ಲಾಲಿಪಾಪ್ ಕಚ್ಚಿದರೆ ಸಾಂಗ್ ಕೇಳುತ್ತೆ; ರುಚಿಯ ಜೊತೆಗೆ ಇಂಪಾದ ಹಾಡು ಸಹ ಕೇಳಬಹುದು!

ಟೆಕ್ನಾಲಜಿ ಎಷ್ಟು ಮುಂದುವರೆಯುತ್ತಿದೆ ಅಂದ್ರೆ ನೀವು ಊಹಿಸುವುದಕ್ಕಿಂತ ವೇಗವಾಗಿ ಹರಡುತ್ತಿದೆ. ಹಾರುವ ಕಾರುಗಳು, ರೋಬೋಟ್‌ಗಳು, ಸ್ಮಾರ್ಟ್ ಗ್ಯಾಜೆಟ್‌ಗಳು, ಎಐ, ಡಿಜಿಟಲ್ ವಿಆರ್, ಎಐ ಗ್ಲಾಸ್ ಇನ್ನು ನೂರಾರು ಆವಿಷ್ಕಾರಗಳು ಈಗ ಎಲ್ಲೆಡೆ ಸುದ್ದಿಯಾಗುತ್ತಲೇ ಇವೆ. ಹಾಗೆ ಹಲವು ಹೊಸ ಹೊಸ ಆವಿಷ್ಕಾರಗಳು ಇನ್ನು ಪ್ರದರ್ಶನಗೊಳ್ಳುತ್ತಿದ್ದು ಮುಂದೆ ಅಚ್ಚರಿಯ ಫಲಿತಾಂಶಗಳ ತರಲಿವೆ.

ಸದ್ಯ ಈಗ ಲಾಸ್ ವೇಗಾಸ್‌ನಲ್ಲಿ ನಡೆದ CES (ಕನ್ಸೂಮರ್ ಟೆಕ್ನೋಲಜಿ ಅಸೋಸಿಯೇಷನ್) ಪ್ರದರ್ಶನದಲ್ಲಿ ಲಾಲಿಪಾಪ್ ಒಂದು ಎಲ್ಲರ ಗಮನ ಸೆಳೆದಿದೆ. ಬಹುದೊಡ್ಡ ಆವಿಷ್ಕಾರವಾಗಿ ಹೊರಹೊಮ್ಮಿದೆ. ಇದು ನಾವು ನೀವು ಸವಿಯುವ ಸಾಮಾನ್ಯ ಲಾಲಿಪಾಪ್ ಅಲ್ಲ ಬದಲಿಗೆ ಇದೊಂದು ವಿಶೇಷ ಹಾಗೆ ಸಂಗೀತ ನುಡಿಸುವ ಲಾಲಿಪಾಪ್ ಆಗಿದೆ.

ಹೌದು ನೀವು ಹೆಡ್‌ಫೋನ್ ಹಾಕುವುದು ಬೇಡ ಹಾಗೆ ಬೇರೆ ಯಾವುದೇ ಗ್ಯಾಜೆಟ್ ಕೂಡ ಬೇಕಾಗಿಲ್ಲ. ಸುಲಭವಾಗಿ ಈ ಲಾಲಿಪಾಪ್ ಒಮ್ಮೆ ಕಚ್ಚಿದರೆ ಸಾಕು ಸಂಗೀತ ಕೇಳಿಸುತ್ತದೆ. ಇಂತಹ ಅದ್ಭುತ ಆವಿಷ್ಕಾರ ನೋಡಿ ಜನರು ಬೆರಗಾಗಿದ್ದಾರೆ. ನೀವು ಚಿಕ್ಕವರಾಗಿದ್ದಾಗ ಒಂದು ಸಣ್ಣ ಕಡ್ಡಿಯ ತುದಿಯಲ್ಲಿ ವೃತ್ತಾಕಾರದ ಲಾಲಿಪಾಪ್ ಸವಿದಿರಬಹುದು. ಅದೇ ರೀತಿಯಲ್ಲಿ ಈ ಲಾಲಿಪಾಪ್ ಸಹ ಕಾಣಿಸಲಿದೆ.

ಆದರೆ ಈ ಲಾಲಿಪಾಪ್‌ನ ಒಳಗೆ ಗಾಳಿಯಲ್ಲಿ ಶಬ್ದದ ಬದಲು ಕಂಪನಗಳಾಗಿ ಧ್ವನಿಯನ್ನು ಕಳುಹಿಸಬಹುದಾದ ಸಣ್ಣ ಎಲೆಕ್ಟ್ರಾನಿಕ್ ಸಾಧನವಿದೆ. ನೀವು ಲಾಲಿಪಾಪ್ ಅನ್ನು ದವಡೆಯ ಮೂಲಕ ಕಚ್ಚಿದಾಗ ಅದರ ಕಂಪನವು ನೇರ ನರದ ಮೂಲಕ ಕಿವಿಗಳಿಗೆ ಚಲಿಸಲಿದೆ. ಇದನ್ನು ಮೂಳೆ ವಹನ ತಂತ್ರಜ್ಞಾನ ಎಂಬುದಾಗಿಯೂ ಕರೆಯಲಾಗುತ್ತದೆ. ಹಲವು ಕಡೆ ಕ್ರೀಡಾ ಹೆಡ್‌ಫೋನ್‌ಗಳಲ್ಲಿ ಈ ತಂತ್ರಜ್ಞಾನ ಬಳಸಲಾಗುತ್ತದೆ. ಇದರಲ್ಲಿ ಸಂಗೀತವು ನಿಮ್ಮ ಕಿವಿಯಲ್ಲಿ ಕೇಳುವ ಬದಲಾಗಿ ನೇರವಾಗಿ ತಲೆಯ ಒಳಗೆ ಕೇಳಿದಂತೆ ಭಾಸವಾಗುತ್ತದೆ.

