ಮರೆಯಾಗಲಿದೆ ಟೋಲ್ ಪ್ಲಾಜಾ..! ಬೆಂಗಳೂರು-ಮೈಸೂರು ಹೆದ್ದಾರಿಯಲ್ಲಿ ಜಿಎನ್‌ಎಸ್‌ಎಸ್ ಟೋಲ್..!!

ತಂತ್ರಜ್ಞಾನದ ಜೊತೆ ಇಡೀ ಜಗತ್ತು ಇಂದು ಓಡುತ್ತಿದೆ. ಈಗಂತು ವೇಗವಾಗಿ ತಂತ್ರಜ್ಞಾನ ಬೆಳೆಯುತ್ತಲೇ ಇದೆ. ಅದಕ್ಕೆ ಹೊಸ ಸೇರ್ಪಡೆಯಾಗಿ ಈಗ ಜಾಗತಿಕ ನ್ಯಾವಿಗೇಷನ್ ಉಪಗ್ರಹ ವ್ಯವಸ್ಥೆ (ಜಿಎನ್‌ಎಸ್‌ಎಸ್) ಸೇರ್ಪಡೆಯಾಗುತ್ತ ಸಾಗುತ್ತಿದೆ. ನೀವು ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಂಚರಿಸಬೇಕಾದರೆ ಸುಂಕ ನೀಡಬೇಕಿದೆ, ದ್ವಿಚಕ್ರ ವಾಹನ ಹೊರತುಪಡಿಸಿ ಉಳಿದ ಎಲ್ಲಾ ವಾಹನಗಳು ಸಹ ಟೋಲ್ ಕಟ್ಟುತ್ತವೆ. ಆದ್ರೆ ಸದ್ಯದಲ್ಲೇ ಈ ಫಾಸ್ಟ್‌ ಟ್ಯಾಗ್ ಸಂಪ್ರದಾಯ ಮರೆಯಾಗಲಿದೆ.

ಹೌದು ಹೆದ್ದಾರಿಗಳಲ್ಲಿ ಕಂಡುಬರುವ ಟೋಲ್ ಪ್ಲಾಜಾಗಳು ಸದ್ಯದಲ್ಲೇ ಮರೆಯಾಗಲಿದೆ ಎಂದು ಸಚಿವರೇ ಸೂಚನೆ ನೀಡಿದ್ದಾರೆ. ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ಅವರು ಜಾಗತಿಕ ನ್ಯಾವಿಗೇಷನ್ ಉಪಗ್ರಹ ವ್ಯವಸ್ಥೆ (ಜಿಎನ್‌ಎಸ್‌ಎಸ್)-ಆಧಾರಿತ ಟೋಲ್ ಸಂಗ್ರಹ ವ್ಯವಸ್ಥೆಯನ್ನು ಆಯ್ದ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಅನುಷ್ಠಾನಗೊಳಿಸುವುದಾಗಿ ಘೋಷಿಸಿದ್ದಾರೆ, ಅಸ್ತಿತ್ವದಲ್ಲಿರುವ ಸಾಂಪ್ರದಾಯಿಕ ಟೋಲ್ ಸಂಗ್ರಹ ವಿಧಾನಗಳನ್ನು ಕೊನೆಗೊಳಿಸುವುದಾಗಿ ಅವರು ಹೇಳಿದ್ದಾರೆ.

