ಹಾಟ್ ಚಿಪ್ಸ್ ಕ್ಯಾನ್ಸರ್ ತಂದೀತು ಹುಷಾರ್!

Wellness

oi-Prasad P Naik

By Prasad

Published: Sunday, August 1, 2010, 15:03 [IST]

ಅಂಗಡಿಗಳಲ್ಲಿ, ಬೀದಿಬದಿಯ ಗಾಡಿಗಳಲ್ಲಿ ಆಗ ತಾನೆ ಕರಿದ ತಾಜಾ ಹಾಟ್ ಚಿಪ್ಸ್ ಗಳನ್ನು ನೋಡಿದರೆ ಯಾರಿಗೆ ತಾನೆ ಬಾಯಲ್ಲಿ ನೀರೂರಲಿಕ್ಕಿಲ್ಲ? ಜಂಕ್ ಫುಡ್ ತಿನ್ನಬಾರದು, ಗ್ಯಾಸ್ ಟ್ರಬಲ್ ಬಾಧಿಸುತ್ತಿದೆ ಎಂಬ ವಿಚಾರಗಳನ್ನು ಬದಿಗಿಟ್ಟು ಬೀದಿಬದಿಯ ಹಾಟ್ ಚಿಪ್ಸ್ ಗಳಿಗಾಗಿ ಬಾಯಲ್ಲಿ ನೀರೂರಿರುತ್ತದೆ.

ಆದರೆ, ಸ್ವಲ್ಪ ತಾಳಿ. ಹಾಟ್ ಆಲೂಗಡ್ಡೆ ಚಿಪ್ಸ್ ಮಾತ್ರವಲ್ಲ, ಫ್ರೈಡ್ ಆಲೂಗಡ್ಡೆ, ಬಿಸ್ಕತ್ತು, ಬ್ರೆಡ್ ಟೋಸ್ಟ್, ಸ್ಯಾಂಡ್ ವಿಚ್ ಗಳನ್ನು ತಿನ್ನುವ ಮೊದಲು ಇನ್ನೊಮ್ಮೆ ಯೋಚಿಸಿ. ಆರೋಗ್ಯದ ಬಗ್ಗೆ ಕಾಳಜಿಯಿದ್ದರೆ ಜಿಹ್ವಾಚಾಪಲ್ಯವನ್ನು ನಿಯಂತ್ರಣದಲ್ಲಿಡಿ.

ಇಂಥ ಕರಿದ ತಿಂಡಿಗಳನ್ನು ಹೆಚ್ಚಾಗಿ ತಿನ್ನುವುದರಿಂದ ಕ್ಯಾನ್ಸರ್ ಬರುವ ಸಾಧ್ಯತೆ ಹೆಚ್ಚು ಎಂದು ಹೇಳಿದ್ದು ವಿಶ್ವ ಆರೋಗ್ಯ ಸಂಸ್ಥೆ. ವಿಶ್ವ ಆರೋಗ್ಯ ಸಂಸ್ಥೆಯೇ ಇದನ್ನು ಹೇಳಿರುವುದರಿಂದ ಹಗುರಾಗಿ ಕಾಣುವಂತಿಲ್ಲ.

ಇಂಥ ಕೆಲ ಬಗೆಯ ತಿಂಡಿಗಳನ್ನು ಅಧಿಕ ಉಷ್ಣದಲ್ಲಿ ಬೇಯಿಸಿದಾಗ ಅಥವಾ ಕರಿದಾಗ ಬಿಡುಗಡೆಯಾಗುವ ರಾಸಾಯನಿಕ ಪದಾರ್ಥ ಕ್ಯಾನ್ಸರನ್ನು ತರಬಲ್ಲದು ಎಂಬುದು ಆರೋಗ್ಯ ತಜ್ಞರ ಅಭಿಪ್ರಾಯ. ಇದಕ್ಕಾಗಿ ಪ್ರಾಣಿಗಳ ಮೇಲೆ ಪ್ರಯೋಗ ಮಾಡಿದಾಗ, ಬಿಡುಗಡೆಯಾಗುವ ಅಕ್ರಿಲಮೈಡ್ ಎಂಬ ರಾಸಾಯನಿಕ ಆರೋಗ್ಯಕ್ಕೆ ಹಾನಿಕರ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಮತ್ತು ವಿಶ್ವ ಸಂಸ್ಥೆಯ ತಜ್ಞರ ಜಂಟಿ ಸಮಿತಿ ಆತಂಕ ವ್ಯಕ್ತಪಡಿಸಿದೆ.

ಇದಕ್ಕೆ ಆಸ್ಟ್ರೇಲಿಯಾ ಮತ್ತು ನ್ಯೂಜಿಲಂಡ್ ಆಹಾರ ಗುಣಮಟ್ಟ ಮಾನದಂಡ ಸಂಸ್ಥೆ ಅನುಮೋದನೆ ನೀಡಿದೆ. 2002ರಲ್ಲಿಯೇ ಆಹಾರಗಳಲ್ಲಿ ಅಕ್ರಿಲಮೈಡ್ ರಾಸಾಯನಿಕ ಪದಾರ್ಥವಿರುವುದನ್ನು ಸ್ವೀಡನ್ನಿನ ವಿಜ್ಞಾನಿಗಳು ಕಂಡುಹಿಡಿದಿದ್ದರು.

ಚಿಪ್ಸ್ ಮತ್ತು ಇತರ ಕರಿದ ತಿಂಡಿಗಳನ್ನು ತಿನ್ನುವುದು ಯಾವತ್ತಿದ್ದರೂ ಆರೋಗ್ಯಕ್ಕೆ ಹಾನಿಕರವೇ. ಇವುಗಳಿಗೆ ಕಡಿವಾಣ ಹಾಕಿ ಅನಾರೋಗ್ಯವನ್ನು ನಾವಾಗಿಯೇ ತಂದುಕೊಳ್ಳದಿರುವುದು ಬುದ್ಧಿವಂತರ ಲಕ್ಷಣ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.