ಈ ಎಲ್ಲಾ ಎಲೆಕ್ಟ್ರಾನಿಕ್ಸ್‌ ಗಳ ಮೇಲೆ ಸಿಹಿಯಾದ ಕ್ಯಾಂಡಿಯ ಲೇಪ ಮಾಡಲಾಗಿರುತ್ತದೆ. ಲಾಲಿಪಾಪ್‌ನ ಕಡ್ಡಿಯ ಭಾಗದಲ್ಲಿ ಸ್ವಿಚ್‌ನಂತಹ ಕಾರ್ಯ ಮಾಡುವ ಸಣ್ಣ ದುಂಡಾದ ವಿಭಾಗವಿದೆ. ಈ ಲಾಲಿಪಾಪ್ ಸವಿಯುವ ಮೊದಲು ಈ ಸ್ವಿಚ್ ಹ್ಯಾಂಡಲ್‌ ಅನ್ನು ಒತ್ತಬೇಕು. ಅನಂತರ ಹಲ್ಲಿನ ಸಹಾಯದಿಂದ ಲಾಲಿಪಾಪ್ ಅನ್ನು ಒಡೆದಾಗ ಸಂಗೀತ ಹೊರಬರುತ್ತದೆ. ಒಮ್ಮೆ ಈ ಲಾಲಿಪಾಪ್ ಸವಿದ ಬಳಿಕ ಕಡ್ಡಿಯಲ್ಲಿನ ಎಲೆಕ್ಟ್ರಾನಿಕ್ ಬೇಸ್ ಅನ್ನು ಮರುಬಳಕೆ ಸಹ ಮಾಡಬಹುದು.

ಈ ಲಾಲಿಪಾಪ್‌ನಿಂದ ಒಂದೇ ಹಾಡು ಕೇಳಿಬರುತ್ತದೆ. ಕ್ಯಾಂಡಿ ಒಮ್ಮೆ ಸವಿದರೆ ನೀವು ಟ್ರ್ಯಾಕ್ ಅನ್ನು ಬದಲಾಯಿಸು ಅಥವಾ ಮತ್ತೆ ಪ್ಲೇ ಮಾಡಲು ಸಾಧ್ಯವಿಲ್ಲ. ಈ ಪ್ರತಿ ಲಾಲಿಪಾಪ್‌ನ ಬೆಲೆ 800 ರೂಪಾಯಿ ಆಗಿದೆ. ಲಾಲಿಪಾಪ್‌ಗಳನ್ನು ಕಂಪನಿಯ ವೆಬ್‌ಸೈಟ್ ಮೂಲಕ ಆನ್‌ಲೈನ್‌ನಲ್ಲಿ ಮತ್ತು ಬಹುಶಃ ಆಯ್ದ ಅಂಗಡಿಗಳಲ್ಲಿ ಮಾರಾಟ ಮಾಡುವ ನಿರೀಕ್ಷೆಯಿದೆ. ಈ ಲಾಲಿಪಾಪ್ ಅನ್ನು ಮೋಜಿನ ಕಾರಣಕ್ಕೆ ಬಳಸಬಹುದು. ಅದನ್ನು ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಳ್ಳಲು ಹಾಗೆ ಹೊಸ ಗ್ಯಾಜೆಟ್‌ಗಳ ಬಗ್ಗೆ ಆಸಕ್ತಿ ಹೊಂದಿರುವ ಮಂದಿ ಇದನ್ನು ಬಳಸಲು ಮುಂದಾಗಬಹುದು.

ಹಾಗೆ ಈ ಕ್ಯಾಂಡಿ ಲಾಲಿಪಾಪ್ ವಿಶೇಷ ಆವಿಷ್ಕಾರ ಎಂದು ಪರಿಗಣಿಸುವುದು ದೂರದ ಮಾತಾಗಬಹುದು. ಇದಕ್ಕೂ ಮೊದಲು ಟೂತ್ ಬ್ರಷ್‌ನಲ್ಲೂ ಸಹ ಈ ರೀತಿಯ ಸಂಗೀತ ಹೊರಬರುವ ಟೆಕ್ನಾಲಜಿ ಹೊರಬಂದಿತ್ತು.