ಏನಿದು ಯೆಲ್ಲೋ ಫಂಗಸ್‌?: ಸೋಂಕಿನ ಲಕ್ಷಣ, ಕಾರಣ, ಚಿಕಿತ್ಸೆ ಇಲ್ಲಿದೆ ಸಂಪೂರ್ಣ ಮಾಹಿತಿ

ಯೆಲ್ಲೋ ಫಂಗಸ್‌ನ ರೋಗ ಲಕ್ಷಣಗಳು

ಯೆಲ್ಲೋ ಫಂಗಸ್‌ ಸೋಂಕಿತರು ಆಲಸ್ಯ, ಹಸಿವಿಲ್ಲದಿರುವಿಕೆ ಅಥವಾ ಕಡಿಮೆ ಹಸಿವು, ತೂಕ ಇಳಿಕೆ ಸಾಮಾನ್ಯ ರೋಗಲಕ್ಷಣಗಳನ್ನು ಎದುರಿಸಬೇಕಾಗುತ್ತದೆ. ಆದರೆ ಇದರ ತೀವ್ರತೆ ಹೆಚ್ಚಾದರೆ ಕಣ್ಣುಗಳು ಒಳಗೆ ಹೋಗಬಹುದು ಅಥವಾ ಕೀವು ರಚನೆ ಮತ್ತು ಸೋರಿಕೆಯಾಗಬಹುದು ಎನ್ನಲಾಗಿದೆ. ಇಲ್ಲಿ ಸವಾಲು ಎಂದರೆ, ಶಿಲೀಂಧ್ರವು ಈ ಗಾಯಗಳನ್ನು ಗುಣಪಡಿಸಲು ಅಡ್ಡಿಯಾಗುತ್ತದೆ, ಅಂಗಾಂಗ ವೈಫಲ್ಯ ಉಂಟಾಗಬಹುದು, ಅಪೌಷ್ಟಿಕತೆಗೆ ಕಾರಣವಾಗಬಹುದು ಮತ್ತು ಅಂತಿಮವಾಗಿ ವಿಪರೀತ ಸಂದರ್ಭಗಳಲ್ಲಿ ನೆಕ್ರೋಸಿಸ್‌ಗೆ ಸಹ ಕಾರಣವಾಗಬಹುದು.

ಹಳದಿ ಶಿಲೀಂಧ್ರಕ್ಕೆ ಕಾರಣಗಳು

ಹಳದಿ ಶಿಲೀಂಧ್ರ ಹರಡಲು ಕಾರಣಗಳು ಹಳೆಯ ಹಾಳಾದ ತೇವಾಂಶಭರಿತ ಆಹಾರ ಸೇವನೆ, ಅಶುಚಿತ್ವ ಎಂದು ಹೇಳಲಾಗುತ್ತದೆ. ಹಳೆಯ ಆಹಾರಗಳ ಸೇವನೆ ತಪ್ಪಿಸುವುದು, ನೈರ್ಮಲ್ಯ ಕಾಪಾಡುವ ಮೂಲಕ ಬ್ಯಾಕ್ಟೀರಿಯಾ ಮತ್ತು ಶಿಲೀಂಧ್ರಗಳು ಹೆಚ್ಚು ಹರಡದಂತೆ ತಡೆಯಬಹುದು. ಮನೆ ಅಥವಾ ಕಚೇರಿಗಳಲ್ಲಿ ಮುಚ್ಚಿದ ಜಾಗಗಳಲ್ಲಿ, ಹೆಚ್ಚು ಸೂರ್ಯನ ಬಿಸಿಲು ಬೀಳದ ಸ್ಥಳಗಳಲ್ಲಿ ತೇವಾಂಶವು ಹೆಚ್ಚು ಇರಬಾರದು, ಮನೆಯನ್ನು ಅಚ್ಚುಕಟ್ಟಾಗಿ ಇಡುವ ಮೂಲಕ ಶಿಲೀಂಧ್ರ ಸೋಂಕಿನಿಂದ ದೂರ ಇರಬಹುದು. ಹೆಚ್ಚಿನ ತೇವಾಂಶದ ವಾತಾವರಣವು ಶಿಲೀಂಧ್ರದ ಬೆಳವಣಿಗೆಯನ್ನು ಹೆಚ್ಚಿಸುತ್ತದೆ.

