ಅಮ್ಮನ ಸಮಾಧಿಗೆ ಮುತ್ತಿಕ್ಕಿದ ಕಂದಮ್ಮ: ಅಜ್ಜಿ ಶೇರ್‌ ಮಾಡಿದ ವೀಡಿಯೋ ವೈರಲ್

ಕೆಲವೊಂದು ವೀಡಿಯೋಗಳನ್ನು ನೋಡಿದಾಗ ಅವರು ನಮಗೆ ಸಂಬಂಧಿಸಿದ ವಿಷಯವಲ್ಲದಿದ್ದರೂ ನಮ್ಮ ಕಣ್ಣಂಚಿನಲ್ಲಿ ನೀರು ಬರುವುದು, ಹೃದಯ ಭಾರವಾಗುವುದು ಅಂಥದ್ದೊಂದು ವೀಡಿಯೋ ಸಾಮಾಜಿಕ ತಾಣದಲ್ಲಿ ಗಮನ ಸೆಳೆಯುತ್ತಿದೆ.

ಪುಟ್ಟ ಮಗುವೊಂದು ತಾಯಿ ಸಮಾಧಿಗೆ ಹೋಗಿ ಮುತ್ತಿಕ್ಕುವ ವೀಡಿಯೋವನ್ನು ಅವನ ಅಜ್ಜಿ ಶೇರ್ ಮಾಡಿದ್ದು ಆ ವೀಡಿಯೋ ನೋಡುಗರ ಕಣ್ಣಂಚು ಒದ್ದೆ ಮಾಡುತ್ತದೆ. ಅಮ್ಮನಿಗೆ ಹಾಯ್‌ ಹೇಳಲು ಹೋಗುತ್ತಾನೆ, ಅವರ ಅಮ್ಮ ವಿಶ್ರಾಂತಿಯಲ್ಲಿರುವ ಸ್ಥಳಕ್ಕೆ ಯಾವಾಗಲೂ ಹೋಗುತ್ತಾನೆ, ನಾವಿಂದು ಅವಳಿಗೆ ಸೂರ್ಯಕಾಂತಿ, ಟ್ಯೂಲಿಪ್ಸ್ ಹೂವುಗಳನ್ನು ತಂದೆವು, ಈ ಹೂಗಳು ತುಂಬಾ ಫ್ರೆಶ್‌ ಆಗಿರುತ್ತದೆ(Saying hi to mommy 💙 He always loves visiting his momma's resting place. Today we brought her sunflowers and tulips that will last till the fresh) ಎಂದು ಬರೆದು ಆ ವೀಡಿಯೋವನ್ನು ಶೇರ್ ಮಾಡಿದ್ದಾರೆ. ಮಗು ಪ್ರತಿದಿನ ಹೋಗಿ ಸಮಾಧಿಯ ಫೋಟೋದಲ್ಲಿರುವ ತನ್ನ ತಾಯಿಯನ್ನು ಮಾತನಾಡಿಸಿ ಬರುತ್ತಾನೆ ಎಂದು ಅವರ ಅಜ್ಜಿ ಹೇಳಿದ್ದಾರೆ.

ಆ ಪುಟ್ಟ ಮಗು ನೋಡಲು 4-5 ವರ್ಷ ಇರಬಹುದು, ಅದು ಪುಟ್ಟ ಸೈಕಲ್‌ನಲ್ಲಿ ತಾಯಿ ಬಳಿ ಹೋಗಿ ಅವರ ಫೋಟೋಗೆ ಮುತ್ತಿಕ್ಕುತ್ತಾನೆ.. ಇತ್ತೀಚೆಗೆ ಇಂಥದ್ದೇ ಒಂದು ವೀಡಿಯೋ ಕರ್ನಾಟಕದಲ್ಲಿ ವೈರಲ್ ಆಗಿತ್ತು, ಪುಟ್ಟ ಮಗುವೊಂದು ತಾಯಿಯನ್ನು ಮಣ್ಣು ಮಾಡಿದ ಜಾಗಕ್ಕೆ ಹೋಗಿ ಅಮ್ಮಾ... ಅಮ್ಮಾ ಎಂದು ಕರೆಯುತ್ತಿರುವ ವೀಡಿಯೋ ವೈರಲ್ ಆಗಿತ್ತು. ಆ ಮಕ್ಕಳ ಸ್ಥಿತಿ ನೋಡುವಾಗ ಎಂಥವರ ಹೃದಯ ಕರಗುತ್ತದೆ, ಚಿಕ್ಕ ಪ್ರಾಯದಲ್ಲಿಯೇ ತಾಯಿಯನ್ನು ಕಳೆದುಕೊಂಡ ಆ ಮಕ್ಕಳ ಸ್ಥಿತಿ ಯಾವ ಮಕ್ಕಳಿಗೂ ಬಾರದಿರಲಿ ಎಂದು ದೇವರಲ್ಲಿ ಬೇಡುತ್ತೇವೆ.