ರಾಜ್ಯಸಭೆಗೆ ಲಿಖಿತ ಉತ್ತರದಲ್ಲಿ ಗಡ್ಕರಿ ಅವರು, GNSS ಆಧಾರಿತ ಬಳಕೆದಾರರ ಶುಲ್ಕ ಸಂಗ್ರಹ ವ್ಯವಸ್ಥೆ ಕುರಿತು ಪ್ರಾಯೋಗಿಕ ಅಧ್ಯಯನವನ್ನು ಕರ್ನಾಟಕದಲ್ಲಿ NH-275 ರ ಬೆಂಗಳೂರು-ಮೈಸೂರು ವಿಭಾಗ ಮತ್ತು ಹರಿಯಾಣದ NH-709 ರ ಪಾಣಿಪತ್-ಹಿಸಾರ್ ವಿಭಾಗದಲ್ಲಿ ನಡೆಸಲಾಗುತ್ತಿದೆ ಎಂದಿದ್ದಾರೆ. ಹಾಗಾದ್ರೆ ಏನಿದು ಹೊಸ ವ್ಯವಸ್ಥೆ? ಟೋಲ್ ಸಂಗ್ರಹ ಹೇಗೆ ನಡೆಯುತ್ತೆ. ಫಾಸ್ಟ್‌ಟ್ಯಾಗ್ ಇಲ್ಲದೆಯೇ ಟೋಲ್ ಸಂಗ್ರಹ ಹೇಗೆ?

ಏನಿದು ಜಾಗತಿಕ ನ್ಯಾವಿಗೇಷನ್ ಉಪಗ್ರಹ ವ್ಯವಸ್ಥೆ?

ಜಾಗತಿಕ ನ್ಯಾವಿಗೇಷನ್ ಉಪಗ್ರಹ ವ್ಯವಸ್ಥೆ ಅಥವಾ ಜಿಎನ್‌ಎಸ್‌ಎಸ್ ಉಪಗ್ರಹ ಆಧಾರಿತ ಟೋಲ್ ಸಂಗ್ರಹ ವ್ಯವಸ್ಥೆಯಾಗಿರಲಿದೆ. ಉಪಗ್ರಹ ಆಧಾರಿತ ವ್ಯವಸ್ಥೆಯು ವಾಹನದ ಚಲನೆಯನ್ನು ಟ್ರ್ಯಾಕ್ ಮಾಡುತ್ತದೆ ಮತ್ತು ವಾಹನಗಳಲ್ಲಿ ಅಳವಡಿಸಲಾಗಿರುವ ಆನ್ ಬೋರ್ಡ್ ಘಟಕದ ಸಹಾಯದಿಂದ ಶುಲ್ಕಗಳನ್ನು ಲೆಕ್ಕಾಚಾರ ಮಾಡುತ್ತದೆ. ಜಿಎನ್‌ಎಸ್‌ಎಸ್ ಆಧಾರಿತ ಸಂಗ್ರಹಣಾ ವ್ಯವಸ್ಥೆಯಡಿಯಲ್ಲಿ, ಅಸ್ತಿತ್ವದಲ್ಲಿರುವ ವಿಧಾನಕ್ಕೆ ವಿರುದ್ಧವಾಗಿ ಹೆದ್ದಾರಿಗಳಲ್ಲಿ ಪ್ರಯಾಣಿಸುವ ದೂರವನ್ನು ಆಧರಿಸಿ ಟೋಲ್ ವಿಧಿಸಲಾಗುತ್ತದೆ. ಬಳಕೆದಾರರು ಟೋಲ್ ರಸ್ತೆಯ ಒಂದು ಭಾಗವನ್ನು ಪ್ರಯಾಣಿಸಿದರೂ ಸಹ ಒಬ್ಬರು ನಿಗದಿತ ಮೊತ್ತವನ್ನು ಪಾವತಿಸಬೇಕಾಗುತ್ತದೆ.

