+92 ನಂಬರ್‌ನಿಂದ ಕರೆ ಬಂದಿದ್ಯಾ..? ಟೆಲಿಕಾಂ ಇಲಾಖೆ ಎಚ್ಚರಿಕೆ..!

ನಿಮ್ಮ ಮೊಬೈಲ್‌ಗೆ ನಿತ್ಯ ಏನಿಲ್ಲಾ ಅಂದ್ರು ಒಂದೆರಡು ಕಂಪನಿಗಳು ಕರೆ ಮಾಡುತ್ತವೆ. ಅವು ಲೋನ್ ತೆಗೆದುಕೊಳ್ಳಿ ಅಂತಲೋ ಇಲ್ಲ ಕ್ರೆಡಿಟ್, ಡೆಬಿಟ್ ಕಾರ್ಡ್ ತೆಗೆದುಕೊಳ್ಳಿ ಅಂತಲೋ ಅಥವಾ ನಮ್ಮ ಶಾಪ್‌ನಲ್ಲಿ ಆಫರ್ ನಡೆಯುತ್ತಿದೆ ಅಂತಲೋ ಕರೆಗಳು ಬರುತ್ತವೆ. ನಾವು ಈ ಕಂಪನಿ ನಂಬರ್‌ಗಳ ನೋಡಿದ ತಕ್ಷಣವೇ ಆ ಕರೆಯನ್ನು ಕಟ್ ಮಾಡುತ್ತೇವೆ. ಇಲ್ಲವೆ ರಿಸೀವ್ ಮಾಡಿ 5 ಸೆಕೆಂಡ್ ಬಳಿಕ ಅದು ಕಂಪನಿಯದ್ದು ಎಂದು ಖಾತರಿ ಪಡಿಸಿಕೊಂಡು ಕರೆ ಕಟ್ ಮಾಡುತ್ತೇವೆ.

ಆದ್ರೆ ಇತ್ತೀಚಿಗೆ ನಿಮಗೂ ವಾಟ್ಸಾಪ್‌ ಮೂಲಕ ಕರೆ ಬರುತ್ತಿರುವುದು ನೋಡಬಹುದು. ಏಕೆಂದರೆ ಈ ಕಂಪನಿಗಳು ಗ್ರಾಹಕರ ತಲುಪಲು ಸುಲಭ ಮಾರ್ಗ ಕಂಡುಕೊಂಡಿದ್ದು, ನೇರವಾಗಿ ವಾಟ್ಸಾಪ್ ಮೂಲಕ ಕರೆ ಮಾಡುತ್ತವೆ. ನೀವು ಫೋನ್‌ನಲ್ಲಿ ಟ್ರೂಕಾಲರ್ ಹಾಕಿಕೊಂಡಿದ್ದರೆ ಅದು ಇಂತಹ ಕರೆಗಳ ಬ್ಲಾಕ್ ಮಾಡಲಿದೆ. ಆದರೆ ವಾಟ್ಸಾಪ್ ಮೂಲಕ ಕರೆ ಮಾಡಿದರೆ ನಿಮಗೆ ತಲುಪುತ್ತದೆ ಎಂಬುದು ಕಂಪನಿಗಳ ಪ್ಲಾನ್ ಆಗಿದೆ.

ಆದರೆ ವಾಟ್ಸಾಪ್‌ನಲ್ಲಿ ನಿಮಗೆ ಯಾವ ದೇಶದ ಮೂಲಕ ಬೇಕಾದರು ಕರೆ ಮಾಡಬಹುದು. ಆದರೆ ಸಾಮಾನ್ಯ ಕರೆಯಲ್ಲಾದರೆ ಇದು ಅಸಾಧ್ಯವಾಗುತ್ತದೆ. ಅಲ್ಲಿ ರೋಮಿಂಗ್, ಐಪಿ ಅಡ್ರೆಸ್ ಎಲ್ಲವು ದಾಖಲಾಗುತ್ತದೆ. ಆದರೆ ವಾಟ್ಸಾಪ್‌ನಲ್ಲಾದರೆ ಇದು ಸುಲಭವಾಗುತ್ತದೆ. ಹೀಗಾಗಿ ವಾಟ್ಸಾಪ್‌ನಲ್ಲಿ ಬರುವ ಅನ್ಯ ನಂಬರ್‌ಗಳ ಕರೆಗಳನ್ನು ಸ್ವೀಕರಿಸುವಾಗ ಎಚ್ಚರಿಕೆ ವಹಿಸಬೇಕಾಗುತ್ತದೆ.

ಈಗ ಖುದ್ದು ಟೆಲಿಕಾಂ ಇಲಾಖೆಯೇ ಗ್ರಾಹಕರಿಗೆ ಎಚ್ಚರಿಕೆ ನೀಡಿದ್ದು, ಟೆಲಿಕಾಂ ಅಧಿಕಾರಿಗಳಂತೆ ವಿದೇಶಿ ಮೂಲದ ಸಂಖ್ಯೆಗಳಿಂದ ವಾಟ್ಸಾಪ್ ಕರೆಗಳು ಬರುತ್ತಿರುವ ಕುರಿತು ಬಳಕೆದಾರರಿಗೆ ಎಚ್ಚರಿಕೆ ನೀಡಿದೆ. ವಾಟ್ಸಾಪ್ ಬಳಕೆದಾರರು ತಮ್ಮ ಮೊಬೈಲ್ ನಂಬರ್ ಸಂಪರ್ಕಗಳನ್ನು ಕಡಿತಗೊಳಿಸುವುದಾಗಿ ಬೆದರಿಕೆ ಕರೆಗಳನ್ನು ಪಡೆಯುತ್ತಿದ್ದಾರೆ ಎಂದು ಟೆಲಿಕಾಂ ಇಲಾಖೆ ಗಮನಿಸಿದೆ.

