ನಾನೇ ಬೇರೆ, ನನ್ನ ಸ್ಟೈಲೇ ಬೇರೆ

Insync

oi-Staff

By Super

Updated: Saturday, September 13, 2014, 14:55 [IST]

"ನೀವು ಯಾರಿಗೋಸ್ಕರ ಡ್ರೆಸ್ ಮತ್ತು ಮೇಕಪ್ ಮಾಡುತ್ತೀರಾ?" ಎಂದು ಯಾರಾದರೂ ಕೇಳಿದರೆ "ನಮಗೋಸ್ಕರ ಮಾಡುತ್ತೇವೆ" ಎಂಬ ಉತ್ತರ ನೀಡಿದರೆ ಅದು ಅಪ್ಪಟ ಸುಳ್ಳು! ಏಕೆಂದರೆ ನಾವು ಡ್ರೆಸ್ ಮಾಡಿದಾಗ ಇತರರಿಗೆ ಚೆನ್ನಾಗಿ ಕಾಣಸಬೇಕೆಂದು ಬಯಸುತ್ತೇವೆ. ನಮಗೋಸ್ಕರ ಮಾಡುವುದಾದರೆ ಯಾವುದಾದರು ಒಂದು ಡ್ರೆಸ್ ಕೊಂಡರೆ ಸಾಕಲ್ಲವೇ ? ಏಕೆ ತುಂಬಾ ಹುಡುಕಿ ಒಂದು ಡ್ರೆಸ್ ಆಯ್ದು ಕೊಳ್ಳುತ್ತೇವೆ? ಏಕೆಂದರೆ ನಮ್ಮ ಡ್ರೆಸ್ಸಿಂಗ್ ಇತರರ ಗಮನವನ್ನು ನಮ್ಮತ್ತ ಸೆಳೆಯಬೇಕೆಂಬ ಆಸೆ ನಮ್ಮ ಮನದಲ್ಲಿ ಇದ್ದೇ ಇರುತ್ತದೆ.

ನಾವು ಧರಿಸುವ ಉಡುಗೆ -ತೊಡುಗೆಗಳು ನಮ್ಮ ವ್ಯಕ್ತಿತ್ವವನ್ನು ಬಿಂಬಿಸುತ್ತದೆ ಎಂಬ ಮಾತು ಸುಳ್ಳಲ್ಲ. ಅದರಲ್ಲೂ ಡ್ರೆಸ್, ಕೂದಲಿನ ವಿನ್ಯಾಸದಲ್ಲಿ ಇತರರನ್ನು ಅನುಸರಿಸುವುದೇ ಜಾಸ್ತಿ. ಎಲ್ಲರು ಮಾಡುವಂತೆ ಡ್ರೆಸ್ಸಿಂಗ್ ಮಾಡಿ ಎಲ್ಲರ ಹಾಗೆ ಇರುವ ಬದಲು ಸ್ವಲ್ಪ ವಿಭಿನ್ನವಾಗಿ ಕಾಣಬೇಕು, ನನ್ನ ವ್ಯಕ್ತಿತ್ವಕ್ಕೆ ಯಾವುದೇ ಧಕ್ಕೆ ಬಾರದ ರೀತಿಯಲ್ಲಿ ಡ್ರೆಸ್ಸಿಂಗ್ ಇರಬೇಕು ಎಂದು ಬಯಸುವುದಾದರೆ ಈ ಕೆಳಗಿನ ಸಲಹೆಗಳನ್ನು ಪಾಲಿಸಬಹುದು.

ಹೊಸ ಮತ್ತು ಹಳೆಯ ಟ್ರೆಂಡ್ ಡ್ರೆಸ್ : ಹೆಚ್ಚಾಗಿ ನಾವು ಹೊಸ ಟ್ರೆಂಡ್ ಏನಿದೆಯೋ ಆ ರೀತಿಯ ಡ್ರೆಸ್ ಹಾಕಲು ಇಷ್ಟಪಡುತ್ತೇವೆ. ಆದರೆ ಹೊಸ ಟ್ರೆಂಡ್ ಜೊತೆ, ಅಪರೂಪಕ್ಕೆ ಹಳೆಯ ಟ್ರೆಂಡ್ ಧರಿಸಿ ನೋಡಿ, ಇತರರಿಗಿಂತ ನಿಮ್ಮ ಸ್ಟೈಲ್ ಭಿನ್ನ ಅನ್ನಿಸಿ, ಇತರರ ಗಮನ ನಿಮ್ಮೆಡೆಗೆ ಸೆಳೆಯುವುದು. ಇದಕ್ಕಾಗಿ ಹಳೆಯ ಫ್ಯಾಷನ್ ಮ್ಯಾಗಿಜೆನ್ ನೋಡಿ, ಆಗ ಯಾವ ಸ್ಟೈಲ್ ಸೂಕ್ತ ಎಂಬ ಐಡಿಯಾ ಬರುತ್ತದೆ.

