'ಯಾವ ಬ್ರೀಡ್ ನಾಯಿ?' ನಿಮ್ಮ ಅಂತಸ್ತು ಅಳೆಯಲು ಹೊಸ ಮಾನದಂಡ

ನಾಯಿ ಸಾಕುವುದು ಪ್ಯಾಷನ್

ಇತ್ತೀಚೆಗೆ ನಾಯಿಗಳನ್ನು ಸಾಕುವುದು ಒಂದು ರೀತಿ ಫ್ಯಾಷನ್ ಆಗಿಬಿಟ್ಟಿದೆ. ವಿವಿಧ ತಳಿಯ ನಾಯಿಗಳನ್ನು ನಮ್ಮ ಸುತ್ತ-ಮುತ್ತ ನಿತ್ಯ ಕಾಣುತ್ತೇವೆ. 5ಸಾವಿರದಿಂದ ಹಿಡಿದು ಲಕ್ಷಗಟ್ಟಲೆ ಹಣ ಕೊಟ್ಟು ನಾಯಿ ಕೊಂಡು ತರುವ ಜನರಿದ್ದಾರೆ. ಆಮೇಲೆ ಅವುಗಳನ್ನು ಕಾಪಾಡುವುದು, ಆರೈಕೆ ಮಾಡುವುದು ಕೂಡಾ ದುಬಾರಿಯೇ. ಹಾಗಾಗಿಯೇ ನಾಯಿಗಳ ಸಾಕುವಿಕೆಯ ಹಿಂದೆ ಕೋಟ್ಯಾಂತರ ರೂಪಾಯಿ ಉದ್ಯಮ ನಡೆಯುತ್ತಿದೆ. ನಾಯಿಗಳನ್ನು ಸಾಕಿ ಮಾರಾಟ ಮಾಡುವುದು, ಅವುಗಳಿಗೆ ಆಹಾರ, ಮಲಗಲು ಬೆಡ್, ಸೋಪ್, ಶ್ಯಾಂಪು, ಪೌಡರ್, ಡ್ರಿಂಕ್ಸ್, ನಿಯಮಿತ ಚುಚ್ಚುಮದ್ದುಗಳು, ಹೈಟೆಕ್ ಆಸ್ಪತ್ರೆ, ಪಾರ್ಲರ್ ಗಳು ಇದಕ್ಕಾಗಿಯೇ ತಲೆ ಎತ್ತಿವೆ.

ನಮಗೆ ನಾವೇ ಹಾಕಿಕೊಂಡ ಮಾನದಂಡ

ಯಾವ ಜಾತಿಯ ನಾಯಿಗಳು ಮನೆಯಲ್ಲಿವೆ ಎನ್ನುವುದು ಒಂದು ರೀತಿಯ ಪ್ರೆಸ್ಟೀಜ್ ಪ್ರಶ್ನೆಯಾಗಿದೆ. ಮನುಷ್ಯನ ಸಂಪತ್ತನ್ನು ಅಳೆಯಲು ಮನುಷ್ಯನೇ ತನ್ನ ಸುತ್ತ ಒಂದು ಮಿಥ್ಯದ ಮಾನದಂಡ ಅಳವಡಿಸಿಕೊಂಡಿದ್ದಾನೆ. ಯಾವ ಬ್ರಾಂಡ್ ಬಟ್ಟೆ, ಮನೆ ಹೇಗಿದೆ, ಯಾವ ಮಾಡೆಲ್ ಕಾರು, ಯಾವ ಬ್ರಾಂಡ್ ವಾಚ್ ಕಟ್ಟಿದ್ದಾರೆ, ಇದರ ಜೊತೆ ಈಗ ಸೇರ್ಪಡೆಯಾಗಿರುವುದು ಯಾವ ತಳಿಯ ನಾಯಿ ಸಾಕಿದ್ದೀರಾ ಎನ್ನುವುದು. ಹೆಚ್ಚಿನ ಬೆಲೆಯ ವಿದೇಶೀ ನಾಯಿ ಸಾಕಿದ್ದರೆ ಸಮಾಜದಲ್ಲಿ ನಿಮಗೇನೋ ಗೌರವ. ಅವುಗಳನ್ನು ನೋಡಿಕೊಳ್ಳುವ ಶ್ರಮವೂ ಏನು ಕಡಿಮೆ ಇಲ್ಲ. ಮಗುವೊಂದನ್ನು ಸಾಕಲು ತೆಗೆದುಕೊಳ್ಳುವುದಕ್ಕಿಂತ ಹೆಚ್ಚು ಜವಬ್ದಾರಿ ನಾಯಿ ಸಾಕುವಾಗ ಬೇಕಾಗುತ್ತದೆ.