ಯೆಲ್ಲೊ ಫಂಗಸ್‌ ರೋಗಕ್ಕೆ ಚಿಕಿತ್ಸೆ

ಆರಂಭಿಕ ಹಂತದಲ್ಲೇ ಯೆಲ್ಲೊ ಫಂಗಸ್‌ ಇರುವ ಬಗ್ಗೆ ಪತ್ತೆಯಾದರೆ ರೋಗವನ್ನು ಗುಣಪಡಿಸಬಹುದು. ಯೆಲ್ಲೋ ಫಂಗಸ್‌ ಚಿಕಿತ್ಸೆಯಲ್ಲಿ ಶಿಲೀಂಧ್ರ ವಿರೋಧಿ ಔಷಧ "ಆಂಫೊಟೆರಿಸಿನ್ ಬಿ ಇಂಜೆಕ್ಷನ್" ಅನ್ನು ಬಳಸಲಾಗುತ್ತದೆ.

ಭಾರತದಲ್ಲಿ ಹಳದಿ ಶಿಲೀಂಧ್ರ ಪ್ರರಣಗಳು

ಭಾರತದಲ್ಲಿ ಹಳದಿ ಶಿಲೀಂಧ್ರದ ಮೊದಲ ಪ್ರಕರಣ ಉತ್ತರ ಪ್ರದೇಶದ ಗಾಜಿಯಾಬಾದ್‌ನಲ್ಲಿ ಪತ್ತೆಯಾಗಿದ್ದು, ಈವರೆಗೂ ಮತ್ತೆ ಬೇರೆ ಯಾವುದೇ ರಾಜ್ಯಗಳು ಈ ಸೋಂಕಿನ ಬಗ್ಗೆ ವರದಿ ಮಾಡಿಲ್ಲ.

ಮಧುಮೇಹಿಗಳೇ ಎಚ್ಚರ!

ಬ್ಲ್ಯಾಕ್ ಫಂಗಸ್ ಪ್ರಕರಣಗಳ ಹೆಚ್ಚಳದಿಂದ COVID-19 ಸೋಂಕಿತರ ಪ್ರಕರಣಗಳು ಸಹ ಹೆಚ್ಚುತಲೇ ಇದೆ. ಭಾರತದಾದ್ಯಂತ ಪ್ರಸ್ತುತ 8,848 ಕಪ್ಪು ಶಿಲೀಂಧ್ರಗಳ ಪ್ರಕರಣಗಳಿವೆ. ಮತ್ತೊಂದೆಡೆ ಬಿಳಿ ಶಿಲೀಂಧ್ರವು ಕಪ್ಪು ಶಿಲೀಂಧ್ರಕ್ಕಿಂತ ಕಡಿಮೆ ಅಪಾಯಕಾರಿ ಎಂದು ಹೇಳಲಾಗುತ್ತದೆ. ಈ ಶಿಲೀಂಧ್ರ ಸೋಂಕು ಹೆಚ್ಚಾಗಿ ಮಧುಮೇಹ ಇರುವವರಲ್ಲಿ ಅಥವಾ COVID-19 ಚಿಕಿತ್ಸೆ ವೇಳೆ ಅತಿಯಾಗಿ ಸ್ಟೀರಾಯ್ಡ್‌ಗಳನ್ನು ಬಳಸಿದವರಲ್ಲಿ ಹೆಚ್ಚಾಗಿ ಕಂಡುಬಂದಿದೆ.