ಲಾಸ್ಟ್ ಮಿನಿಟ್ ಟ್ರಿಪ್! ಈ 8 ಸ್ಥಳಗಳಿಗೆ ಹೋಗಿ ರಿಫ್ರೆಶ್ ಆಗಿ.. ಕಮ್ಮಿ ಸಮಯ, ಜಾಸ್ತಿ ನೆಮ್ಮದಿ

ಬೆಂಗಳೂರಿನಿಂದ ಒಂದು ದಿನದ (One Day Trip) ಪ್ರವಾಸಕ್ಕೆ ಅನೇಕ ಸ್ಥಳಗಳಿವೆ. ಕುಟುಂಬದವರು, ಏಕಾಂಗಿ ಅಥವಾ ಸ್ನೇಹಿತರೊಟ್ಟಿಗೆ ಪ್ರವಾಸ ಯೋಜಿಸಬಹುದು. ನೀವು ಬೆಂಗಳೂರಿನ ಗದ್ದಲದಿಂದ ಹೊರಬರಲು, ಯಾವುದೇ ಪ್ಲಾನ್ ಇಲ್ಲದೆ ಈ ಪ್ಲೇಸ್‌ಗೆ ಹೋಗಬಹುದು. ಹೌದು, ಬೆಂಗಳೂರಿನ ಬಳಿ ಸಾಕಷ್ಟು ಪ್ರೇಕ್ಷಣೀಯ ಸ್ಥಳಗಳಿವೆ. ಒಂದು ದಿನದ ಪ್ರವಾಸ ಮಾಡಲು ಇಂತಹ ತಾಣಗಳನ್ನು ಆಯ್ಕೆ ಮಾಡಿಕೊಳ್ಳಿ. ಹಾಗಾದರೆ, ಯಾವೆಲ್ಲಾ ತಾಣಗಳು ಒನ್‌ ಡೇ ಟ್ರಿಪ್‌ (One Day Trips From Bengaluru) ಮಾಡಲು ಬೆಸ್ಟ್ ಎಂಬುದನ್ನು ತಿಳಿಯೋಣ ಬನ್ನಿ.

ಬೆಂಗಳೂರಿನಿಂದ ಹೊರಟರೆ.. ಬೆಳಗ್ಗಿನ ಜಾವ ಮಂಜಿನಿಂದ ಆವೃತವಾದ ನಂದಿ ಬೆಟ್ಟ, ಪ್ರಾಚೀನ ಲೇಪಾಕ್ಷಿ ದೇವಾಲಯಕ್ಕೆ ಭೇಟಿ ನೀಡಿ ಅಥವಾ ಚುಂಚಿ ಜಲಪಾತದ ಬಳಿ ವಿಶ್ರಾಂತಿ ಪಡೆಯಬಹುದು. ದೊಡ್ಡ ಆಲದ ಮರದ ಕೆಳಗೆ ಪಿಕ್ನಿಕ್ ಆನಂದಿಸಿ ಅಥವಾ ನೃತ್ಯಗ್ರಾಮದ ಕಲಾತ್ಮಕತೆ ಅನುಭವಿಸಿ. ಈ ಸ್ಥಳಗಳು ನಗರ ಜೀವನದಿಂದ ತ್ವರಿತವಾಗಿ ಚೇತರಿಸಿಕೊಳ್ಳಲು ಸೂಕ್ತ. ಇದಕ್ಕೆ ಯಾವುದೇ ಪೂರ್ವಯೋಜನೆಗಳ ಅಗತ್ಯವಿಲ್ಲ.

ಯಾವುದೇ ಪ್ಲಾನ್ ಇಲ್ಲದೆ ಬೆಂಗಳೂರಿನಿಂದ ಒನ್‌ ಡೇ ಟ್ರಿಪ್‌

ನಗರಗಳು ಕೆಲವೊಮ್ಮೆ ಕಿರಿಕಿರಿ ಉಂಟುಮಾಡಬಹುದು. ಬೆಂಗಳೂರು ಇದಕ್ಕೆ ಹೊರತಾಗಿಲ್ಲ. ಟ್ರಾಫಿಕ್ ಜಾಮ್ ಮತ್ತು ಗದ್ದಲದ ನಡುವೆ, ಒಂದು ಸಣ್ಣ ಬ್ರೇಕ್ ಬೇಕೆನಿಸುವುದು ಸಹಜ. ಆದರೆ ಯೋಜನೆ, ತಂಗುವ ಸ್ಥಳಗಳನ್ನು ಬುಕ್ ಮಾಡುವುದು ಮತ್ತು ಪ್ರವಾಸದ ಪಟ್ಟಿ ತಯಾರಿಸುವುದು ಎಲ್ಲರಿಗೂ ಸಾಧ್ಯವಾಗುವುದಿಲ್ಲ. ಕೆಲವೊಮ್ಮೆ, ಹಾಸಿಗೆಯಿಂದ ಎದ್ದು, ಕೆಲವು ತಿಂಡಿಗಳನ್ನು ಬ್ಯಾಗ್‌ಗೆ ಹಾಕಿಕೊಂಡು ಹೊರಡುವುದು ಉತ್ತಮ. ಬೆಂಗಳೂರಿನಿಂದ ಯಾವುದೇ ಯೋಜನೆಯಿಲ್ಲದೆ ತಕ್ಷಣ ಹೊರಡಲು ಕೆಲವು ಸ್ಥಳಗಳಿವೆ.

