ಸುಸ್ತು ಮಾಡುವ ಮನೆ ಕೆಲಸಕ್ಕೆ ಇನ್ನು ವಿದಾಯ ಹೇಳಿ

Improvement

oi-Staff

By Jaya subramanya

Published: Thursday, March 24, 2016, 19:54 [IST]

ಮನೆ ಎಂಬ ದೇವಾಲಯವನ್ನು ಸ್ವಚ್ಛವಾಗಿಟ್ಟುಕೊಳ್ಳುವುದು ಕ್ರಿಯಾತ್ಮಕ ಕೆಲಸವಾಗಿದ್ದು ಇದರಿಂದ ನಿಮಗೆ ವ್ಯಾಯಾಮವೂ ದೊರಕಿದಂತಾಗಿ ನಿಮಗೂ ಹಾಯೆನಿಸುತ್ತದೆ. ಆದರೆ ಕೊಳಕಾದ ಮನೆಯು ನಿಮ್ಮ ಮನಸ್ಸನ್ನು ಕೂಡ ಹಾಳು ಮಾಡಿ ನೆಮ್ಮದಿಯನ್ನು ಕೆಡಿಸಬಲ್ಲುದು. ಮನೆಯಲ್ಲಿರುವ ಗೃಹಿಣಿಯರಿಗೆ ಮನೆಯ ಸ್ವಚ್ಛತೆ ಅಷ್ಟೊಂದು ಹೊರೆ ಎಂದೆನಿಸದಿದ್ದರೂ ಉದ್ಯೋಗಕ್ಕೆ ಹೋಗುವ ಮಹಿಳೆಯರಿಗೆ ಮನೆ ಸ್ವಚ್ಛತೆ ಕಷ್ಟಕರವಾದ ಕೆಲಸ ಎಂದೆನಿಸುತ್ತದೆ.

ಮನೆಯ ಸ್ವಚ್ಛತೆಗಾಗಿಯೇ ವಾರಕ್ಕೊಂದು ರಜಾದಿನವನ್ನು ಇವರು ಮೀಸಲಾಗಿರಿಸಿ ತುಂಬಾ ಕಷ್ಟಕರವೆಂದು ಹಾಗಯೇ ಬಿಟ್ಟಿರುವ ಮನೆಗೆಲಸಗಳನ್ನು ಸ್ವತಃ ಅವರೇ ಕೈಗೆತ್ತಿಕೊಳ್ಳುತ್ತಾರೆ ಇಲ್ಲವೇ ಮನೆಗೆಲಸದವರಿಗೆ ಹೇಳಿ ಮಾಡಿಸುತ್ತಾರೆ. ಮನೆಯ ಮೂಲೆ ಮೂಲೆಯ ಸ್ವಚ್ಛತೆಯನ್ನು ಕರಾರುವಕ್ಕಾಗಿ ಮಾಡಬೇಕಾಗಿರುವ ಒತ್ತಡದೊಂದಿಗೆ ಧೂಳು, ಕೊಳೆ ಸೇರದಂತೆ ಕಿಟಕಿ ಬಾಗಿಲುಗಳ ಕರ್ಟನ್‎ಗಳು, ಟಿವಿ ಷೋಕೇಸ್, ಹೀಗೆ ಪ್ರತಿಯೊಂದು ವಸ್ತುಗಳ ಮೇಲೆ ನಿಗಾ ಇರಿಸಿ ಧೂಳು ಕೆಡವಬೇಕಾಗುತ್ತದೆ.

ಜೊತೆಗೆ ಇತರೆ ಕೆಲಸಗಳನ್ನು ನಿರ್ವಹಿಸಬೇಕಾದ ಜವಬ್ದಾರಿ ಇವರ ಮೇಲಿರುತ್ತದೆ. ಈ ಸಮಸ್ಯೆಯನ್ನು ನಿವಾರಿಸಲೆಂದೇ ಇಂದಿನ ಲೇಖನದಲ್ಲಿ ಮನೆಯ ಸ್ವಚ್ಛತೆಗೆ ಸಹಕಾರಿ ಎಂದೆನಿಸಿರುವ ಸರಳ ಸಲಹೆಗಳನ್ನು ನಾವು ನೀಡುತ್ತಿದ್ದೇವೆ.

