ದೀಪ ಹಚ್ಚುವಾಗ ಎಣ್ಣೆ ಕಲೆಯಾದರೆ ಏನು ಮಾಡ್ತೀರಾ?

ಹೆಚ್ಚು ಬೆಲೆ ಕೊಟ್ಟು ಹಬ್ಬಕ್ಕೆಂದು ತಂದ ಹೊಸ ಬಟ್ಟೆ ಎಣ್ಣೆಯಿಂದಾಗಿ ತನ್ನ ರೂಪ ಕಳೆದುಕೊಂಡರೆ ತೊಡಲು ಹಿಂಜರಿಕೆ. ಆದ್ದರಿಂದ ಬಟ್ಟೆಯಿಂದ ಎಣ್ಣೆ ಕಲೆ ಹೋಗಿಸುವ ಕೆಲವು ಸುಲಭ ಉಪಾಯಗಳನ್ನು ಇಲ್ಲಿ ನೀಡಲಾಗಿದೆ.

ಬಟ್ಟೆ ಮೇಲಿನ ಎಣ್ಣೆ ಕಲೆ ಹೋಗಿಸುವುದು ಹೇಗೆ?

* ಬೇಬಿ ಪೌಡರ್: ಬಟ್ಟೆಯ ಮೇಲೆ ಎಣ್ಣೆ ಬಿದ್ದಿದ್ದರೆ ಎಣ್ಣೆಯಾದ ಜಾಗಕ್ಕೆ ಬೇಬಿ ಟಾಲ್ಕಂ ಪೌಡರ್ ಹಚ್ಚಬೇಕು. ಹಚ್ಚಿದ ಕೆಲ ಗಂಟೆ ಹಾಗೆ ಬಿಟ್ಟು ಪೌಡರ್ ತೆಗೆಯಬೇಕು. ಎಣ್ಣೆಯನ್ನು ಹೀರಿಕೊಂಡ ಪೌಡರ್ ಬಣ್ಣ ಬದಲಾಗಿರುತ್ತದೆ. ಆಗ ಬಟ್ಟೆಯನ್ನು ಒಗೆದರೆ ಎಣ್ಣೆ ಕಲೆ ಕಾಣುವುದಿಲ್ಲ.

* ಡಿಶ್ ಸೋಪ್ : ಎಣ್ಣೆ ಕಲೆಯನ್ನು ಹೋಗಿಸಲು ಪಾತ್ರೆ ತೊಳೆಯುವ ಸೋಪನ್ನು ಉಪಯೋಗಿಸಬಹುದು. ಕಲೆಯಾದ ಜಾಗಕ್ಕೆ ಸ್ವಲ್ಪ ಸೋಪನ್ನು ಹಾಕಿ ಟೂಥ್ ಬ್ರಶ್ ಸಹಾಯದಿಂದ ಮೃದುವಾಗಿ ಉಜ್ಜಿ ಕೆಲ ನಿಮಿಷ ಬಿಟ್ಟು ತೊಳೆದು ಒಣಗಿಸಬೇಕು.

* ಕಾರ್ನ್ ಸ್ಟಾರ್ಚ್: ಎಣ್ಣೆ ಕಲೆಯಾದ ಜಾಗವನ್ನು ಸಮತಟ್ಟಾಗಿರಿಸಿ ಅದರ ಮೇಲೆ ಕಾರ್ನ್ ಸ್ಟಾರ್ಚ್ ಹಾಕಿ ಅರ್ಧ ಗಂಟೆ ನೆನೆಸಿ ಒಗೆದರೆ ಕಲೆ ಕಡಿಮೆಯಾಗಿರುತ್ತದೆ.

*ಶಾಂಪು: ತಲೆಯಿಂದ ಎಣ್ಣೆ ತೆಗೆಯಲು ಬಳಸುವ ಶಾಂಪುವನ್ನು ಕಲೆಗಳಿಗೂ ಬಳಸಬಹುದು. ಕಲೆಯಾದ ತಕ್ಷಣವೇ ಆ ಜಾಗಕ್ಕೆ ಶಾಂಪುವಿನಿಂದ ಉಜ್ಜಿ ತೊಳೆದು ಒಣಗಿಸಿದರೆ ಕಲೆ ಸುಲಭವಾಗಿ ಬಿಡಬಹುದು.

ಆದರೆ ಈ ವಿಧಾನವನ್ನು ಅನುಸರಿಸುವ ಮುನ್ನ ಬಟ್ಟೆಯ ವಿಧ, ಅದರ ನಿರ್ವಹಣೆಯ ವಿಧಾನ ಎಲ್ಲವನ್ನೂ ತಿಳಿದುಕೊಂಡು ಈ ಟಿಪ್ಸ್ ಗಳನ್ನು ಪಾಲಿಸಬೇಕು.