ಅವಲಬೆಟ್ಟ

ಇದು ಬಂಡೆಗಳಿಂದ ಕೂಡಿದ ಬೆಟ್ಟ. ನಂದಿ ಬೆಟ್ಟಕ್ಕಿಂತ ಕಡಿಮೆ ಜನರನ್ನು ಹೊಂದಿರುತ್ತದೆ. ಇಲ್ಲಿನ ಬೆಟ್ಟದ ಅಂಚು ಒಂದು ಕಾಲ್ಪನಿಕ ಸಿನಿಮಾದಂತೆ ಕಾಣುತ್ತದೆ. ಇಲ್ಲಿ ಡ್ರ್ಯಾಗನ್‌ಗಳಿಲ್ಲ, ಆದರೆ ಚಿಪ್ಸ್ ಕದಿಯಲು ಕಾಯುತ್ತಿರುವ ಕೋತಿಗಳಿವೆ.

ಚುಂಚಿ ಜಲಪಾತ

ಈ ಜಲಪಾತವು ಕನಕಪುರದ ಬಳಿ ಇದೆ. ನೀವು ಸುಮ್ಮನೆ ಹರಿಯುವ ನೀರನ್ನು ನೋಡುತ್ತಾ, ಜೀವನದ ಬಗ್ಗೆ ಯೋಚಿಸುತ್ತಾ, ಬಂಡೆಯ ಮೇಲೆ ಕುಳಿತು ಇಡ್ಲಿ ತಿನ್ನಲು ಹೇಳಿ ಮಾಡಿಸಿದಂತಿದೆ. ಈಜಲು ಸುರಕ್ಷಿತವಲ್ಲದಿದ್ದರೂ, ಮನಸ್ಸಿಗೆ ಮುದ ನೀಡಲು ಇದು ಹೇಳಿಮಾಡಿಸಿದ ಸ್ಥಳ.

ನಂದಿ ಬೆಟ್ಟ

ಇದು ಸದಾ ಜನಸಂದಣಿಯಿಂದ ಕೂಡಿರುತ್ತದೆ. ಆದರೆ, ಇಲ್ಲಿಗೆ ಬರುವುದು ನಿಮ್ಮ ಶ್ರಮಕ್ಕೆ ತಕ್ಕ ಫಲ ನೀಡುತ್ತದೆ. ಬೆಳಗ್ಗೆ ಬೇಗನೆ ಹೊರಟರೆ, ಸೂರ್ಯೋದಯದ ಸಮಯದಲ್ಲಿ ಮಂಜಿನಿಂದ ಆವೃತವಾದ ಬೆಟ್ಟಗಳ ವಿಹಂಗಮ ನೋಟವನ್ನು ಕಣ್ತುಂಬಿಕೊಳ್ಳಬಹುದು. ಅಲ್ಲದೆ, ಹತ್ತಿರದಲ್ಲಿ ಪರೋಟ ಮತ್ತು ಚಹಾ ಅಂಗಡಿಗಳನ್ನು ಹುಡುಕುವುದು ಕಷ್ಟವೇನಲ್ಲ.

ಲೇಪಾಕ್ಷಿ

ನೀವು ಇತಿಹಾಸವನ್ನು ಮೆಲುಕು ಹಾಕಲು ಬಯಸಿದರೆ, ಈ ಆಂಧ್ರ ಪಟ್ಟಣಕ್ಕೆ ಭೇಟಿ ನೀಡಿ. ಇದು ಅದ್ಭುತವಾದ ದೇವಾಲಯದ ಕೆತ್ತನೆಗಳು, ಪ್ರಾಚೀನ ಭಿತ್ತಿಚಿತ್ರಗಳು ಮತ್ತು ರಹಸ್ಯವಾದ ತೂಗು ಕಂಬವನ್ನು ಹೊಂದಿದೆ.

