ದೇಹದ ಮೇಲಿನ ಮಚ್ಚೆ, ನಿಮ್ಮ ಜಾತಕವನ್ನೇ ಬಿಚ್ಚಿಡುತ್ತದೆ!

ಹುಬ್ಬಿನಲ್ಲಿರುವ ಮಚ್ಚೆ

ಈ ವ್ಯಕ್ತಿಗಳು ಸಾಮಾನ್ಯವಾಗಿ ಕ್ರಿಯಾತ್ಮಕರಾಗಿದ್ದು ಸದಾ ಮನದಲ್ಲಿ ಹೊಸತನ್ನು ಅಥವಾ ಈಗಿರುವುದನ್ನು ಬದಲಿಸುವ ಬಗ್ಗೆ ಯೋಚಿಸುತ್ತಿರುತ್ತಾರೆ. ಇವರು ಸದಾ ಅದೃಷ್ಟ ತಮ್ಮೆಡೆಗೆ ಇರುತ್ತದೆ ಎಂದು ಭಾವಿಸಿರುತ್ತಾರೆ. ಈ ವ್ಯಕ್ತಿಗಳಿಗೆ ಸಾಮಾನ್ಯವಾಗಿ ಉತ್ತಮ ಉದ್ಯೋಗ, ತನ್ಮೂಲಕ ಧನ ಮತ್ತು ನೆಮ್ಮದಿ ಲಭಿಸಿರುತ್ತದೆ.

ಮೇಲ್ತುಟಿಯಲ್ಲಿರುವ ಮಚ್ಚೆ

ಈ ವ್ಯಕ್ತಿಗಳು ಮಚ್ಚೆಯ ಕಾರಣದಿಂದಲೇ ಸುಲಭವಾಗಿ ಇತರರ ಗಮನವನ್ನು ಸೆಳೆಯುತ್ತಾರೆ. ತಾವು ಆಕರ್ಷಕರಾಗಿರುವ ಪ್ರಯೋಜನವನ್ನು ಅವರು ತಮ್ಮ ಲಾಭಕ್ಕಾಗಿ ಬಳಸಿಕೊಳ್ಳುವುದನ್ನು ಕಂಡುಕೊಳ್ಳಲಾಗಿದೆ. ಇವರು ಅತಿ ಸ್ನೇಹಜೀವಿಗಳೂ ಸುಲಭವಾಗಿ ಇನ್ನೊಬ್ಬರೊಂದಿಗೆ ಹೊಂದಿಕೊಳ್ಳುವವರೂ ಆಗಿದ್ದಾರೆ. ಆದರೆ ಇವರ ಸ್ನೇಹದ ಉದ್ದೇಶ ಮಾತ್ರ ಹೆಚ್ಚಿನ ಸಂದರ್ಭದಲ್ಲಿ ಸ್ವಾರ್ಥಪರವಾಗಿರುತ್ತದೆ.

ಹಣೆಯ ಪಕ್ಕ (ಕನ್ನಡಕ ಧರಿಸಿದರೆ ಕನ್ನಡಕದ ಕಡ್ಡಿ ತಾಕುವಲ್ಲಿ)

ಈ ಸ್ಥಳದಲ್ಲಿ ಮಚ್ಚೆ ಇರುವ ವ್ಯಕ್ತಿಗಳು ಸದಾ ಚಲನಶೀಲರಾಗಿದ್ದು ಪ್ರಯಾಣವೇ ಮುಖ್ಯವಾಗಿರುವ ಉದ್ಯೋಗಗಳಲ್ಲಿ ಸಾರ್ಧಕತೆ ಪಡೆದುಕೊಳ್ಳುತ್ತಾರೆ. ಸಾಮಾನ್ಯವಾಗಿ ಒಂದೇ ಊರಿನಲ್ಲಿ ನೆಲೆಸಲು ಇಷ್ಟಪಡದ ಇವರು ಬೇರೆ ದೇಶಕ್ಕೆ ದೇಶಾಂತರ ಹೋಗಲೂ ಪ್ರಯತ್ನಿಸುತ್ತಿರುತ್ತಾರೆ.

