ಎಚ್ಚರ! ಹೀಗೆ ಕೂತು ಕೆಲಸ ಮಾಡಿದ್ರೆ ಲಿವರ್ ಹಾಳಾಗುತ್ತೆ! ಯಾರಿಗೆ ಹೆಚ್ಚು ಅಪಾಯ?

ಎಚ್ಚರ..! ಗಂಟೆಗಟ್ಟಲೆ ಕುಳಿತುಕೊಂಡರೆ ನಿಮ್ಮ ಲಿವರ್‌ಗೆ ಅಪಾಯ. ಕುರ್ಚಿಯಲ್ಲಿ ಕುಳಿತು ಕೆಲಸ ಮಾಡುವವರು ತಕ್ಷಣ ಎಚ್ಚೆತ್ತುಕೊಳ್ಳಿ. ಹೌದು, ಕಚೇರಿ ಕೆಲಸವನ್ನು ಒಂದು ನಿಮಿಷ ಪಕ್ಕಕ್ಕಿಟ್ಟು ಈ ವಿಷಯ ತಿಳಿದುಕೊಳ್ಳದಿದ್ದರೆ ನಿಮ್ಮ ಯಕೃತ್‌ಗೆ (liver) ಅಪಾಯ ಸಾಧ್ಯತೆ. ನಿರಂತರವಾಗಿ ಕುಳಿತುಕೊಳ್ಳುವ ಅಭ್ಯಾಸವು ನಮ್ಮ ದೇಹಕ್ಕೆ ದೊಡ್ಡ ಅಪಾಯ ತಂದೊಡ್ಡುತ್ತಿದೆ. ವಿಶೇಷವಾಗಿ, ಲಿವರ್ ಎಂಬ ಪ್ರಮುಖ ಅಂಗವು ಈ ಮೌನ ಹಂತಕನ ಬಲಿಯಾಗುತ್ತಿದೆ.

ಪ್ರಸ್ತುತ ದಿನಗಳಲ್ಲಿ ನಮ್ಮ ಜೀವನಶೈಲಿ ಬಹಳಷ್ಟು ಬದಲಾಗಿದೆ. ಹೆಚ್ಚಿನವರಿಗೆ ಕುರ್ಚಿಯೇ ಪ್ರಪಂಚವಾಗಿದೆ. ಕಚೇರಿಯಲ್ಲಿ ಗಂಟೆಗಟ್ಟಲೆ ಕಂಪ್ಯೂಟರ್ ಮುಂದೆ, ಮನೆಯಲ್ಲಿ ಟಿವಿ ಅಥವಾ ಮೊಬೈಲ್ ಫೋನ್‌ಗೆ ಅಂಟಿಕೊಂಡು ಸಮಯ ಕಳೆಯುತ್ತೇವೆ. ಕುಳಿತುಕೊಳ್ಳುವುದು (sitting) ಸಾಮಾನ್ಯ ವಿಷಯವಾದರೂ, ಈ ಅಭ್ಯಾಸ ನಮ್ಮ ಆರೋಗ್ಯಕ್ಕೆ, ವಿಶೇಷವಾಗಿ ನಮ್ಮ ದೇಹದ ಪ್ರಮುಖ ಅಂಗವಾದ ಯಕೃತ್‌ಗೆ ಮಾರಕವಾಗಬಹುದು. ನೀವು ಕೂಡ ಹೆಚ್ಚಾಗಿ ಕುರ್ಚಿಯಲ್ಲೇ ಕುಳಿತುಕೊಳ್ಳುವವರಾಗಿದ್ದರೆ, ನಿಮ್ಮ ಆರೋಗ್ಯದ ಬಗ್ಗೆ ಕೂಡಲೇ ಗಮನ ಹರಿಸಬೇಕು.

ಫ್ಯಾಟಿ ಲಿವರ್ ಅಂದರೆ ಏನು?

