Makar Sankranti 2026: ಜ.14 ಅಥವಾ 15? ಮಕರ ಸಂಕ್ರಾಂತಿ ನಿಖರ ದಿನಾಂಕ ಯಾವುದು? ದಾನ, ಪೂಜೆಗೆ ಶುಭ ಸಮಯ ಇಲ್ಲಿದೆ

ಜನವರಿ 14 ಅಥವಾ 15? ಮಕರ ಸಂಕ್ರಾಂತಿ ಹಬ್ಬದ ಸರಿಯಾದ ದಿನಾಂಕ ಯಾವುದು? ಪಂಚಾಂಗದ ಮಾಹಿತಿ ಇಲ್ಲಿದೆ! ಹೌದು, ಹೊಸ ವರ್ಷದ ಮೊದಲ ಪ್ರಮುಖ ಹಬ್ಬವಾದ ಮಕರ ಸಂಕ್ರಾಂತಿಯ (Makar Sankranti) ದಿನಗಣನೆ ಆರಂಭವಾಗಿದೆ. ಪ್ರತಿ ವರ್ಷದಂತೆ 2026ರ ಸಂಕ್ರಾಂತಿಯ ಕುರಿತು ಜನವರಿ 14 ಅಥವಾ 15ರಂದು (Makar Sankranti 14 or 15 January) ಆಚರಿಸಬೇಕೇ ಎಂಬ ಗೊಂದಲ ಅನೇಕರನ್ನು ಕಾಡುತ್ತಿದೆ.

ಸೂರ್ಯನು ಧನು ರಾಶಿಯಿಂದ ಮಕರ ರಾಶಿಗೆ ಪ್ರವೇಶಿಸುವ ಪುಣ್ಯಕಾಲವನ್ನೇ ಸಂಕ್ರಾಂತಿ ಎಂದು ಆಚರಿಸಲಾಗುತ್ತದೆ. ಈ ಬಾರಿಯ ಮಕರ ಸಂಕ್ರಾಂತಿಗೆ (Makar Sankranti 2026) 'ಷಟ್ತಿಲಾ ಏಕಾದಶಿ'ಯ ವಿಶೇಷ ಕಾಕತಾಳೀಯವೂ ಸೇರಿಕೊಂಡಿದೆ. ಈ ಲೇಖನದಲ್ಲಿ ಶುಭ ದಿನಾಂಕ, ಪೂಜೆ, ಪುಣ್ಯಸ್ನಾನ ಹಾಗೂ ದಾನದ ಕುರಿತು ಸಂಪೂರ್ಣ ಮಾಹಿತಿ ನೀಡಲಾಗಿದೆ.

ದಿನಾಂಕದ ಗೊಂದಲಕ್ಕೆ ತೆರೆ

ದೃಕ್ ಪಂಚಾಂಗದ ಪ್ರಕಾರ, 2026ರ ಮಕರ ಸಂಕ್ರಾಂತಿಯನ್ನು ಜನವರಿ 14, ಬುಧವಾರದಂದು ಆಚರಿಸಲಾಗುತ್ತದೆ. ಈ ದಿನ ಸೂರ್ಯನು ಮಕರ ರಾಶಿಗೆ ಪ್ರವೇಶಿಸುತ್ತಾನೆ. ಸೂರ್ಯನ ಈ ಗೋಚಾರವು ಹಗಲಿನ ವೇಳೆಯಲ್ಲೇ ಸಂಭವಿಸುವುದರಿಂದ, ಈ ವರ್ಷ ಜನವರಿ 15ಕ್ಕೆ ಹಬ್ಬ ಆಚರಿಸುವ ಅಗತ್ಯವಿಲ್ಲ. ದೇಶಾದ್ಯಂತ ಜನವರಿ 14 ರಂದೇ ಸಂಕ್ರಾಂತಿಯ ಸಡಗರ ಮನೆಮಾಡಲಿದೆ ಎಂದು ಖಚಿತಪಡಿಸಲಾಗಿದೆ.

