ಮಹಿಳಾ ಉದ್ಯೋಗಿಗಳಿಗೆ ಗುಡ್ ನ್ಯೂಸ್: ವೇತನ ಸಹಿತ 12 ಋತುಚಕ್ರ ರಜೆ ಘೋಷಿಸಿದ ಸರ್ಕಾರ!

ರಾಜ್ಯದಾದ್ಯಂತ ಸರ್ಕಾರಿ ಕಚೇರಿಗಳು, ಗಾರ್ಮೆಂಟ್ಸ್‌, ಬಹುರಾಷ್ಟ್ರೀಯ ಕಂಪನಿಗಳು, ಐಟಿ ಮತ್ತು ಇತರ ಖಾಸಗಿ ಕೈಗಾರಿಕೆಗಳು ಸೇರಿ ಎಲ್ಲಾ ವಲಯಗಳಲ್ಲಿ ಕೆಲಸ ಮಾಡುವ ಮಹಿಳೆಯರಿಗೆ 12 ಋತು ಚಕ್ರ ರಜೆ ನೀಡಲು ಸರ್ಕಾರ ನಿರ್ಧರಿಸಿದೆ. ಈ ಕುರಿತಂತೆ ಋತು ಚಕ್ರ ರಜೆ ನೀತಿ 2025ಕ್ಕೆ ಇಂದು ಸಚಿವ ಸಂಪುಟ ಒಪ್ಪಿಗೆ ನೀಡಿದೆ.

ವೇತನ ಸಹಿತ ಮಾಸಿಕ ಒಂದು ರಜೆ ನೀಡಲು ಉದ್ದೇಶಿಸಿ ಈ ನೀತಿ ಜಾರಿ ಮಾಡಲಾಗಿದ್ದು, ವಾರ್ಷಿಕವಾಗಿ 12 ಹೆಚ್ಚುವರಿ ರಜೆಯನ್ನು ಮಹಿಳಾ ಸಿಬ್ಬಂದಿ ಪಡೆಯಲಿದ್ದಾರೆ. ಈ ರೀತಿ ರಜೆ ನೀತಿ ಜಾರಿಗೆ ತಂದ ದೇಶದ ಮೊದಲ ರಾಜ್ಯ ಕರ್ನಾಟಕವಾಗಿದೆ. ಉದ್ಯೋಗಸ್ಥ ಮಹಿಳೆಯರಿಗೆ ಋತು ಚಕ್ರದ ರಜೆ ನೀಡುವ ಸಂಬಂಧ ಬಹಳಷ್ಟು ಚರ್ಚೆಗಳಿದ್ದವು ಈ ಹಿಂದೆ ಸದನದಲ್ಲೂ ಈ ಕುರಿತಾದ ಚರ್ಚೆಗಳಾಗಿದ್ದವು.

ಹೀಗಾಗಿ ಸರ್ಕಾರ ನಿಟ್ಟಿನಲ್ಲಿ ಋತು ಚಕ್ರದ ರಜೆ ನೀಡುವ ಸಂಬಂಧವಾಗಿ ಕ್ರೈಸ್ಟ್ ವಿಶ್ವವಿದ್ಯಾಲಯದ ಕಾನೂನು ವಿಭಾಗದ ಮುಖ್ಯಸ್ಥೆ ಸಪ್ನಾ ಎಸ್ ಅವರ ಅಧ್ಯಕ್ಷತೆಯ 18 ಸದಸ್ಯರ ಸಮಿತಿಯನ್ನು ಇದಕ್ಕಾಗಿ ನಿಯೋಜಿಸಲಾಗಿತ್ತು, ಈ ಸಮಿತಿ ಕೂಡ ವರದಿ ಸಲ್ಲಿಸಿತ್ತು. ಇದರ ಆಧಾರದ ಮೇಲೆ ಈಗ ಋತು ಚಕ್ರ ರಜೆ ನೀತಿ 2025ರನ್ನು ಜಾರಿ ಮಾಡಲಾಗಿದೆ ಎಂದು ತಿಳಿದುಬಂದಿದೆ.

ವರ್ಷಕ್ಕೆ 12 ದಿನ ರಜೆ ನೀಡುವುದಾಗಿದ್ದು, ಯಾವ ದಿನ ರಜೆ ಪಡೆಬೇಕು ಎಂಬುದನ್ನು ಮಹಿಳೆಯರು ತೀರ್ಮಾನ ಮಾಡಲಿದ್ದಾರೆ. ಕ್ಯಾಬಿನೆಟ್ ಸಭೆಯ ಬಳಿಕ ಮಾತನಾಡಿದ ಸಚಿವ ಸಂತೋಷ ಲಾಡ್, ಹೆಣ್ಣು ಮಕ್ಕಳಿಗೆ ಋತು ಚಕ್ರ ರಜೆ ನೀಡಲು ಕ್ಯಾಬಿನೆಟ್ ನಲ್ಲಿ ಒಮ್ಮತದ ನಿರ್ಧಾರಕ್ಕೆ ಬರಲಾಗಿದೆ. ವರ್ಷದಲ್ಲಿ 12 ದಿನ ಸಂಬಳ ಸಹಿತ ರಜೆ ನೀಡಲಾಗುತ್ತದೆ. ತಿಂಗಳಿನ ಯಾವ ದಿನ ಬೇಕಾದರು ಅವರು ಈ ರಜೆಯನ್ನು ಪಡೆಯಬಹುದು. ಕಾನೂನು ಇಲಾಖೆ ಜೊತೆ ಸೇರಿ ಅನೇಕ ಚರ್ಚೆಗಳ ಬಳಿಕ ಈ ರೀತಿಯ ನಿರ್ಧಾರಕ್ಕೆ ಬರಲಾಗಿದೆ ಎಂದಿದ್ದಾರೆ.

