ಭೂಮಿ ಮಾತ್ರವಲ್ಲ ಚಂದ್ರನಿಗೂ ತಟ್ಟಿತ್ತು ಲಾಕ್‌ಡೌನ್ ಬಿಸಿ.! ಚಂದ್ರನಲ್ಲಿ ಏನಾಗಿತ್ತು ಗೊತ್ತಾ?

ಚಂದ್ರ ಹಾಗೂ ಭೂಮಿಯ ನಡುವೆ ನೇರಾನೇರ ಸಂಬಂಧವಿದೆ ಎಂಬುದು ತಿಳಿದುರುವ ವಿಚಾರ, ಹುಣ್ಣಿಮೆ, ಅಮಾವಾಸ್ಯೆಯಲ್ಲಾಗುವ ಭೂಮಿಯ ಮೇಲಿನ ಬದಲಾವಣೆ ಸೇರಿ ಭೂಮಿಯ ಹಲವು ಬದಲಾವಣೆಗೆ ಚಂದ್ರ ಕಾರಣ. ಭೂಮಿ ಮೇಲಿನ ಕೆಲವೊಂದು ವಾತಾವರಣದ ಸಂಬಂಧಿ ಬದಲಾವಣೆಗೆ ಚಂದ್ರನೂ ಕೂಡ ಒಂದು ಕಾರಣ. ಹಾಗೆ ಚಂದ್ರನಲ್ಲಿನ ಬದಲಾವಣೆ ಭೂಮಿ ಕೂಡ ಕಾರಣ.

ಭೂಮಿ ತಿರುಗುವ ವೇಗ ಹಾಗೂ ಹಗಲು ರಾತ್ರಿಯ ನಿರ್ಧರಿತ ಅಂಶವು ಚಂದ್ರನ ಇರುವಿಕೆಗೆ ಸಂಬಂಧಿಸಿದೆ. ನಾವೀಗ ಚಂದ್ರನ ಮೇಲೂ ಇಳಿದಿದ್ದೇವೆ. ಚಂದ್ರನ ಕುರಿತು ಅಧ್ಯಯನ ನಿರಂತರವಾಗಿ ಸಾಗುತ್ತಲೇ ಇದೆ. ಇನ್ನು ಭೂಮಿಯ ಮೇಲಿನ ವಾತಾವರಣದಲ್ಲಿನ ಬದಲಾವಣೆ ಚಂದ್ರನಲ್ಲಿಯೂ ಬದಲಾವಣೆಗೆ ಕಾರಣವಾಗುತ್ತಿದೆ ಎಂಬುದು ಹೊಸ ಅಧ್ಯಯನದಲ್ಲಿ ತಿಳಿದುಬಂದಿದೆ.

ಕೋವಿಡ್ ಸಮಯದಲ್ಲಿ ಭೂಮಿಯ ಮೇಲಿನ ಮಾಲಿನ್ಯ ಎಷ್ಟು ಕಡಿಮೆಯಾಗಿತ್ತು ಎಂಬುದು ನಮಗೆಲ್ಲಾ ತಿಳಿದಿದೆ. ಗಾಳಿಯಲ್ಲಿ ಕಾರ್ಬನ್ ಮಟ್ಟ ಅತ್ಯಧಿಕ ಮಟ್ಟಕ್ಕೆ ಇಳಿಕೆ ಕಂಡಿತ್ತು, ಇದರಿಂದ ಭೂಮಿ ಒಂದಿಷ್ಟು ಕಾಲ ಹೊಸತನದಿಂದ ಕೂಡಿತ್ತು. ಮಾಲಿನ್ಯ ಕಡಿಮೆಯಾಗಿ ದೆಹಲಿಯಂತಹ ನಗರಗಳು ಕೂಡ ಪರಿಶುದ್ಧ ಗಾಳಿಯಲ್ಲಿ ಉಸಿರಾಡಿತ್ತು.

ನಾವ್ಯಾರು ಅಂದುಕೊಳ್ಳದಷ್ಟು ಮಾಲಿನ್ಯ ಪ್ರಮಾಣ ಕಡಿಮೆಯಾಗಿತ್ತು. ಇಡೀ ವಿಶ್ವದಾದ್ಯಂತ ಮಾಲಿನ್ಯ ಇಳಿಕೆ ಕಂಡಿದ್ದರಿಂದ ಭೂಮಿಯ ಮೇಲೆ ಹಲವು ಬದಲಾವಣೆಗೆ ಕಾರಣವಾಗಿತ್ತು. ಈಗ ಭಾರತೀಯ ವಿಜ್ಞಾನಿಗಳ ತಂಡ ನಡೆಸಿದ ಅಧ್ಯಯನದಲ್ಲಿ ಚಂದ್ರನ ಮೇಲೆ ಕೋವಿಡ್ ಪರಿಣಾಮ ಬೀರಿದೆ ಎಂದು ತಿಳಿದುಬಂದಿದೆ.