ಶುಭ ಮುಹೂರ್ತ

- ಪಂಚಾಂಗದ ಮಾಹಿತಿ ಅನುಸಾರ, 2026ರ ಜನವರಿ 14ರಂದು ಸೂರ್ಯನು ಮಧ್ಯಾಹ್ನ ಮಕರ ರಾಶಿಗೆ ಪ್ರವೇಶಿಸುತ್ತಾನೆ.

- ಸಂಕ್ರಾಂತಿಯ ಪುಣ್ಯಕಾಲವು ಮಧ್ಯಾಹ್ನ 2:43 ರಿಂದ 3:06 ರವರೆಗೆ (ಕೆಲವು ಪಂಚಾಂಗಗಳ ಪ್ರಕಾರ 2:49 ರಿಂದ 3:13 ರವರೆಗೆ) ಇರುತ್ತದೆ.

- ಸೂರ್ಯನು ರಾಶಿ ಬದಲಿಸುವ ಈ ಮಧ್ಯಾಹ್ನದ ಶುಭ ಸಮಯವು ಪೂಜೆ ಮತ್ತು ದಾನ-ಧರ್ಮಗಳ ಆಚರಣೆಗೆ ಅತ್ಯಂತ ಪ್ರಶಸ್ತವಾಗಿದೆ.

ಮಹಾ ಪುಣ್ಯಕಾಲ

ಧಾರ್ಮಿಕ ಕಾರ್ಯಗಳನ್ನು ಕೈಗೊಳ್ಳಲು ಮಕರ ಸಂಕ್ರಾಂತಿಯ 'ಮಹಾ ಪುಣ್ಯಕಾಲ' ಅತ್ಯಂತ ಶ್ರೇಷ್ಠವೆಂದು ಪರಿಗಣಿಸಲಾಗಿದೆ. ಈ ಮಹಾ ಪುಣ್ಯಕಾಲವು ಬೆಳಿಗ್ಗೆ 07:15 ರಿಂದ 09:00 ರವರೆಗೆ ವಿಸ್ತರಿಸಿದೆ. ಅಲ್ಲದೆ, ಮಧ್ಯಾಹ್ನ 02:48 ರಿಂದ 03:42 ರವರಗೆಯೂ ಇನ್ನೊಂದು ಮಹಾ ಪುಣ್ಯಕಾಲವಿರುತ್ತದೆ. ಈ ಅವಧಿಯಲ್ಲಿ ಮಾಡುವ ಧಾರ್ಮಿಕ ವಿಧಿಗಳು ವಿಶೇಷ ಫಲ ನೀಡುತ್ತವೆ.

ಪವಿತ್ರ ನದಿ ಸ್ನಾನ

ಸಂಕ್ರಾಂತಿಯ ದಿನದಂದು ಪವಿತ್ರ ನದಿ ಸ್ನಾನಕ್ಕೆ ಹೆಚ್ಚಿನ ಮಹತ್ವವಿದೆ. ನದಿಗಳಲ್ಲಿ ಸ್ನಾನ ಮಾಡುವುದರಿಂದ ಪಾಪಗಳು ನಾಶವಾಗುತ್ತವೆ ಎಂಬ ನಂಬಿಕೆ ಚಾಲ್ತಿಯಲ್ಲಿದೆ. ಸ್ನಾನಕ್ಕೆ ಅತ್ಯಂತ ಶುಭ ಸಮಯ ಬೆಳಿಗ್ಗೆ 09:03 ರಿಂದ 10:48 ರವರೆಗೆ ಎಂದು ಸೂಚಿಸಲಾಗಿದೆ. ಸೂರ್ಯೋದಯದ ನಂತರ, ಅಂದರೆ ಸುಮಾರು 07:15 ರ ನಂತರ ಮಾಡುವ ಸ್ನಾನವು ಪುಣ್ಯದಾಯಕವೆಂದು ಶಾಸ್ತ್ರವು ಹೇಳುತ್ತದೆ.

ಷಟ್ತಿಲಾ ಏಕಾದಶಿ ವ್ರತವೂ ಇದೇ ದಿನ!

