ಪುರುಷನೋ V/S ಮಹಿಳೆಯೋ-ನಿಮ್ಮ ಬಾಸ್ ಯಾರಾಗಿರಲು ಬಯಸುತ್ತೀರಿ?

ಕಾರ್ಯಕ್ಷೇತ್ರದಲ್ಲಿ

ಹಿಂದಿನಿಂದ ನಡೆದು ಬಂದಿರುವ ಸಂಪ್ರದಾಯದಂತೆ ಪುರುಷರೇ ಹೆಚ್ಚಾಗಿ ಮೇಲ್ಮಟ್ಟದ ಹುದ್ದೆಗಳನ್ನು ಅಲಂಕರಿಸುತ್ತಾರೆ. ಈ ಸ್ತರದಲ್ಲಿರುವ ಪುರುಷರು ತಮ್ಮ ಕಾರ್ಯಕ್ಕೆ ಹೆಚ್ಚಿನ ಮಹತ್ವ ನೀಡುತ್ತಾರೆ ಹಾಗೂ ತಮ್ಮ ಕೆಳಗೆ ಕಾರ್ಯ ನಿರ್ವಹಿಸುವ ಎಲ್ಲರಿಂದಲೂ ಇದನ್ನೇ ಬಯಸುತ್ತಾರೆ. ಕೆಲಸದಲ್ಲಿ ವಿಳಂಬ ಮತ್ತು ತಪ್ಪುಗಳನ್ನು ಅವರು ಸಹಿಸುವುದಿಲ್ಲ ಹಾಗೂ ತಪ್ಪುಗಳಿಂದಾಗುವ ಪ್ರತ್ಯಕ್ಷ ಮತ್ತು ಪರೋಕ್ಷ ಪರಿಣಾಮಗಳಿಗೆ ಅವರನ್ನು ಗುರಿಯಾಗಿಸಿ ದಂಡವನ್ನೂ ವಿಧಿಸುತ್ತಾರೆ. ಇದೇ ವೇಳೆ ಉನ್ನತ ಸ್ಥಾನದಲ್ಲಿರುವ ಮಹಿಳೆಯರು ಅಷ್ಟೊಂದು ಬಿಗಿಯಾಗಿರುವುದಿಲ್ಲ. ತಮ್ಮ ಕೆಳಗಿನವರು ಯಾವುದಾದರೂ ತೊಂದರೆಯನ್ನು ಅಥವಾ ವಿಷಯವನ್ನು ವಿಮರ್ಶಿಸಲು ಬಂದರೆ ಮುಕ್ತಮನಸ್ಸಿನಿಂದ ಅವರೊಂದಿಗೆ ಮಾತುಕತೆ ನಡೆಸಿ ಪರಿಹಾರ ಸೂಚಿಸುತ್ತಾರೆ.

ಗೊಡ್ಡು ಹರಟೆ (ಗಾಸಿಪ್)

ಇಬ್ಬರು ಪುರುಷರಿದ್ದೆಡೆ ಚರ್ಚೆ, ಇಬ್ಬರು ಮಹಿಳೆಯರಿದ್ದೆಡೆ ಗಾಸಿಪ್ ಇರುತ್ತದೆ ಎಂಬುದೊಂದು ಹಳೆಯ ಆಂಗ್ಲ ಗಾದೆ. ತಮ್ಮ ಸುತ್ತಮುತ್ತಲ ಜನರಲ್ಲಿ ಏನು ನಡೆಯುತ್ತಿದೆ ಎಂಬ ಕುತೂಹಲ ಪುರುಷರಿಗಿಂತ ಮಹಿಳೆಯರಿಗೆ ಹೆಚ್ಚು. ಹಾಗಾಗಿ ಪುರುಷ ಮೇಲಧಿಕಾರಿಗಳು ತಮ್ಮ ಕೆಳಗೆ ಕೆಲಸ ಮಾಡುವವರ ವೈಯಕ್ತಿಯ ವಿಷಯಗಳನ್ನು ಕೆದಕಲು ಹೋಗುವುದಿಲ್ಲ. ಇದೇ ವೇಳೆ ಮಹಿಳಾ ಉನ್ನತಾಧಿಕಾರಿ ಕೊಂಚ ಉತ್ಸುಕರಾಗುತ್ತಾರೆ. ಈ ಗುಟ್ಟನ್ನು ಅರಿತ ಸಮಯಸಾಧಕರು ಅಲ್ಲಿನ ವಿಷಯಗಳನ್ನು ಇಲ್ಲಿ ಇಲ್ಲಿನ ವಿಷಯಗಳನ್ನು ಅಲ್ಲಿ ಉಪ್ಪೂಕಾರ ಹಾಕಿ ತಿಳಿಸುವ ಮೂಲಕ ವಾತಾವರಣವನ್ನು ಕೆಡಿಸುತ್ತಾರೆ.