ಯಕೃತ್‌ನಲ್ಲಿ ಕೊಬ್ಬು ಅತಿಯಾಗಿ ಸಂಗ್ರಹವಾಗುವುದನ್ನೇ ಫ್ಯಾಟಿ ಲಿವರ್ (fatty liver) ಕಾಯಿಲೆ ಎನ್ನುತ್ತಾರೆ. ಇದು ಯಕೃತ್‌ನಲ್ಲಿ ಉರಿಯೂತವನ್ನು ಉಂಟುಮಾಡಿ ಅದರ ಕಾರ್ಯಕ್ಷಮತೆಯನ್ನು ಕುಂಠಿತಗೊಳಿಸುತ್ತದೆ. ಆರಂಭದಲ್ಲಿ ಇದನ್ನು ಗುರುತಿಸಿ ಚಿಕಿತ್ಸೆ ನೀಡದಿದ್ದರೆ, ಭವಿಷ್ಯದಲ್ಲಿ ಸಿರ್ಹೋಸಿಸ್, ಯಕೃತ್ ಕ್ಯಾನ್ಸರ್‌ನಂತಹ ಮಾರಣಾಂತಿಕ ಕಾಯಿಲೆಗಳಿಗೆ ಕಾರಣವಾಗಬಹುದು. ಫ್ಯಾಟಿ ಲಿವರ್‌ನಲ್ಲಿ ಮುಖ್ಯವಾಗಿ ಎರಡು ವಿಧಗಳಿವೆ: ಆಲ್ಕೋಹಾಲ್ ಸೇವನೆಯಿಂದ ಬರುವ ಫ್ಯಾಟಿ ಲಿವರ್ ಮತ್ತು ನಾನ್ ಆಲ್ಕೊಹಾಲಿಕ್ ಫ್ಯಾಟಿ ಲಿವರ್ ಡಿಸೀಸ್ (NAFLD). ಇದು ಹೆಚ್ಚಾಗಿ ನಮ್ಮ ಜೀವನಶೈಲಿಯ ದೋಷಗಳಿಂದ ಬರುತ್ತದೆ.

ಲಿವರ್‌ ಮತ್ತು ಕುಳಿತುಕೊಳ್ಳುವುದಕ್ಕೆ ಸಂಬಂಧ ಏನು?

ಗಂಟೆಗಟ್ಟಲೆ ಚಲನರಹಿತವಾಗಿ ಕುಳಿತಾಗ, ನಮ್ಮ ದೇಹದ ಸ್ನಾಯುಗಳು ಸ್ಲೀಪಿಂಗ್ ಮೋಡ್‌ಗೆ ಹೋಗುತ್ತವೆ. ಇದರಿಂದ ದೇಹದಲ್ಲಿ ಇನ್ಸುಲಿನ್ ಕಾರ್ಯನಿರ್ವಹಣೆ ಹದಗೆಡುತ್ತದೆ. ರಕ್ತದಲ್ಲಿನ ಸಕ್ಕರೆಯನ್ನು ನಿಯಂತ್ರಿಸುವ ಇನ್ಸುಲಿನ್ ಸರಿಯಾಗಿ ಕೆಲಸ ಮಾಡದಿದ್ದಾಗ, ದೇಹವು ಕೊಬ್ಬನ್ನು ಸಂಗ್ರಹಿಸಲು ಪ್ರಾರಂಭಿಸುತ್ತದೆ. ಈ ಕೊಬ್ಬಿನ ಮೊದಲ ತಾಣ ನಮ್ಮ ಯಕೃತ್. ಹೀಗೆ ಯಕೃತ್‌ನಲ್ಲಿ ಕೊಬ್ಬು ಸೇರುವುದರಿಂದ ಫ್ಯಾಟಿ ಲಿವರ್ ಸಮಸ್ಯೆ ಪ್ರಾರಂಭವಾಗುತ್ತದೆ.

ಯಾರಿಗೆ ಹೆಚ್ಚು ಅಪಾಯ?

• ಡೆಸ್ಕ್‌ಜಾಬ್ ಮಾಡುವ ನೌಕರರು
• ವಿದ್ಯಾರ್ಥಿಗಳು
• ಗಂಟೆಗಟ್ಟಲೆ ಸ್ಕ್ರೀನ್ ಎದುರುಗಿರುವವರು
• ಮೊಬೈಲ್ ಹಾಗೂ ಲ್ಯಾಪ್‌ಟಾಪ್‌ ಮೇಲೆ ಅವಲಂಬನೆ ಹೆಚ್ಚಿರುವ ಮಕ್ಕಳು ಮತ್ತು ಯುವಕರು

ಕಚೇರಿಗಳಲ್ಲಿ ಅಥವಾ ಕಾರ್ಖಾನೆಗಳಲ್ಲಿ ಡೆಸ್ಕ್ ಕೆಲಸ (desk job) ಮಾಡುವವರು, ವಿದ್ಯಾರ್ಥಿಗಳು ಮತ್ತು ಗಂಟೆಗಟ್ಟಲೆ ಸ್ಕ್ರೀನ್ ಮುಂದೆ ಕಳೆಯುವವರಿಗೆ ಈ ಸಮಸ್ಯೆಯ ಅಪಾಯ ಹೆಚ್ಚು. ಸ್ಮಾರ್ಟ್‌ಫೋನ್‌ಗಳು ಮತ್ತು ಕಂಪ್ಯೂಟರ್‌ಗಳ ಬಳಕೆಯ ಹೆಚ್ಚಳದಿಂದಾಗಿ ಮಕ್ಕಳಲ್ಲಿ ಮತ್ತು ಯುವಜನರಲ್ಲಿಯೂ ಈ ರೋಗ ವೇಗವಾಗಿ ಹರಡುತ್ತಿದೆ ಎಂಬುದು ದುರದೃಷ್ಟಕರ. ಬೊಜ್ಜು ಇರುವವರಿಗೆ ಮಾತ್ರ ಈ ಸಮಸ್ಯೆ ಬರುತ್ತದೆ ಎಂದು ಭಾವಿಸುವುದು ತಪ್ಪು. ತೆಳ್ಳಗಿರುವ ಅಥವಾ ಸಾಮಾನ್ಯ ತೂಕ ಇರುವವರೂ ಸಹ ಗಂಟೆಗಟ್ಟಲೆ ಕುಳಿತುಕೊಂಡರೆ ಫ್ಯಾಟಿ ಲಿವರ್ ಬರುವ ಅಪಾಯವಿದೆ.

