ಮಣ್ಣೇ ಬೇಡ! ಕೇವಲ ನೀರಿನಿಂದ ಬೆಳೆಯುವ 7 ಸಸ್ಯಗಳಿವು; ಯಾರಿಗೂ ಗೊತ್ತಿಲ್ಲದ ಸಿಂಪಲ್ ಟ್ರಿಕ್

ಮಣ್ಣು ಬೇಕಿಲ್ಲ, ತೊಂದರೆ ಇಲ್ಲ! ಕೇವಲ ನೀರಿನಲ್ಲಿ ಬೆಳೆಸುವ ಅಡುಗೆ ಸಸ್ಯಗಳಿವು. ಹೌದು, ಪ್ರಸ್ತುತ ಅಡುಗೆಮನೆ ಕೇವಲ ಅಡುಗೆ ಮಾಡುವ ಸ್ಥಳವಾಗಿಲ್ಲ, ಆರೋಗ್ಯ ಹಾಗೂ ನೈಸರ್ಗಿಕ ಜೀವನಶೈಲಿಯ ಕೇಂದ್ರವಾಗುತ್ತಿದೆ. ನಮ್ಮ ಅಡುಗೆಯಲ್ಲಿ ಬಳಸುವ ಹಲವಾರು ಔಷಧಿ ಸಸ್ಯಗಳನ್ನು (herb garden) ಮಣ್ಣು ಇಲ್ಲದೇ ಕೇವಲ ನೀರಿನಲ್ಲಿ ಬೆಳೆಸಬಹುದು ಅಂತ ತಿಳಿದರೆ ನಿಮಗೆ ಅಚ್ಚರಿಯಾಗಬಹುದು. ಹೌದು, ಸ್ವಲ್ಪ ಕಾಳಜಿ ಮತ್ತು ಸರಿಯಾದ ವಿಧಾನ ಪಾಲಿಸಿದರೆ, ಅಡುಗೆಮನೆಯಲ್ಲಿ ಹಸಿರು ಸಸ್ಯಗಳನ್ನು ಬೆಳೆಸುವುದು ತುಂಬಾ ಸುಲಭ. ಇವು ಕೇವಲ ರುಚಿ ಮತ್ತು ವಾಸನೆ ನೀಡುವುದಲ್ಲದೆ, ಆರೋಗ್ಯಕ್ಕೂ ಬಹಳ ಉಪಕಾರಿಯಾಗುತ್ತವೆ. ಕೇವಲ ನೀರಿನಿಂದ ಬೆಳೆಸಬಹುದಾದ 7 ಪ್ರಮುಖ ಗಿಡಮೂಲಿಕೆಗಳ (Growing Herbs in Water) ಬಗ್ಗೆ ಇಲ್ಲಿದೆ ಮಾಹಿತಿ.

ಹಲವರು ಮನೆಯಲ್ಲಿ ಸಣ್ಣದೊಂದು ಗಿಡವನ್ನು ಬೆಳೆಸುವುದು ಕೂಡ ದೊಡ್ಡ ಸಾಧನೆ ಎಂದುಕೊಳ್ಳುತ್ತಾರೆ. ಅದರಲ್ಲೂ ಮಣ್ಣು, ಗೊಬ್ಬರ, ಸೂಕ್ತ ಜಾಗದ ಕೊರತೆಯಿಂದಾಗಿ ಗಿಡಗಳನ್ನು ಬೆಳೆಸುವ ಆಸೆಯನ್ನು ಕೈಬಿಡುವವರೇ ಹೆಚ್ಚು. ಆದರೆ, ನಿಮ್ಮ ಮನೆಯ ಅಡುಗೆಮನೆಯಲ್ಲೇ, ಮಣ್ಣು ಮತ್ತು ಗೊಬ್ಬರದ ಗೋಜಿಲ್ಲದೆ ಕೇವಲ ನೀರನ್ನು ಬಳಸಿ ತಾಜಾ ಗಿಡಮೂಲಿಕೆಗಳನ್ನು ಬೆಳೆಸಬಹುದು ಎಂದರೆ ನೀವು ನಂಬಲೇಬೇಕು. ಇದು ಕೇವಲ ಒಂದು ಟ್ರಿಕ್ ಅಲ್ಲ, ಬದಲಾಗಿ ನೀರನ್ನು ಆಧರಿಸಿದ ಹೈಡ್ರೋಪೋನಿಕ್ ತಂತ್ರಜ್ಞಾನದ ಸರಳ ರೂಪ. ಈ ಸುಲಭ ವಿಧಾನವು ನಗರ ಪ್ರದೇಶಗಳಲ್ಲಿ, ಅಪಾರ್ಟ್‌ಮೆಂಟ್‌ಗಳಲ್ಲಿ ವಾಸಿಸುವವರಿಗೂ ತಮ್ಮದೇ ಆದ ಚಿಕ್ಕ ಗಿಡಗಳ ತೋಟವನ್ನು ಹೊಂದಲು ಅವಕಾಶ ನೀಡುತ್ತದೆ. ಈ ವಿಧಾನದಿಂದ ನೀವು ಬಯಸಿದಾಗಲೆಲ್ಲಾ ನಿಮ್ಮ ಅಡುಗೆಗೆ ತಾಜಾ ಗಿಡಮೂಲಿಕೆಗಳನ್ನು ಬಳಸಬಹುದು.