ಕಛೇರಿಯಲ್ಲಿದ್ದಾಗ ಮನೆಯ ಬಗ್ಗೆ ಯೋಚನೆ

ಕುಟುಂಬದ ಬಗ್ಗೆ ಪುರುಷರಿಗಿಂತಲೂ ಮಹಿಳೆಯರಿಗೇ ಹೆಚ್ಚಿನ ಕಾಳಜಿಯಿರುತ್ತದೆ. ಸ್ವಾಭಾವಿಕವಾಗಿ ಕಛೇರಿಯಲ್ಲಿದ್ದ ವೇಳೆಯಲ್ಲಿಯೂ ಅವರು ತಮ್ಮ ಕುಟುಂಬದ ಬಗ್ಗೆ ಚಿಂತನೆ ನಡೆಸುತ್ತಾರೆ. ಇದರಿಂದಾಗಿ ಕೆಲವು ಬಾರಿ ಅತ್ಯಂತ ಪ್ರಮುಖ ನಿರ್ಣಯಗಳನ್ನು ಕೈಗೊಳ್ಳುವ ವೇಳೆ ಪೂರ್ಣವಾದ ಗಮನ ನೀಡಲಾಗದೇ ಸೂಕ್ತನಿರ್ಣಯ ಕೈಗೊಳ್ಳಲು ವಿಫಲರಾಗುತ್ತಾರೆ. ಇದೇ ವೇಳೆ ಪುರುಷ ಮೇಲಧಿಕಾರಿ ಕಛೇರಿಯ ವೇಳೆಯಲ್ಲಿ ಸಂಪೂರ್ಣರಾಗಿ ತಮ್ಮ ಕೆಲಸದಲ್ಲಿ ಮಗ್ನರಾಗಿ ಬಿಡುವ ಕಾರಣ ಸೂಕ್ತ ನಿರ್ಣಯಗಳನ್ನು ಕೈಗೊಳ್ಳಲು ಸಮರ್ಥರಾಗುತ್ತಾರೆ.