ಕಣ್ಣುರೆಪ್ಪೆಯ ಮೇಲಿರುವ ಮಚ್ಚೆ

ಕಣ್ಣುಗಳ ಸೌಂದರ್ಯಕ್ಕೆ ಅವಲಕ್ಷಣವಾಗಿ ಕಾಣುವ ಈ ಮಚ್ಚೆ ಇರುವ ವ್ಯಕ್ತಿಗಳು ಬಹುಕೌಶಲ್ಯವುಳ್ಳ ವ್ಯಕ್ತಿಗಳಾಗಿರುತ್ತಾರೆ. ಇದೇ ಇವರ ಕೊರತೆಯಾಗಿದ್ದು ಯಾವುದೇ ಒಂದು ಕೌಶಲ್ಯದಲ್ಲಿ ಪರಿಣಿತಿ ಸಾಧಿಸಲು ಸಾಧ್ಯವಾಗುವುದಿಲ್ಲ. ಆದರೆ ಇನ್ನುಳಿದಂತೆ ತಮ್ಮ ಪ್ರತಿಭೆಯಿಂದಾಗಿ ಇವರು ಸುತ್ತಮುತ್ತಲ ಎಲ್ಲರಿಗೂ ಬೇಕಾದವರಾಗಿರುತ್ತಾರೆ.

ಕೆನ್ನೆಯ ಮೂಳೆಯ ಮೇಲಿರುವ ಮಚ್ಚೆ

ದವಡೆಯ ಮೇಲೆ ಒತ್ತಿ ನೋಡಿದರೆ ಕೆನ್ನೆಯ ಮೂಳೆ ಇರುವುದು ಅನುಭವಕ್ಕೆ ಬರುತ್ತದೆ. ಈ ಸ್ಥಳದಲ್ಲಿ ಮಚ್ಚೆ ಇರುವ ವ್ಯಕ್ತಿಗಳು ಸಾಮಾನ್ಯವಾಗಿ ಹೆಚ್ಚು ಪ್ರಭಾವಿ ವ್ಯಕ್ತಿಗಳಾಗಿದ್ದು ಸಮಾಜದಲ್ಲಿ ಹೆಚ್ಚಿನ ಮನ್ನಣೆ ಪಡೆಯುವವರಾಗಿರುತ್ತಾರೆ. ಇವರು ಸಾಮಾನ್ಯವಾಗಿ ಜನಸೇವೆ ಅಥವಾ ಜನಸಂಪರ್ಕದ ಉದ್ಯೋಗಗಳಲ್ಲಿ ಹೆಚ್ಚು ಯಶಸ್ವಿಯಾಗಿದ್ದು ದಿನಗಳೆದಂತೆ ಧನವಂತರೂ ಪ್ರಭಾವಿಗಳೂ ಆಗುತ್ತಾ ಹೋಗುತ್ತಾರೆ.

ಹಸ್ತದಲ್ಲಿರುವ ಮಚ್ಚೆ

ಹಸ್ತದಲ್ಲಿ ಅಥವಾ ಅಂಗೈಯಲ್ಲಿ ಮಚ್ಚೆ ಇದ್ದವರನ್ನು ಅತ್ಯಂತ ಅದೃಷ್ಟವಂತರೆಂದು ಭಾವಿಸಲಾಗುತ್ತದೆ. ಏಕೆಂದರೆ ಇವರು ಹಣ ಮತ್ತು ವ್ಯಕ್ತಿಗಳನ್ನು ಹೇಗೆ ನಡೆಸಿಕೊಳ್ಳಬೇಕು ಎಂದು ಅರಿತಿರುವವರಾಗಿದ್ದು ಸಮಾಜದಲ್ಲಿ ಗಣ್ಯರೆಂದು ಗುರುತಿಸಲ್ಪಡುತ್ತಾರೆ.

