ಗರ್ಭಾವಸ್ಥೆಯಲ್ಲಿಯೇ ಮಗುವಿಗೆ ಡೌನ್‌ ಸಿಂಡ್ರೋಮ್ ಬರಲು ಕಾರಣವೇನು? ತಡೆಗಟ್ಟಬಹುದೇ?

ಡೌನ್‌ ಸಿಂಡ್ರೋಮ್‌ ಎಂಬುವುದು ಹುಟ್ಟುವ ಮಕ್ಕಳಲ್ಲಿ ಕ್ರೋಮೋಸೋಮ್‌ ಅಧಿಕವಿದ್ದಾಗ ಕಂಡು ಬರುವ ಸಮಸ್ಯೆಯಾಗಿದೆ. ಡೌನ್‌ ಸಿಂಡ್ರೋಮ್‌ ಇರುವ ಮಕ್ಕಳಲ್ಲಿ ಬುದ್ಧಿ ಶಕ್ತಿ ಬೆಳವಣಿಗೆಯಾಗುವುದಿಲ್ಲ, ಕೆಲವರಲ್ಲಿ ದೈಹಿಕವಾಗಿ ಹಲವಾರು ಸಮಸ್ಯೆಗಳಿರುತ್ತದೆ.

ಕೆಲ ಮಕ್ಕಳಲ್ಲಿ ಡೌನ್‌ ಸಿಂಡ್ರೋಮ್‌ ಅಲ್ಪ ಪ್ರಮಾಣದಲ್ಲಿ ಇದ್ದರೆ ಇನ್ನು ಕೆಲವರಲ್ಲಿ ಅಧಿಕ ಪ್ರಮಾಣದಲ್ಲಿರುತ್ತದೆ.

ಡೌನ್‌ ಸಿಂಡ್ರೋಮ್‌ ಇರುವ ಎಲ್ಲರಲ್ಲೂ ಒಂದೇ ಲಕ್ಷಣ ಇರುವುದಿಲ್ಲ, ಆದರೆ ಕೆಲವರಲ್ಲಿ ಈ ಸಾಮಾನ್ಯ ಲಕ್ಷಣಗಳು ಕಂಡು ಬರುತ್ತದೆ:

* ಅಗಲವಾದ ಮುಖ
* ಚಿಕ್ಕ ಕಣ್ಣುಗಳು
* ಗಿಡ್ಡ ಕುತ್ತಿಗೆ
* ನಾಲಗೆ ಹೊರಹಾಕುವುದು
* ಓರೆ ಕಣ್ಣು
* ಸ್ನಾಯುಗಳು ಬಲವಿಲ್ಲದಿರುವುದು
* ಕೈ-ಕಾಲುಗಳು ತುಂಬಾ ಮೃದುವಾಗಿರುವುದು
* ಪುಟ್ಟ ಬೆರಳುಗಳು
* ಪ್ಲೆಕ್ಸಿಬಿಲಿಟಿ ಅಧಿಕವಿರುತ್ತದೆ
* ಕುಳ್ಳಗೆ ಇರುತ್ತಾರೆ.

ಬುದ್ಧಿಶಕ್ತಿ ಕಡಿಮೆಯಾಗುವುದು
ಡೌನ್‌ ಸಿಂಡ್ರೋಮ್ ಇರುವ ಮಕ್ಕಳು ಮಾತನಾಡುವುದು ನಿಧಾನವಾಗುವುದು. ಇಂಥ ಮಕ್ಕಳಲ್ಲಿ ಬುದ್ದಿ ಶಕ್ತಿ ಕಡಿಮೆ ಇರುತ್ತದೆ.

ಡೌನ್‌ ಸಿಂಡ್ರೋಮ್‌ಗೆ ಕಾರಣವೇನು?
ಟ್ರಿಸೋಮಿ 21 (Trisomy 21) : ಕ್ರೋಮೋಸೋಮ್‌ 21ರ 3 ಕಾಪಿಗಳಿರುವ ವ್ಯಕ್ತಿಗಳಿಂದಾಗಿ ಅಂಡಾಣು ಹಾಗೂ ವೀರ್ಯಾಣು ಸೇರಿ ಫಲವತ್ತತೆಯಾದಾಗ ಅಸಹಜ ಬೆಳವಣಿಗೆಯಾಗುವುದು.