ಆರಂಭಿಕ ಹಂತದಲ್ಲಿ ವಾಣಿಜ್ಯ ಬಳಕೆ ವಾಹನಗಳಲ್ಲಿ ಈ ವ್ಯವಸ್ಥೆ ಜಾರಿ ಮಾಡಲು ಮುಂದಾಗಲಾಗಿದೆ, ಜೊತೆಗೆ ಎಲ್ಲಾ ಟೋಲ್ ಗಳಲ್ಲೂ ಈ ತಂತ್ರಜ್ಞಾನಕ್ಕೆ ಸಹಾಯಕವಾಗಲು ಅದರ ನಿಯಂತ್ರಣ ವ್ಯವಸ್ಥೆ ಸೇರಿ ಎಲ್ಲಾ ವ್ಯವಸ್ಥೆ ಮಾಡಲು ಮುಂದಾಗಲಾಗಿದೆ. ರೇಡಿಯೋ ಫ್ರೀಕ್ವೆನ್ಸಿ ಐಡೆಂಟಿಫಿಕೇಶನ್-ಆಧಾರಿತ ವಾಹನಗಳೊಂದಿಗೆ ಘರ್ಷಣೆಗೆ ಒಳಗಾಗದೆ ಜಿಎನ್‌ಎಸ್‌ಎಸ್ ಸಕ್ರಿಯಗೊಳಿಸಿದ ವಾಹನಗಳಿಗೆ ಅನುಕೂಲವಾಗುವಂತೆ ಅಸ್ತಿತ್ವದಲ್ಲಿರುವ ಪ್ಲಾಜಾಗಳಲ್ಲಿ ಮೀಸಲಾದ ಜಿಎನ್‌ಎಸ್‌ಎಸ್ ಲೇನ್‌ಗಳ ಮುಂಗಡ ಚಿಹ್ನೆಗಳು, ಗುರುತುಗಳು, ಬೆಳಕು ಮತ್ತು ಉಪಕರಣಗಳ ನಿಯೋಜನೆ ಸೇರಿದಂತೆ ವಿನ್ಯಾಸವನ್ನು ಅಭಿವೃದ್ಧಿಪಡಿಸುತ್ತದೆ.

ಟೋಲ್‌ ಪ್ಲಾಜಾಗಳಲ್ಲಿ ಜಿಎನ್‌ಎಸ್‌ಎಸ್‌ ಅಳವಡಿಕೆಯಾದ ವಾಹನಗಳು ಸಲೀಸಾಗಿ ಪ್ರಯಾಣಿಸಲು ಅನುವಾಗುವಂತೆ ಪ್ರತ್ಯೇಕ ಜಿಎನ್‌ಎಸ್‌ಎಸ್‌ ಲೇನುಗಳನ್ನು ನಿರ್ಮಿಸುವುದಾಗಿ ಸರಕಾರ ಕಳೆದ ತಿಂಗಳು ತಿಳಿಸಿದೆ. ಹೀಗಾಗಿ ಸದ್ಯದಲ್ಲೇ ಬೆಂಗಳೂರು-ಮೈಸೂರು ಹೆದ್ದಾರಿಯಲ್ಲಿ GNSS ವ್ಯವಸ್ಥೆ ಜಾರಿಯಾಗುವುದು ಖಚಿತವಾಗಿದೆ. ಈ ವ್ಯವಸ್ಥೆಯಲ್ಲಿ ಒಂದು ವಾಹನ ಆ ಹೆದ್ದಾರಿಯ ಮೇಲೆ ಎಷ್ಟು ದೂರು ಕ್ರಮಿಸಿದೆ ಎಂಬುವ ಆಧಾರದ ಮೇಲೆ ಸುಂಕ ವಸೂಲಾಗಲಿದೆ. ಜೊತೆಗೆ ಟೋಲ್‌ನಲ್ಲಿ ಸರದಿ ಸಾಲು ತಪ್ಪಲಿದೆ. ಈಗ ಟೋಲ್‌ಗಳಲ್ಲಿ ಒಮ್ಮೆ ಹೆದ್ದಾರಿ ಕ್ರಮಿಸಿ ಟೋಲ್ ಕಟ್ಟಿದರೆ ಅದು ಸಂಪೂರ್ಣ ಟೋಲ್ ಪಾವತಿ ಆಗದಿದ್ದರೂ ಜನರ ಹೊರೆ ಎಂಬ ದೂರು ಸಹ ಕೇಳಿಬರುತ್ತವೆ. ಈಗ ಜಾರಿಯಲ್ಲಿರುವ ಶುಲ್ಕ ಕಟ್ಟುವ ಟೋಲ್ ಪ್ಲಾಜಾಗಳಲ್ಲಿನ ಎಲ್ಲಾ ಲೇನ್‌ಗಳನ್ನು ಅಂತಿಮವಾಗಿ GNSS ಲೇನ್‌ಗಳಾಗಿ ಪರಿವರ್ತಿಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.