ಒಡತಿಯ ಪ್ರಾಣಕ್ಕೆ ಕುತ್ತಾದವೇ ಸಾಕು ನಾಯಿಗಳು?

Pet Care

oi-Sumalatha N

By Sumalatha N

Published: Saturday, September 3, 2011, 14:46 [IST]

ತಾನು ಮುದ್ದಾಗಿ ಸಾಕಿ ಬೆಳೆಸಿದ ನಾಯಿಯೇ ತನ್ನ ಪ್ರಾಣವನ್ನು ಬಲಿತೆಗೆದುಕೊಳ್ಳುವುದೆಂದು ಆಕೆ ಎಂದಿಗೂ ಎಣಿಸಿರಲೇ ಇಲ್ಲ. ಆದರೆ ಅದೇಕೊ ಅಂದು ಅವಳ ಮುದ್ದು ನಾಯಿಗಳು ಅವಳ ವಿರುದ್ದವೇ ತಿರುಗಿಬಿದ್ದಿದ್ದವು. ತಮಗೆ ಊಟ ಹಾಕಿದ ಒಡತಿಯ ಪ್ರಾಣವನ್ನು ಐದು ನಾಯಿಗಳು ಕ್ರೂರವಾಗಿ ಬಲಿ ತೆಗೆದುಕೊಂಡಿದ್ದವು.

ಫಿಲಡೆಲ್ಫಿಯಾದ ಮನೆಯೊಂದರಲ್ಲಿ ಐದು ಪಿಟ್ ಬುಲ್ಸ್ ನಾಯಿಗಳು ತನ್ನ ಒಡತಿಯನ್ನು ಬರ್ಬರವಾಗಿ ಕೊಂದು ಹಾಕಿವೆ. 50 ವರ್ಷದ ಕಾರ್ಮೆನ್ ರಾಮೋಸ್ ಎಂಬಾಕೆ ನಾಯಿಗಳ ಆವೇಷಕ್ಕೆ ಬಲಿಯಾದ ಮನೆಯೊಡತಿ.

ಕೆಲಸಕ್ಕೆ ಹೋಗಿದ್ದ ಕಾರ್ಮೆನ್ ಗಂಡ ಮನೆಗೆ ಮರಳಿ ಬಂದಾಗ ಘಟನೆ ಬೆಳಕಿಗೆ ಬಂದಿದ್ದು. ತಲೆ, ಮುಖ ಮತ್ತು ದೇಹಕ್ಕೆ ತೀವ್ರ ಪೆಟ್ಟಾಗಿ ರಕ್ತದ ಮಡುವಿನಲ್ಲಿ ಸತ್ತು ಬಿದ್ದಿದ್ದ ಪತ್ನಿಯನ್ನು ನೋಡಿ ಏನೂ ಮಾಡಲು ತೋಚದೆ ಕೈ ಚೆಲ್ಲಿ ಕುಳಿತುಕೊಳ್ಳುವಂತಾಯಿತು.

ಇತ್ತೀಚೆಗಷ್ಟೆ ಅಲ್ಲಿನ ಇಬ್ಬರು ನಿವಾಸಿಗಳ ಮೇಲೆ ಇದೇ ನಾಯಿಗಳು ಆಕ್ರಮಣ ಮಾಡಿದ್ದರಿಂದ ಪ್ರಾಣಿ ದಯಾ ಸಂಘದ ಅಧಿಕಾರಿಗಳು ಕರೆದುಕೊಂಡು ಹೋಗಿದ್ದರು. ಆದರೆ ನಾಯಿಯ ಮೇಲಿನ ಅತಿಯಾದ ಪ್ರೀತಿಯಿಂದ ದಂಪತಿಗಳು ಮತ್ತೆ ತಮ್ಮ ಮುದ್ದು ಶ್ವಾನಗಳನ್ನು ಕರೆಸಿಕೊಂಡಿದ್ದರು. ಅದೇ ಈಗ ಕಾರ್ಮೆನ್ ಪ್ರಾಣಕ್ಕೆ ಕುತ್ತಾಗಿ ಹೋಯ್ತು. ಕಾರ್ಮನ್ ಸತ್ತ ನಂತರ ಈ ಶ್ವಾನಗಳು ಮತ್ತೆ ಪ್ರಾಣಿದಯಾ ಸಂಘ ಸೇರುವಂತಾಗಿದೆ. ಪ್ರಾಣಿಗಳಲ್ಲಿ ಕ್ರೂರತನ ನಿವಾರಿಸುವ ಪೆನಿಸ್ಲೇವಿಯಾದ ಸಂಸ್ಥೆ ಈ ಕುರಿತು ತನಿಖೆ ನಡೆಸುತ್ತಿದೆ.

ಬೆಂಗಳೂರಿನಲ್ಲಿ ಬೀದಿ ನಾಯಿಗಳ ಹಾವಳಿ ವಿಪರೀತ. ದಾರಿಹೋಕರನ್ನು, ಅದರಲ್ಲೂ ರಸ್ತೆಯಲ್ಲಿ ಆಡುವ ಮಕ್ಕಳನ್ನು ಕಚ್ಚುವುದು, ಸಾಯಿಸುವುದು ವಿದ್ಯಮಾನ. ವಿರೋಧಾಭಾಸವೆಂದರೆ ಸಾಕಿದ ನಾಯಿಗಳೇ ಮನೆಯೊಡತಿಯನ್ನು ಕಚ್ಚಿ ಸಾಯಿಸುವ ಈ ಕ್ರೂರ ಉದಾಹರಣೆ ಅಮೆರಿಕ ಪೂರ್ವ ಕರಾವಳಿಯನ್ನು ಬೆಚ್ಚಿಬೀಳಿಸುವಂತಿದೆ.