ಜ. 16ರಿಂದ ಭಾರತದಲ್ಲಿ ಕೋವಿಡ್ 19 ಲಸಿಕೆ: ಇದರ ಕುರಿತ ಪ್ರಮುಖ 10 ಮಾಹಿತಿ

ಪ್ರಧಾನಿ ಮೋದಿಯವರಿಂದ ಚಾಲನೆ

1. ಕೋವಿಡ್ 19 ಲಸಿಕೆ ಕಾರ್ಯಕ್ರಮಕ್ಕೆ ಜನವರಿ 16ರಂದು ಪ್ರಧಾನಿ ನರೇಂದ್ರ ಮೋದಿಯವರು ಚಾಲನೆ ನೀಡಿದ್ದಾರೆ.

2. ಇದೇ ದಿನ ಮೋದಿಯವರು CoWIN (ಕೋವಿಡ್ 19 ಇಂಟೆಲಿಜೆನ್ಸ್ ನೆಟ್‌ವರ್ಕ್) ಆ್ಯಪ್‌ಗೆ ಚಾಲನೆ ನೀಡಲಿದ್ದು, ಇದರ ಮೂಲಕ ಕೊರೊನಾವೈರಸ್ ಲಸಿಕೆ ವಿತರಣೆ ಕುರಿತು ನಿಗಾ ಇಡಲಾಗುವುದು.

ಆರೋಗ್ಯ ಕಾರ್ಯಕರ್ತರಿಗೆ ಮೊದಲ ಹಂತದಲ್ಲಿ ಲಸಿಕೆ

* ಸುಮಾರು 3 ಲಕ್ಷ ಆರೋಗ್ಯ ಕಾರ್ಯಕರ್ತರಿಗೆ ಕೋವಿಡ್ 19 ಲಸಿಕೆ ನೀಡಲಾಗುತ್ತಿದ್ದು ಮೊದಲ ದಿನದಲ್ಲಿ ಔಷಧಿ ಲಭ್ಯವಿರುವ ಕಡೆ 100 ಜನರಿಗೆ ಲಸಿಕೆ ನೀಡಲಾಗುವುದು.

* ಇದರ ಜೊತೆಗೆ ಕೇಂದ್ರದಿಂದ ಕರಪತ್ರ ಕೂಡ ನೀಡಲಾಗುತ್ತಿದ್ದು ಅದರಲ್ಲಿ ಲಸಿಕೆ ಕುರಿತು ಏನು ಮಾಡಬೇಕು, ಏನು ಮಾಡಬಾರದು ಎಂಬ ಮಾಹಿತಿ ಇದೆ. ಕೋವಿಡ್‌ ಶೀಲ್ಡ್ ಹಾಗೂ ಕೊವಾಕ್ಸಿನ್ ಎರಡೂ ಲಸಿಕೆಗೂ ಏನೆಲ್ಲಾ ಮುನ್ನೆಚ್ಚರಿಕೆ ವಹಿಸಬೇಕು ಎಂಬ ಮಾಹಿತಿ ಇದರಲ್ಲಿ ಇರುತ್ತದೆ.

ಕರಪತ್ರದಲ್ಲಿ ಯಾವೆಲ್ಲಾ ಅಂಶ ಹೇಳಲಾಗಿದೆ

* ಈ ಲಸಿಕೆಯನ್ನು 18 ವರ್ಷ ಮೇಲ್ಪಟ್ಟವರಿಗೆ ಮಾತ್ರ ನೀಡಬೇಕು.

* ಗರ್ಭಿಣಿಯರು, ಗರ್ಭಧಾರಣೆ ನಿರೀಕ್ಷೆಯಲ್ಲಿರುವವರು ಹಾಗೂ ಎದೆ ಹಾಲುಣಿಸುವ ತಾಯಂದಿರಿಗೆ ಈ ಲಸಿಕೆ ನೀಡಬಾರದು.

* ಕೋವಿಡ್‌ 19 ಲಸಿಕೆ ಡೋಸ್‌ಗಳನ್ನು 14 ದಿನಗಳ ಅಂತರದಲ್ಲಿ ತೆಗೆದುಕೊಳ್ಳಬೇಕು.

* ಮೊದಲ ಡೋಸ್‌ನಲ್ಲಿ ಯಾವ ಲಸಿಕೆ ನೀಡಲಾಗಿದೆಯೋ ಅದೇ ಲಸಿಕೆಯನ್ನು ಎರಡನೇ ಡೋಸ್‌ನಲ್ಲಿ ನೀಡಬೇಕು.

* ಕೋವಿಡ್‌ 19 ಲಸಿಕೆ ಬದಲಾಯಿಸಬಾರದು (ಅಂದರೆ ಮೊದಲು ಕೋವಿಡ್‌ ಶೀಲ್ಡ್ ಕೊಟ್ಟು ನಂತರ ಡೋಸ್ ಕೊಡುವಾಗ ಕೊವಾಕ್ಸಿನ್ ಕೊಡುವುದು ಮಾಡಬಾರದು)

ವೈದ್ಯರು, ನರ್ಸ್‌ಗಳು ಮಾತ್ರವಲ್ಲದೆ ಎಲ್ಲಾ ಆರೋಗ್ಯ ಕಾರ್ಯಕರ್ತರಿಗೆ ದೊರೆಯಲಿದೆ

* ಆರೋಗ್ಯ ಕಾರ್ಯಕರ್ತರೆಂದರೆ ವೈದ್ಯರು, ನರ್ಸ್‌ಗಳು ಮಾತ್ರವಲ್ಲದೆ ಆಶಾ ಕಾರ್ಯಕರ್ತರು, ಆಂಬ್ಯೂಲೆನ್ಸ್ ಡ್ರೈವರ್‌ಗಳು, ಆಸ್ಪತ್ರೆ ಸ್ವಚ್ಛತಾ ಸಿಬ್ಬಂದಿ ಹೀಗೆ ಆಸ್ಪತ್ರೆಗೆ ಸಂಬಂಧಿಸಿದಂತೆ ಕೆಲಸ ಮಾಡುವ ಪ್ರತಿಯೊಬ್ಬರಿಗೂ ಲಸಿಕೆ ನೀಡಲಾಗುವುದು.

* ರಾಜ್ಯ ಸರಕಾರಗಳು ಆರೋಗ್ಯ ಕಾರ್ಯತರ ಕುರಿತು ನೀಡಿ ಮಾಹಿತಿ ಡಾಟಾದ ಅನುಸಾರ ಲಸಿಕೆ ದೊರೆಯಲಿದೆ.

ಮೊದಲ ಹಂತದಲ್ಲಿ 1.65 ಕೋಟಿ ಕೋವಿಡ್ 19 ಲಸಿಕೆ

* ಆ್ಯಪ್‌ನಲ್ಲಿ ಲಸಿಕೆ ಕುರಿತ ಪ್ರಶ್ನೆಗಳಿಗೆ ಉತ್ತರವೂ ದೊರೆಯಲಿದೆ.

* ಆರೋಗ್ಯ ಇಲಾಖೆಯು ರಾಜ್ಯಗಳಿಗೆ 5000ಕ್ಕೂ ಅಧಿಕ ಲಸಿಕೆ ಕೇಂದ್ರಗಳನ್ನು ತೆರೆಯಲು ಸೂಚಿಸಿದೆ.

* ಮೊದಲಿಗೆ 1.65 ಕೋಟಿ ಕೋವಿಡ್ 19 ಲಸಿಕೆ ದೇಶದಲ್ಲಿ ಮೊದಲ ಹಂತದಲ್ಲಿ ನೀಡಲಾಗುತ್ತಿದೆ.