ಈ ಬಾಲಕಿ ಕಣ್ಣು ಮುಚ್ಚಿಕೊಂಡೇ ಓದಬಲ್ಲಳು - ಈಕೆಯಲ್ಲಿದೆ ಮೂರನೆಯ ಕಣ್ಣು!

ಅಷ್ಟಕ್ಕೂ ’ಮಾ ಯೋಗಮಾತೆ’ಯಾಗಿರುವ ಕಿಶೋರಿ ಯಾರು?

ಈಕೆ ಇನ್ನೂ ಒಂಬತ್ತು ವರ್ಷದ ಪುಟ್ಟ ಬಾಲಕಿಯಾಗಿದ್ದು ಅಮೇರಿಕಾದ ಉತ್ತರ ಕ್ಯಾರೋಲೀನಾ ರಾಜ್ಯದ ನಿವಾಸಿಯಾಗಿದ್ದಾಳೆ. ತನಗೆ ಅಗೋಚರ ಕಣ್ಣು ಅಥವಾ ಮೂರನೆಯ ಕಣ್ಣೊಂದು ಇದ್ದು ಎರಡು ಕಣ್ಣುಗಳನ್ನು ಮುಚ್ಚಿದ್ದರೂ ಈ ಕಣ್ಣಿನಿಂದ ಸ್ಪಷ್ಟವಾಗಿ ನೋಡಬಲ್ಲೆ ಎಂದು ಹಾಗೂ ಪುಸ್ತಕದ ವಾಕ್ಯಗಳನ್ನು ಓದಬಲ್ಲೆ ಎಂದು ಹೇಳಿಕೊಂಡಿದ್ದಾಳೆ. ಆದರೆ ಈ ಶಕ್ತಿ ತನಗೆ ದೈವದತ್ತವಾಗಿ ಬಂದದ್ದಲ್ಲ, ನಾನೇ ಸ್ವತಃ ಕಲಿತುಕೊಂಡಿದ್ದು ಎಂದೇ ಹೇಳಿಕೊಳ್ಳುತ್ತಿದ್ದಾಳೆ.

ಕಣ್ಣು ಮುಚ್ಚಿಕೊಂಡು ಓದಲು ಹೇಗೆ ಸಾಧ್ಯ?

ಈಕೆ ಭಾರತಕ್ಕೆ ಬಂದಿದ್ದಾಗ ಒಂದು ಗುರುಕುಲದಲ್ಲಿ ನಡೆಸಿದ ಅಭ್ಯಾಸದ ಕಾರಣದಿಂದ ಈ ಶಕ್ತಿಯನ್ನು ಪಡೆಯಲು ಸಾಧ್ಯವಾಗಿತ್ತು. ಗುರುಕುಲದಲ್ಲಿರುವ ಗುರು ನಿತ್ಯಾನಂದರವರು ಈ ಶಕ್ತಿಯ ಬಗ್ಗೆ ಆಕೆಗೆ ಶಿಕ್ಷಣ ನೀಡಿದ್ದರು.

ಈಕೆಯ ಶಕ್ತಿಗಳಲ್ಲಿ ಇನ್ನೇನೇನಿದೆ?

ಪ್ರಾರಂಭದಲ್ಲಿ ಈಕೆ ಕೇವಲ ಸಭೆಯಲ್ಲಿ ನೆರೆದಿದ್ದ ಜನರನ್ನು ರಂಜಿಸಲೆಂದು ಮಾಡುತ್ತಿದ್ದ ಕೈಚಳವೆಂದೇ ಜನರು ತಿಳಿದಿದ್ದರು. ಆದರೆ ಈಕೆ ತನ್ನ ನಿಜವಾದ ಶಕ್ತಿಯನ್ನು ಯಾವಾಗ ಪ್ರಕಟಿಸಲು ತೊಡಗಿದಳೋ ಆಗ ನೆರೆದಿದ್ದ ಅಷ್ಟೂ ಜನರು ಅವಾಕ್ಕಾಗಿದ್ದರು. ಈಕೆ ಕಣ್ಣು ಮುಚ್ಚಿಕೊಂಡೇ ಓದುವುದು ಮಾತ್ರವಲ್ಲ, ಆಟವಾಡುವುದು, ಚಿತ್ರ ಬಿಡಿಸುವುದು ಮೊದಲಾದ ಚಟುವಟಿಕೆಗಳನ್ನೂ ಸುಲಲಿತವಾಗಿ ನಡೆಸುತ್ತಾಳೆ. ಅಷ್ಟೇ ಅಲ್ಲ, ಜನನಿಬಿಡ ಸ್ಥಳದಲ್ಲಿ ಡಾಜ್ ಕಾರುಗಳ ನಡುವೆ ಎಲ್ಲರಂತೆ ಬೈಸಿಕಲ್ ಒಂದನ್ನು ಸವಾರಿ ಮಾಡುತ್ತಾಳೆ.

