ಲೈಫ್ ಬೋರಾಗುತ್ತಿದೆಯೇ? ಹಾಗಾದರೆ ಈ ರೀತಿ ಮಾಡಿ

ತುಂಬಾ ಬೋರಾದಾಗ ನೀವೇನು ಮಾಡುತ್ತೀರಿ? ನಾನಂತೂ ಮಾಡುವ ಕೆಲಸವನ್ನು ಅರ್ಧದಲ್ಲಿ ಬಿಟ್ಟು ಒಂದೋ ಸೋಮಾರಿಯಂತೆ ಕೂತು ಬಿಡುತ್ತಿದ್ದೆ, ಮನೆಯಲ್ಲಿ ಇದ್ದರೆ ಜೋರಾಗಿ ನಿದ್ದೆ ಮಾಡುತ್ತಿದ್ದೆ. ಆದರೆ ಈ ರೀತಿಯೆಲ್ಲಾ ಮಾಡಬಾರದಂತೆ! ಈ ರೀತಿ ಮಾಡಿದರೆ ಮತ್ತಷ್ಟು ಬೋರಾಗುವುದು, ಚೈತನ್ಯ ಕಡಿಮೆಯಾಗಿ ಆ ದಿನಾ ಪೂರ್ತಿ ಸೋಮಾರಿಗಳಂತೆ ಕಾಲಕಳೆಯುವಂತಾಗುವುದು.

ಲೈಫ್ ಬೋರು ಅನಿಸಿದರೆ ಆ ಭಾವನೆ ಬೇಗನೆ ಹೋಗುವುದಿಲ್ಲ. ಕೆಲವರಿಗೆ ವಾರಗಟ್ಟಲೆ ಇರುತ್ತದೆ. ಯಾವುದೇ ಕೆಲಸ ಮಾಡಲು ಮನಸ್ಸು ಬರುವುದಿಲ್ಲ. ನನಗೆ ಬೋರಾಗುತ್ತದೆ ಎಂದು ಹೇಳಿದರೆ ನಮ್ಮ ಕೆಲಸವನ್ನು ಇತರರು ಮಾಡಿಕೊಡುವುದಿಲ್ಲ. ಆದ್ದರಿಂದ ಬೋರ್ ಆದಾಗ ಈ ಕೆಳಗಿನಂತೆ ಮಾಡಬೇಕಂತೆ, ಆಗ ನಮ್ಮಲ್ಲಿ ಲವಲವಿಕೆ ಮರಳಿ ಬರುತ್ತದೆ. ನಾನಂತು ಇದನ್ನು ಪಾಲಿಸುತ್ತಿದ್ದೇನೆ (ಪಾಲಿಸಲೇ ಬೇಕು, ಇಲ್ಲಾಂದರೆ ಸೋಮಾರಿ ಎಂದು ಹೇಳಿ, ನಮ್ಮ ಆಫೀಸ್ ನಲ್ಲಿ ಇಂಥವರು ಬೇಡ ಎಂದು ಸೀದಾ ಮನೆಗೆ ಕಳುಹಿಸಿಬಿಡುತ್ತಾರೆ ಅಷ್ಟೇ), ನೀವು ಜೀವನ ಬೋರಾಗುತ್ತಿದೆ ಎಂದು ಕೂತರೆ ಬಾಸ್ ಸುಮ್ಮನೆ ಬಿಡುವುದಿಲ್ಲ ಅಲ್ಲವೇ? ಹಾಗಾದರೆ ಈ ಸಲಹೆ ಪಾಲಿಸಲು ನೀವು ರೆಡಿನಾ?

ಬೋರಾದಾಗ ಈ ರೀತಿ ಮಾಡಿ:

ತಿನ್ನಿ
ತುಂಬಾ ಬೋರಾದರೆ ನಿಮ್ಮ ಪ್ರಿಯವಾದ ಅಡುಗೆಯನ್ನು ತಿನ್ನಿ. ಅದರಲ್ಲೂ ಹೊರಗಡೆ ಹೋಗಿ ತಿನ್ನಿ. ಈ ರೀತಿ ಮಾಡಿದರೆ ಬೋರು ಸ್ವಲ್ಪ ಮಟ್ಟಿಗೆ ದೂರವಾಗುವುದು.

