ಮನೆಯಲ್ಲಿ ಘಮ ಘಮಿಸುವ ಮಲ್ಲಿಗೆ ಗಿಡ ಬೆಳೆಸೋದು ಹೇಗೆ..? ಇಲ್ಲಿದೆ ಮಾಹಿತಿ

ಮನೆಯಲ್ಲಿ ಹೂವಿನ ಗಿಡ ನೆಡಬೇಕು ಅನ್ನೋದು ಎಲ್ಲರ ಆಸೆಯಾಗಿರುತ್ತೆ. ಅದರಂತೆ ಹೂ ಬಿಡುವ ಗಿಡಗಳಿಗೆ ಸಿಕ್ಕಾಪಟ್ಟೆ ಡಿಮ್ಯಾಂಡ್ ಸಹ ಇದೆ. ಹೀಗಾಗಿ ಮನೆಯಲ್ಲಿ ಗುಲಾಬಿ, ಮಲ್ಲಿಗೆ ಸೇರಿ ಕೆಲ ಸಣ್ಣ ಸಣ್ಣ ಗಿಡದಲ್ಲಿ ಬೆಳೆಯುವ ಹೂವಿನ ಗಿಡಗಳ ನಡುತ್ತಾರೆ. ಮನೆಯಲ್ಲಿ ಸಣ್ಣದಾದ ಹೂವಿನ ತೋಟ ಮಾಡುವುದು ಹಲವರ ಕನಸಾಗಿರುತ್ತೆ.

ಈ ರೀತಿಯ ಹೂವಿನ ತೋಟದಲ್ಲಿ ಹೂವುಗಳ ಒಮ್ಮೆ ಅರಳಿದಾಗ ನೋಡಲು ಸುಂದರವಾಗಿ ಕಾಣುತ್ತದೆ. ಈಗ ದೊಡ್ಡ ದೊಡ್ಡ ನಗರಗಳಲ್ಲೂ ಮನೆ ಒಳಗೆ ಟೆರೆಸ್ ಮೇಲೆಯೂ ಹೂವಿನ ಗಿಡಗಳ ನೆಟ್ಟು ಪೋಷಿಸುತ್ತಾರೆ. ಸಣ್ಣ ಗಿಡಗಳಿಗೂ ಅಲ್ಲಿ ಸಾವಿರಾರು ರೂಪಾಯಿ ನೀಡಿ ಖರೀದಿಸಿ ತಂದು ನೀರು ಹಾಕಿ ಬೆಳೆಸುತ್ತಾರೆ.

ಆದರೆ ಮಲ್ಲಿಗೆ ಹೂವು ಮನೆಯಲ್ಲಿ ಬೆಳೆಯುವುದು ಸ್ವಲ್ಪ ಕಷ್ಟದ ಕೆಲಸ. ಏಕೆಂದರೆ ಇದಕ್ಕೆ ಸರಿಯಾದ ಆರೈಕೆಯ ಹೊರತು ಅವು ಚೆನ್ನಾಗಿ ಬೆಳೆಯುವುದಿಲ್ಲ. ಬೇರೆಲ್ಲಾ ಹೂವಿನ ಗಿಡಗಳಿಗಿಂತ ಮಲ್ಲಿಗೆ ಹೂವು ತುಂಬಾನೆ ಪರಿಮಳಯುಕ್ತವಾಗಿರುತ್ತೆ. ಹೀಗಾಗಿ ಹೆಚ್ಚಿನವರು ಈ ಹೂವಿನ ಗಿಡ ಬೆಳೆಯಲು ಇಷ್ಟಪಡುತ್ತಾರೆ.

ಹಾಗಾದರೆ ನಾವಿಂದು ಮನೆಯಲ್ಲಿ ಮಲ್ಲಿಗೆ ಹೂವಿನ ಗಿಡ ಬೆಳೆಸುವುದು ಹೇಗೆ ಎಂಬುದನ್ನು ತಿಳಿಯೋಣ. ಏಕೆಂದರೆ ಮಲ್ಲಿಗೆ ಹೂವು ಬೆಳೆದರೆ ಅದು ಅರಳಿದಾಗ ಸುವಾಸನೆ ನಿಮ್ಮ ದಣಿವು ನಿವಾರಿಸುವಷ್ಟು ಪ್ರಬಲವಾಗಿರುತ್ತೆ. ಸಂಜೆ ವೇಳೆ ಮಲ್ಲಿಗೆಯ ಸುವಾಸನೆ ಮನೆ ತುಂಬುತ್ತದೆ. ಇದು ಮನಸ್ಸಿಗೆ ಶಾಂತಿ, ನೆಮ್ಮದಿ ನೀಡುತ್ತದೆ.

