ಟೀಕೆಗೆ ಹೆದರಿದರೆ ಜೀವನದಲ್ಲಿ ಸೋಲು

Insync

oi-Reena

By Hema S

Published: Tuesday, May 22, 2012, 17:10 [IST]

ನಮ್ಮನ್ನು ಹೊಗುಳುವವರು ಇರುವ ಹಾಗೇ ನಮ್ಮ ಏಳಿಗೆಯನ್ನು ಸಹಿಸದವರು ಕೂಡ ಜೊತೆಗೆ ಇರುತ್ತಾರೆ. ಅಂತಹವರು ನಮ್ಮ ಸಣ್ಣ ತಪ್ಪು ಸಿಕ್ಕಿದರೆ ಅದನ್ನೇ ಬೊಟ್ಟು ಮಾಡಿ ತೋರಿಸಿ ನಮಗೆ ಜೀವನದಲ್ಲಿ ಜಿಗುಪ್ಸೆ ಬರುವ ರೀತಿ ಮಾಡಿ ಬಿಡುತ್ತಾರೆ. ಈ ರೀತಿ ಕೆಲಸದ ಜಾಗದಲ್ಲಿ ಅನುಭವಕ್ಕೆ ಬರಬಹುದು ಅಥವಾ ನೆರೆಹೊರೆಯವರು ಆ ರೀತಿ ವರ್ತಿಸಬಹುದು. ಆದರೆ ಅವರೆಲ್ಲಾ ಅ ರೀತಿ ವರ್ತಿಸುತ್ತಾರೆ ಎಂದು ತಾಳ್ಮೆ ಕಳೆದುಕೊಂಡರೆ ಪರಿಸ್ಥಿತಿ ಮತ್ತಷ್ಟು ಕೆಟ್ಟದಾಗಿ ಇದ್ದ ಮಾನಸಿಕ ನೆಮ್ಮದಿ ಕೂಡ ಹಾಳಾಗುತ್ತೆ. ಕೆಲಸದ ಜಾಗದಲ್ಲಿ ನಿಮ್ಮನ್ನು ಕಾಲೆಳೆಯುವವರು ಇದ್ದರೆ ಕೋಪ ಅಥವಾ ಬೇಜಾರು ಮಾಡದೆ ಈ ಕೆಳಗಿನ ಸಲಹೆಗಳನ್ನು ಪಾಲಿಸುವುದು ಒಳ್ಳೆಯದು.

ಯಾವ ವಿಷಯವಾಗಲಿ ತುಂಬಾ ವೈಯಕ್ತಿಕವಾಗಿ ತಗೋಬಾರದು: ಬೇರೆಯವರು ಏನಾದರೂ ಅಂದರೆ ಅದನ್ನು ತುಂಬಾ ವೈಯಕ್ತಿಕವಾಗಿ ತಗೋಬಾರದು. ಏಕೆಂದರೆ ಅದರ ಬಗ್ಗೆ ಯೋಚನೆ ಮಾಡಿದಷ್ಟು ನಿಮ್ಮ ಮನಸ್ಸಿನ ನೆಮ್ಮದಿ ಹಾಳಾಗುವುದು. ಇದರಿಂದ ಕೆಲಸದಲ್ಲಿ ಗಮನ ಸಲ್ಲಿಸಲು ಸಾಧ್ಯವಾಗುವುದಿಲ್ಲ. ಆದ್ದರಿಂದ ನಿಮ್ಮ ಭಾವನೆಗಳನ್ನು ನಿಯಂತ್ರಣದಲ್ಲಿಟ್ಟು ಕೆಲಸದ ಕಡೆ ಗಮನ ಕೊಡಬೇಕು.

ಆತ್ಮವಿಶ್ವಾಸ ಕಳೆದುಕೊಳ್ಳಬಾರದು: ಕೆಲವೊಮ್ಮೆ ಬೇರೆಯವರು ಟೀಕೆ ಮಾಡಿದರೆ ಅದು ನಮ್ಮ ಆತ್ಮವಿಶ್ವಾಸವನ್ನು ಕುಗ್ಗಿಸಿಬಿಡುತ್ತದೆ. ಉದಾಹರಣೆಗೆ ' ಬಾಸ್ ಅಥವಾ ಸಹೋದ್ಯೋಗಿ ನಿನ್ನ ಕೈಯಿಂದ ಆ ಕೆಲಸ ಮಾಡಲು ಆಗಲ್ಲ' ಅಂದರೆ ನಿಮಗೆ ಮಾಡುವ ಸಾಮರ್ಥ್ಯವಿದ್ದರೂ ಅವರು ಹೇಳಿದ್ದೇ ಸರಿಯಿರಬಹುದೇ ಅಂತ ಅನಿಸಲಾರಂಭಿಸುತ್ತದೆ. ನಿಮ್ಮ ಸಾಮರ್ಥ್ಯ ಬೇರೆಯವರಿಗಿಂತ ನಿಮಗೆ ಗೊತ್ತಿರುತ್ತದೆ. ಬೇರೆಯವರು ಏನು ಹೇಳುತ್ತಿದ್ದಾರೆ ಅಂತ ಕಿವಿಗೊಡದೆ ಕೆಲಸದ ಮುಖಾಂತರ ನಿಮ್ಮ ಸಾಮರ್ಥ್ಯವನ್ನು ತೋರಿಸಿಕೊಡಬೇಕು.

ನಗು: ಬೇರೆಯವರು ಟೀಕೆ ಮಾಡಿದರೆ ಅದನ್ನು ನಿರ್ಲಕ್ಷ್ಯ ಮಾಡಬೇಕು. ಕೋಪ ಬಂದರೂ ನಿಯಂತ್ರಣದಲ್ಲಿಡಬೇಕು. ಏಕೆಂದರೆ ಕೋಪ ಮಾಡಿಕೊಂಡಷ್ಟು ಪರಿಸ್ಥಿತಿ ಮತ್ತಷ್ಟು ಗಂಭೀರವಾಗುತ್ತದೆ. ಆದ್ದರಿಂದ ತಕ್ಷಣವೇ ಪ್ರತಿಕ್ರಿಯೆ ನೀಡದೆ ಸಾವಧಾನವಾಗಿರಿ. ನಿಮ್ಮ ಕೆಲಸದತ್ತ ಗಮನ ಹರಿಸಿ. ಈ ರೀತಿ ಮಾಡಿದರೆ ಮಾತ್ರ ನಿಮಗೆ ಏನಾದರೂ ಸಾಧಿಸಲು ಸಾಧ್ಯ. ಟೀಕೆಗೆ ಹೆದರಿಕೊಂಡರೆ ಆತ್ಮವಿಶ್ವಾಸ ಕಳೆದುಕೊಂಡು ನಮ್ಮ ಜೀವನ ನಾವೇ ಹಾಳು ಮಾಡಿದಂತಾಗುತ್ತದೆ.