ಋತು ಚಕ್ರ ರಜೆ ನೀತಿ 2025ರ ಪ್ರಕಾರ, ಇದು ಖಾಸಗಿ ಸಂಸ್ಥೆಗಳು ಸೇರಿದಂತೆ ಎಲ್ಲಾ ಕ್ಷೇತ್ರಗಳಲ್ಲಿ ಮಹಿಳೆಯರು ಪಡೆಯಬಹುದಾದ ರಜೆಯಾಗಿದ್ದು, ಕಡ್ಡಾಯವಾಗಿ ಎಲ್ಲರಿಗೂ ಅನ್ವಯವಾಗಲಿದೆ. ಮಹಿಳಾ ಉದ್ಯೋಗಿಗಳು ತಮ್ಮ ಆರೋಗ್ಯ ಸ್ಥಿತಿಯನ್ನು ಗಮನಿಸಿ ಬಯಸಿದ ದಿನ ರಜೆ ಪಡೆಯಬಹುದು ಮತ್ತು ಇದಕ್ಕೆ ಯಾವುದೇ ವೈದ್ಯಕೀಯ ಪತ್ರದ ಅಗತ್ಯವಿರುವುದಿಲ್ಲ.

ಈ ಮೊದಲು 1992 ರಲ್ಲಿ ಬಿಹಾರ ರಾಜ್ಯವು ಮಹಿಳಾ ಸರ್ಕಾರಿ ನೌಕರರಿಗೆ ಪ್ರತಿ ತಿಂಗಳು ಎರಡು ದಿನಗಳ ವೇತನ ಸಹಿತ ಮುಟ್ಟಿನ ರಜೆಯನ್ನು ಘೋಷಿಸಿತ್ತು. ಇದಾದ ಬಳಿಕ ಕೇರಳ ಹಾಗೂ ಒಡಿಶಾದಲ್ಲಿಯೂ ಈ ರೀತಿಯ ನಿಯಮಗಳಿವೆ. ಕೇರಳವು ಕೈಗಾರಿಕಾ ತರಬೇತಿ ಸಂಸ್ಥೆಗಳಲ್ಲಿ (ಐಟಿಐ) ಮಹಿಳಾ ತರಬೇತಿದಾರರಿಗೆ ಎರಡು ದಿನಗಳ ಮುಟ್ಟಿನ ರಜೆ ನೀಡುವ ನೀತಿಯನ್ನು ರೂಪಿಸಿದೆ. ಬಿಹಾರ ಮತ್ತು ಒಡಿಶಾ 12 ದಿನಗಳ ವಾರ್ಷಿಕ ಮುಟ್ಟಿನ ರಜೆಯನ್ನು ನೀಡುತ್ತವೆ, ಆದರೆ ಇದು ರಾಜ್ಯ ಸರ್ಕಾರಿ ಮಹಿಳಾ ಉದ್ಯೋಗಿಗಳಿಗೆ ಮಾತ್ರವೇ ಸೀಮಿತವಾಗಿವೆ. ಉಳಿದಂತೆ ಖಾಸಗಿ ಸಂಸ್ಥೆಗಳಿಗೆ ಇದು ಅನ್ವಯವಾಗುವುದಿಲ್ಲ. ಆದ್ರೆ ಕರ್ನಾಟಕದಲ್ಲಿ ಎಲ್ಲಾ ಸರ್ಕಾರಿ ಮತ್ತು ಖಾಸಗಿ ಸಂಸ್ಥೆಗಳಲ್ಲೂ ಇದು ಅನ್ವಯವಾಗಲಿದೆ.

ಸದ್ಯ ಸರ್ಕಾರದ ಈ ನಿಯಮದಿಂದಾಗಿ ರಾಜ್ಯದ ಮಹಿಳಾ ಉದ್ಯೋಗಿಗಳಲ್ಲಿ ಸಂತಸ ಮನೆ ಮಾಡಿದೆ. ಈ ಹಿಂದೆ ಸರ್ಕಾರದ ಶಕ್ತಿ, ಗೃಹಲಕ್ಷ್ಮಿ ಯೋಜನೆಯಿಂದಾಗಿ ಸಂತಸಗೊಂಡಿದ್ದ ಮಹಿಳೆಯರಿಗೆ ದೀಪಾವಳಿ ಮುನ್ನ ಮತ್ತೊಂದು ಬಂಪರ್ ಯೋಜನೆ ಸಿಕ್ಕಂತಾಗಿದೆ.