ಮೂಡ್ ಸರಿ ಇಲ್ಲವೆಂದರೆ ಇವುಗಳ ಸಹವಾಸ ಮಾಡಬೇಡಿ

ಆಲ್ಕೋಹಾಲ್ ಸೇವಿಸಬೇಡಿ

ಕೆಟ್ಟ ಮೂಡ್ ನಿಮ್ಮನ್ನು ಕಾಡಿದಾಗ ಆಲ್ಕೋಹಾಲ್ ಸೇವಿಸಬೇಡಿ. ಏಕೆಂದರೆ ಜನರು ಕೆಟ್ಟ ಮೂಡು ಮತ್ತು ಕೋಪವನ್ನು ನಿಯಂತ್ರಿಸುವ ಒಂದೇ ಔಷಧಿ ಆಲ್ಕೋಹಾಲ್ ಎಂದು ಭಾವಿಸಿರುತ್ತಾರೆ. ಆದರೆ ಅದನ್ನು ಸೇವಿಸುವುದರಿಂದ ನಿಮ್ಮ ಮನಸ್ಸು ಮತ್ತು ನೀವು ಮಾತನಾಡಿಕೊಳ್ಳುವ ಒಂದು ಸದಾವಕಾಶವನ್ನು ಕಳೆದುಕೊಳ್ಳುತ್ತೀರಿ. ಇದರಿಂದ ನಶೆ ಇಳಿದ ಮೇಲೆ, ನಿಮ್ಮ ಮನಸ್ಸು ಮತ್ತೆ ಪ್ರಕ್ಷುಬ್ಧಗೊಳ್ಳುತ್ತದೆ. ಮತ್ತೆ ಅದೇ ಕೆಟ್ಟ ಮೂಡ್ ಮತ್ತು ಕೋಪ ನಿಮ್ಮನ್ನು ಕಾಡುತ್ತದೆ. ಇದರಿಂದ ನಿಮ್ಮ ಸಂಬಂಧಗಳು ಹಾಳಾಗುತ್ತವೆ.

ಸಾಮಾಜಿಕ ನೆಟ್‌ವರ್ಕ್ ಸೈಟಿನಲ್ಲಿ ಪೋಸ್ಟ್ ಮಾಡಬೇಡಿ

ನಿಮ್ಮ ಕೆಟ್ಟ ಮೂಡ್ ತುಂಬಾ ಹೊತ್ತು ಇರುವುದಿಲ್ಲ. ಒಂದು ವೇಳೆ ನಿಮಗೆ ನಿಮ್ಮ ಕೋಪ ಅಥವಾ ಕೆಟ್ಟ ಭಾವನೆಯನ್ನು ಬರೆಯಬೇಕು ಎಂದಲ್ಲಿ, ಪೆನ್ ಪೇಪರ್ ತೆಗೆದುಕೊಂಡು ಬರೆಯಿರಿ. ಅದನ್ನು ಬಿಟ್ಟು ಸಾಮಾಜಿಕ ನೆಟ್‌ವರ್ಕ್ ಸೈಟಿನಲ್ಲಿ ಬರೆಯಲು ಹೋಗಬೇಡಿ. ಏಕೆಂದರೆ ಈ ಸೈಟ್‌‍ಗಳಲ್ಲಿ ನಿಮ್ಮ ಸ್ನೇಹಿತರಲ್ಲದವರು ಸಹ ಇರುತ್ತಾರೆ.

