AI Blood Test: ಸೂಜಿ ಇಲ್ಲ.. ರಕ್ತ ಬೇಕಿಲ್ಲ.. ನೋವು ಆಗಲ್ಲ! 20 ಸೆಕೆಂಡ್‌ಗಳಲ್ಲೇ ಕೈಗೆ ಸೇರುತ್ತೆ ರಿಪೋರ್ಟ್‌

ಇನ್ಮುಂದೆ ರಕ್ತ ಪರೀಕ್ಷೆಗೆ ಸೂಜಿ ಬೇಕಿಲ್ಲ! ನಿಮ್ಮ ಮುಖ ಸ್ಕ್ಯಾನ್ ಮಾಡಿದ್ರೆ ಸಾಕು. 20 ಸೆಕೆಂಡುಗಳಲ್ಲಿ ಟೆಸ್ಟ್ ರಿಪೋರ್ಟ್‌ ನಿಮ್ಮ ಕೈಗೆ ಸೇರುತ್ತೆ. ಸೂಚಿ ಚುಚ್ಚಿ ರಕ್ತ ಹೊರತೆಗೆಯುವ ಅಗತ್ಯವೇ ಇಲ್ಲ. ಎಐ (AI) ಮೂಲಕ ರಕ್ತ ಪರೀಕ್ಷೆ (AI blood test) ಮಾಡಬಹುದು. ಹೌದು, ಯಾವುದೇ ರೋಗವನ್ನು ಪತ್ತೆಹಚ್ಚಲು ರಕ್ತ ಪರೀಕ್ಷೆ ಸುಲಭವಾದ ಮಾರ್ಗ. ಆದರೆ, ಈಗ ರಕ್ತ ಪರೀಕ್ಷೆಯ ಹೊಸ ವಿಧಾನ ಬರುತ್ತಿದೆ. ಯಾವುದೇ ಕಾರಣಕ್ಕೂ ಇಂಜೆಕ್ಷನ್ ಬಳಸುವ ಅಗತ್ಯವಿಲ್ಲ. ಅಂದರೆ, ಇಂಜೆಕ್ಷನ್ ಮೂಲಕ ರಕ್ತವನ್ನು ಹೊರತೆಗೆಯುವ ಅಗತ್ಯವೇ ಇರಲ್ಲ.

ರಕ್ತ ಪರೀಕ್ಷೆ ಮೂಲಕ ದೇಹದಲ್ಲಿ ಸಂಭವಿಸುವ ಸಮಸ್ಯೆಗಳನ್ನು ಪತ್ತೆ ಮಾಡಲಾಗುವುದು. ಈ ಮೂಲಕ ಸೋಂಕು, ಮಧುಮೇಹ, ಕೊಲೆಸ್ಟ್ರಾಲ್ ಮತ್ತು ಕಬ್ಬಿಣದ ಮಟ್ಟ ಇತ್ಯಾದಿಗಳು ಸೇರಿದಂತೆ ಒಟ್ಟಾರೆ ಆರೋಗ್ಯದ ಬಗ್ಗೆ ನಾವು ತಿಳಿಯುತ್ತೇವೆ. ಬ್ಲಡ್ ಚೆಕಪ್ (ರಕ್ತ ಪರೀಕ್ಷೆ) ಮೂಲಕ, ವೈದ್ಯರು ಯಾವುದೇ ರೋಗದ ಲಕ್ಷಣಗಳನ್ನು ಮುಂಚಿತವಾಗಿಯೇ ಪತ್ತೆ ಹಚ್ಚುತ್ತಾರೆ. ಯಾವುದೇ ರೋಗವನ್ನು ಪತ್ತೆಹಚ್ಚುವ ಸುಲಭವಾದ ಮಾರ್ಗ ರಕ್ತ ಪರೀಕ್ಷೆ. ಆದರೆ, ಪ್ರಸ್ತುತ ರಕ್ತ ಪರೀಕ್ಷೆಗೆಂದೇ ಹೊಸ ವಿಧಾನ ಬರುತ್ತಿದೆ. ಇನ್ಮುಂದೆ, ಇಂಜೆಕ್ಷನ್ ಬಳಸದೆಯೇ ರಕ್ತ ಪರೀಕ್ಷೆ ಮಾಡಲಾಗುತ್ತದೆ.

