ನಿರ್ಲಕ್ಷ್ಯ ಮಾಡದಿರಿ: ತ್ವಚೆ ಅಲರ್ಜಿ ಕೂಡ ಕೊರೊನಾವೈರಸ್‌ ಲಕ್ಷಣ

ಲಂಡನ್‌ನಲ್ಲಿ ನಡೆಸಿದ ಅಧ್ಯಯನ

ಲಂಡನ್‌ನ ಕಿಂಗ್ಸ್‌ ಕಾಲೇಜಿನ ಅಧ್ಯಯನ ವರದಿಯು ಕೋವಿಡ್ 19 ಸೋಂಕು ಇರುವವರಿಗೆ ಕೆಮ್ಮು, ಜ್ವರ, ಉಸಿರಾಟದಲ್ಲಿ ತೊಂದರೆ ಮಾತ್ರವಲ್ಲ ತ್ವಚೆ ಅಲರ್ಜಿ ಕೂಡ ಉಂಟಾಗುವುದು ಎಂದು ಹೇಳಿದೆ. ಕೆಲವರಲ್ಲಿ ತ್ವಚೆ ಅಲರ್ಜಿ ಮೊದಲಿಗೆ ಕಂಡು ಬರುವುದು. ಇವರು ಯುಕೆಯಲ್ಲಿ ಕೋವಿಡ್ ಆ್ಯಪ್ ಬಳಸಿ 336,000 ಕೋವಿಡ್‌ ಸೋಂಕಿತರನ್ನು ಅಧ್ಯಯನ ಮಾಡಲಾಯಿತು. ಈ ಸಮೀಕ್ಷೆಯಲ್ಲಿ ಶೇ. 8.8 ಸೋಂಕಿತರಿಗೆ ತ್ವಚೆಯಲ್ಲಿ ಅಲರ್ಜಿ ಉಂಟಾಗಿತ್ತು. ಶೇ. 8.2ರಷ್ಟು ರೋಗಿಗಳಲ್ಲಿ ಮೊದಲಿಗೆ ತ್ವಚೆ ಅಲರ್ಜಿ ಕಂಡು ಬಂತು, ನಂತರ ಕೋವಿಡ್‌ 19 ಲಕ್ಷಣಗಳಾದ ಕೆಮ್ಮು, ಜ್ವರ, ವಾಸನೆ ಗ್ರಹಿಸಲು ಸಾಧ್ಯವಾಗದಿರುವುದು ಈ ರೀತಿಯ ಲಕ್ಷಣಗಳು ಕಂಡು ಬಮತು ಎಂದು ಅಧ್ಯಯನ ವರದಿ ಹೇಳಿದೆ.

ಯಾವ ರೀತಿಯ ತ್ವಚೆ ಅಲರ್ಜಿ ಕೋವಿಡ್ 19 ಲಕ್ಷಣವಾಗಿದೆ?

ತ್ವಚೆಯಲ್ಲಿ ಉರಿ, ತುರಿಕೆ, ಚಿಕ್ಕ-ಚಿಕ್ಕ ಗುಳ್ಳೆಗಳು ಕಂಡು ಬರುವುದು ಇವೆಲ್ಲಾ ಕೂಡ ಕೋವಿಡ್ 19 ಲಕ್ಷಣಗಳಾಗಿರಬಹುದು. ರೋಗನಿರೋಧಕ ವ್ಯವಸ್ಥೆಯಲ್ಲಿ ಉಂಟಾಗುವ ಅಸಮತೋಲನದಿಂದಾಗಿ ಈ ರೀತಿಯ ಸಮಸ್ಯೆ ಕಂಡು ಬರುತ್ತದೆ.

ಪಾದಗಳಲ್ಲಿ ಕಂಡು ಬರುವ ವ್ಯತ್ಯಾಸ

ಕೊರೊನಾವೈರಸ್‌ ಸೋಂಕು ತಗುಲಿದಾಗ ಪಾದಗಳಲ್ಲಿ ರಕ್ತ ಹೆಪ್ಪುಗಟ್ಟುವುದು, ಊತ, ಉರಿ ಈ ರೀತಿಯ ಲಕ್ಷಣಗಳು ಕಂಡು ಬರುವುದು. ಈ ರೀತಿಯ ಲಕ್ಷಣಗಳು ಮಕ್ಕಳಿಂದ ಹಿಡಿದು ದೊಡ್ಡವರವರೆಗೆ ಎಲ್ಲಾ ವಯಸ್ಸಿನವರಲ್ಲೂ ಕಂಡು ಬರುವುದಾಗಿ ಅಧ್ಯಯನ ವರದಿ ಹೇಳಿದೆ.

ಅಲರ್ಜಿ ನೋಡಲು ಹೇಗಿರುತ್ತದೆ

ಅಧ್ಯಯನ ಪ್ರಕಾರ ಕೋವಿಡ್‌ 19ನಿಂದ ತ್ವಚೆ ಅಲರ್ಜಿ ಉಂಟಾದಾಗ 3 ಬಗೆಯಲ್ಲಿ ಕಂಡು ಬರುತ್ತದೆ.

• ಇದ್ದಕ್ಕಿದ್ದಂತೆ ತ್ವಚೆಯಲ್ಲಿ ತುರಿಕೆ ಉಂಟಾಗುವುದು, ಕೆಂಪು-ಕೆಂಪು ಗುಳ್ಳೆಗಳು ಏಳುವುದು, ಇದು ಸ್ವಲ್ಪ ಹೊತ್ತಿನಲ್ಲಿ ಇಲ್ಲವಾಗುತ್ತದೆ.
• ಚಿಕನ್‌ಪಾಕ್ಸ್ ಉಂಟಾದಾಗ ಕಂಡು ಬರುವಂತೆ ತುಂಬಾ ತುರಿಕೆ ಉಂಟಾಗಿ ಅದು ಕಡಿಮೆಯಾಗುವುದೇ ಇಲ್ಲ.
• ಇನ್ನು ಪಾದಗಳಲ್ಲಿ ಕೆಂಪು ಗುಳ್ಳೆಗಳು ಏಳುವುದು, ಊತ, ನೋವು ಕಂಡು ಬರುವುದು.



ಈ ರೀತಿಯ ಲಕ್ಷಣಗಳು ಕಂಡು ಬಂದರೆ ಏನು ಮಾಡಬೇಕು?

ಕೊರೊನಾವೈರಸ್‌ ಲಕ್ಷಣಗಳು ಇತರ ಸೋಂಕಿನ ಲಕ್ಷಣಗಳಂತೆಯೇ ಕಂಡು ಬರುವುದು, ಆದ್ದರಿಂದ ದೇಹದಲ್ಲಿ ಏನೇ ವ್ಯತ್ಯಾಸ ಉಂಟಾದರೆ ನಿರ್ಲಕ್ಷ್ಯ ಮಾಡಬೇಡಿ. ಆದ್ದರಿಂದ ಈ ಸಮಯದಲ್ಲಿ ಮೈಯಲ್ಲಿ ಅಲರ್ಜಿ ಕಂಡು ಬಂದರೂ ಮನೆಯವರಿಂದ ಅಂತರ ಕಾಯ್ದುಕೊಂಡು ಕೋವಿಡ್ 19 ಪರೀಕ್ಷೆ ಮಾಡಿಸಿಕೊಳ್ಳಿ.