ತಿಂಗಳಿಗೆ ಲಕ್ಷಾಂತರ ಖರ್ಚು

ನಾಯಿಗಳ ಸಾಕುವಿಕೆಗಾಗಿಯೇ ತಿಂಗಳೊಂದಕ್ಕೆ ಲಕ್ಷಾಂತರ ರೂಪಾಯಿ ಖರ್ಚು ಮಾಡುವ ಮಂದಿಯಿದ್ದಾರೆ. ಅವುಗಳನ್ನು ನೋಡಿಕೊಳ್ಳಲೆಂದೇ ಸಹಾಯಕರನ್ನು ಸಹ ನೇಮಕ ಮಾಡಿರುತ್ತಾರೆ. ಬಾಲಿವುಡ್, ಹಾಲಿವುಡ್, ಕ್ರಿಕೆಟರ್ಸ್ ಇತರ ವಿಐಪಿಗಳು ಹಲವರು ಒಂದಲ್ಲ ಒಂದು ಬೆಲೆಬಾಳುವ ನಾಯಿಯ ಒಡೆಯರಾಗಿದ್ದಾರೆ. ಒಮ್ಮೊಮ್ಮೆ ತಮ್ಮ ಪ್ರೀತಿಯ ನಾಯಿಯ ಜೊತೆ ಒಂದು ಫೋಟ್ ಅಪ್ಲೋಡ್ ಮಾಡ್ತಿರ್ತಾರೆ ಕೂಡ.

ನಾಯಿಗೂ ಇದೆ ಅದೃಷ್ಟ

ಈ ಸಮಾಜದಲ್ಲಿ ಒಂದು ವರ್ಗದ ಮನುಷ್ಯ ಮಾತ್ರ ಐಷಾರಾಮಿ ಜೀವ ನಡೆಸುತ್ತಿಲ್ಲ. ಹಲವು ನಾಯಿಗಳು ಸಹ ಐಷಾರಾಮಿ ಜೀವನ ನಡೆಸುತ್ತಿವೆ. ಅದೂ ಕೂಡ ಆ ಮನುಷ್ಯನ ಐಷಾರಾಮಿ ಜೀವನದ ಒಂದು ಭಾಗವೇ ಆಗಿದೆ. ಮನುಷ್ಯ ಕೇವಲ ತನ್ನ ಜೊತೆಗಾಗಿ, ತನ್ನ ಅಗತ್ಯಕ್ಕಾಗಿ ನಾಯಿ ಸಾಕುವ ಕ್ರಮ ಬದಲಾಗುತ್ತಿದೆ. ತನ್ನ ಅಂತಸ್ತಿನ ಪ್ರದರ್ಶನಕ್ಕಾಗಿಯೂ ಮೂಕ ಪ್ರಾಣಿಗಳು ಬಳಕೆಯಾಗುತ್ತಿವೆ. ಆ ನೆಪದಲ್ಲಾದರೂ ನಾಯಿಯೊಂದಕ್ಕೆ ಉತ್ತಮ ಜೀವನ ಸಿಗುವಂತಾಗಿದೆ ಎಂಬುವುದು ಬೇರೆ ಮಾತು.