ಮಣ್ಣು ಇಲ್ಲದೆ ಬೆಳೆಯಬಹುದಾದ ಸಸ್ಯಗಳು ಇಲ್ಲಿವೆ

ನಿಮ್ಮ ಮನೆಯ ಕಿಚನ್ ಗಾರ್ಡನ್ ಆರಂಭಿಸಲು ಈ ಲೇಖನದಲ್ಲಿ 7 ಗಿಡಮೂಲಿಕೆಗಳನ್ನು ಮತ್ತು ಅವುಗಳನ್ನು ಬೆಳೆಸುವ ವಿಧಾನವನ್ನು ತಿಳಿಸಲಾಗಿದೆ. ಈ ಸರಳ ವಿಧಾನಗಳನ್ನು ಬಳಸಿಕೊಂಡು ನೀವು ಯಾವುದೇ ಕಷ್ಟವಿಲ್ಲದೆ ನಿಮ್ಮ ಅಡುಗೆಮನೆಯಲ್ಲಿಯೇ ತಾಜಾ ಗಿಡಮೂಲಿಕೆಗಳನ್ನು ಬೆಳೆಸಬಹುದು. ಇನ್ಮುಂದೆ, ನೀವು ಮಾಡುವ ಅಡುಗೆಗೆ ಬಳಸುವ ವಸ್ತುಗಳನ್ನು ತರಲು ಮಾರುಕಟ್ಟೆಗೆ ಹೋಗುವ ಅಗತ್ಯವಿಲ್ಲ.

1. ಕೊತ್ತಂಬರಿ

ಕೊತ್ತಂಬರಿ (Coriander) ಇಲ್ಲದೆ ಯಾವುದೇ ಅಡುಗೆ ಪೂರ್ಣವಾಗುವುದೇ ಇಲ್ಲ. ಕೊತ್ತಂಬರಿ ಅಡುಗೆಗೆ ತಾಜಾತನ ನೀಡುವ ಪ್ರಮುಖ ಸಸ್ಯ. ನೀವು 4 ಇಂಚು ಉದ್ದದ ಕೊತ್ತಂಬರಿ ಗಿಡದ ಚಿಕ್ಕ ಕಟಿಂಗ್‌ಗಳನ್ನು ತೆಗೆದುಕೊಂಡು, ಕೆಳಗಿನ ಎಲೆಗಳನ್ನು ತೆಗೆಯಿರಿ. ಬಳಿಕ ಸ್ವಚ್ಛ ಅಥವಾ ಶುದ್ಧ ನೀರಿನ ಗಾಜಿನಲ್ಲಿ (ಜಾರ್‌) ಇಡಿ. ಕೆಲವೇ ದಿನಗಳಲ್ಲಿ ಹೊಸ ಬೇರುಗಳು ಬೆಳೆಯುತ್ತವೆ.