ಮಿಶ್ರ ಸ್ಟೈಲ್ : ನೀವು ಸ್ಪೋರ್ಟ್ಸ್ ಇಷ್ಟಪಡುವುದಾದರೆ ಸ್ಪೋರ್ಟ್ಸ್ ನ ಟ್ರೆಂಡಿ ಡ್ರೆಸ್ ಧರಿಸಿ, ಕೆಲವೊಮ್ಮೆ ಸಂಪ್ರದಾಯ ಪ್ರಕಾರ ಅಂದರೆ ಕ್ಲಾಸಿಕಲ್ ರೀತಿ ಡ್ರೆಸ್ ಮಾಡಿ, ಈ ರೀತಿ ನಿಮ್ಮದೇ ಆದ ಸ್ಟೈಲ್ ನಲ್ಲಿ ಮಿಂಚಿ.

ಸೂಜಿಗಲ್ಲಿನಂತಹ ಚೆಲುವಿಗೆ: ಸ್ಟೈಲ್ ಮತ್ತು ವ್ಯಕ್ತಿತ್ವನ್ನು ಮ್ಯಾಚ್ ಮಾಡುವಂತೆ ಇರಬೇಕು. ಸಂಪ್ರದಾಯದ ಪ್ರಕಾರ ಡ್ರೆಸ್ ಮಾಡಿದರೆ ನಿಮ್ಮ ಮೇಕಪ್ ನಿಂದ ಹಿಡಿದು, ಹೇರ್ ಸ್ಟೈಲ್ ವರೆಗೂ ಅದೇ ರೀತಿ ಇರಲಿ. ಆದರೆ ಮಾಡರ್ನ್ ಡ್ರೆಸ್ ಮಾಡಿದಾಗ ಹೂ ಮುಡಿಯುವುದು, ಹಳೆಯ ಕಾಲದಂತೆ ಮೇಕಪ್ ಮಾಡುವುದು ಮಾಡಿದರೆ ವಿಚಿತ್ರವಾಗಿ ಕಾಣುವುದು.

ಹೊಸ ಕೇಶ ವಿನ್ಯಾಸ: ಕೇಶ ವಿನ್ಯಾಸ ನಿಮ್ಮ ಲುಕ್ ಅನ್ನೇ ಬದಲಾಯಿಸುತ್ತದೆ. ದಿನಾ ಒಂದೇ ರೀತಿಯ ಕೇಶ ವಿನ್ಯಾಸದಲ್ಲಿ ಬರುವುದಕ್ಕಿಂತ ಹೇರ್ ಕಟ್ ಮಾಡಿ ಹೊಸ ಕೇಶ ವಿನ್ಯಾಸ ಮಾಡಿಸಿದರೆ ನಿಮ್ಮ ಲುಕ್ ವಿಭಿನ್ನವಾಗಿ ಕಾಣುವುದು. ಆದರೆ ಈ ರೀತಿ ಕೇಶ ವಿನ್ಯಾಸ ಮಾಡಿಸುವಾಗ ನುರಿತ ಬ್ಯೂಟಿಷಿಯನ್ ಬಳಿ ಮಾಡಿಸಿ.

ಬ್ಯೂಟಿ ಟಿಪ್ಸ್: ನಿಮ್ಮ ಫ್ರೆಂಡ್ಸ್ ಗೆ ಬ್ಯೂಟಿ ಸಲಹೆಗಳನ್ನು ನೀಡಿ, ಒಂದು ವೇಳೆ ನಿಮ್ಮ ಸ್ಟೈಲ್ ಅನ್ನು ಜೊತೆಯಲ್ಲಿದ್ದವರು ಕಾಪಿ ಮಾಡಲು ಬಯಸಿದರೆ ಅದಕ್ಕಾಗಿ ನೀವು ನಿಮ್ಮ ಸ್ಟೈಲ್ ಬಿಡಬೇಕಾಗಿಲ್ಲ, ಏಕೆಂದರೆ ನಿಮ್ಮನ್ನು ಇತರರು ಅನುಕರಿಸಿದರೆ ನೀವು ಈಗಾಗಲೇ ಇತರರ ಮನ ಸೆಳೆದ್ದೀರಾ ಎಂದು ಅರ್ಥ.
ಬೇರೆಯವರ ಸ್ಟೈಲ್ ಕಾಪಿ ಮಾಡುವುದಕ್ಕಿಂತ ತಮ್ಮ ವ್ಯಕ್ತಿತ್ವಕ್ಕೆ ಯಾವುದೇ ದಕ್ಕೆಯಾಗದ ರೀತಿಯಲ್ಲಿ ನಾವೇ ಹೊಸ ಟ್ರೆಂಡ್ ಹುಟ್ಟು ಹಾಕಿದರೆ ಇತರರಿಗಿಂತ ಭಿನ್ನವಾಗಿ ಕಾಣಬಹುದು. ನೀವೂ ಕೂಡ ಭಿನ್ನವಾಗಿ ಕಾಣಬೇಕೆಂದು ಇಷ್ಟಪಡುತ್ತೀರಾ ತಾನೆ?