ನಿರ್ಧಾರಗಳನ್ನು ತೆಗೆದುಕೊಳ್ಳಬೇಡಿ

ಒಂದು ವೇಳೆ ನಿಮಗೆ ಕೆಟ್ಟ ಮೂಡ್ ಕಾಡುತ್ತಿದ್ದಲ್ಲಿ, ನಿರ್ಧಾರಗಳನ್ನು ತೆಗೆದುಕೊಳ್ಳುವುದನ್ನು ನಿಲ್ಲಿಸಿ. ಕೋಪದಲ್ಲಿ ತೆಗೆದುಕೊಂಡ ನಿರ್ಧಾರಗಳು ಕಹಿಯಾದ ಫಲಿತಾಂಶವನ್ನು ನೀಡುತ್ತವೆ. ಇದರಿಂದ ನೀವು ಮುಂದೆ ಪಶ್ಚಾತ್ತಾಪವನ್ನು ಪಡುತ್ತೀರಿ. ಆಮೇಲೆ ಮುಂದೆ ಇದರಿಂದ ನೀವು ಕೊರಗಿದರು ಪ್ರಯೋಜನವಾಗುವುದಿಲ್ಲ. ನಿಮ್ಮ ಮನಸ್ಸು ಮತ್ತೆ ತಿಳಿಯಾದಾಗ ಮಾತ್ರ ನಿರ್ಧಾರಗಳನ್ನು ತೆಗೆದುಕೊಳ್ಳಿ.

ಅದನ್ನು ಸುಮ್ಮನೆ ಹೋಗಲು ಬಿಡಿ

ಕೆಲವೊಮ್ಮೆ ನೀವು ಕೆಲಸ ಮಾಡುವ ಸ್ಥಳದಲ್ಲಿ ಕೆಟ್ಟ ಮೂಡ್ ನಿಮ್ಮನ್ನು ಭಾದಿಸಬಹುದು. ಆಗ ಅದನ್ನು ಅದರ ಪಾಡಿಗೆ ಅದು ಹೋಗಲು ಬಿಡಿ. ನಿಮ್ಮ ಜೊತೆ ಯಾರಾದರು ಕೆಟ್ಟದಾಗಿ ನಡೆದುಕೊಂಡರೆ, ಅವನಿಗು ಸಹ ಕೆಟ್ಟ ಮೂಡ್ ಭಾದಿಸಿದೆ ಎಂದು ಅರ್ಥ ಮಾಡಿಕೊಳ್ಳಿ. ನೀವು ತಪ್ಪು ಮಾಡಿದಿರಿ ಎಂದು ಆತ ನಿಮ್ಮ ಮೇಲೆ ರೇಗಿಲ್ಲ, ಬದಲಿಗೆ ಆತನಿಗೆ ತನ್ನದೆ ಆದ ಸಮಸ್ಯೆಗಳು ಇದ್ದವು ಅದಕ್ಕೆ ಆತ ನಿಮ್ಮ ಮೇಲೆ ರೇಗಿದ ಎಂದು ಭಾವಿಸಿಕೊಳ್ಳಿ.

ಇಮೇಲ್ ಬರೆಯಲು ಹೋಗಬೇಡಿ

ಒಂದು ವೇಳೆ ನೀವು ಕೆಲಸದ ಸ್ಥಳದಲ್ಲಿ ಕೆಟ್ಟ ಮೂಡ್ ಅಥವಾ ಕೋಪಕ್ಕೆ ತುತ್ತಾದರೆ, ಯಾವುದೇ ಕಾರಣಕ್ಕು ಇಮೇಲ್ ಬರೆಯಲು ಹೋಗಬೇಡಿ. ಸ್ವಲ್ಪ ಹೊರಗೆ ಸಣ್ಣ ವಾಕ್ ಅಥವಾ ಕಾಫಿ ಸೇವಿಸಲು ಹೋಗಿ ಬನ್ನಿ. ಏಕೆಂದರೆ ಈ ಸನ್ನಿವೇಶದಲ್ಲಿ ಇಮೇಲ್ ಬರೆದರೆ, ನೀವು ಮತ್ತಷ್ಟು ತೊಂದರೆಗೆ ಸಿಕ್ಕಿಹಾಕಿಕೊಳ್ಳುವುದರಲ್ಲಿ ಸಂಶಯವಿಲ್ಲ. ಏಕೆಂದರೆ ಇಮೇಲ್ ಅನ್ನು ಒಮ್ಮೆ ಕಳುಹಿಸಿದರೆ ಅದನ್ನು ಪುನಃ ಹಿಂದಕ್ಕೆ ತೆಗೆದುಕೊಳ್ಳಲು ಆಗುವುದಿಲ್ಲ.