ಕಿಟಕಿಗಳಿಗೆ ಸೊಳ್ಳೆ ಪರದೆ
ಕಿಟಕಿಯೊಂದಿಗೆ ಅಂಟಿಕೊಂಡಿರುವ ಸೊಳ್ಳೆ ಪರದೆಗೆ ಮಹತ್ವ ನೀಡಿ. ವಲ್‎ಕ್ರೊ ಅಥವಾ ಮೇಲೆತ್ತುವ ಪರದೆಗಳನ್ನು ಆರಿಸಿ. ಈ ನೆಟ್‎ಗಳು ಸೊಳ್ಳೆಗಳನ್ನು ನಿವಾರಿಸುವುದರ ಜೊತೆಗೆ ಧೂಳನ್ನು ನಿವಾರಿಸುತ್ತವೆ. ಗಾಳಿಯನ್ನು ಫಿಲ್ಟರ್ ಮಾಡುವ ಸಾಮರ್ಥ್ಯವನ್ನು ಈ ಕಿಟಕಿಗಳು ಹೊಂದಿದ್ದು ನಿಮ್ಮ ಮನೆಗೆ ತಾಜಾ ಗಾಳಿಯನ್ನು ನೀಡುತ್ತದೆ. ಅಂತೆಯೇ ಸಣ್ಣ ಗಾಳಿಯೊಂದಿಗೆ ಒಳಬರುವ ಕೀಟಗಳನ್ನು ತಡೆಯುತ್ತದೆ. ಇದರಿಂದ ಮನೆಯನ್ನು ಹೆಚ್ಚು ಶ್ರಮವಿಲ್ಲದೆ ಸ್ವಚ್ಛವಾಗಿಟ್ಟುಕೊಳ್ಳಬಹುದು.

ತುಂಬಾ ಸಣ್ಣದು ಅಥವಾ ಕಷ್ಟಕರ ವಿನ್ಯಾಸಗಳನ್ನು ಆಯ್ಕೆಮಾಡಬೇಡಿ
ಪೀಠೋಪಕರಣಗಳನ್ನು ಆರಿಸುವಾಗ ಆದಷ್ಟು ಅದರ ವಿನ್ಯಾಸದತ್ತ ಗಮನ ಹರಿಸಿ. ತೀರಾ ಚಿಕ್ಕದು ಅಂತೆಯೇ ಕಷ್ಟಕರ ವಿನ್ಯಾಸಗಳುಳ್ಳ ಪೀಠೋಪಕರಣಗಳ ಆಯ್ಕೆಯನ್ನು ಮಾಡಬೇಡಿ. ಇಂತಹ ಸ್ಥಳಗಳಲ್ಲಿ ಧೂಳು ಬೇಗನೇ ಸೇರಿಕೊಳ್ಳುತ್ತದೆ ಮತ್ತು ಅದನ್ನು ಸ್ವಚ್ಛಮಾಡುವುದೂ ತುಂಬಾ ಕಷ್ಟಕರ. ಇವುಗಳನ್ನು ನಿತ್ಯವೂ ನೀವು ಸ್ವಚ್ಛಮಾಡಿಟ್ಟುಕೊಳ್ಳಬೇಕಾಗುತ್ತದೆ ಇಲ್ಲದಿದ್ದರೆ ಮನೆಯ ಅಂದವನ್ನು ಕೆಡಿಸಲು ಇವುಗಳು ಸಾಕು.

ಕರ್ಟನ್‎ಗಳ ಬಳಕೆ

ಕರ್ಟನ್‎ಗಳು ಮನೆಯ ಅಂದವನ್ನು ಹೆಚ್ಚಿಸುವುದರಿಂದಾಗಿ ಅವುಗಳು ಬೇರೆ ಬೇರೆ ಸ್ಟೈಲ್ ಮತ್ತು ವಿನ್ಯಾಸಗಳಲ್ಲಿ ಲಭ್ಯವಿವೆ. ಧೂಳನ್ನು ತಡೆಗಟ್ಟುವಲ್ಲಿ ಕರ್ಟನ್‎ಗಳು ಉಪಯೋಗಕಾರಿಯಾಗಿವೆ. ನೀವು ಮನೆಯಲ್ಲಿಲ್ಲದಾಗ ಆದಷ್ಟು ಕಿಟಕಿಗಳನ್ನು ಕರ್ಟನ್‎ ಬಳಸಿ ಮುಚ್ಚಿರಿ. ಇದು ಮನೆಯನ್ನು ತಂಪಾಗಿರಿಸುವುದರ ಜೊತೆಗೆ, ಧೂಳನ್ನು ತಮ್ಮಲ್ಲಿ ಅಂಟಿಕೊಳ್ಳುವಂತೆ ಮಾಡುತ್ತವೆ. ಆದರೆ ಇವುಗಳನ್ನು ವಾರಕ್ಕೊಮ್ಮೆ ತೊಳೆಯಲು ಮಾತ್ರ ಮರೆದಿರಿ.