ಅಡುಗೆ ಮನೆಯ ವಾಸನೆ ಹೋಗಲಾಡಿಸುವ ಸೂಪರ್ ಟಿಪ್ಸ್

ನಾವು ವಾಸಿಸುವ ಮನೆ ದೇವಾಲಯವಿದ್ದಂತೆ. ಮನೆಕಟ್ಟಲು ಹೆಚ್ಚಿನ ಖರ್ಚು ವೆಚ್ಚಗಳನ್ನು ನಾವು ಮಾಡುತ್ತೇವೆ ಅದರ ಜೊತೆಗೆ ಅದನ್ನು ಸ್ವಚ್ಛವಾಗಿಡುವಲ್ಲಿಯೂ ನಾವು ಜಿಪುಣತನವನ್ನು ಮಾಡಬಾರದು. ಮನೆಯ ಮೂಲೆ ಮೂಲೆಯೂ ಫಳಫಳನೆ ಹೊಳೆಯುತ್ತಾ ಸ್ವಚ್ಛವಾಗಿದ್ದರೆ ಅಲ್ಲಿ ವಾಸಿಸುವರಿಗೂ ಮನೆಗೆ ಬರುವ ಅತಿಥಿಗಳಿಗೂ ತೃಪ್ತಿ ಸಮಾಧಾನವಿರುತ್ತದೆ. ಮನೆಯಲ್ಲಿ ಮುಖ್ಯಸ್ಥಾನವಿರುವುದು ಅಡುಗೆ ಮನೆಗೆ. ಆಹಾರಗಳನ್ನು ಇಲ್ಲಿ ತಯಾರಿಸುವುದರಿಂದ ಈ ಭಾಗಕ್ಕೆ ಹೆಚ್ಚಿನ ಗಮನವನ್ನು ನೀಡಬೇಕು.

ಕೀಟಗಳ ಉಪಟಳಗಳನ್ನು ನಿಯಂತ್ರಿಸುವುದು, ಅಡುಗೆ ಕೋಣೆ ವಾಸನೆ ಬರದಂತೆ ನೋಡಿಕೊಳ್ಳುವುದು ಇದರಲ್ಲಿ ಮುಖ್ಯವಾದುದಾಗಿದೆ. ಆಹಾರ ತಯಾರಿಸಿದ ನಂತರ ಅಡುಗೆ ಮನೆಯನ್ನು ಸ್ವಚ್ಛ ಮಾಡುವ ಕ್ರಿಯೆಯಲ್ಲಿ ನಾವು ಹಿಂದೇಟು ಹಾಕಬಾರದು. ಅಂತೆಯೇ ಅಲ್ಲಿ ಹೊರಸೂಸುವ ವಾಸನೆಯನ್ನು ನಿಗ್ರಹಿಸುವಂತಹ ಕೆಲವೊಂದು ಸ್ವಚ್ಛತಾ ಕಾರ್ಯಗಳನ್ನು ನಾವು ಹಮ್ಮಿಕೊಳ್ಳಬೇಕು. ಇಂದಿನ ಲೇಖನದಲ್ಲಿ ಅಡುಗೆ ಮನೆಯಲ್ಲಿ ಸುವಾಸನೆಯನ್ನು ಪಸರಿಸುವುದು ಹೇಗೆ ಮತ್ತು ಅದಕ್ಕಾಗಿ ನಾವು ಕಂಡುಕೊಳ್ಳಬೇಕಾದ ಮಾರ್ಗೋಪಾಯಗಳೇನು ಎಂಬುದನ್ನು ಕಂಡುಕೊಳ್ಳೋಣ. ಅಡುಗೆ ಕೋಣೆಯ ಸ್ವಚ್ಛತೆಗೆ ಮೊದಲ ಆದ್ಯತೆ ನೀಡಿ

ಕಿತ್ತಳೆ ಸಿಪ್ಪೆಯನ್ನು ಬಳಸಿ ದುರ್ವಾಸನೆಯನ್ನು ಹೋಗಲಾಡಿಸಬಹುದಾಗಿದೆ. ಕುದಿಯುವ ನೀರಿನಲ್ಲಿ ಕಿತ್ತಳೆ ಸಿಪ್ಪೆಯೊಂದಿಗೆ ದಾಲ್ಚಿನ್ನಿ ಮತ್ತು ಏಲಕ್ಕಿಯನ್ನು ಹಾಕಿರಿ ಇದು ಮಾಡುವ ಮ್ಯಾಜಿಕ್ ಅನ್ನು ನೀವು ನೋಡಿಯೇ ತಿಳಿದುಕೊಳ್ಳಬೇಕು. ಇಂತಹುದೇ ಕೆಲವೊಂದು ಸಲಹೆಗಳನ್ನು ಇಂದಿನ ಲೇಖನದಲ್ಲಿ ನಾವು ನೀಡಿದ್ದು ಅದರತ್ತ ದೃಷ್ಟಿ ಹಾಯಿಸಿ...

