ಏಡ್ಸ್ ರೋಗಿಗಳನ್ನು ಹೀಗೆ ನೋಡುವುದು ಸರಿಯೇ?

ಡಿಸೆಂಬರ್ 1. ವಿಶ್ವ ಏಡ್ಸ್ ದಿನ. ವಿಶ್ವ ಆರೋಗ್ಯ ಸಂಸ್ಥೆಯು 1988 ರಲ್ಲಿ ಡೆಸೆಂಬರ್ 1 ವಿಶ್ವ ಏಡ್ಸ್ ದಿನವೆಂದು ಘೋಷಿಸಿತು. ಏಡ್ಸ್ ಎಂಬ ಮಾರಕ ರೋಗವನ್ನು ತಡೆಯಲು ಜನರಲ್ಲಿ ಜಾಗೃತಿ ಮೂಡಿಸುವ ಸಲುವಾಗಿ ಈ ದಿನವನ್ನು ಆಚರಿಸಲಾಗುವುದು.

ಏಡ್ಸ್ ರೋಗ ಬಂದವರನ್ನು ಸಮಾಜ ಸಂಶಯ ದೃಷ್ಟಿಯಿಂದ ನೋಡುವುದು ಹೆಚ್ಚು. ಕೆಲವೊಮ್ಮೆ ತಮ್ಮದಲ್ಲದ ತಪ್ಪಿನಿಂದ ಕೂಡ ಈ ರೋಗ ಬರಬಹುದು. ಗಂಡನಿಗೆ ರೋಗವಿದ್ದರೆ ಹೆಂಡತಿಗೆ ಬರಬಹುದು, ಗರ್ಭಿಣಿ ಹೆಂಗಸಿನಿಂದ ಮಗುವಿಗೆ ಬರಬಹುದು, ಇಂಜೆಕ್ಷನ್ ನಿಂದ ಬರಬಹುದು. ಆದ್ದರಿಂದ ಏಡ್ಸ್ ರೋಗಿಗಳನ್ನು ಸಮಾಜ ಸಂಶಯ ದೃಷ್ಟಿಯಿಂದ ನೋಡಿ ದೂರವಿಡುವುದನ್ನು ಮಾಡಬಾರದು.

ಕೆಲವರು ಏಡ್ಸ್ ರೋಗಿಗಳನ್ನು ಮುಟ್ಟಲು, ಮಾತನಾಡಿಸಲು ಭಯಪಡುತ್ತಾರೆ. ಆದರೆ ಏಡ್ಸ್ ರೋಗಿಗಳು ಮಟ್ಟಿದ ಅಥವಾ ಧರಿಸಿದ ಬಟ್ಟೆಗಳನ್ನು ಧರಿಸುವುದರಿಂದ, ಅವರನ್ನು ಮುಟ್ಟುವುದರಿಂದ, ಅವರಿಗೆ ಕಚ್ಚಿದ ಸೊಳ್ಳೆ ನಿಮಗೆ ಕಚ್ಚುವುದರಿಂದ. ಕೈ ಕುಲುಕುವುದರಿಂದ , ಅವರ ಜೊತೆ ತಿನ್ನುವುದರಿಂದ ಏಡ್ಸ್ ರೋಗ ಹರಡುವುದಿಲ್ಲ. ಏಡ್ಸ್ ಬರಲು ಕಾರಣವಾಗುವ ಅಂಶಗಳು ಹಾಗೂ ಏಡ್ಸ್ ತಡೆಗಟ್ಟುವುದು ಹೇಗೆ ಎಂದು ಇಲ್ಲಿ ಹೇಳಲಾಗಿದೆ ನೋಡಿ:

