ಫೋನ್ ಪಾಸ್‌ವರ್ಡ್ ಮರೆತಿದ್ದೀರಾ? ಸರ್ವಿಸ್ ಸೆಂಟರ್‌ಗೆ ಹೋಗದೆ ಅನ್‌ಲಾಕ್ ಮಾಡಿ.. ಹೇಗೆ ಗೊತ್ತಾ?

ಫೋನ್ ಪಾಸ್‌ವರ್ಡ್ ಮರೆತಿದ್ದೀರಾ? ಸೇವಾ ಕೇಂದ್ರಕ್ಕೆ ಹೋಗದೆ ನಿಮ್ಮ ಲಾಕ್ ಆದ ಸ್ಮಾರ್ಟ್‌ಫೋನ್‌ಗಳನ್ನು ಮನೆಯಲ್ಲೇ ಅನ್‌ಲಾಕ್ ಮಾಡುವ ವಿಧಾನಗಳಿಲ್ಲಿವೆ. ಹೌದು, ಸ್ಮಾರ್ಟ್‌ಫೋನ್‌ಗಳು (Smartphones) ವೈಯಕ್ತಿಕ ಹಾಗೂ ಪ್ರಮುಖ ಮಾಹಿತಿಯನ್ನು ಒಳಗೊಂಡಿರುತ್ತವೆ. ಈ ಡೇಟಾ ಸುರಕ್ಷತೆಗೆ ಪಾಸ್‌ವರ್ಡ್, ಪಿನ್ ಅಥವಾ ಪ್ಯಾಟರ್ನ್‌ಗಳನ್ನು ಬಳಸಲಾಗುತ್ತದೆ. ಕೆಲವೊಮ್ಮೆ ಈ ಭದ್ರತಾ ಸಂಕೇತಗಳನ್ನು ಮರೆತಾಗ, ಫೋನ್‌ಗೆ ಪ್ರವೇಶಿಸಲಾಗದೆ ಲಾಕ್ ಆಗುವುದು ಸಾಮಾನ್ಯವಾಗಿದೆ.

ಫೋನ್ (Phone) ಲಾಕ್ ಆದಾಗ ತಕ್ಷಣ ಸೇವಾ ಕೇಂದ್ರಕ್ಕೆ (Service Center) ಹೋಗುವ ಅಗತ್ಯವಿಲ್ಲ. ಸ್ಮಾರ್ಟ್‌ಫೋನ್‌ನ (mobile) ಆಪರೇಟಿಂಗ್ ಸಿಸ್ಟಮ್ (OS) ಆಧರಿಸಿ, ಮನೆಯಲ್ಲೇ ಅನ್‌ಲಾಕ್ ಮಾಡಲು ಹಲವು ಮಾರ್ಗಗಳಿವೆ. ಆಂಡ್ರಾಯ್ಡ್ ಮತ್ತು ಐಫೋನ್ ಬಳಕೆದಾರರಿಗಾಗಿ ಎರಡು ಪ್ರಮುಖ ಅನ್‌ಲಾಕ್ ವಿಧಾನಗಳನ್ನು ಇಲ್ಲಿ ಹಂತ ಹಂತವಾಗಿ ವಿವರಿಸಲಾಗಿದೆ.

ಆಂಡ್ರಾಯ್ಡ್ ಬಳಕೆದಾರರಿಗೆ ಅನ್‌ಲಾಕ್ ವಿಧಾನಗಳು

ಆಂಡ್ರಾಯ್ಡ್ ಫೋನ್‌ಗಳನ್ನು ಅನ್‌ಲಾಕ್ ಮಾಡಲು ಎರಡು ಮುಖ್ಯ ವಿಧಾನಗಳಿವೆ. ಗೂಗಲ್ ಖಾತೆಯು ಪಾಸ್‌ವರ್ಡ್ ಮರೆತಾಗ ನಿಮ್ಮ ನೆರವಿಗೆ ಬರುತ್ತದೆ.

- ಫೋನ್‌ನ ಪಾಸ್‌ವರ್ಡ್, ಪಿನ್ ಅಥವಾ ಪ್ಯಾಟರ್ನ್ ಅನ್ನು ಕೆಲವು ಬಾರಿ ತಪ್ಪಾಗಿ ನಮೂದಿಸಿದರೆ, 'Forgot Pattern / Password' ಆಯ್ಕೆ ಕಾಣಿಸುತ್ತದೆ.

- ಇದನ್ನು ಟ್ಯಾಪ್ ಮಾಡಿ, ನಿಮ್ಮ ಫೋನ್‌ನಲ್ಲಿ ನೋಂದಾಯಿಸಲಾದ ಗೂಗಲ್ ಖಾತೆಯ ಇಮೇಲ್ ಮತ್ತು ಪಾಸ್‌ವರ್ಡ್ ನಮೂದಿಸಿ ಲಾಗಿನ್ ಮಾಡಿ.

- ಲಾಗಿನ್ ಆದ ತಕ್ಷಣ ಫೋನ್ ಅನ್‌ಲಾಕ್ ಆಗಿ, ಹೊಸ ಪಾಸ್‌ವರ್ಡ್ ಅಥವಾ ಪ್ಯಾಟರ್ನ್ ಸೆಟ್ ಮಾಡಲು ಅವಕಾಶ ನೀಡುತ್ತದೆ.