ಪ್ಲಾನ್ ಮಾಡಿ
ತುಂಬಾ ಬೋರ್ ಅನಿಸಿದಾಗ ಸ್ವಲ್ಪ ದೂರ ಪ್ರಯಾನಕ್ಕೆ ಪ್ಲಾನ್ ಮಾಡಿ. ಸ್ನೇಹಿತರು ಅಥವಾ ಮನೆಯವರ ಜೊತೆ ಹೋಗಿ ಬನ್ನಿ, ಆಗ ನಿಮಗೆ ಸ್ವಲ್ಪ ರಿಲ್ಯಾಕ್ಸ್ ದೊರೆಯುತ್ತದೆ. ಬೋರು, ಜಡತನ ದೂರವಾಗಿ ಲವಲವಿಕೆಯಿಂದ ಇರುವಿರಿ.

ಕರೆಮಾಡಿ
ಬೋರಾದಾಗ ನಿಮ್ಮ ಸ್ನೇಹಿತರಲ್ಲಿ ಸ್ವಲ್ಪ ಹಾಸ್ಯ ಸ್ವಭಾವ ಇರುವವರಿಗೆ ಫೋನ್ ಮಾಡಿ, ಅವರ ಮಾತುಗಳನ್ನು ಕೇಳುತ್ತಿದ್ದರೆ ನಿಮಗೆ ನಿಮ್ಮ ಬೋರು ದೂರವಾಗುವುದು.

ನಿಮ್ಮ ಹಳೆಯ ಡೈರಿ ಓದಿ
ನಿಮಗೆ ತುಂಬಾ ಬೋರು ಅನಿಸಿದರೆ ಹಳೆಯ ಡೈರಿ ಓದಿ. ಆಗ ಹಳೆಯ ನೆನಪುಗಳು ಮರುಕಳಿಸುತ್ತದೆ, ಫೋಟೋ ನೋಡಿ, ಫ್ರೆಂಡ್ಸ್ ಕರೆ ಮಾಡಿ.

ಮನೆಯನ್ನು ಸ್ವಚ್ಛ ಮಾಡಿ
ನನ್ನ ಫ್ರೆಂಡ್ ಗೆ ಈ ಅಭ್ಯಾಸವಿದೆ. ಅವಳಿಗೆ ತುಂಬಾ ಬೋರ್ ಅನಿಸಿದಾಗ ಮನೆಯನ್ನು ಕಬೋರ್ಡ್ ನಲ್ಲಿರುವ ವಸ್ತುಗಳನ್ನೆಲ್ಲಾ ಜೋಡಿಸಿ, ಮನೆಯನ್ನು ಸ್ವಚ್ಛ ಮಾಡುತ್ತಾಳೆ. ಈ ರೀತಿ ಮಾಡಿದರೆ ನನಗೆ ಒಂಥರಾ ಖುಷಿ ಸಿಗುತ್ತದೆ, ಬೋರು ಕೂಡ ಆಗುವುದಿಲ್ಲ ಅಂತಾಳೆ. ನೀವು ಕೂಡ ಟ್ರೈ ಮಾಡಿ ನೋಡಿ.

ಸಿನಿಮಾ ನೋಡಿ
ಲೈಫ್ ಬೋರ್ ಅನಿಸಿದಾಗ ನಿಮ್ಮ ನೆಚ್ಚಿನ ಹೀರೋನ ಸಿನಿಮಾ ನೋಡಿ. ಬರೆಯುವ ಾಸಕ್ತಿ ಇದ್ದರೆ ನಿಮಗೆ ತೋಚಿದ್ದನ್ನು ಬರೆಯಿರಿ. ಇಷ್ಟು ಮಾಡಿ ನಿಮ್ಮ ಬೋರು ಬಂದ ದಾರಿಗೆ ಸುಂಕವಿಲ್ಲದಂತೆ ದೂರ ಹೋಗುವುದು.