ಒಂದು ಸಭೆಯಲ್ಲಿ ಈ ಚಮತ್ಕಾರವನ್ನೂ ತೋರಿಸಿದಳು

ಒಂದು ಸಾರ್ವಜನಿಕ ಸಭೆಯಲ್ಲಿ ಈಕೆ ಮುಚ್ಚಿದ್ದ ಕಣ್ಣುಗಳಿಂದ ಪುಸ್ತಕದ ಕೆಲವು ವಾಕ್ಯಗಳನ್ನು ಓದಿದ್ದಳು. ಇದರ ಬಳಿಕ ಟಿಕ್-ಟ್ಯಾಕ್ ಎಂಬ ಆಟವನ್ನೂ, ಪ್ಲಾಸ್ಟಿಕ್ಕಿನ ಉದ್ದಿನವಡೆಯಂತಹ ಡೋನಟ್ ಗಳನ್ನು ಜೋಡಿಸುವ ಆಟವನ್ನೂ ಆಡಿ ತೋರಿಸಿದಳು. ಈಕೆಯ ತಾಯಿಯ ಹೇಳಿಕೆಯ ಪ್ರಕಾರ ಈಕೆ ತನ್ನಲ್ಲಿರುವ ವಿಶೇಷ ಶಕ್ತಿಯನ್ನು ಅರಿತುಕೊಳ್ಳುವ ಮುನ್ನ ಎಲ್ಲರಂತೆ ಸರ್ವೇ ಸಾಮಾನ್ಯ ಬಾಲಕಿಯಾಗಿದ್ದು ಈ ಶಕ್ತಿ ತನ್ನಲ್ಲಿರುವುದನ್ನು ಮನಗಂಡ ಬಳಿಕ ಹೆಚ್ಚು ಧನಾತ್ಮಕ ಹಾಗೂ ಆತ್ಮವಿಶ್ವಾಸವುಳ್ಳ ವ್ಯಕ್ತಿಯಾಗಿದ್ದಾಳೆ.

ಈ ಶಕ್ತಿ ನಿಜವಾದುದೇ ಅಥವಾ ಕಪಟವೇ?

ಹಲವಾರು ವೀಡಿಯೋಗಳಲ್ಲಿ ಈಕೆಯ ಅದ್ಭುತ ಪ್ರತಿಭೆ ಪ್ರಕಟಗೊಂಡಿದ್ದು ವಿಶ್ವದಾದ್ಯಂತ ಜನರು ಸಾಮಾಜಿಕ ತಾಣಗಳ ಮೂಲಕ ನೋಡಿ ಚಕಿತಗೊಂಡಿದ್ದಾರೆ. ಆದರೂ, ಕೆಲವರಿಗೆ ಈ ವಿಡಿಯೋಗಳ ಮೇಲೇ ಅನುಮಾನವಿದ್ದು ಈಕೆಯ ಪ್ರತಿಭೆ ಕಪಟವೂ ಇರಬಹುದೆಂಬ ಗುಮಾನಿಯೂ ಹರಡಿದೆ.

ನಮ್ಮ ಅಭಿಪ್ರಾಯ

ಇದು ನಿಜವೋ ಅಥವಾ ಹಣ ಮಾಡಲು ಜನರನ್ನು ಮರಳುಮಾಡುವ ತಂತ್ರವೋ ಎಂದು ನಮಗೂ ಅನುಮಾನವಿದೆ. ಸಧ್ಯಕ್ಕೆ ಈ ಬಾಲಕಿಯ ನಿಜನಾಮಧೇಯದ ಬಗ್ಗೆ ಯಾವುದೇ ಮಾಹಿತಿ ನೀಡದಿರುವುದು ಹಾಗೂ ಆಕೆಯ ಕುಟುಂಬದ ಬಗ್ಗೆಯೂ ಯಾವುದೇ ಮಾಹಿತಿ ಇಲ್ಲದಿರುವುದು ಅನುಮಾನಾಸ್ಪದವಾಗಿದೆ. ಒಂದು ವೇಳೆ ಶಕ್ತಿ ನಿಜವೇ ಆಗಿದ್ದರೆ ಕೇವಲ ವಿಡಿಯೋಗಳಲ್ಲಿ ಮಾತ್ರವೇ ಏಕೆ ಈಕೆ ಕಾಣಿಸಿಕೊಳ್ಳಬೇಕು? ಎಂಬುದೂ ಇನ್ನೊಂದು ತರ್ಕವಾಗಿದೆ. ಈ ಸತ್ಯಾಸತ್ಯತೆಗಳ ವೈಜ್ಞಾನಿಕ ವಿವರಣೆಯ ಹೊರತಾಗಿ ಇದು ಅಪ್ಪಟ ನಿಜ ಎಂದು ಹೇಳಲು ಸಾಧ್ಯವಿಲ್ಲ. ಆದರೂ, ಕೆಳಗಿನ ವಿಡಿಯೋ ನೋಡಿ ಇದು ನಿಜವೋ, ನಿಜವಾಗಿಯೂ ಆಕೆಯಲ್ಲಿ ಈ ಅಗೋಚರ ಶಕ್ತಿ ಇದೆಯೇ ಎಂಬುದನ್ನು ನೀವೇ ನೋಡಿ. ಈಕೆಗೆ ಓದಲು ಸಾಧ್ಯವಾದರೆ ನಿಮಗೂ ಏಕೆ ಸಾಧ್ಯವಾಗಲಾರದು? ಪ್ರಯತ್ನಿಸಿ....