- ಈ ವಿಧಾನಕ್ಕೆ ಸಕ್ರಿಯ ಇಂಟರ್ನೆಟ್ ಸಂಪರ್ಕ ಕಡ್ಡಾಯ. ಪ್ರಮುಖ ಅನುಕೂಲವೆಂದರೆ, ನಿಮ್ಮ ಯಾವುದೇ ಡೇಟಾ ಅಳಿಸಿಹೋಗುವುದಿಲ್ಲ.

ಫ್ಯಾಕ್ಟರಿ ರೀಸೆಟ್ ವಿಧಾನ

ಮೊದಲ ವಿಧಾನ ವಿಫಲವಾದರೆ, ಫೋನ್ ಅನ್ನು ಫ್ಯಾಕ್ಟರಿ ರೀಸೆಟ್ (Factory Reset) ಮಾಡಬಹುದು.

- ಇದಕ್ಕಾಗಿ, ಫೋನ್ ಅನ್ನು ಸ್ವಿಚ್ ಆಫ್ ಮಾಡಿ.

- ನಂತರ ಪವರ್ ಬಟನ್ ಹಾಗೂ ವಾಲ್ಯೂಮ್ ಅಪ್ ಅಥವಾ ವಾಲ್ಯೂಮ್ ಡೌನ್ ಬಟನ್ (ಮಾದರಿಗೆ ಅನುಗುಣವಾಗಿ) ಅನ್ನು ಏಕಕಾಲದಲ್ಲಿ ಒತ್ತಿ ಹಿಡಿದು 'ರಿಕವರಿ ಮೋಡ್'ಗೆ ಪ್ರವೇಶಿಸಿ.

- ರಿಕವರಿ ಮೋಡ್‌ನಲ್ಲಿ 'Wipe data / Factory Reset' ಆಯ್ಕೆ, ನಂತರ 'Clean / Erase Data' ಮತ್ತು 'Wipe Cache' ಆಯ್ಕೆಗಳನ್ನು ಕನ್ಫರ್ಮ್ ಮಾಡಿ.

- ರೀಬೂಟ್ ಆದ ನಂತರ ಫೋನ್ ಹೊಸದಾಗಿ ಸೆಟಪ್ ಮಾಡುವ ಆಯ್ಕೆ ತೋರಿಸುತ್ತದೆ.

- ಈ ವಿಧಾನದಿಂದ ಫೋನ್ ಅನ್‌ಲಾಕ್ ಆದರೂ ನಿಮ್ಮೆಲ್ಲಾ ಡೇಟಾ (ಫೋಟೋ, ವಿಡಿಯೋ, ಆಪ್ಸ್) ಶಾಶ್ವತವಾಗಿ ಅಳಿಸಿಹೋಗುತ್ತವೆ.

- ಡೇಟಾ ನಷ್ಟದ ಅಪಾಯದ ಬಗ್ಗೆ ತಿಳಿದಿರಬೇಕು.

ಐಫೋನ್ ಬಳಕೆದಾರರಿಗಾಗಿ ಪಾಸ್‌ಕೋಡ್ ಅನ್‌ಲಾಕ್ ವಿಧಾನ

ಐಫೋನ್ ಬಳಕೆದಾರರು ತಮ್ಮ ಪಾಸ್‌ಕೋಡ್ ಮರೆತಿದ್ದರೆ, ಕಂಪ್ಯೂಟರ್ ಸಹಾಯದಿಂದ ಅದನ್ನು ಅನ್‌ಲಾಕ್ ಮಾಡಬಹುದು.

- ಮೊದಲು ಐಫೋನ್ ಅನ್ನು ಸ್ವಿಚ್ ಆಫ್ ಮಾಡಿ.

- ನಂತರ ಅದನ್ನು (iTunes ಅಥವಾ Finder ಇನ್‌ಸ್ಟಾಲ್ ಆಗಿರುವ) PC ಅಥವಾ MacBook ಗೆ ಸಂಪರ್ಕಿಸಿ.

- ಸಂಪರ್ಕವಿರುವಾಗ, ಫೋನ್ ಮಾದರಿಗೆ ಅನುಗುಣವಾಗಿ ಸೂಕ್ತ ಬಟನ್‌ಗಳನ್ನು ಒತ್ತಿ ಹಿಡಿದು 'ರಿಕವರಿ ಮೋಡ್'ಗೆ ತನ್ನಿ.

- ಐಟ್ಯೂನ್ಸ್ / ಫೈಂಡರ್‌ನಲ್ಲಿ ಫೋನ್ ಗೋಚರಿಸಿದಾಗ, 'Restore' ಆಯ್ಕೆ ಕ್ಲಿಕ್ ಮಾಡಿ.

- ಈ ಪ್ರಕ್ರಿಯೆಯು ನಿಮ್ಮ ಐಫೋನ್‌ನ ಎಲ್ಲ ಡೇಟಾ ಮತ್ತು ಪಾಸ್‌ಕೋಡ್ ಅನ್ನು ಅಳಿಸಿಹಾಕುತ್ತದೆ.

ರೀಸ್ಟೋರ್ ಮುಗಿದ ನಂತರ, ಹೊಸ ಪಾಸ್‌ಕೋಡ್ ಸೆಟ್ ಮಾಡಬಹುದು. iCloud ಬ್ಯಾಕಪ್‌ನಿಂದ ನಿಮ್ಮ ಡೇಟಾ, ಅಪ್ಲಿಕೇಶನ್‌ಗಳು ಮತ್ತು ಸೆಟ್ಟಿಂಗ್‌ಗಳನ್ನು ಮತ್ತೆ ಪಡೆದುಕೊಳ್ಳಲು ಸಹ ಸಾಧ್ಯವಿದೆ.