ಮೊಸಾಯಿಕ್ ಡೌನ್‌ ಸಿಂಡ್ರೋಮ್‌(Mosaic Down syndrome): ಇದು ತುಂಬಾ ಅಪರೂಪ. ವ್ಯಕ್ತಿಯಲ್ಲಿ ಕೆಲವೊಂದು ಕಣಗಳಲ್ಲಿ ಮಾತ್ರ ಕ್ರೋಮೋಸೋಮ್ 21 ಅಧಿಕವಿದ್ದಾಗ ಕೂಡ ಫಲವತ್ತತೆ ಸಮಯದಲ್ಲಿ ಮಗುವಿನ ಬೆಳವಣಿಗೆಯಲ್ಲಿ ಅಸಹಜತೆ ಉಂಟಾಗುವುದು.

ಟ್ರಾನ್ಸ್‌ಲೊಕೇಷನ್ ಡೌನ್‌ ಸಿಂಡ್ರೋಮ್: ಕ್ರೋಮೋಸೋಮ್ 21ರ ಕೆಲವೊಂದು ಭಾಗ ಮತ್ತೊಂದು ಕ್ರೋಮೋಸೋಮ್‌ಗೆ ಅಂಟಿಕೊಂಡಾಗ ವೀರ್ಯಾಣು-ಅಂಡಾಣು ಫಲವತ್ತತೆಯಾದಾಗ ಡೌನ್‌ ಸಿಂಡ್ರೋಮ್‌ ಉಂಟಾಗುವುದು.

ಇದು ವಂಶವಾಹಿಯಾಗಿ ಬರುವುದೇ?
ಸಾಮಾನ್ಯವಾಗಿ ಇದು ವಂಶವಾಹಿಯಾಗಿರುವುದಿಲ್ಲ. ಕ್ರೋಮೋಸೋಮ್‌ನ ವ್ಯತ್ಯಾಸದಿಂದಾಗಿ ಈ ರೀತಿ ಉಂಟಾಗುತ್ತದೆ.

ಯಾರಲ್ಲಿ ಈ ಬಗೆಯ ಮಕ್ಕಳು ಹುಟ್ಟುವ ಸಾಧ್ಯತೆ ಹೆಚ್ಚು?
* ತಡವಾಗಿ ಗರ್ಭಧಾರಣೆಯಾದರೆ: 35 ವರ್ಷ ದಾಟಿದ ಮೇಲೆ ಗರ್ಭಧಾರಣೆಯಾದರೆ ಡೌನ್‌ ಸಿಂಡ್ರೋಮ್‌ ಮಗು ಜನಿಸುವ ಸಾಧ್ಯತೆ ಇದೆ.

* ಮಗು ಡೌನ್‌ ಸಿಂಡ್ರೋಮ್‌ನಿಂದ ಜನಿಸಲು ಮಹಿಳೆ ಮಾತ್ರವಲ್ಲ ಕೆಲವೊಮ್ಮೆ ಪುರುಷರ ಕ್ರೋಮೋಸೋಮ್ ಕೂಡ ಕಾರಣವಾಗುವುದು.
* ಒಂದು ಮಗುವಿಗೆ ಡೌನ್‌ ಸಿಂಡ್ರೋಮ್ ಇದ್ದು ಮತ್ತೆ ಗರ್ಭಧಾರಣೆಯಾದರೆ ಆ ಮಗುವಿಗೂ ಡೌನ್‌ ಸಿಂಡ್ರೋಮ್ ಬರುವ ಸಾಧ್ಯತೆ ಇರುವುದರಿಂದ ಮತ್ತೊಂದು ಮಗುವಿಗೆ ಪ್ಲ್ಯಾನ್‌ ಮಾಡುವಾಗ ವೈದ್ಯರ ಸಲಹೆ ಸೂಚನೆ ಪಡೆಯಿರಿ.

ಡೌನ್‌ ಸಿಂಡ್ರೋಮ್ ತಡೆಗಟ್ಟಬಹುದೇ?
ಡೌನ್ ಸಿಂಡ್ರೋಮ್ ತಡೆಗಟ್ಟಲು ಸಾಧ್ಯವಿಲ್ಲ. ಒಂದು ಮಗುವಿಗೆ ಡೌನ್‌ ಸಿಂಡ್ರೋಮ್ ಇದ್ದರೆ ಮತ್ತೊಂದು ಮಗುವಿಗೆ ಪ್ಲ್ಯಾನ್‌ ಮಾಡುವುದಾದರೆ ವೈದ್ಯರ ಸಲಹೆ ಪಡೆದು ಆರೋಗ್ಯವಂತ ಮಗುವನ್ನು ಪಡೆಯಬಹುದು.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.