ಬಾಂಗ್ಲಾ ಬೀದಿಯಲ್ಲಿ ಕಾಣಿಸಿಕೊಂಡರಾ ವಿರಾಟ್ ಕೊಹ್ಲಿ..! ಈ ವಿಡಿಯೋದಲ್ಲಿ ಇರೋದು ಯಾರು?

ನೀವು ಕ್ರಿಕೆಟ್ ಪ್ರೇಮಿಗಳಾಗಿದ್ದರೆ ನಿಮಗೆ ಭಾರತ ಕ್ರಿಕೆಟ್ ತಂಡದ ಆಟಗಾರರ ಪರಿಚಯ ಇದ್ದೇ ಇರುತ್ತೆ. ಅದ್ರಲ್ಲೂ ಮಾಜಿ ನಾಯಕ ವಿರಾಟ್ ಕೊಹ್ಲಿ ಬಗ್ಗೆ ಯಾರಿಗೆ ಗೊತ್ತಿಲ್ಲ. ವಿರಾಟ್ ಬ್ಯಾಟ್ ಹಿಡಿದು ಫೀಲ್ಡ್‌ಗೆ ಇಳಿದರೆ ರನ್‌ಗಳ ಮಳೆ ಬರೋದು ಪಕ್ಕ. ಅವರ ಹೆಸರಲ್ಲಿ ನೂರಾರು ರೆಕಾರ್ಡ್‌ಗಳು ತುಂಬಿವೆ. ಹೀಗಾಗಿ ಕ್ರಿಕೆಟ್‌ ಆಡದೆ ಇರುವ ದೇಶದಲ್ಲೂ ವಿರಾಟ್ ಫೇಮಸ್ ಆಗಿದ್ದಾರೆ.

ಆದ್ರೆ ಈಗೊಂದು ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದ್ದು, ವಿರಾಟ್ ಕೊಹ್ಲಿ ಬಾಂಗ್ಲಾದೇಶದಲ್ಲಿ ನಡೆಯುತ್ತಿರುವ ಪ್ರತಿಭಟನೆಯಲ್ಲಿ ಭಾಗಿಯಾಗಿದ್ದಾರೆ ಎಂದು ಹರಡಲಾಗಿದೆ. ಬಾಂಗ್ಲಾದೇಶದಲ್ಲಿ ಅರಾಜಕತೆಯಂತಹ ಪರಿಸ್ಥಿತಿ ನಿರ್ಮಾಣವಾಗಿದ್ದು, ಯುವ ಜನತೆಯ ಪ್ರತಿಭಟನೆ ಹಿಂಸಾರೂಪ ಪಡೆದು ಬಳಿಕ ಪ್ರಧಾನಿ ಶೇಖ್ ಹಸೀನ ರಾಜೀನಾಮೆ ನೀಡಿ ದೇಶ ತೊರೆದಿದ್ದಾರೆ.

ಈ ಹಿನ್ನೆಲೆ ದೇಶದಲ್ಲಿ ಈಗ ಮಿಲಿಟರಿ ಆಡಳಿತ ಜಾರಿಯಾಗಿದೆ. ಸರ್ಕಾರಿ ಉದ್ಯೋಗದಲ್ಲಿನ ಮೀಸಲಾತಿ ವಿರುದ್ಧ ಆರಂಭಗೊಂಡಿದ್ದ ಪ್ರತಿಭಟನೆ ಬಳಿಕ ಉಗ್ರ ರೂಪ ಪಡೆದಿದ್ದಲ್ಲದೆ ದೇಶದೆಲ್ಲೆಡೆ ಹಿಂಸಾಚಾರ, ಘರ್ಷಣೆ ಏರ್ಪಟ್ಟಿತ್ತು. ಆದರೆ ಈಗ ಮಿಲಿಟರಿ ಆಡಳಿತ ಜಾರಿಯಾಗಿದೆ. ಈ ನಡುವೆ ಬಾಂಗ್ಲಾದೇಶದಲ್ಲಿ ಸಂಭ್ರಮಾಚರಣೆ ನಡೆಯುತ್ತಿದೆ. ಬೀದಿ ಬೀದಿಯಲ್ಲಿ ಯುವ ಜನೆತೆಯ ಜಯ ಘೋಷಗಳು ಮೊಳಗುತ್ತಿವೆ.

ಈ ರೀತಿಯ ಸಂಭ್ರಮಾಚರಣೆಯ ನಡುವ ವಿರಾಟ್ ಕೊಹ್ಲಿಯ ವಿಡಿಯೋ ಸಹ ವೈರಲ್ ಆಗಿದೆ. ಆದ್ರೆ ಅದು ನಿಜವಾದ ವಿರಾಟ್ ಕೊಹ್ಲಿ ಅಲ್ಲವೇ ಅಲ್ಲ. ವಿರಾಟ್ ಕೊಹ್ಲಿ ಸದ್ಯ ಶ್ರೀಲಂಕಾದಲ್ಲಿ ನಡೆಯುತ್ತಿರುವ ಭಾರತ ಹಾಗೂ ಶ್ರೀಲಂಕಾ ನಡುವಿನ ಏಕದಿನ ಪಂದ್ಯದಲ್ಲಿ ಆಡುತ್ತಿದ್ದಾರೆ. ಆದರೆ ಇದು ಕೊಹ್ಲಿಯಂತೆಯೇ ಕಾಣುತ್ತಿರುವ ಯುವಕನೊಬ್ಬನ ವಿಡಿಯೋ ಆಗಿದೆ.