ಕಿತ್ತಳೆ ಸಿಪ್ಪೆ ನೀರು

ಪಾತ್ರೆಯಲ್ಲಿ ಒಂದು ಕಪ್‌ನಷ್ಟು ನೀರು ಹಾಕಿ. ನೀರು ಕುದಿಯುತ್ತಿರುವಂತೆ ಇದಕ್ಕೆ ಕಿತ್ತಳೆ ಸಿಪ್ಪೆಯನ್ನು ಸೇರಿಸಿ. ಎರಡು ನಿಮಷಗಳಷ್ಟು ಸಮಯ ಇದು ಕುದಿಯಲಿ. ನಂತರ ದಾಲ್ಚಿನ್ನಿಯನ್ನು ಸೇರಿಸಿ ಜೊತೆಗೆ ಏಲಕ್ಕಿ ಸೇರಿಸಲು ಮರೆಯದಿರಿ.

ಬೇಕಿಂಗ್ ಸೋಡಾದ ಕಮಾಲು

ಅಡುಗೆ ಮಾಡುವಾಗ ಬೇಕಿಂಗ್ ಸೋಡಾ (ಅಡುಗೆ ಸೋಡಾ) ವನ್ನು ಬಳಸುವುದೂ ಉತ್ತಮ ಉಪಾಯವಾಗಿದೆ. ಗಾಳಿಯಲ್ಲಿರುವ ಆಸಿಡ್ ಅನ್ನು ಬೇಕಿಂಗ್ ಸೋಡಾ ಹೀರಿಕೊಳ್ಳುತ್ತದೆ ಇದರಿಂದ ಅಡುಗೆ ಮಾಡುವಾಗ ಹೊರಬರುವ ವಾಸನೆಯನ್ನು ಇದು ನಿಗ್ರಹಿಸುತ್ತದೆ.

ಲಿಂಬೆ ನೀರು

ಫ್ರಿಡ್ಸ್ ಕೆಟ್ಟ ವಾಸನೆಯನ್ನು ಬೀರುತ್ತಿದೆ ಎಂದಾದಲ್ಲಿ ಲಿಂಬೆ ಬೆರೆತ ನೀರನ್ನು ಫ್ರಿಡ್ಜ್‌ನಲ್ಲಿರಿಸಿ. ಹತ್ತು ನಿಮಿಷಗಳ ಕಾಲ ಈ ಪ್ರಯೋಗವನ್ನು ಮಾಡಿ. ನಿಮ್ಮ ಫ್ರಿಡ್ಜ್‌ನಿಂದ ಹೊರಸೂಸುವ ಕೆಟ್ಟ ವಾಸನೆ ಮಾಯವಾಗುತ್ತದೆ.

ಸಕ್ಕರೆ

ಮೀನು ತುಂಡರಿಸಿದ ನಂತರ ನಿಮ್ಮ ಕೈಬೆರಳುಗಳಿಂದ ವಾಸನೆ ಬರುತ್ತಿದೆಯೇ? ಇದಕ್ಕಿರುವ ಒಂದೇ ಪರಿಹಾರವೆಂದರೆ ನಿಮ್ಮ ಹಸ್ತಗಳನ್ನು ಸಕ್ಕರೆಯಿಂದ ಮಸಾಜ್ ಮಾಡಿಕೊಳ್ಳುವುದಾಗಿದೆ ತದನಂತರ ಸೋಪಿನ ಬಳಕೆಯನ್ನು ಮಾಡಿ. ನಿಮ್ಮ ಹಸ್ತಗಳಿಂದ ಬರುವ ಮೀನಿನ ವಾಸನೆಯನ್ನು ನಿಗ್ರಹಿಸಲು ಸಕ್ಕರೆ ಸಹಕಾರಿ.

ವಾಸನೆ ಹೋಗಲಾಡಿಸಲು ವಿನೇಗರ್ ಬಳಕೆ

ಅಡುಗೆ ಮನೆಯಿಂದ ವಾಸನೆಯನ್ನು ಹೋಗಲಾಡಿಸಲು ವಿನೇಗರ್ ನಿಮಗೆ ಸಹಕಾರಿಯಾಗಲಿದೆ. ಬಿಳಿ ವಿನೇಗರ್ ಅನ್ನು ಅಡುಗೆ ಮನೆಯಲ್ಲಿ ಇರಿಸಿಕೊಳ್ಳಿ. ಇದಕ್ಕೆ ತಾಜಾ ದಾಲ್ಚಿನ್ನಿಯನ್ನು ಸೇರಿಸಿ. ಇವೆರಡೂ ನಿಮ್ಮ ಅಡುಗೆ ಮನೆಯ ವಾಸನೆಯನ್ನು ನಿಯಂತ್ರಿಸಲು ಪರಿಣಾಮಕಾರಿ ಪರಿಕರಗಳಾಗಿವೆ.