ಎಂದು ಆತನ ಕುಟುಂಬಿಕರು ಹೇಳಿರುವುದಾಗಿ ವರದಿಯಾಗಿದೆ.