ಈ ಹೊಸ ರಕ್ತ ಪರೀಕ್ಷೆಯ ವಿಧಾನ ಹೇಗೆ? ಎಂಬ ಕುತೂಹಲ ನಿಮ್ಮಲ್ಲಿ ಇದ್ಯಾ? ಒಂದು ಸುಸಜ್ಜಿತ ಕೋಣೆಯಲ್ಲಿ ನಿಮ್ಮ ಮುಖವನ್ನು ಸ್ಕ್ಯಾನ್ ಮಾಡಲಾಗುತ್ತದೆ. ನಿಮಗೆ ಕೇವಲ 20 ಸೆಕೆಂಡುಗಳಲ್ಲಿ ರಕ್ತ ಪರೀಕ್ಷೆಯ ರಿಪೋರ್ಟ್‌ ನೀಡಲಾಗುವುದು. ಈ ಹೊಸ ವಿಧಾನದಿಂದ, ನಿಮ್ಮ ರಕ್ತದೊತ್ತಡ, ಹಿಮೋಗ್ಲೋಬಿನ್ ಮಟ್ಟ, ಹೃದಯ ಬಡಿತ, ಆಮ್ಲಜನಕದ ಪ್ರಮಾಣ ಮತ್ತು ಒತ್ತಡದ ಮಟ್ಟವನ್ನು ಸಹ ನೀವು ಪತ್ತೆಹಚ್ಚಬಹುದು.

ಹೆರಿಗೆ ವಾರ್ಡ್‌ಲ್ಲಿ ಕಬ್ಬಿಣದ ಮಟ್ಟ ಪತ್ತೆಹಚ್ಚಲು ಬಳಕೆ

ಕಳೆದ ವರ್ಷ (2024 ರಲ್ಲಿ) ಈ ಅಪ್ಲಿಕೇಶನ್ ಅನ್ನು ಬಿಡುಗಡೆ ಮಾಡಲಾಯಿತು. ಇತ್ತೀಚೆಗೆ ಹೈದರಾಬಾದ್‌ನ ಸರ್ಕಾರಿ ಆಸ್ಪತ್ರೆಯಲ್ಲಿ (ನಿಲೌಫ‌ರ್ ಆಸ್ಪತ್ರೆ) ಇದನ್ನು ಪ್ರಾರಂಭಿಸಲಾಗಿದೆ. ದೇಶದಲ್ಲಿ ವಿಶೇಷವಾಗಿ, ಮಹಿಳೆಯರಲ್ಲಿ ರಕ್ತಹೀನತೆಯ ಸಮಸ್ಯೆ ತುಂಬಾ ಸಾಮಾನ್ಯವಾಗಿದೆ. ಹೆರಿಗೆ ವಾರ್ಡ್‌ಲ್ಲಿ, ಈ ಆಪ್ ಗರ್ಭಿಣಿ ಮಹಿಳೆಯರಲ್ಲಿ ಕಡಿಮೆ ಕಬ್ಬಿಣದ ಮಟ್ಟವನ್ನು ಪತ್ತೆಹಚ್ಚಲು ಸಹಾಯ ಮಾಡಲಾಗಿದೆ. ಇದು ರಕ್ತಹೀನತೆಗೆ ಸಕಾಲಿಕ ಚಿಕಿತ್ಸೆ ನೀಡಲು ಅವಕಾಶ ಮಾಡಿಕೊಟ್ಟಿತು.

