ಹೊಳಪು ಕಳೆದುಕೊಳ್ಳದಿರಲಿ ನಿಮ್ಮ ಮುತ್ತಿನ ಒಡವೆ

ಮುತ್ತಿನ ಒಡವೆಗಳನ್ನು ಸಂರಕ್ಷಿಸುವ ವಿಧಾನ:

1. ಈ ಮೊದಲ ಸಲಹೆ ಎಲ್ಲಾ ಒಡವೆಗಳಿಗೂ ಅನ್ವಯವಾಗುತ್ತದೆ. ಆಭರಣಗಳ ಮೇಲೆ ಪರ್ಫ್ಯೂಮ್ ಅಥವಾ ಮೇಕಪ್ ಸಾಧನಗಳನ್ನು ತಾಕಿಸಬಾರದು. ಮೇಕಪ್ ಮತ್ತು ಪರ್ಫ್ಯೂಮ್ ಹಾಕಿಕೊಂಡ ನಂತರ ಒಡವೆಗಳನ್ನು ಧರಿಸಬೇಕು.

2. ಮುತ್ತಿನ ಒಡವೆಗಳನ್ನು ಧರಿಸಿದಾಗ ಒಡವೆಗಳನ್ನು ನೀರಿಗೆ ತಾಕಿಸಬಾರದು. ಶಾಂಪೂ, ಸೋಪ್ ಮತ್ತು ಹೆಚ್ಚು ನೀರು ತಾಗಿಸಿದರೆ ಮುತ್ತಿನ ಅಂದಕ್ಕೆ ಮಾರಕವಾಗಬಹುದು.

3. ಮುತ್ತು ಕೊಳೆಯಂತೆ ಕಂಡರೆ ಮೆತ್ತಗಿನ ಹತ್ತಿ ಬಟ್ಟೆಯಿಂದ ಮೃದುವಾಗಿ ಒರೆಸಬೇಕು. ಗಡುಸಾದ ಬಟ್ಟೆಯನ್ನು ಉಪಯೋಗಿಸಬಾರದು. ಇದರಿಂದ ಮುತ್ತಿನ ಮೇಲಿನ ಹೊದಿಕೆ ಕಿತ್ತು ಬರುವ ಸಾಧ್ಯತೆ ಹೆಚ್ಚಿರುತ್ತದೆ.

4. ಕೇವಲ ಒರೆಸುವುದರಿಂದ ಕೊಳೆ ಹೋದಂತೆ ನಿಮಗನ್ನಿಸದಿದ್ದರೆ ಸ್ವಲ್ಪ ನೀರನ್ನು ಅದ್ದಿ ಒರೆಸಬಹುದು. ಆದರೆ ಹೆಚ್ಚು ನೀರನ್ನು ಉಪಯೋಗಿಸಬಾರದು.

5. ನೀರಿನಿಂದ ಮುತ್ತನ್ನು ಶುದ್ಧಗೊಳಿಸಿದ ನಂತರ 10 ನಿಮಿಷ ಒಣಗಲು ಬಿಡಬೇಕು. ತಕ್ಷಣವೇ ಅದನ್ನು ಸುತ್ತಿಡಬಾರದು.

6. ತುಂಬಾ ಇಕ್ಕಟ್ಟಾದ ಜಾಗದಲ್ಲಿ ಒಡವೆ ವಸ್ತುಗಳನ್ನು ಇಡಬೇಡಿ. ಆಭರಣಕ್ಕೆ ಅಗತ್ಯ ಸ್ಥಳಾವಕಾಶ ಒದಗಿಸಿರಿ. ಇದರಿಂದ ಒಡವೆಗಳು ಕಿತ್ತು ಹೋಗುವುದನ್ನು ತಡೆಯಬಹುದು.

7. ಬೇರೆ ಒಡವೆಗಳೊಂದಿಗೆ ಮುತ್ತಿನ ಒಡವೆಗಳನ್ನು ಇಡಬೇಡಿ. ಇದರಿಂದ ಮುತ್ತಿನ ಹೊಳಪು ಕಡಿಮೆಯಾಗುವುದಲ್ಲದೆ ಸ್ಕ್ರಾಚ್ ಕೂಡ ಆಗಬಹುದು.

8. ಮುತ್ತನ್ನು ಪೋಣಿಸಿದ ದಾರ ಅಥವಾ ಕೊಂಡಿಯನ್ನು ಆಗಾಗ್ಗೆ ಪರೀಕ್ಷಿಸುತ್ತಿರಬೇಕು. ಸಮಯ ಕಳೆದಂತೆ ಅದು ಸವೆಯುತ್ತಾ, ಜಗ್ಗುತ್ತದೆ ಮತ್ತು ಕಿತ್ತು ಹೋಗುತ್ತದೆ. ಆದ್ದರಿಂದ ಆಗಾಗ್ಗೆ ಪರೀಕ್ಷಿಸಿ ಬದಲಾಯಿಸಬೇಕು.