ರೋಗನಿರೋಧಕಗಳ ಬಗ್ಗೆ ಒಂದಿಷ್ಟು ತಿಳಿದಿರಲಿ

Wellness

oi-Sumalatha

By Sumalatha

Published: Friday, September 23, 2011, 16:30 [IST]

ವಾತಾವರಣ ಬದಲಾಗುತ್ತಿದ್ದಂತೆ ಬ್ಯಾಕ್ಟೀರಿಯಾದಿಂದ ಅನೇಕ ಸೋಂಕು ತಗುಲಬಹುದು. ಆದರೆ ಚಿಂತಿಸಬೇಕಿಲ್ಲ. ರೋಗನಿರೋಧಕಗಳು ನಿಮ್ಮ ರಕ್ಷಣೆಗಿವೆ. ಆದರೆ ಸೂಕ್ತವಾಗಿ ಬಳಸದಿದ್ದರೆ ರೋಗನಿರೋಧಕಗಳೂ ಇನ್ನಿತರ ಅಡ್ಡಪರಿಣಾಮವನ್ನು ಉಂಟುಮಾಡಬಹುದು.

ರೋಗನಿರೋಧಕದ ನಿಮಗಿಷ್ಟು ತಿಳಿದಿರಲಿ:

ಹೇಳಿದ್ದನ್ನು ಅನುಸರಿಸಿ: ರೋಗನಿರೋಧಕ ಮಾತ್ರೆಯನ್ನು ಸರಿಯಾದ ಡೋಸ್ ನಲ್ಲಿ ಸೇವಿಸಿ. ವೈದ್ಯರು ಎಷ್ಟು ತೆಗೆದುಕೊಳ್ಳಲು ಹೇಳಿರುತ್ತಾರೊ ಅಷ್ಟನ್ನು ಮಾತ್ರ ಸೇವಿಸಿ. ಊಟದ ಮುನ್ನ ಅಥವಾ ನಂತರ ಸೇವಿಸಬೇಕಾದ್ದನ್ನು ಆಯಾ ಸಮಯಕ್ಕೇ ತೆಗೆದುಕೊಳ್ಳಬೇಕು. ಆಗ ಚಿಕಿತ್ಸೆ ಬೇಗ ಫಲಕಾರಿಯಾಗುತ್ತದೆ.

ಸೂಕ್ತ ಸಂರಕ್ಷಣೆಯಿರಲಿ: ರೋಗನಿರೋಧಕಗಳ ಮೇಲಿನ ಸೂಚನೆಯಂತೆ ಸರಿಯಾದ ವಾತಾವರಣದಲ್ಲಿ ಅವನ್ನು ಸಂರಕ್ಷಿಸಬೇಕು. ಇಲ್ಲವೆಂದರೆ ಅದರಲ್ಲಿ ಬಳಸಿರುವ ಅಂಶಗಳ ಮೇಲೆ ಪರಿಣಾಮ ಬೀರಬಹುದು.

ಸ್ವಯಂ ಚಿಕಿತ್ಸೆ ಬೇಡ: ಸುಖಾಸುಮ್ಮನೆ ಆಂಟಿಬಯೋಟಿಕ್ ಸೇವಿಸುವುದು ಬೇಡ. ಸಮಸ್ಯೆ ಕಂಡುಬಂದ ತಕ್ಷಣವೇ ಡಾಕ್ಟರನ್ನು ಸಂಪರ್ಕಿಸಿ ನಂತರ ಆ ಸಮಸ್ಯೆಗೆ ತಕ್ಕಂತೆ ರೋಗನಿರೋಧಕವನ್ನು ವೈದ್ಯರ ಸೂಚನೆ ಮೇರೆಗೆ ಸೇವಿಸಿ. ತಮ್ಮ ಸಮಸ್ಯೆಗೆ ತಾವೇ ಚಿಕಿತ್ಸೆ ಪಡೆದುಕೊಳ್ಳುವುದು ಅಷ್ಟು ಒಳ್ಳೆಯದಲ್ಲ.

ಅರಿವಿಲ್ಲದೇ ಸೇವನೆ ಬೇಡ: ಸೋಂಕಿಗೆ ಕಾರಣ, ಡೋಸ್, ಅಡ್ಡ ಪರಿಣಾಮ, ಅಲರ್ಜಿ ಮುಂತಾದ ಅರಿವಿಲ್ಲದೆಯೇ ಮಾತ್ರೆಗಳ ಸೇವನೆ ಒಳ್ಳೆಯದಲ್ಲ. ಮೊದಲು ವೈದ್ಯರನ್ನು ಸಂಪರ್ಕಿಸಿ ನಂತರವಷ್ಟೇ ಮಾತ್ರೆ ತೆಗೆದುಕೊಳ್ಳಬೇಕು. ಇಲ್ಲದಿದ್ದರೆ ವ್ಯತಿರಿಕ್ತ ಪರಿಣಾಮ ಬೀರಬಹುದು.

ತಪ್ಪಿಸಬೇಡಿ: ಸೋಂಕನ್ನು ತಡೆಯಲು ವೈದ್ಯರು ತಿಳಿಸಿದಷ್ಟು ಅವಧಿ ರೋಗನಿರೋಧಕಗಳನ್ನು ತೆಗೆದುಕೊಳ್ಳುವುದು ಉತ್ತಮ. ಮಧ್ಯದಲ್ಲಿಯೇ ನಿಲ್ಲಿಸಿದರೆ ಸೋಂಕಿಗೆ ಕಾರಣವಾದ ಬ್ಯಾಕ್ಟೀರಿಯಾ ಮತ್ತೆ ಬೆಳವಣಿಗೆ ಹೊಂದಬಹುದು. ಇದು ಮುಂದೆ ಸಮಸ್ಯೆ ಹೋಗಲಾಡಿಸಲು ಕಷ್ಟವಾಗಬಹುದು.

ಅಡ್ಡಪರಿಣಾಮ: ಕೆಲವು ಮಾತ್ರೆ ಸೇವಿಸಿದ ನಂತರ ಹೊಟ್ಟೆ ನೋವು, ವಾಂತಿ, ನಾಲಿಗೆಯ ಮೇಲೆ ಬಿಳಿ ಗುರುತು, ಮುಖ, ನಾಲಗೆ ಅಥವಾ ತುಟಿ ಊದಿಕೊಳ್ಳುವುದು, ನೋವು, ಉಸಿರಾಟ ಕಷ್ಟವೆನಿಸುವುದು ಈ ರೀತಿ ಅಡ್ಡ ಪರಿಣಾಮ ಉಂಟು ಮಾಡಬಹುದು. ತಕ್ಷಣವೇ ವೈದ್ಯರನ್ನು ಸಂಪರ್ಕಿಸಿ ಪರ್ಯಾಯ ವಿಧಾನವನ್ನು ಅನುಸರಿಸಬೇಕು.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.