ದೂರದ ಬುಡಕಟ್ಟು ಪ್ರದೇಶಗಳಿಗೆ ವಿಸ್ತರಿಸುವ ಪ್ಲಾನ್

ಪ್ರಸ್ತುತ, ಮಹಾರಾಷ್ಟ್ರದಲ್ಲಿ ಈ ಅಪ್ಲಿಕೇಶನ್ ಅನ್ನು ಪ್ರಾರಂಭಿಸಲು ಡೆವಲಪರ್‌ಗಳು ಮುಂದಾಗಿದ್ದಾರೆ. ಮುಂದಿನ ದಿನಗಳಲ್ಲಿ ಕ್ರಮೇಣವಾಗಿ ರಕ್ತ ಪರೀಕ್ಷೆ ಮತ್ತು ಶುಚಿತ್ವವು ದೊಡ್ಡ ಸವಾಲಾಗಿ ಉಳಿದಿರುವ ದೂರದ ಬುಡಕಟ್ಟು ಪ್ರದೇಶಗಳಿಗೆ ವಿಸ್ತರಿಸಲು ಯೋಜಿಸಲಾಗುತ್ತಿದೆ. ಬಿಸಮ್ ಫಾರ್ಮಾಸ್ಯುಟಿಕಲ್ಸ್ ಸಂಸ್ಥಾಪಕ ಹರೀಶ್ ಬಿಸಮ್ ಅವರು, 'ಕ್ವಿಕ್ ವೈಟಲ್ಸ್' ಉಪಕರಣದ ಬಗ್ಗೆ ಮಾಹಿತಿ ನೀಡಿದ್ದಾರೆ. ಈ ಅಪ್ಲಿಕೇಶನ್ ದೇಶಾದ್ಯಂತ ರೋಗನಿರ್ಣಯದ ಆರೋಗ್ಯ ರಕ್ಷಣೆಯನ್ನು ಹೇಗೆ ಪರಿವರ್ತಿಸಲಿದೆ ಎಂಬುದರ ಬಗ್ಗೆ ಹೇಳಿದ್ದಾರೆ.

ದೇಶದ ಮೊದಲ AI ರಕ್ತ ಪರೀಕ್ಷಾ ಉಪಕರಣ

ಇದು ದೇಶದ ಮೊದಲ AI ರಕ್ತ ಪರೀಕ್ಷಾ ಉಪಕರಣ (Indias first AI blood test) ಆಗಿದೆ. ಇದು ಏಕ ಬಳಕೆದಾರ ಅಪ್ಲಿಕೇಶನ್ ಆಗಿದೆ. ಇದಕ್ಕೆ 'ಕ್ವಿಕ್ ವೈಟಲ್ಸ್' (Quick Vitals app) ಎಂದು ಹೆಸರಿಸಲಾಗಿದೆ. ಆದರೆ, ಸರ್ಕಾರಿ ಆಸ್ಪತ್ರೆಗಳಲ್ಲಿ ಪ್ರಾರಂಭಿಸಲಾದ ಈ ಅಪ್ಲಿಕೇಶನ್ ಅನ್ನು 'ಅಮೃತ್ ಸ್ವಸ್ಟ್ ಭಾರತ್' ಎಂದು ಕರೆಯಲಾಗಿದೆ. ಇದರಲ್ಲಿ, ಯಾವುದೇ ಸೂಜಿ ಇಲ್ಲದೆ ನಿಮ್ಮ ಆರೋಗ್ಯದಲ್ಲಿ ಸಮಸ್ಯೆಯನ್ನು ತಕ್ಷಣವೇ ಪತ್ತೆ ಮಾಡಬಹುದು. ಇದು ಒಂದು ನಿಮಿಷಕ್ಕಿಂತ ಕಡಿಮೆ ಸಮಯ ತೆಗೆದುಕೊಳ್ಳುತ್ತದೆ. ಈ ಸಾಧನವು ಫೋಟೋಪ್ಲೆಥಿಸ್ಟೋಗ್ರಫಿ (PPG) ಅನ್ನು ಬಳಸುತ್ತದೆ.

ಈ ಸಾಧನದ ಮೂಲಕ ಯಾವೆಲ್ಲಾ ಸಮಸ್ಯೆ ಪತ್ತೆಹಚ್ಚಬಹುದು?

- ರಕ್ತದೊತ್ತಡ
- ಹೀಮೊಗ್ಲೋಬಿನ್ A1c
- ನಾಡಿ ಉಸಿರಾಟದ ಅಂಶ (PRQ)
- ಉಸಿರಾಟದ ದರ
- ಹೃದಯ ಬಡಿತ
- ಕೊಲೆಸ್ಟ್ರಾಲ್
- ಆಮ್ಲಜನಕದ ಶುದ್ಧತ್ವ (SpO2)
- ವಿಶ್ರಾಂತಿ ಮತ್ತು ಜೀರ್ಣಕ್ರಿಯೆಯ ಪ್ರತಿಕ್ರಿಯೆ (ಪ್ಯಾರಸೈಪಥೆಟಿಕ್ ಚಟುವಟಿಕೆ)
- ಹೃದಯ ಬಡಿತದ ವ್ಯತ್ಯಾಸ (HRV)