ಉದ್ಯೋಗಿಗಳನ್ನು ಅರ್ಥ ಮಾಡಿಕೊಳ್ಳುವುದು

ಹೆಚ್ಚಿನ ಬಾರಿ ಮೇಲಧಿಕಾರಿಗಳು ತಮ್ಮ ಕೆಲಸದ ಬಗ್ಗೆ ಅತೀವ ಹೆಚ್ಚಿನ ಕಾಳಜಿ ತೋರುತ್ತಾ ಒಂದು ರೀತಿಯಲ್ಲಿ ಕಾರ್ಯವ್ಯಸನಿಗಳಾಗಿರುತ್ತಾರೆ (workaholic). ಇವರಿಗೆ ತಮ್ಮ ಕೆಲಸ ಬಿಟ್ಟು ಬೇರೆಯವರ ತೊಂದರೆಗಳೊಂದೂ ಪ್ರಮುಖವಾಗಿ ಕಾಣಿಸುವುದೇ ಇಲ್ಲ. ಉದ್ಯೋಗಿಗಳು ನೀಡುವ ನೆವಗಳು ನಿಜವಾದರೂ ಇವರಿಗೆ ಅವು ಸುಳ್ಳು ಹೇಳಿ ಕೆಲಸದಿಂದ ತಪ್ಪಿಸಿಕೊಳ್ಳುವ ಹುನ್ನಾರದಂತೆಯೇ ಭಾಸವಾಗುತ್ತದೆ. ಈ ಪರಿಸ್ಥಿತಿಯಲ್ಲಿ ಪುರುಷ ಅಥವಾ ಮಹಿಳಾ ಮೇಲಧಿಕಾರಿ ಯಾರು ಮೇಲು ಎಂದು ಕೇಳಿದರೆ ಹೆಚ್ಚಿನವರು ಕೋಮಲ ಹೃದಯವುಳ್ಳ ಮಹಿಳೆಯೇ ಆಗಿರಬೇಕು ಎಂಬ ಅಭಿಪ್ರಾಯ ವ್ಯಕ್ತಪಡಿಸುತ್ತಾರೆ. ಆದರೆ ವಾಸ್ತವದಲ್ಲಿ ಪುರುಷ ಮೇಲಧಿಕಾರಿಯೇ ತಮ್ಮ ಉದ್ಯೋಗಿಗಳ ಕಷ್ಟಗಳ ಬಗ್ಗೆ ವ್ಯಾಕುಲತೆಯನ್ನು ತೋರಿ ತಮ್ಮಿಂದಾದ ಸಹಾಯವನ್ನು ನೀಡುತ್ತಾರೆ. ಮಹಿಳಾ ಮೇಲಧಿಕಾರಿಗಳು ಈ ಮನವಿಯನ್ನೇ ಅಸ್ತ್ರವನ್ನಾಗಿಸಿ ತಮ್ಮ ಕೆಳಗೆ ಕೆಲಸ ಮಾಡುವವರ ಮೇಲೆ ಇನ್ನಷ್ಟು ಹತೋಟಿ ಸಾಗಿಸಲು ಬಳಸುವುದು ಕಂಡುಬಂದಿದೆ.

ಮಾತುಗಳಲ್ಲಿ ಅವಾಚ್ಯ ಶಬ್ದ ಬಳಸುವುದು

ಎಷ್ಟೇ ಎಚ್ಚರಿಕೆಯಿಂದ ಕೆಲಸ ಮಾಡಿದರೂ ಯಾವುದೋ ಒಂದು ಕ್ಷಣದ ಮೈಮರೆತ ಘಳಿಗೆಯಲ್ಲಿ ಏನೋ ಒಂದು ಪ್ರಮಾದವಾಗಿ ಕೆಲವು ತೊಂದರೆಗಳು ಎದುರಾಗುತ್ತವೆ. ಈ ವಿಷಯ ತಿಳಿದ ಯಾವುದೇ ಮೇಲಧಿಕಾರಿ ಕೋಪಾವಿಷ್ಠರಾಗುವುದು ಸಹಜ. ಈ ಕೋಪದ ಭರದಲ್ಲಿ ಅವರು ಉಪಯೋಗಿಸುವ ಪದಗಳನ್ನು ಪಟ್ಟಿ ಮಾಡಿದರೆ ಪುರುಷ ಮೇಲಧಿಕಾರಿ ಸೂಕ್ತವಾದ ಮತ್ತು ಗಂಭೀರವಾದ ಪದಗಳನ್ನೇ ಉಪಯೋಗಿಸುವುದು ಕಂಡುಬಂದಿದೆ. ಇದೇ ವೇಳೆ ಮಹಿಳಾ ಮೇಲಧಿಕಾರಿ ತಮ್ಮ ಸ್ಥಿಮಿತವನ್ನು ಕಳೆದುಕೊಂಡು ಅವಾಚ್ಯ ಮತ್ತು ವಾಮಗೋಚರ ಪದಗಳನ್ನು ಉಪಯೋಗಿಸಿರುವುದು ಕಂಡುಬಂದಿದೆ. ಅದರಲ್ಲೂ ಮಹಿಳಾ ಅಧಿಕಾರಿಯ ಕೈಕೆಳಗಿನ ಉದ್ಯೋಗಿ ಮಹಿಳೆಯಾಗಿದ್ದರೆ ಮತ್ತು ವಿವಾಹಿತೆಯಾಗಿದ್ದರೆ ಈ ಪದಪುಂಜ ಇನ್ನಷ್ಟು ಕೆಟ್ಟದಾಗಿರುವುದು ಗಮನಕ್ಕೆ ಬಂದಿದೆ.