ಲಾಕ್‌ಡೌನ್ ಸಮಯದಲ್ಲಿ ಚಂದ್ರನ ಮೇಲ್ಮೈಯಲ್ಲಿ ತಾಪಮಾನದಲ್ಲಿ ಗಮನಾರ್ಹ ಕುಸಿತವನ್ನು ಕಂಡುಕೊಂಡಿದ್ದಾರೆ. ರಾಯಲ್ ಆಸ್ಟ್ರೋನಾಮಿಕಲ್ ಸೊಸೈಟಿಯ ಮಾಸಿಕ ನೋಟೀಸ್‌ನಲ್ಲಿ ಪ್ರಕಟವಾದ ಇತ್ತೀಚಿನ ಅಧ್ಯಯನದ ಪ್ರಕಾರ 2020ರ ಏಪ್ರಿಲ್‌ನಿಂದ ಮೇ ತಿಂಗಳ ಜಾಗತಿಕ ಲಾಕ್‌ಡೌನ್ ಸಮಯದಲ್ಲಿ ಚಂದ್ರನ ಮೇಲೆ ರಾತ್ರಿಯ ಮೇಲ್ಮೈ ತಾಪಮಾನದಲ್ಲಿ 8-10 ಕೆಲ್ವಿನ್‌ನಷ್ಟು ಕುಸಿತ ಆಗಿರುವುದು ತಿಳಿದುಬಂದಿದೆ.

ಭೌತಿಕ ಸಂಶೋಧನಾ ಪ್ರಯೋಗಾಲಯದ (PRL) ವಿಜ್ಞಾನಿಗಳಾದ ಕೆ ದುರ್ಗಾ ಪ್ರಸಾದ್ ಮತ್ತು ಜಿ ಅಂಬಿಲಿ 2017 ಮತ್ತು 2023 ರ ನಡುವೆ ಚಂದ್ರನ ಸಮೀಪದಲ್ಲಿರುವ ಆರು ವಿಭಿನ್ನ ಸ್ಥಳಗಳಲ್ಲಿನ ರಾತ್ರಿಯ ಮೇಲ್ಮೈ ತಾಪಮಾನವನ್ನು ವಿಶ್ಲೇಷಿಸಿದ್ದು, ಈ ಅಧ್ಯಯನದಲ್ಲಿ ಚಂದ್ರನ ಮೇಲೆ ತಾಪಮಾನ ಕುಸಿತ ಆಗಿರುವುದು ಕಂಡುಬಂದಿದೆ.

ಲಾಕ್‌ಡೌನ್‌ನಲ್ಲಿ ಭೂಮಿ ಮೇಲೆ ಮಾನವನ ಚಟುವಟಿಕೆಗಳಿಗೆ ಬ್ರೇಕ್ ಬಿದ್ದಿತ್ತು, ಇದರಿಂದ ಹಸಿರುಮನೆ ಪರಿಣಾಮ ಹಾಗು ಏರೋಸಾಲ್‌ಗಳ ಕುಸಿತಕ್ಕೆ ಕಾರಣವಾಗಿತ್ತು. ಇದು ಭೂಮಿಯಿಂದ ಹೊರಸೂಸುವ ವಿಕಿರಣ ಕಡಿಮೆ ಮಾಡಿತ್ತು, ಹೀಗಾಗಿ ಚಂದ್ರನ ಮೇಲೆ ಪರಿಣಾಮ ಉಂಟು ಮಾಡಲು ಸಾಧ್ಯವಾಗಿದೆ. ಭೂಮಿ ಮತ್ತು ಚಂದ್ರನ ಮೇಲೆ ಒಂದೇ ರೀತಿಯ ಕಾಸ್ಮಿಕ್ ಪರಿಸರ ವ್ಯವಸ್ಥೆ ಇದೆ. ಹೀಗಾಗಿ ಚಂದ್ರನ ಮೇಲೂ ಪರಿಣಾಮಕಾರಿಯಾಗಿ ತಾಪಮಾನ ಇಳಿಕೆಯಾಗಿದೆ.

ಈ ಸಮಯದಲ್ಲಿ ಭೂಮಿಯ ತಾಪಮಾನದಲ್ಲೂ ಬದಲಾವಣೆಯಾಗಿತ್ತು. ಇನ್ನು ಚಂದ್ರನ ಮೇಲೆ ಸುಮಾರು 6 ವರ್ಷದ ಡೇಟಾವನ್ನು ಅಧ್ಯಯನ ಮಾಡಲಾಗಿದೆ. ಚಂದ್ರನ ಮೇಲೆ ಭೂಮಿಯಿಂದ ಹೊರಡುವ ಟಿಆರ್ ವಿಕಿರಣಗಳು ನೇರವಾಗಿ ಪರಿಣಾಮ ಬೀರುತ್ತವೆ. ಆದರೆ ಲಾಕ್‌ಡೌನ್ ಸಮಯದಲ್ಲಿ ಈ ವಿಕಿರಣಗಳ ಹೊರಸೂಸುವಿಕೆಯ ಪ್ರಮಾಣ ಶೇ.20ರಷ್ಟು ಕಡಿಮೆಯಾಗಿದ್ದರಿಂದ ಚಂದ್ರನಲ್ಲಿ ತಾಪಮಾನ ಇಳಿಕೆಗೆ ಕಾರಣವಾಗಿದೆ ಎಂದು ಅಧ್ಯಯನ ತಿಳಿಸಿದೆ.