ತಮಾಷೆಯಲ್ಲ, ಸಸ್ಯಗಳು ಸಂವಹನ ಮಾಡುತ್ತವೆ..! ವಿಡಿಯೋ ಮೂಲಕ ಸಾಬೀತುಪಡಿಸಿದ ಸಂಶೋಧಕರು..!

ಸಸ್ಯಗಳು ಸಹ ಉಸಿರಾಡುತ್ತವೆ, ಅವುಗಳಿಗೂ ಜೀವವಿದೆ ಎಂದು ನಾವು ಓದಿ ತಿಳಿದುಕೊಂಡಿದ್ದೇವೆ. ಸೂರ್ಯನ ಬೆಳಕಿನಿಂದ ಅವು ತಮಗೆ ಬೇಕಾದ ಆಹಾರ ತಯಾರಿಸುತ್ತವೆ ಜೊತೆಗೆ ಆಮ್ಲಜನಕ ನೀಡಿ ಇಂಗಾಲದ ಡೈ ಆಕ್ಸೈಡ್ ಅನ್ನು ಹೀರಿಕೊಳ್ಳುತ್ತವೆ ಎಂಬುದು ಹಳೆಯ ಸಂಶೋಧನೆಯಾಗಿದೆ. ಇದಲ್ಲದೆ ನಮ್ಮ ನಡುವೆ ಇರುವ ಮಾಂಸಹಾರಿ ಸಸ್ಯಗಳ ಕುರಿತಂತೆಯೂ ನಮಗೆ ತಿಳಿದಿದೆ.

ಆದ್ರೆ ನೀವೆಂದಾದರೂ ಸಸ್ಯಗಳು ಪರಸ್ಪರ ಸಂವಹನ ಮಾಡುತ್ತವೆ ಎಂಬುದನ್ನು ಕೇಳಿದ್ದೀರಾ? ಹೌದು ಸಸ್ಯಗಳು ಪರಸ್ಪರ ಸಂವಹನ ನಡೆಸುತ್ತವೆ ಎಂಬುದು ಸಂಶೋಧಕರ ಅಧ್ಯಯನದಲ್ಲಿ ಸಾಬೀತಾಗಿದೆ. ಇಷ್ಟೇ ಅಲ್ಲ ಇದರ ವಿಡಿಯೋ ಸಹ ಚಿತ್ರೀಕರಿಸಲಾಗಿದ್ದು, ನಿಜಕ್ಕೂ ಎಲ್ಲರ ಹುಬ್ಬೇರುವಂತೆ ಮಾಡಿದೆ.

ಜಪಾನಿನ ವಿಜ್ಞಾನಿಗಳ ತಂಡವು ಸಸ್ಯಗಳ ರಹಸ್ಯ ಭಾಷೆಯನ್ನು ಪತ್ತೆ ಮಾಡಿದ್ದಾರೆ. ಅವು ಪರಸ್ಪರ ಸಂವಹನ ನಡೆಸುವುದನ್ನು ತೋರಿಸುವ ನೈಜ-ಸಮಯದ ವಿಡಿಯೋ ತುಣುಕನ್ನು ಹಂಚಿಕೊಂಡಿದ್ದಾರೆ. ಈ ವಿಸ್ಮಯ-ಸ್ಫೂರ್ತಿದಾಯಕ ಆವಿಷ್ಕಾರವು ಸಸ್ಯಗಳು ಮುಂಬರುವ ಅಪಾಯಗಳ ಬಗ್ಗೆ ಪರಸ್ಪರ ಎಚ್ಚರಿಕೆ ನೀಡುವ ವಿಧಾನಗಳಲ್ಲಿ ಒಂದಾಗಿದೆ ಎಂದು ತಿಳಿದುಬಂದಿದೆ.