2. ತಳಸಿ

ತಳಸಿಯ (Basil) ಸುವಾಸನೆ ಮತ್ತು ಔಷಧೀಯ ಗುಣಗಳ ಬಗ್ಗೆ ಎಲ್ಲರಿಗೂ ತಿಳಿದಿದೆ. ಇದು ಅಡುಗೆಗೆ ವಿಶೇಷ ರುಚಿ ನೀಡುತ್ತದೆ. ಇದರ ಕಾಂಡಗಳನ್ನು ನೀರಿನಲ್ಲಿ ಇಟ್ಟು ಬೆಳೆಸಬಹುದು. ನೀವು 4 ರಿಂದ 6 ಇಂಚಿನ ಕೊಂಬೆ ಅಥವಾ ತುಳಸಿ ಕಾಂಡವನ್ನು ಎಲೆಗಳು ಸೇರುವ ಭಾಗದ ಕೆಳಗೆ ಕತ್ತರಿಸಿ. ಕೆಳಗಿನ ಎಲೆಗಳನ್ನು ತೆಗೆದುಹಾಕಿ. ಅದನ್ನು ಸೂರ್ಯ ಬೆಳಕು ಬೀಳುವ ಕಿಟಕಿಯ ಬಳಿ ನೀರಿನಲ್ಲಿ ಇಡಿ. ಪ್ರತೀ 2 ರಿಂದ 3 ದಿನಕ್ಕೊಮ್ಮೆ ನೀರನ್ನು ಬದಲಾಯಿಸಿದರೆ ಬೇಗನೆ ಬೇರು ಬಿಡುತ್ತದೆ.

3. ಪುದೀನಾ

ಪುದೀನಾ (Mint) ತಾಜಾ ಶೀತಲತೆಯನ್ನು ನೀಡುವ ಸಸ್ಯ. ಚಟ್ನಿ, ಜ್ಯೂಸ್ ಮತ್ತು ಸಲಾಡ್‌ಗಳಲ್ಲಿ ಪುದೀನವನ್ನು ಬಳಸಲಾಗುತ್ತದೆ. ಪುದೀನಾವನ್ನು ನೀರಿನಲ್ಲಿ ಸುಲಭವಾಗಿ ಬೆಳೆಸಬಹುದು. ಇದರ ಕಾಂಡಗಳನ್ನು ನೀರಿನಲ್ಲಿ ಇಡುವುದರಿಂದ ಬೇಗನೆ ಬೇರುಗಳು ಮೂಡುತ್ತವೆ. ನೀವು 4 ರಿಂದ 5 ಇಂಚು ಉದ್ದದ, ಹೂವಿಲ್ಲದ ಪುದೀನ ಕಾಂಡಗಳನ್ನು ಕತ್ತರಿಸಿ. ಕೆಳಗಿನ ಎಲೆಗಳನ್ನು ತೆಗೆದುಹಾಕಿ. ನಂತರ ಫಿಲ್ಟರ್ ಮಾಡಿದ ಅಥವಾ ಸ್ವಚ್ಛ ನೀರಿನ ಗಾಜಿನಲ್ಲಿ ಇಡಿ. ಇದನ್ನು ನೇರ ಸೂರ್ಯನ ಬೆಳಕು ಬೀಳದ ಜಾಗದಲ್ಲಿ ಇಡಿ, ಆಗ ಚೆನ್ನಾಗಿ ಬೆಳೆಯುತ್ತದೆ.

4. ಒರೆಗಾನೋ (Oregano)

ಪಿಜ್ಜಾ ಮತ್ತು ಪಾಸ್ತಾದಲ್ಲಿ ಹೆಚ್ಚಿನದಾಗಿ ಬಳಸುವ ಈ ಒರೆಗಾನೋ (Oregano) ಕೂಡ ನೀರಿನಲ್ಲಿ ಬೆಳೆಸಬಹುದು. ಆರೋಗ್ಯಕರವಾದ ಒರೆಗಾನೊ ಗಿಡದ ಕಾಂಡವನ್ನು ಕತ್ತರಿಸಿ. ಅದರ ಕೆಳಗಿನ ಅರ್ಧ ಭಾಗದ ಎಲೆಗಳನ್ನು ತೆಗೆಯಿರಿ. ಅದನ್ನು ಪ್ರಕಾಶಮಾನವಾದ ಹಾಗೂ ಬಿಸಿಯ ಸ್ಥಳದಲ್ಲಿ ನೀರಿರುವ ಗ್ಲಾಸ್‌ನಲ್ಲಿ ಇಟ್ಟರೆ ಬೇಗನೆ ಬೆಳೆಯುತ್ತದೆ.