ಮಲ್ಲಿಗೆ ಗಿಡ ನೆಡಲು ಒಂದು ಮಣ್ಣಿನ ಪಾಟ್ ಆಯ್ಕೆ ಮಾಡಿಕೊಳ್ಳಿ. ಏಕೆಂದರೆ ಪ್ಲಾಸ್ಟಿಕ್ ಪಾಟ್‌ನಲ್ಲಿ ನೆಟ್ಟರೆ ಅದು ಸೂರ್ಯನ ಬಿಸಿಲಿಗೆ ಬಿಸಿಯಾದಾಗ ಮಲ್ಲಿಗೆ ಗಿಡ ಸಾಯುವ ಸಂಭವವಿರುತ್ತದೆ. ಮಣ್ಣಿನ ಮಡಕೆಯಲ್ಲಿ ಗಿಡ ಬೇರುಗಳು ಚೆನ್ನಾಗಿ ಹರಡಿಕೊಳ್ಳುತ್ತವೆ. ಮೊದಲು ಗಿಡ ನೆಡಲು ಮಣ್ಣನ್ನು ಹದ ಮಾಡಿಕೊಳ್ಳಬೇಕು. ಫಲವತ್ತಾದ ಮಣ್ಣನ್ನು ಆರಿಸಿಕೊಳ್ಳಬೇಕು. ಆದರೆ ಕೆಲವು ಬಾರಿ ನರ್ಸರಿಯಲ್ಲಿ ಅವರು ಮೊದಲೇ ಮಣ್ಣು ಹಾಕಿ ನೆಟ್ಟಿರುವ ಗಿಡ ನೀಡುತ್ತಾರೆ.

ಆದರೆ ಈ ಮಣ್ಣು ಗಿಡ ಬೆಳೆಯಲು ಉತ್ತಮವಾಗಿರುತ್ತೆ. ಅವರು ಸೂಕ್ತ ಪ್ರಮಾನದಲ್ಲಿ ಕೀಟನಾಶಕ, ಗೊಬ್ಬರ ಹಾಕಿ ಗಿಡ ಬೆಳೆಸಿರುತ್ತಾರೆ. ಒಂದು ವೇಳೆ ನೀವು ಮನೆಯಲ್ಲಿ ಅದನ್ನು ಬೇರೆ ಕಡೆ ನೆಡುವುದಾದರೆ ಇಲ್ಲವೆ ಬೇರೊಂದು ಪಾಟ್‌ನಲ್ಲಿ ಬೆಳೆಸುವುದಾದರೆ ನೀವೇ ಸರಿಯಾದ ರೀತಿ ಮಣ್ಣು ಮಾಡಿಕೊಳ್ಳಿ.

ಮಲ್ಲಿಗೆ ಗಿಡವನ್ನು ಪೋಷಿಸಲು ಗೊಬ್ಬರವನ್ನು ಸಹ ವ್ಯಾಪಕವಾಗಿ ಬಳಸಬೇಕು. ಇದಕ್ಕಾಗಿ ನೀವು ಎರೆಹುಳು ಗೊಬ್ಬರ ಬಳಸಬಹುದು. ಇದರಲ್ಲಿ ಫಲವತ್ತತೆ ಅಧಿಕವಾಗಿದ್ದು, ಗಿಡ ಬೇಗ ಬೆಳೆಯುತ್ತದೆ. ಇನ್ನು ಮಲ್ಲಿಗೆ ಗಿಡಕ್ಕೆ ಸೂರ್ಯನ ಬೆಳಕು ಅತ್ಯಗತ್ಯ ಹೀಗಾಗಿ ಸೂರ್ಯನ ಬೆಳಕು ಬೀಳೂಕ ಕಡೆಯಲ್ಲಿ ಗಿಡ ಇಡುವುದು ಉತ್ತಮ. ಇನ್ನು ಬೆಳಗ್ಗೆ ಒಂದು ಬಾರಿ ಮತ್ತು ಸಂಜೆ ಒಂದು ಬಾರಿ ಗಿಡಕ್ಕೆ ನೀರು ಹಾಕಬೇಕು. ಸುಮಾರು 6 ಗಂಟೆ ಸೂರ್ಯನ ಬೆಳಕಿನಲ್ಲಿಡಬೇಕು. ಹೀಗಾದಾಗ ಮಲ್ಲಿಗೆ ಗಿಡ ಬೇಗ ಬೆಳೆಯುತ್ತದೆ.

ಮಲ್ಲಿಗೆ ಗಿಡವನ್ನು ಕಾಲಕಾಲಕ್ಕೆ ಕತ್ತರಿಸುತ್ತಿರಬೇಕು. ಏಕೆಂದರೆ ಮಲ್ಲಿಗೆ ಗಿಡ ಬೇಗನೆ ಬಳ್ಳಿಯಾಗಿ ಹಬ್ಬಲು ಆರಂಭವಾಗುತ್ತದೆ. ಅದು ಬಳ್ಳಿ ಆಕಾರಕ್ಕೆ ಬರಲು ಬಿಡಬಾರದು ಹೀಗಾಗಿ ಅದರ ತಲೆ ಕತ್ತರಿಸುತ್ತಾ ಇರಬೇಕು. ಹೀಗೆ ಕತ್ತರಿಸಿದಾಗ ಅದು ಕವಲು ಒಡೆದು ಸಿಕ್ಕ ಪೊದೆಯಂತೆ ಬೆಳೆಯುತ್ತದೆ. ಜೊತೆಗೆ ಬೇಗನೇ ಹೂವು ಬಿಡಲು ಆರಂಭಿಸುತ್ತದೆ. ಇದು ಹೂ ಬಿಡುವ ಸಸ್ಯ ಆಗಿರುವುದರಿಂದ ಕೀಟಗಳ ಬಾದೆ ಕಾಡುತ್ತದೆ. ಹೀಗಾಗಿ ತಿಂಗಳಿಗೆ ಒಮ್ಮೆಯಾದರು, ಕೀಟನಾಶಕ ಸಿಂಪಡಿಸಬೇಕು. ಬೇವಿನ ಎಣ್ಣೆಯ ನೀರು ಹಾಕುತ್ತಾ ಇರಬೇಕು.