ಹೆಚ್ಚು ಹೊತ್ತು ಕೆಲಸ ಮಾಡಿದರೆ ಆಯುಸ್ಸು ಕಡಿಮೆಯಾಗುವುದು: WHO

ಅಧಿಕ ಹೊತ್ತು ಕೆಲಸ ಮಾಡುವುದರಿಂದ ಪಾರ್ಶ್ವವಾಯು ಹಾಗೂ ಹೃದಯಾಘಾತದ ಅಪಾಯ

ಅಧಿಕ ಹೊತ್ತು ಕೆಲಸ ಮಾಡುವುದರಿಂದ 2016ರಲ್ಲಿ 745 000 ಜನರು ಪಾರ್ಶ್ವವಾಯು ಹಾಗೂ ಹೃದಯಾಘಾತ ಉಂಟಾಗಿ ಸಾವನ್ನಪ್ಪಿದ್ದಾರೆ. 2000ಕ್ಕೆ ಹೋಲಿಸಿದರೆ ಶೇ. 29ರಷ್ಟು ಸಾವಿನ ಸಂಖ್ಯೆ ಅಧಿಕವಾಗಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಹೇಳಿದೆ.

ಕೆಲಸಕ್ಕೆ ಸಂಬಂಧಿಸಿದಂತೆ ಒತ್ತಡ ಪುರುಷರಲ್ಲಿ ಹೆಚ್ಚಾಗಿ ಕಂಡು ಬರುತ್ತಿದೆ

ಸಾಮಾನ್ಯವಾಗಿ ಮನೆಯ ಆರ್ಥಿಕ ಅಗ್ಯತವನ್ನು ನಿಭಾಯಿಸುವ ಜವಾಬ್ದಾರಿ ಪುರುಷರಿಗೆ ಅಧಿಕವಿರುತ್ತದೆ. ಆ ಕಾರಣಕ್ಕೆ ಅವರು ಹೆಚ್ಚು ಒತ್ತಡಕ್ಕೆ ಒಳಗಾಗಿ ಕೆಲಸ ಮಾಡುತ್ತಾರೆ. ವಾರದಲ್ಲಿ 55 ಗಂಟೆಗಿಂತ ಅಧಿಕ ಕೆಲಸ ಮಾಡುವ 45-74 ವರ್ಷದವರಲ್ಲಿ ಪಾರ್ಶ್ವವಾಯು, ಹೃದಯಾಘಾತ ಸಮಸ್ಯೆ ಹೆಚ್ಚಾಗಿ ಕಂಡು ಬರುತ್ತಿದೆ.

ಮಾನಸಿಕ ಆರೋಗ್ಯದ ಮೇಲೂ ಪರಿಣಾಮ ಬೀರುತ್ತದೆ

ಅಧಿಕ ಹೊತ್ತು ಕೆಲಸ ಮಾಡುವುದರಿಂದ ಮಾನಸಿಕ ಆರೋಗ್ಯದ ಮೇಲೂ ಪರಿಣಾಮ ಬೀರುತ್ತಿದೆ, ಇದರಿಂದಾಗಿ ದೈಹಿಕ ಆರೋಗ್ಯ ಹಾಳಾಗುತ್ತಿದೆ.

ವಿಶ್ವದ ಒಟ್ಟು ಜನ ಸಂಖ್ಯೆಯಲ್ಲಿ ಶೇ.9ರಷ್ಟು ಜನರು ಅಧಿಕ ಹೊತ್ತು ಕೆಲಸ ಮಾಡುತ್ತಿದ್ದಾರೆ. ಇದು ಕೆಲಸಕ್ಕೆ ಸಂಬಂಧಿಸಿದ ಕಾಯಿಲೆಗಳು ಹೆಚ್ಚಾಗಲು ಹಾಗೂ ಮನುಷ್ಯ ಬೇಗ ಸಾವನ್ನಪ್ಪಲು ಕಾರಣವಾಗಿದೆ.

ಅಧ್ಯಯನ ವರದಿ

ಯಾರು ವಾರದಲ್ಲಿ 55 ಗಂಟೆಗಿಂತ ಅಧಿಕ ಸಮಯ ಕೆಲಸ ಮಾಡುತ್ತಾರೋ ಅವರಲ್ಲಿ ಶೇ.35ರಷ್ಟು ಜನರಿಗೆ ಪಾರ್ಶ್ವವಾಯು ಸಮಸ್ಯೆ ಕಾಣಿಸಿದರೆ ಶೇ. 17ರಷ್ಟು ಜನರಿಗೆ ನ ಹೃದಯ ಸಂಬಂಧಿ ಸಮಸ್ಯೆ ಕಾಣಿಸಿದೆ. ಈ ಸಂಖ್ಯೆಯೂ ಯಾರು ವಾರದಲ್ಲಿ 35-40 ಗಂಟೆ ಕೆಲಸ ಮಾಡುತ್ತಾರೋ ಅವರಿಗೆ ಹೋಲಿಸಿದರೆ ತುಂಬಾನೇ ಅಧಿಕವಾಗಿದೆ.

ಕೋವಿಡ್‌ 19 ಸಾಂಕ್ರಾಮಿಕ ಕೆಲಸದ ಅವಧಿ ಹೆಚ್ಚಿಸಿದೆ

ಕೋವಿಡ್ 19 ಬಂದ ಮೇಲೆ ಜನರು ಕೆಲಸ ಮಾಡುವ ಕಾರ್ಯ ವೈಖರಿಯೇ ಬದಲಾಗಿದೆ. ಹೆಚ್ಚಿನವರು ವರ್ಕ್‌ ಫ್ರಂ ಹೋಂ ಮಾಡುತ್ತಿದ್ದಾರೆ. ಕೆಲವರು ಕೆಲಸವನ್ನು ಕಳೆದು ಕೊಂಡಿದ್ದಾರೆ. ಇದನ್ನು ನೋಡಿದಾಗ ಕೆಲಸದಲ್ಲಿ ಇರುವವರು ತಮ್ಮ ಕೆಲಸಕ್ಕೆ ಎಲ್ಲಿ ಕುತ್ತು ಬರುತ್ತದೋ ಎಂಬ ಭಯದಲ್ಲಿ ಹೆಚ್ಚು ಹೊತ್ತು ಕೆಲಸ ಮಾಡುತ್ತಿದ್ದಾರೆ.

ಕೊನೆಯದಾಗಿ

ಕೆಲಸ ಉಳಿಯಬೇಕು, ಆರ್ಥಿಕ ಸ್ಥಿತಿ ಚೆನ್ನಾಗಿರಬೇಕೆಂದು ಶ್ರಮಪಟ್ಟು ಅಧಿಕ ಹೊತ್ತು ಕೆಲಸ ಮಾಡುತ್ತೇವೆ, ಆದರೆ ಕೊನೆಗೆ ಆರೋಗ್ಯವನ್ನು ಕಳೆದುಕೊಳ್ಳುವುದು ಮಾತ್ರವಲ್ಲ, ದುಡಿದ ಹಣವನ್ನು ಆಸ್ಪತ್ರೆಗೆ ಖರ್ಚು ಮಾಡಬೇಕಾಗುತ್ತದೆ. ಆದ್ದರಿಂದ ಕೆಲಸದ ಜೊತೆಗೆ ಆರೋಗ್ಯಕ್ಕೂ ಗಮನ ನೀಡಿ.