ಈ ಸಂಖ್ಯೆ +92 ನಿಂದ ಆರಂಭವಾಗುವ ಮೊಬೈಲ್ ಸಂಖ್ಯೆಯಿಂದ ಕರೆಗಳು ಬರುತ್ತಿವೆ. ಇದು ಪಾಕಿಸ್ತಾನಕ್ಕೆ ಸೇರಿರುವ ಸಂಖ್ಯೆಯಾಗಿದೆ. ಇವುಗಳು ವ್ಯಕ್ತಿಗಳ ವೈಯಕ್ತಿಕ ಮಾಹಿತಿಯನ್ನು ಕದಿಯಲು ಮತ್ತು ಹಣಕಾಸಿನ ವಂಚನೆಯನ್ನು ನಡೆಸುವ ಉದ್ದೇಶದಿಂದ ಮಾಡಲಾಗುತ್ತಿರುವ ನಕಲಿ ಕರೆಗಳಾಗಿವೆ ಎಂದು ಟೆಲಿಕಾಂ ಇಲಾಖೆ ಮಾಹಿರಿ ಹಂಚಿಕೊಂಡಿದೆ.

ವಿದೇಶಿ ಮೂಲದ ಮೊಬೈಲ್ ಸಂಖ್ಯೆಗಳಿಂದ (+92-xxxxxxxxxx) WhatsApp ಕರೆಗಳ ಮಾಡಿ ನಿಮ್ಮ ಮೊಬೈಲ್ ನಂಬರ್‌ನ ಸೇವೆ ಕಡಿತಗೊಳಿಸಲಾಗುತ್ತಿದೆ. ಕಡಿತವಾಗಬಾರದು ಎಂದಾದರೆ ಆಧಾರ್ ಸಂಖ್ಯೆ, ಪಾನ್ ಸಂಖ್ಯೆ ಹಾಗೂ ಓಟಿಪಿ ಹೇಳುವಂತೆ ಕೇಳಲಾಗುತ್ತದೆ. ಒಂದು ವೇಳೆ ಈ ಮಾಹಿತಿ ಹಂಚಿಕೊಂಡರೆ ನಿಮ್ಮ ಖಾತೆಯಲ್ಲಿರುವ ಹಣ, ನಿಮ್ಮ ವೈಯಕ್ತಿಕ ಮಾಹಿತಿ ಕಳುವಾಗುವ ಸಂಭವ ಅಧಿಕವಾಗಿದೆ ಎಂದು ಎಚ್ಚರಿಕೆ ನೀಡಲಾಗಿದೆ.

ಆದರೆ ಈ ರೀತಿಯ ಕರೆಗಳನ್ನು ಟೆಲಿಕಾಂ ಇಲಾಖೆ ಎಂದಿಗೂ ಗ್ರಾಹಕರಿಗೆ ಮಾಡುವುದಿಲ್ಲ ಎಂದು ಖಾತರಿಪಡಿಸಿದೆ. ಅಲ್ಲದೆ ಇಂತಹ ಕರೆಗಳನ್ನು ಸ್ವೀಕರಿಸದಂತೆ ಹಾಗೂ ಯಾವ ಮಾಹಿತಿಯನ್ನೂ ಹಂಚಿಕೊಳ್ಳದಂತೆ ಗ್ರಾಹಕರಿಗೆ ಎಚ್ಚರಿಕೆ ನೀಡಿದೆ. ಒಂದು ವೇಳೆ ನೀವು ಎಲ್ಲಾ ಮಾಹಿತಿ ನೀಡಿ ನಿಮ್ಮ ಹಣ ವಂಚನೆಗೊಳಗಾದರೆ ಸೈಬರ್ ಠಾಣೆಯಲ್ಲಿ ದೂರು ದಾಖಲಿಸುವಂತೆ ಸಲಹೆ ನೀಡಿದೆ.

ಪೋರ್ಟಲ್‌ನಲ್ಲಿ ಮಾಧ್ಯಮ, ವರ್ಗ ಮತ್ತು ಸಮಯ ಸೇರಿದಂತೆ ವಂಚನೆ ಸಂವಹನಗಳನ್ನು ನಾಗರಿಕರು ವರದಿ ಮಾಡಬಹುದು. ನಿರ್ಬಂಧಿಸಲು ಮತ್ತು ಪತ್ತೆಹಚ್ಚಲು ಮೊಬೈಲ್ ಹ್ಯಾಂಡ್‌ಸೆಟ್‌ಗಳನ್ನು ಕದ್ದ ಅಥವಾ ಕಳೆದುಹೋದ ವರದಿ ಮಾಡಲು ಸಹ ಇದನ್ನು ಬಳಸಬಹುದು. ಸೈಬರ್-ಕ್ರೈಮ್ ಅಥವಾ ಹಣಕಾಸಿನ ವಂಚನೆಗೆ ಬಲಿಯಾದ ಸಂದರ್ಭದಲ್ಲಿ ಸೈಬರ್-ಕ್ರೈಮ್ ಸಹಾಯವಾಣಿ ಸಂಖ್ಯೆ 1930 ಅಥವಾ www.cybercrime.gov.in ನಲ್ಲಿ ವರದಿ ಮಾಡುವಂತೆ DoT ನಾಗರಿಕರಿಗೆ ಸಲಹೆ ನೀಡಿದೆ.