ಸೈತಾಮಾ ವಿಶ್ವವಿದ್ಯಾನಿಲಯದಿಂದ ಆಣ್ವಿಕ ಜೀವಶಾಸ್ತ್ರಜ್ಞ ಮಸಾಟ್ಸುಗು ಟೊಯೋಟಾ ನೇತೃತ್ವದಲ್ಲಿ, ಪಿಎಚ್‌ಡಿ ವಿದ್ಯಾರ್ಥಿ ಯೂರಿ ಅರಾಟಾನಿ ಮತ್ತು ಪೋಸ್ಟ್‌ಡಾಕ್ಟರಲ್ ಸಂಶೋಧಕ ಟಕುಯಾ ಉಮುರಾ ಅವರನ್ನು ಒಳಗೊಂಡ ತಂಡವು ಸಸ್ಯ ಸಂವಹನದ ಕ್ಷೇತ್ರವನ್ನು ಪರಿಶೀಲಿಸಿದೆ.

'ನೇಚರ್ ಕಮ್ಯುನಿಕೇಷನ್ಸ್' ನಿಯತಕಾಲಿಕದಲ್ಲಿ ಪ್ರಕಟವಾದ ಅವರ ಅಧ್ಯಯನವು, ಒಂದು ಸಸ್ಯವು ಬಾಹ್ಯವಾಗಿ ಅದಕ್ಕೆ ಆಪತ್ತು ಎದುರಾದಾಗ ತನ್ನ ಇತರೆ ಕಾಂಡಗಳ ಜೊತೆ ಅದು ಹೇಗೆ ಪ್ರತಿಕ್ರಿಯಿಸುತ್ತದೆ, ಅದನ್ನು ಹೇಗೆ ಗ್ರಹಿಸಿ ಬೇರೆ ಎಲೆಗಳಿಗೂ ಎಚ್ಚರಿಸುತ್ತದೆ ಎಂಬುದನ್ನು ವಿವರಿಸುತ್ತದೆ. ಒಂದು ಸಸ್ಯಕ್ಕೆ ಕೀಟ ನಾಶಕ ಅಥವಾ ಅನ್ಯ ಹಾನಿಗೆ ಒಳಗಾದಾಗ ಹೊರಸೂಸುವ ಬಾಷ್ಪಶೀಲ ಸಾವಯವ ಸಂಯುಕ್ತಗಳಿಗೆ (VOCs) ಹಾನಿಯಾಗದ ಸಸ್ಯಗಳು ಹೇಗೆ ಪ್ರತಿಕ್ರಿಯಿಸುತ್ತವೆ ಎಂಬುದರ ಮೇಲೆ ಸಂಶೋಧಕರು ಗಮನಹರಿಸಿದ್ದಾರೆ.

"ಯಾಂತ್ರಿಕವಾಗಿ ಅಥವಾ ಹಾನಿಗೊಳಗಾದ ನೆರೆಯ ಸಸ್ಯಗಳಿಂದ ಬಿಡುಗಡೆಯಾದ VOC ಗಳನ್ನು ಮತ್ತೊಂದು ಸಸ್ಯವು ಗ್ರಹಿಸುತ್ತವೆ ಮತ್ತು ವಿವಿಧ ರಕ್ಷಣಾ ಪ್ರತಿಕ್ರಿಯೆಗಳನ್ನು ಪ್ರೇರೇಪಿಸುತ್ತವೆ. ಅಂತಹ ಇಂಟರ್ಪ್ಲಾಂಟ್ ಸಂವಹನವು ಪರಿಸರ ಬೆದರಿಕೆಗಳಿಂದ ಸಸ್ಯಗಳನ್ನು ರಕ್ಷಿಸುತ್ತದೆ ಎಂದು ಲೇಖಕರು ತಮ್ಮ ಅಧ್ಯಯನದಲ್ಲಿ ಹೇಳಿದ್ದಾರೆ.