ಪಾದದಲ್ಲಿರುವ ಮಚ್ಚೆ

ಪಾದದಲ್ಲಿ ಮಚ್ಚೆ ಇರುವ ವ್ಯಕ್ತಿಗಳ ಕಾಲಿಗೆ ಚಕ್ರ ಇರುತ್ತದೆ ಎಂಬ ನಂಬಿಕೆ ಬಹಳ ವರ್ಷಗಳಿಂದ ಬೆಳೆದುಬಂದಿದೆ. ಪಾದದ ಯಾವುದೇ ಭಾಗದಲ್ಲಿ ಅಂದರೆ ಕೆಳಭಾಗದಲ್ಲಿ ಅಥವಾ ಮೇಲ್ಭಾಗದಲ್ಲಿ, ಬೆರಳುಗಳಲ್ಲಿ ಅಥವಾ ಹಿಮ್ಮಡಿಯಲ್ಲಿ, ಬಲಪಾದ ಅಥವಾ ಎಡಪಾದ ಎಲ್ಲಿದ್ದರೂ ಇವರು ಸದಾ ಪ್ರಯಾಣಿಸುತ್ತಾ ಇರುತ್ತಾರೆ ಎಂದು ನಂಬಲಾಗಿದೆ. ಇವರು ನಾಯಕತ್ವದ ಗುಣಗಳನ್ನೂ ಸಮರ್ಥವಾಗಿ ಪ್ರದರ್ಶಿಸುವವರಾಗಿದ್ದಾರೆ.

ಹೊಟ್ಟೆ ಮತ್ತು ಸೊಂಟದಲ್ಲಿದ್ದರೆ

ಒಂದು ಸ್ಪಷ್ಟವಾದ ಕಪ್ಪು ಮಚ್ಚೆ ಹೊಟ್ಟೆ ಅಥವಾ ಸೊಂಟದಲ್ಲಿದ್ದರೆ (ಪುರುಷರು ಮತ್ತು ಮಹಿಳೆಯರಿಗೆ ಸಮಾನವಾಗಿ ಅನ್ವಯ) ಆ ವ್ಯಕ್ತಿ ಸಾಮಾನ್ಯವಾಗಿ ಆಸೆಬುರುಕ ಮತ್ತು ಸ್ವಾರ್ಥಿಯಾಗಿರುತ್ತಾರೆ.

ಮುಖದಲ್ಲಿ ತುಟಿಯ ಅಕ್ಕಪಕ್ಕ ಇದ್ದರೆ

ಮುಖದಲ್ಲಿ ತುಟಿಯ ಅಕ್ಕಪಕ್ಕದಲ್ಲಿರುವ ಕಪ್ಪು ಮಚ್ಚೆ ಇರುವ ಪುರುಷರು ಸಾಮಾನ್ಯವಾಗಿ ಧನವಂತರೂ ಜೀವನದಲ್ಲಿ ಹೆಚ್ಚು ಸುಖವನ್ನನುಭವಿಸುವವರೂ ಆಗಿರುತ್ತಾರೆ. ಮಹಿಳೆಯರಲ್ಲಿ ಈ ಮಚ್ಚೆ ವಾಚಾಳಿತನ ಮತ್ತು ಅತಿ ಸೂಕ್ಷ್ಮ ಸ್ವಭಾವದವರಾಗಿರುತ್ತಾರೆ.

ಎಡಗೆನ್ನೆಯ ಮೇಲಿದ್ದರೆ

ಎಡಗೆನ್ನೆಯ ಮೇಲಿರುವ ಕಪ್ಪು ಮಚ್ಚೆ ಪುರುಷರಿಗೆ ಆರ್ಥಿಕವಾದ ತೊಂದರೆಗಳಿರುವುದನ್ನು ಸೂಚಿಸುತ್ತದೆ. ಮಹಿಳೆಯರಲ್ಲಿ ಈ ಗುರುತು ಅಗೋಚರ ಖಿನ್ನತೆಯನ್ನು ಬಿಂಬಿಸುತ್ತದೆ.

ಎಡಸ್ತನದ ಕೆಳಭಾಗದಲ್ಲಿದ್ದರೆ (ಪುರುಷರು-ಮಹಿಳೆಯರಿಗೆ ಸಮಾನವಾಗಿ ಅನ್ವಯ)

ಈ ಗುರುತು ನೀವು ಕೈಹಾಕಿದ ಎಲ್ಲಾ ಕೆಲಸಗಳಲ್ಲಿ ಯಶಸ್ಸನ್ನು ಸೂಚಿಸುತ್ತದೆ ಹಾಗೂ ನಿಮ್ಮ ಹಾಸ್ಯಪ್ರಜ್ಞೆಯನ್ನು ಬಿಂಬಿಸುತ್ತದೆ. ಅಂದರೆ ನೀವು ಮುಟ್ಟಿದ್ದೆಲ್ಲಾ ಚಿನ್ನವಾಗುತ್ತದೆ.