ಈ ವರ್ಷದ ಮಕರ ಸಂಕ್ರಾಂತಿಯ ಮತ್ತೊಂದು ವಿಶೇಷತೆಯೆಂದರೆ 'ಷಟ್ತಿಲಾ ಏಕಾದಶಿ' ವ್ರತವೂ ಇದೇ ದಿನ ಬಂದಿರುವುದು. ಭಗವಾನ್ ವಿಷ್ಣುವಿಗೆ ಪ್ರಿಯವಾದ ಏಕಾದಶಿ ಮತ್ತು ಸೂರ್ಯ ದೇವನಿಗೆ ಪ್ರಿಯವಾದ ಸಂಕ್ರಾಂತಿ ಒಂದೇ ದಿನ ಒಗ್ಗೂಡಿರುವುದು ಅತ್ಯಂತ ಅಪರೂಪದ ಹಾಗೂ ಶುಭಕರವಾದ ಅದೃಷ್ಟದ ಯೋಗವಾಗಿದೆ. ಈ ಯೋಗವು ಧಾರ್ಮಿಕವಾಗಿ ದೊಡ್ಡ ಮಹತ್ವವನ್ನು ಹೊಂದಿದೆ.

ಈ ಅಪರೂಪದ ದಿನದಂದು ವಿಷ್ಣು ಮತ್ತು ಸೂರ್ಯ ದೇವರನ್ನು ಆರಾಧಿಸುವುದರಿಂದ ಪಿತೃಗಳ ಆತ್ಮಕ್ಕೆ ಶಾಂತಿ ಲಭಿಸುತ್ತದೆ ಮತ್ತು ಎಲ್ಲಾ ಇಷ್ಟಾರ್ಥಗಳು ನೆರವೇರುತ್ತವೆ. ಇಂತಹ ಸಮಾಗಮದ ದಿನದಂದು ಮಾಡುವ ಪೂಜೆ-ಪುಣ್ಯಗಳಿಗೆ ಅಕ್ಷಯ ಫಲ ಸಿಗುತ್ತದೆ ಎಂಬುದು ಹಿಂದೂ ಧರ್ಮದ ನಂಬಿಕೆ.

ದಾನ-ಧರ್ಮದ ಮಹತ್ವ

ಮಕರ ಸಂಕ್ರಾಂತಿಯಂದು ಮಾಡುವ ದಾನಗಳಿಗೆ ಭಾರಿ ಮಹತ್ವವಿದೆ. ಈ ದಿನ ಮಾಡುವ ದಾನವು ನೂರು ಪಟ್ಟು ಫಲ ನೀಡುತ್ತದೆ. ದಾನ-ಧರ್ಮಗಳ ಮೂಲಕ ಪುಣ್ಯ ಸಂಪಾದನೆ ಮಾಡುವುದು ಈ ಹಬ್ಬದ ಪ್ರಮುಖ ಭಾಗವಾಗಿದೆ. ಇದು ದಾನಿಗಳಿಗೆ ಮತ್ತು ಪಡೆಯುವವರಿಗೆ ಶುಭ ತರುತ್ತದೆ.

- ಸೂರ್ಯ ದೋಷ ನಿವಾರಣೆಗಾಗಿ ಎಳ್ಳು ಮತ್ತು ಬೆಲ್ಲವನ್ನು ದಾನ ಮಾಡುವುದು ಶ್ರೇಷ್ಠವೆಂದು ಹೇಳಲಾಗುತ್ತದೆ.

- ಆರ್ಥಿಕ ಸಂಕಷ್ಟಗಳನ್ನು ದೂರಮಾಡಲು ಅನ್ನ ಅಥವಾ ಕಿಚಡಿ (ಬೇಳೆ ಅನ್ನ) ದಾನ ಮಾಡಬೇಕು.

- ಚಳಿಗಾಲದ ಸಮಯವಾಗಿರುವುದರಿಂದ ಬಡವರಿಗೆ ವಸ್ತ್ರ ಅಥವಾ ಕಂಬಳಿಗಳನ್ನು ನೀಡುವುದು ಮಹಾ ಪುಣ್ಯ ತರುತ್ತದೆ.