ಮುನ್ನೆಚ್ಚರಿಕೆಯೇ ಏಕೈಕ ಪರಿಹಾರ

ನಿವಾರಣೆ ನಮ್ಮ ಕೈಯಲ್ಲೇ ಇದೆ. ನಮ್ಮ ಜೀವನಶೈಲಿಯಲ್ಲಿ ಕೆಲವು ಸಣ್ಣ ಬದಲಾವಣೆಗಳನ್ನು ಮಾಡಿಕೊಳ್ಳುವುದರಿಂದ ಫ್ಯಾಟಿ ಲಿವರ್ ಅನ್ನು ತಡೆಯಬಹುದು ಅಥವಾ ನಿಯಂತ್ರಿಸಬಹುದು.

• ಪ್ರತೀ 30 ರಿಂದ 60 ನಿಮಿಷಕ್ಕೊಮ್ಮೆ ವಿರಾಮ ತೆಗೆದುಕೊಳ್ಳಿ: ನಿಮ್ಮ ಕುರ್ಚಿಯಿಂದ ಎದ್ದು ನಿಂತು ಸ್ವಲ್ಪ ಸಮಯ ಅತ್ತಿತ್ತ ಓಡಾಡಿ. ಸಣ್ಣಪುಟ್ಟ ಸ್ಟ್ರೆಚಿಂಗ್ ವ್ಯಾಯಾಮಗಳನ್ನು ಮಾಡುವುದು ಒಳ್ಳೆಯದು.

• ದೈನಂದಿನ ವ್ಯಾಯಾಮ ರೂಢಿಸಿಕೊಳ್ಳಿ: ಪ್ರತಿದಿನ ಕನಿಷ್ಠ 30 ನಿಮಿಷಗಳ ಕಾಲ ವಾಕಿಂಗ್, ಯೋಗ, ಸೈಕ್ಲಿಂಗ್ ಅಥವಾ ಓಟದಂತಹ ಲಘು ವ್ಯಾಯಾಮಗಳನ್ನು ಮಾಡಿ.

• ಆರೋಗ್ಯಕರ ಆಹಾರ ಸೇವಿಸಿ: ನಿಮ್ಮ ಆಹಾರದಲ್ಲಿ ಹೆಚ್ಚು ಹಣ್ಣುಗಳು, ತರಕಾರಿಗಳು ಮತ್ತು ಧಾನ್ಯಗಳನ್ನು ಸೇರಿಸಿಕೊಳ್ಳಿ. ಎಣ್ಣೆಯಲ್ಲಿ ಕರಿದ ಆಹಾರಗಳು, ಜಂಕ್ ಫುಡ್ ಮತ್ತು ಸಕ್ಕರೆ ಪಾನೀಯಗಳಿಂದ ದೂರವಿರಿ.

ಒಟ್ಟಾರೆಯಾಗಿ, 'ಕೂರುವ ಬದುಕು' ಸುಲಭವಾದರೂ ಆರೋಗ್ಯಕ್ಕೆ ಮೌನ ಹಂತಕ. ಇಂದೇ ಚಿಕ್ಕ ಅಭ್ಯಾಸ ಬದಲಾಯಿಸಿದರೆ, ನಾಳೆ ನಿಮ್ಮ ಲಿವರ್‌ಗೆ ದೊಡ್ಡ ರಕ್ಷಣೆ. ಈ ಸಣ್ಣ ಬದಲಾವಣೆಗಳು ನಿಮ್ಮ ಲಿವರ್ ಅನ್ನು ರಕ್ಷಿಸುತ್ತವೆ. ನಿಮ್ಮ ಒಟ್ಟಾರೆ ಆರೋಗ್ಯವನ್ನು ಉತ್ತಮಗೊಳಿಸುತ್ತವೆ. ನಿಮ್ಮ ಯಕೃತ್ತು ಆರೋಗ್ಯವಾಗಿದ್ದರೆ, ನಿಮ್ಮ ಜೀವನವೂ ಆರೋಗ್ಯವಾಗಿ, ಸಂತೋಷದಿಂದ ಇರುತ್ತದೆ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.