ಎದೆಯ ನಡುಭಾಗದಲ್ಲಿದ್ದರೆ (ಪುರುಷರು-ಮಹಿಳೆಯರಿಗೆ ಸಮಾನವಾಗಿ ಅನ್ವಯ)

ಈ ಗುರುತು ನಿಮಗೆ ಶುಭವನ್ನೂ, ಜೀವನದಲ್ಲಿ ಸಾಕಷ್ಟು ಧನವನ್ನೂ ತಂದುಕೊಡುವ ಸೂಚನೆಯಾಗಿದೆ.

ಗದ್ದದ ಮೇಲಿದ್ದರೆ

ಪುರುಷರಲ್ಲಿರುವ ಈ ಗುರುತು ಆ ವ್ಯಕ್ತಿ ಅತಿ ಕೋಪಿಷ್ಟನೆಂದು ಬಿಂಬಿಸುತ್ತದೆ. ಮಹಿಳೆಯರಲ್ಲಿ ಈ ಗುರುತು ಕುಟುಂಬ ಆಕೆಯ ಆಶ್ರಯದಲ್ಲಿರುವ ಸೂಚನೆಯನ್ನು ನೀಡುತ್ತದೆ.

ಹಣೆಯ ಬಲಭಾಗದಲ್ಲಿದ್ದರೆ (ಪುರುಷರು-ಮಹಿಳೆಯರಿಗೆ ಸಮಾನವಾಗಿ ಅನ್ವಯ)

ಈ ಗುರುತು ನೀವು ಮಾನಸಿಕವಾಗಿ ಅತಿ ಬಲಿಷ್ಟರೆಂಬುದನ್ನು ಸೂಚಿಸುತ್ತದೆ.

ಹಣೆಯ ಎಡಭಾಗದಲ್ಲಿದ್ದರೆ

ಈ ಗುರುತು ನಿಮ್ಮ ಜೀವನದ ಆಕಾಂಕ್ಷೆಗಳಿಗೆ ಹಲವು ಅಡ್ದಿ ಆತಂಕಗಳಿರುವುದನ್ನು ಸೂಚಿಸುತ್ತದೆ. ಅಲ್ಲದೇ ಈ ಗುರುತಿರುವವರು ಸಾಮಾನ್ಯವಾಗಿ ಹೆಚ್ಚು ಖರ್ಚು ಮಾಡುವವರಾಗಿರುತ್ತಾರೆ.

ಕೈಗಳ ಮೇಲಿದ್ದರೆ

ಕೈಗಳ ಮೇಲಿರುವ ಮಚ್ಚೆ ಇರುವ ಪುರುಷರು ತಮ್ಮ ಹೆಚ್ಚಿನ ವೇಳೆಯನ್ನು ಮನೆಯೊಳಗೇ ಕಳೆಯುವವರಾಗಿರುತ್ತಾರೆ ಹಾಗೂ ಮಕ್ಕಳನ್ನು ನೋಡಿಕೊಳ್ಳುವಲ್ಲಿ, ಶಿಸ್ತನ್ನು ಕಾಪಾಡಿಕೊಳ್ಳುವಲ್ಲಿ ಹೆಚ್ಚಿನ ಆಸಕ್ತಿ ತೋರುತ್ತಾರೆ. ಮಹಿಳೆಯಲ್ಲಿರುವ ಈ ಗುರುತು ಆಕೆ ಸ್ವತಂತ್ರಳಾಗಿರಲು ಬಯಸುವುದನ್ನೂ ಜೀವನದಲ್ಲಿ ಏನಾದರೂ ಸಾಧಿಸಬೇಕೆಂಬ ಆಕಾಂಕ್ಷೆಯುಳ್ಳವಳೆಂಬುದನ್ನೂ ಸೂಚಿಸುತ್ತದೆ.