ತಾಯಿ ಪ್ರೀತಿಗೆ ಸಮ ಯಾವುದೂ ಇಲ್ಲ
ತಾಯಿ ಯಾವತ್ತಿಗೂ ಎಲ್ಲಕ್ಕಿಂತ ಮಿಗಿಲು, ಅವಳ ಪ್ರೀತಿಗೆ ಸಮ ಯಾವುದೂ ಇಲ್ಲ, ಅವಳ ಪ್ರೀತಿ ಮಗುವಿಗೆ ಎಲ್ಲಿಯೂ ಸಿಗುವುದಿಲ್ಲ, ತಾಯಿ ಏನೇ ಆಗಿರಲಿ ತಾಯಿ ತಾಯಿನೇ... ಆ ಪ್ರೀತಿಯೇ ಕಳೆದುಕೊಂಡರೆ ಅದರ ಕಠೋರ ಅನುಭವ ಹೇಳಲು ಸಾಧ್ಯವಿಲ್ಲ, ಮಗುವಿಗೆ ಆ ಪ್ರೀತಿ ಯಾವತ್ತಿಗೂ ಖಾಲಿ ಖಾಲಿಯೇ....

.ಅಮ್ಮನನ್ನು ಕೊನೆಯವರೆಗೂ ನೋಡಿಕೊಳ್ಳಿ
ಅಮ್ಮನ ಬೆಲೆ ಏನು ಎಂಬುವುದು ಅಮ್ಮನನ್ನು ಕಳೆದುಕೊಂಡ ಮಕ್ಕಳಿಗೆ ಮಾತ್ರ ಗೊತ್ತಿರುತ್ತದೆ, ಆದರೆ ಇಂದಿನ ವೃದ್ಧಾಶ್ರಮಗಳನ್ನು ನೋಡುವಾಗ ಎಷ್ಟೋ ವೃದ್ಧರು ಮಕ್ಕಳ ಕ್ರೌರ್ಯದಿಂದ ವೃದ್ಧಾಶ್ರಮದಲ್ಲಿ ಕಣ್ಣೀರಿನಲ್ಲಿ ಕಳೆಯುತ್ತಿದ್ದಾರೆ, ಅಂಥ ಮಕ್ಕಳು ಇಂಥ ವೀಡಿಯೋ ನೋಡಿದಾಗ ಖಂಡಿತ ಅವರಿಗೆ ಅವರ ತಪ್ಪಿನ ಅರಿವು ಉಂಟಾಗುವುದು.

ತಾಯಿ ಮಗುವಿಗೆ ಜನ್ಮ ನೀಡುವಾಗ ತನ್ನ ಪ್ರಾಣವನ್ನು ಒತ್ತೆ ಇಟ್ಟು ಜನ್ಮ ನೀಡಿರುತ್ತಾಳೆ, ಅಲ್ಲಿಂದ ಮಕ್ಕಳನ್ನು ಒಂದು ನೆಲೆಗೆ ತರಲು ಅವಳು ಸಾಕಷ್ಟು ಕಷ್ಟಪಡುತ್ತಾಳೆ, ಅಂಥ ತಾಯಿಯನ್ನು ಕೊನೆಯವರೆಗೂ ಪ್ರೀತಿಯಿಂದ ನೋಡಿಕೊಳ್ಳುವುದು ಮಕ್ಕಳ ಕರ್ತವ್ಯ ಆಗಿರುತ್ತದೆ.

ಅಮ್ಮಾ ಎಂಬುವುದು ಸೆಂಟಿಮೆಂಟ್‌ ಅಲ್ಲ ಅವಳು ನಮ್ಮ ಶ್ರೀರಕ್ಷೆ, ಹೆತ್ತ ತಾಯಿಯನ್ನು ಗೌರವಿಸಿ, ಪ್ರೀತಿಸಿ ವೃದ್ಧಾಶ್ರಮ ಅವರು ಕಾಣುವಂತೆ ಮಾಡಬೇಡಿ.