ಈ ಸಂವಹನವನ್ನು ಕ್ರಿಯೆಯಲ್ಲಿ ಸೆರೆಹಿಡಿಯಲು, ವಿಜ್ಞಾನಿಗಳು ಒಂದು ಚಾಣಾಕ್ಷ ವಿಧಾನವನ್ನು ರೂಪಿಸಿದರು. ಏರ್ ಪಂಪ್‌ವೊಂದು ಎರಡು ಬಾಕ್ಸ್‌ಗಳ ಹಾದು ಹೋಗುವಂತ ರಚನೆ ಮಾಡಲಾಗಿತ್ತು. ಒಂದರಲ್ಲಿ ಸಾಸಿವೆ ಜಾತಿಗೆ ಸೇರಿದ ಸಸ್ಯವನ್ನು ಮತ್ತೊಂದರಲ್ಲಿ ಸಸ್ಯದ ಜೊತೆ ಚಿಕ್ಕ ಹುಳುಗಳ ಇಡಲಾಗಿತ್ತು.

ಸಂಶೋಧಕರು ಮರಿಹುಳುಗಳನ್ನು ಟೊಮೆಟೊ ಸಸ್ಯಗಳು ಮತ್ತು ಅರಬಿಡೋಪ್ಸಿಸ್ ಥಾಲಿಯಾನಾ ಎಲೆಗಳನ್ನು ತಿನ್ನಲು ಅವಕಾಶ ಮಾಡಿಕೊಟ್ಟರು, ಈ ಅಪಾಯದ ಸೂಚನೆಗಳಿಗೆ ಹಾನಿಯಾಗದ ಅರಬಿಡೋಪ್ಸಿಸ್ ಸಸ್ಯಗಳ ಪ್ರತಿಕ್ರಿಯೆಗಳನ್ನು ಗಮನಿಸಿದರು. ಹಾನಿಗೊಳಗಾಗದ ಸಸ್ಯವು ಅಪಾಯದ ಸಂದೇಶ ಸ್ವೀಕರಿಸುತ್ತಿರುವುದನ್ನು ವಿಡಿಯೋದಲ್ಲಿ ಸೆರೆ ಹಿಡಿಯಲಾಗಿದೆ. ಕ್ಯಾಲ್ಸಿಯಂ ಸಿಗ್ನಲಿಂಗ್‌ನ ಸ್ಫೋಟಗಳೊಂದಿಗೆ ಪ್ರತಿಕ್ರಿಯಿಸಿ, ಅವುಗಳ ಚಾಚಿದ ಎಲೆಗಳ ಉದ್ದಕ್ಕೂ ಅಲೆಯಂತೆ, ಸಸ್ಯಗಳು ಸನ್ನಿಹಿತ ಬೆದರಿಕೆಗಳ ಸಂಕೇತಗಳನ್ನು ಅರ್ಥೈಸಿಕೊಳ್ಳುವ ಮತ್ತು ಪ್ರತಿಕ್ರಿಯಿಸುವ ಗಮನಾರ್ಹ ಸಾಮರ್ಥ್ಯವನ್ನು ಪ್ರದರ್ಶಿಸಿದವು.

ಅರಬಿಡೋಪ್ಸಿಸ್‌ನಲ್ಲಿ ಕ್ಯಾಲ್ಸಿಯಂ ಸಂಕೇತಗಳನ್ನು ಉಂಟುಮಾಡುವ Z-3-HAL ಮತ್ತು E-2-HAL ಎಂಬ ಎರಡು ಸಂಯುಕ್ತಗಳನ್ನು ಗುರುತಿಸಿದ್ದಾರೆ. ಈ ಮೂಲಕ ಸಸ್ಯಗಳು ಸಹ ಅಪಾಯದ ಸೂಚನೆಯನ್ನು ಸ್ವೀಕರಿಸುತ್ತವೆ, ಇದು ತನ್ನದೇ ಸಸ್ಯದ ಕಡೆಯಿಂದ ಬಂದಿರುವ ಸಂದೇಶವಾಗಿರುತ್ತದೆ ಎಂದು ಸಂಶೋಧಕರು ವಿವರಿಸಿದ್ದಾರೆ.