ಪ್ರತಿಭಟನಾ ನಿರತರು ಅಲ್ಲಿ ಸಂಭ್ರಮಾಚರಣೆ ಮಾಡುತ್ತಿದ್ದು, ಈ ಕೊಹ್ಲಿ ಕೊಹ್ಲಿಯಂತೆ ಕಾಣುವ ವ್ಯಕ್ತಿಯನ್ನು ಹೆಗಲ ಮೇಲೆ ಹೊತ್ತು ಕುಣಿಯುತ್ತಿದ್ದಾರೆ. ಆತ ಸಹ ಕೊಹ್ಲಿಯಂತೆ ಕಾಣುತ್ತಿದ್ದು, ಕನ್ನಡಕ ಸಹ ಹಾಕಿ ಜೈಕಾರ ಹಾಕುತ್ತಿದ್ದಾನೆ. ಈ ವಿಡಿಯೋ ನೋಡಿದ ಮಂದಿ ಒಂದು ಕ್ಷಣ ಶಾಕ್‌ಗೆ ಒಳಗಾಗಿದ್ದಾರೆ.

ವೀಡಿಯೊದಲ್ಲಿ ವಿರಾಟ್ ಕೊಹ್ಲಿ ಅಂತೆ ಕಾಣುವ ವ್ಯಕ್ತಿ ಆರ್‌ಸಿಬಿ ಲೋಗೋ ಇರುವ ಟೋಪಿಯನ್ನು ಸಹ ಹಾಕಿದ್ದಾನೆ ಎಂದು ಕೆಲವರು ಹೇಳುತ್ತಿದ್ದಾರೆ. ವೀಡಿಯೊ ಸುಮಾರು 1.4 ಲಕ್ಷ ವೀಕ್ಷಣೆಗಳ ಕಂಡಿದೆ. ಅಲ್ಲದೆ ವಿಡಿಯೋ ನೋಡಿದ ಮಂದಿ ಇದು ನಿಜವಾಗಿಯೂ ವಿರಾಟ್ ಕೊಹ್ಲಿ ಎಂದು ತಿಳಿದು ವಿಭಿನ್ನ ಕಮೆಂಟ್ ಮಾಡಿದ್ದಾರೆ.

ಅಲ್ಲದೆ ಆತನ ಜೊತೆ ಫೋಟೋ ಕ್ಲಿಕ್ಕಿಸಲು ಯುವಕರು ಮುಗಿಬಿದ್ದ ಘಟನೆಯೂ ನಡೆದಿದೆ. ನಿಜವಾಗಲು ವಿರಾಟ್ ಕೊಹ್ಲಿ ಬಂದಿರಬಹುದು ಎಂದು ತಿಳಿದ ಮಂದಿ ಗುಂಪು ಗುಂಪಲ್ಲಿ ಜಾಗಕ್ಕೆ ಬಂದು ಆತನ ಜೊತೆ ಸೆಲ್ಪಿಗೆ ಮುಗಿಬಿದ್ದರು, ಇನ್ನು ವಿಡಿಯೋವನ್ನು ಬಾಂಗ್ಲಾದೇಶದ ಯುವಕರ ಸಂಭ್ರಮದಲ್ಲಿ ಭಾಗಿಯಾಗಿರುವ ವಿರಾಟ್ ಕೊಹ್ಲಿ ಎಂದು ಬರೆದು ಹಂಚಿಕೊಳ್ಳಲಾಗಿದೆ.

ನಿಜವಾಗಲು ವಿರಾಟ್ ಕೊಹ್ಲಿ ಬಾಂಗ್ಲಾದೇಶದಲ್ಲಿದ್ದಾರಾ? ಅವರಿ ಬಾಂಗ್ಲಾ ಯುವಕರಿಗೆ ಬೆಂಬಲ ನೀಡಿದ್ದಾರೆ ಎಂದು ತಿಳಿದರೆ ಸಂತೋಷವಾಗುತ್ತಿದೆ ಎಂದು ಬಳಕೆದಾರರೊಬ್ಬರು ಬರೆದುಕೊಂಡಿದ್ದಾರೆ. ಮತ್ತೊಬ್ಬರು ವಿರಾಟ್‌ ಕೊಹ್ಲಿ ಶ್ರೀಲಂಕಾ ಬಿಟ್ಟು ಬಾಂಗ್ಲಾದಲ್ಲಿ ಏನು ಮಾಡುತ್ತಿದ್ದಾರೆ ಎಂದು ಪ್ರಶ್ನೆ ಮಾಡಿದ್ದಾರೆ.