ದೊಡ್ಡ ಆಲದ ಮರ

ಇದು ಸುಮಾರು 3 ಎಕರೆ ಪ್ರದೇಶದಲ್ಲಿ ಹರಡಿಕೊಂಡಿರುವ 400 ವರ್ಷಗಳಷ್ಟು ಹಳೆಯದಾದ ಮರ. ಇದರ ನೆರಳಿನಲ್ಲಿ ನಡೆದು, ಒಂದು ದಿನ ಪಿಕ್ನಿಕ್ ಮಾಡಿ, ಪ್ರಕೃತಿ ಹೇಗೆ ನಿಧಾನವಾಗಿ ಜೀವಿಸುತ್ತದೆ ಎಂಬುದನ್ನು ಆಶ್ಚರ್ಯದಿಂದ ನೋಡಿ.

ರಾಸ್ತಾ ಕೆಫೆ

ನಿಮಗೆ ಬೆಟ್ಟಗಳು ಅಥವಾ ದೇವಾಲಯಗಳು ಬೇಡವೆನಿಸಿದರೆ, ಮೈಸೂರು ರಸ್ತೆಯಲ್ಲಿರುವ ರಾಸ್ತಾ ಕೆಫೆಗೆ ಹೋಗಿ. ಇಲ್ಲಿ ದೊಡ್ಡ ಬರ್ಗರ್‌ಗಳು, ಪೂಲ್ ಟೇಬಲ್‌ಗಳು ಮತ್ತು ವಿಶಾಲವಾದ ಹುಲ್ಲುಹಾಸುಗಳಿವೆ. ಇದು ಒಂದು ಸುಂದರವಾದ ರಸ್ತೆ ಪ್ರವಾಸದ ಅನುಭವ ನೀಡುತ್ತದೆ.

ಸ್ಕಂದಗಿರಿ ರಾತ್ರಿ ಟ್ರೆಕ್ಕಿಂಗ್

ಇದಕ್ಕೆ ಯಾವುದೇ ಫ್ಯಾನ್ಸಿಯಾದ ಬುಕಿಂಗ್ ಆಪ್‌ಗಳ ಅಗತ್ಯವಿಲ್ಲ. ಒಂದು ಟಾರ್ಚ್, ನೀರು ಮತ್ತು ಆರಾಮದಾಯಕ ಬೂಟುಗಳು ಇದ್ದರೆ ಸಾಕು. ಟ್ರೆಕ್ಕಿಂಗ್ ಅನ್ನು ಬೇಗನೆ ಪ್ರಾರಂಭಿಸಿ, ಸೂರ್ಯೋದಯದ ವೇಳೆಗೆ ಶಿಖರವನ್ನು ತಲುಪಿ, ನಗರದ ಉಳಿದ ಜನರು ತಮ್ಮ ಕೆಲಸವನ್ನು ಪ್ರಾರಂಭಿಸುವ ಮೊದಲು ಕೆಳಗೆ ಇಳಿಯಿರಿ.

ನೃತ್ಯಗ್ರಾಮ

ಹೆಸರಘಟ್ಟದ ಬಳಿ ಇರುವ ಒಂದು ಕಲಾತ್ಮಕ ನೃತ್ಯ ಗ್ರಾಮ. ಇದು ಸಾಂಸ್ಕೃತಿಕ ತಾಣವಾಗಿದ್ದು, ಝೆನ್ ಉದ್ಯಾನವನದಂತಿದೆ. ಮಣ್ಣಿನ ಹಾದಿಯಲ್ಲಿ ನಡೆದು, ಒಡಿಸ್ಸಿ ನೃತ್ಯಗಾರ್ತಿಯರೊಂದಿಗೆ ಮಾತನಾಡಿ, ನಿಮಗೆ ಬೇಕಾದ ಬ್ರೇಕ್ ಪಡೆಯಬಹುದು.

ವೀಕೆಂಡ್‌ನಲ್ಲಿ ಬೆಂಗಳೂರು ತುಂಬಾ ಗದ್ದಲದಿಂದ ಕೂಡಿರುತ್ತದೆ. ಇದರಿಂದ ನಿಮಗೆ ಬೇಜಾರ್ ಆಗಿದ್ದರೆ, ಈ ಸ್ಥಳಗಳಲ್ಲಿ ಒಂದನ್ನು ಆಯ್ಕೆ ಮಾಡಿ. ಹಿಂದೆ ಮುಂದೆ ಯೋಚಿಸದೆ, ಒನ್‌ ಡೇ ಟ್ರಿಪ್‌ಗೆ ಹೊರಡಿ. ನೀವು ಮರಳಿ ಬಂದಾಗ ಬೆಂಗಳೂರು ಅಲ್ಲೇ ಇರುತ್ತದೆ.