5. ಥೈಮ್

ಥೈಮ್ ಅಥವಾ ತೈಮ್‌ನಲ್ಲಿ (Thyme) ಅಂಟಿ-ಆಕ್ಸಿಡೆಂಟ್ ಗುಣಗಳು ಹೆಚ್ಚು. ಹೂ ಬಿಡದ ಮೃದು ಹಸಿರು ಕೊಂಬೆಯಿಂದ ಕತ್ತರಿಸಿ. ಕೆಳಗಿನ ಎಲೆಗಳನ್ನು ತೆಗೆಯಿರಿ. ಅದನ್ನು ಪಾರದರ್ಶಕ ಗಾಜಿನಲ್ಲಿರುವ ನೀರಿನಲ್ಲಿ ಇಡಿ. ಇದನ್ನು ಪ್ರಕಾಶಮಾನವಾದ ಆದರೆ, ನೇರ ಸೂರ್ಯನ ಬೆಳಕು ಬೀಳದ ಸ್ಥಳದಲ್ಲಿ ಇಡಿ. ಆಗ ಬೇಗನೆ ಬೆಳೆಯುತ್ತದೆ.

6. ಸೇಜ್

ಸೇಜ್ (Sage) ಗಿಡಮೂಲಿಕೆಯು ಅದರ ಔಷಧೀಯ ಗುಣಗಳಿಗಾಗಿ ಹೆಸರುವಾಸಿಯಾಗಿದೆ. ಇದು ದೇಹದ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುವ ಸಸ್ಯ. ಹೊಸದಾಗಿ ಕತ್ತರಿಸಿದ ಕೊಂಬೆಗಳನ್ನು ತೆಗೆದು, ಕೆಳಗಿನ ಎಲೆಗಳನ್ನು ತೆಗೆದುಹಾಕಿ. ಬಳಿಕ ನೀರು ತುಂಬಿದ ಜಾರ್‌ನಲ್ಲಿ ಇಡಿ. ಅದನ್ನು ಬೆಳಕು ಬೀಳುವ ಸ್ಥಳದಲ್ಲಿ ಇರಿಸಿದರೆ, ಅದು ಬೇಗನೇ ಬೇರು ಬಿಡುತ್ತದೆ.

7. ರೋಸ್ಮೆರಿ

ರೋಸ್ಮೆರಿಯನ್ನು (Rosemary) ಸಾಮಾನ್ಯವಾಗಿ ಮಾಂಸಾಹಾರ ಮತ್ತು ಸೂಪ್‌ಗಳಲ್ಲಿ ಬಳಸಲಾಗುತ್ತದೆ. ಈ ಸಸ್ಯವು ವಿಶಿಷ್ಟ ವಾಸನೆ ಮತ್ತು ಆರೋಗ್ಯಕರ ಗುಣಗಳಿಂದ ಪ್ರಸಿದ್ಧ. ಆರೋಗ್ಯಕರ ಸಸ್ಯದಿಂದ 4 ರಿಂದ 6 ಇಂಚಿನ ಕೊಂಬೆಯನ್ನು ಕತ್ತರಿಸಿ, ಕೆಳಗಿನ ಎಲೆಗಳನ್ನು ತೆಗೆದುಹಾಕಿ. ಕೇವಲ ಕೆಳಭಾಗವನ್ನು ಮಾತ್ರ ಮುಳುಗುವಷ್ಟು ನೀರಿರುವ ಕಿರಿದಾದ ಗ್ಲಾಸ್‌ನಲ್ಲಿ ಇಡಿ. ಇದನ್ನು ಬೆಚ್ಚಗಿನ, ಬಿಸಿಲು ಅಥವಾ ಸೂರ್ಯ ಕಿರಣ ಬೀಳುವ ಸ್ಥಳದಲ್ಲಿ ಇಟ್ಟರೆ, ಚೆನ್ನಾಗಿ ಬೆಳೆಯುತ್ತದೆ.