ಲೈಂಗಿಕ ಕ್ರಿಯೆ: ಅಸುರಕ್ಷತೆ ಲೈಂಗಿಕ ಕ್ರಿಯೆಯಿಂದ ಏಡ್ಸ್ ರೋಗ ಹರಡುತ್ತದೆ. ಹೆಣ್ಣಿಗೆ ಒಬ್ಬನೇ ಗಂಡಿ- ಗಂಡಿಗೆ ಒಬ್ಬಳೇ ಹೆಣ್ಣು ಎಂಬ ನಿಯಮವನ್ನು ಪಾಲಿಸಿದರೆ ಈ ಏಡ್ಸ್ ಕಾಯಿಲೆಯ ಭಯವಿಲ್ಲದೆ ಜೀವಿಸಬಹುದು. ಅನ್ಯ ಪುರುಷ ಹಾಗೂ ಅನ್ಯ ಮಹಿಳೆಯ ಜೊತೆ ಲೈಂಗಿಕ ಸಂಪರ್ಕ ಮಾಡಬಾರದು.

ಕಾಂಡೋಮ್ ಗಳ ಬಳಕೆ: ಲೈಂಗಿಕ ಕ್ರಿಯೆಯನ್ನು ಕಾಂಡೋಮ್ ಬಳಸಿ ಮಾಡಿದರೆ ಏಡ್ಸ್ ಬರದಂತೆ ತಡೆಯಬಹುದು.

ಸೂಜಿಗಳ ಮರುಬಳಿಕೆ: ಒಬ್ಬರಿಗೆ ಚುಚ್ಚಿದ ಸೂಜಿಯಿಂದ ಮತ್ತೊಬ್ಬರಿಗೆ ಚುಚ್ಚಬಾರದು. ಏಡ್ಸ್ ಇರುವ ವ್ಯಕ್ತಿಗೆ ಚುಚ್ಚಿದ ಸೂಜಿಯನ್ನು ಆರೋಗ್ಯವಂತರಿಗೆ ಚುಚ್ಚಿದರೆ ಏಡ್ಸ್ ಬರುತ್ತದೆ. ಸಲೂನ್ ಗಳಲ್ಲಿ ಶೇವಿಂಗ್ ಮಾಡಿಸುವಾಗ ಹೊಸ ಬ್ಲೇಡ್ ಉಪಯೋಗಿಸುತ್ತಿದ್ದಾರೆಯೇ ಎಂದು ಗಮನಿಸಿ. ಒಬ್ಬರಿಗೆ ಬಳಸಿದ ಬ್ಲೇಡ್ ಮತ್ತೊಬ್ಬರಿಗೆ ಬಳಸಿದರೆ ಏಡ್ಸ್ ಬರುವ ಸಾಧ್ಯತೆ ಹೆಚ್ಚು.

ಎದೆ ಹಾಲು: ಏಡ್ಸ್ ಇರುವ ತಾಯಿ ತನ್ನ ಮಗುವಿಗೆ ಎದೆ ಹಾಲು ಕೊಟ್ಟರೆ ಮಗುವಿಗೂ ಏಡ್ಸ್ ಬರುತ್ತದೆ.

ಗುಣಮಟ್ಟದ ಕಾಂಡೋಮ್: ಹರಿದು ಹೋಗದಂತಹ ಗುಣ ಮಟ್ಟದ ಕಾಂಡೋಮ್ ಬಳಸಿ. ಈ ರೀತಿ ಮಾಡಿದರೆ ಏಡ್ಸ್ ತಡೆಗಟ್ಟಬಹುದು.

ಸಲಹೆ: ಏಡ್ಸ್ ಬಂದವರು ನಿರಾಶೆರಾಗಬೇಕಾಗಿಲ್ಲ. ಉತ್ತಮವಾದ ಆಹಾರಕ್ರಮ ಹಾಗೂ ವ್ಯಾಯಾಮ ಮಾಡಿ ರೋಗಗಳನ್ನು ದೂರವಿಟ್ಟು ಜನಸಾಮಾನ್ಯರಂತೆ ಬದುಕಬಹುದು.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.