ಹೈಡ್ರೋಪೋನಿಕ್ ಗಿಡಗಳ ಲಾಭಗಳೇನು?

ಮಣ್ಣು ಬಳಸದೆ ಗಿಡಗಳನ್ನು ಬೆಳೆಸುವುದರಿಂದ ಹಲವು ಪ್ರಯೋಜನಗಳಿವೆ. ಈ ವಿಧಾನದಲ್ಲಿ ನೀವು ಯಾವುದೇ ರಾಸಾಯನಿಕ ಗೊಬ್ಬರ ಅಥವಾ ಕೀಟನಾಶಕಗಳಿಲ್ಲದೆ ಸಂಪೂರ್ಣವಾಗಿ ಶುದ್ಧ ಮತ್ತು ತಾಜಾ ಗಿಡಮೂಲಿಕೆಗಳನ್ನು ಪಡೆಯಬಹುದು. ಅವುಗಳು ಇಲ್ಲಿವೆ.

• ಇದರಿಂದ ಯಾವುದೇ ಗಲೀಜು ಅಥವಾ ಕೆಸರು ಆಗುವುದಿಲ್ಲ.
• ಮಣ್ಣಿನ ಮೂಲಕ ಬರುವ ಕೀಟಗಳು ಮತ್ತು ರೋಗಗಳಿಂದ ನಿಮ್ಮ ಗಿಡಗಳು ಸುರಕ್ಷಿತವಾಗಿರುತ್ತವೆ.
• ಇಡೀ ಪ್ರಕ್ರಿಯೆಯು ಪಾರದರ್ಶಕವಾಗಿರುವುದರಿಂದ ಗಿಡಗಳು ಬೆಳೆಯುವುದನ್ನು ನೀವು ಸ್ಪಷ್ಟವಾಗಿ ನೋಡಬಹುದು.

ಮಣ್ಣಿನ ತೊಂದರೆ, ಗೊಬ್ಬರ ಅಥವಾ ಹೆಚ್ಚಿನ ಕಾಳಜಿ ಬೇಡ. ಕೇವಲ ನೀರು ಮತ್ತು ಸ್ವಲ್ಪ ಸಮಯ ಕೊಟ್ಟರೆ, ಈ ಸಸ್ಯಗಳು ನಿಮ್ಮ ಅಡುಗೆಮನೆಯಲ್ಲಿ ಹಸಿರು ತೋಟದಂತೆ ಅರಳುತ್ತವೆ. ಇವು ಅಡುಗೆಯಲ್ಲಿ ಸ್ವಾದ ಹೆಚ್ಚಿಸುವುದಲ್ಲದೆ, ಮನೆಯಲ್ಲಿ ಹಸಿರುತನ ಮತ್ತು ತಾಜಾತನವನ್ನು ನೀಡುತ್ತವೆ. ಆರೋಗ್ಯಕರ ಜೀವನಶೈಲಿಗೆ ಮತ್ತು ತಾಜಾ ಆಹಾರಕ್ಕೆ ಇವು ಉತ್ತಮ ಆಯ್ಕೆ. ನೀವು ಸಹ ಅಡುಗೆಮನೆಯಲ್ಲಿ ಸ್ವಲ್ಪ ಜಾಗ ಬಿಡಿ. ಈ ಸಸ್ಯಗಳನ್ನು ಬೆಳೆಸುವುದನ್ನು ಪ್ರಾರಂಭಿಸಿ. ನಿಮ್ಮ ಅಡುಗೆಮನೆ ನಿಮ್ಮದೇ ಚಿಕ್ಕ ಹಸಿರು ತೋಟವಾಗುವುದು ಖಚಿತ.