5 ಲಕ್ಷ ಆರೋಗ್ಯ ವಿಮೆ! 70+ ವೃದ್ಧರಿಗೆ ಉಚಿತ ಚಿಕಿತ್ಸೆ.. 'ಆಯುಷ್ಮಾನ್ ವೇ ವಂದನಾ ಕಾರ್ಡ್' ನೋಂದಣಿ ಹೇಗೆ?

70 ವರ್ಷ ಮೇಲ್ಪಟ್ಟ ವೃದ್ಧರಿಗೆ ಉಚಿತ ಚಿಕಿತ್ಸೆ.. ಬರೋಬ್ಬರಿ 5 ಲಕ್ಷ ಆರೋಗ್ಯ ವಿಮೆ! ಹೌದು, ಕೇಂದ್ರ ಸರ್ಕಾರ ಹಿರಿಯ ನಾಗರಿಕರ ಆರೋಗ್ಯ ರಕ್ಷಣೆಯತ್ತ ದೊಡ್ಡ ಹೆಜ್ಜೆ ಇಟ್ಟಿದೆ. ಅದರಂತೆ 'ಆಯುಷ್ಮಾನ್ ವೇ ವಂದನಾ ಯೋಜನೆ' (Ayushman Vaya Vandana) ಪ್ರಾರಂಭಿಸಿದೆ. ಎಲ್ಲಾ ನಾಗರಿಕರಿಗೆ (Senior Citizen) ಅವರ ಸಾಮಾಜಿಕ, ಆರ್ಥಿಕ ಸ್ಥಿತಿಯನ್ನು ಲೆಕ್ಕಿಸದೆ 5 ಲಕ್ಷ ರೂ.ಗಳ ಉಚಿತ ಆರೋಗ್ಯ ರಕ್ಷಣೆಯನ್ನು ನೀಡುವುದು ಈ ಯೋಜನೆಯ ಉದ್ದೇಶ. ಬನ್ನಿ, ಆಯುಷ್ಮಾನ್ ಆ್ಯಪ್ ಡೌನ್‌ಲೋಡ್ ಮಾಡುವುದು ಹೇಗೆ? ಮತ್ತು 5 ಲಕ್ಷ ರೂ. ಆರೋಗ್ಯ ವಿಮೆಯನ್ನು ಪಡೆಯುವುದು ಹೇಗೆ? ಎನ್ನುವುದನ್ನು ತಿಳಿಯೋಣ.

ಆಯುಷ್ಮಾನ್ ಭಾರತ್ ಪ್ರಧಾನ ಮಂತ್ರಿ ಜನ ಆರೋಗ್ಯ ಯೋಜನೆಯ (AB PM-JAY) ಅಡಿಯಲ್ಲಿ ಬರುತ್ತದೆ. ಪ್ರಧಾನಿ ನರೇಂದ್ರ ಮೋದಿ ಅವರು ಅಕ್ಟೋಬರ್ 2024 ರಲ್ಲಿ ಹಿರಿಯ ನಾಗರಿಕರಿಗೆ ಉಚಿತ ವೈದ್ಯಕೀಯ ರಕ್ಷಣೆ ಒದಗಿಸಲು 'ಆಯುಷ್ಮಾನ್ ವೇ ವಂದನಾ' ಯೋಜನೆಯನ್ನು ಪ್ರಾರಂಭಿಸಿದರು. ಈ ಯೋಜನೆಯಡಿಯಲ್ಲಿ ಆಯುಷ್ಮಾನ್ ವೇ ವಂದನಾ ಕಾರ್ಡ್ (AVVC) ನೀಡಲಾಗುವುದು. ಈ ಮೂಲಕ 70 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಎಲ್ಲಾ ನಾಗರಿಕರಿಗೆ ಅವರ 5 ಲಕ್ಷ ರೂ.ಗಳವರೆಗೆ ಉಚಿತ ಆರೋಗ್ಯ ರಕ್ಷಣೆಯನ್ನು ನೀಡಲಾಗುವುದು.

ಈ ಕಾರ್ಡ್ ಇನ್ನಷ್ಟು ಸಹಾಯಕವಾಗಿಸುವ ಅಂಶವೆಂದರೆ, ಇದು ಮೊದಲ ದಿನದಿಂದಲೇ ಇರುವ ಎಲ್ಲಾ ಕಾಯಿಲೆಗಳನ್ನು ಒಳಗೊಂಡಂತೆ ಸುಮಾರು 2,000 ವೈದ್ಯಕೀಯ ವಿಧಾನಗಳನ್ನು ಒಳಗೊಂಡಿದೆ. ಅಂದರೆ, ಯಾವುದೇ ಕಾಯುವ ಅವಧಿಯಿಲ್ಲದೆ ಚಿಕಿತ್ಸೆಯನ್ನು ಒಳಗೊಂಡಿದೆ. ಖಾಸಗಿ ವಿಮೆ ಹೊಂದಿರುವವರು ಸಹ ಇದಕ್ಕೆ ಅರ್ಹರು. ಆಯುಷ್ಮಾನ್ ವೇ ವಂದನಾ ಕಾರ್ಡ್‌ಗೆ ನೋಂದಾಯಿಸಿಕೊಳ್ಳುವುದು ಮತ್ತು 5 ಲಕ್ಷ ರೂ.ಗಳ ಆರೋಗ್ಯ ರಕ್ಷಣೆಯನ್ನು ಪಡೆಯುವುದು ಹೇಗೆ ಎಂದು ಯೋಚಿಸುತ್ತಿದ್ದೀರಾ? ನಿಮ್ಮ ಕುತೂಹಲಕ್ಕೆ ಇಲ್ಲಿದೆ ಉತ್ತರ.

'ಆಯುಷ್ಮಾನ್ ವೇ ವಂದನ ಕಾರ್ಡ್' ಪಡೆಯುವುದು ಹೇಗೆ?

ಹಂತ 1: ಗೂಗಲ್ ಪ್ಲೇ ಸ್ಟೋರ್‌ನಿಂದ ಆಯುಷ್ಮಾನ್ ಭಾರತ್ (Ayushman Bharat) ಅಪ್ಲಿಕೇಶನ್ ಡೌನ್‌ಲೋಡ್ ಮಾಡಿ.

ಹಂತ 2: ನೀವು ಫಲಾನುಭವಿ ಅಥವಾ ನಿರ್ವಾಹಕರಾಗಿ ಲಾಗಿನ್ ಮೇಲೆ ಕ್ಲಿಕ್ ಮಾಡಿ.

ಹಂತ 3: ನಿಮ್ಮ ಕ್ಯಾಪ್ಚಾ ನಮೂದಿಸಿ, ಮೊಬೈಲ್ ಸಂಖ್ಯೆ ಮತ್ತು ದೃಢೀಕರಣ ವಿಧಾನವನ್ನು ಆಯ್ಕೆಮಾಡಿ.

ಹಂತ 4: ನಿಮ್ಮ ಮೊಬೈಲ್‌ಗೆ ಕಳುಹಿಸಲಾದ OTP ನಮೂದಿಸಿ ಮತ್ತು ಲಾಗಿನ್ ಕ್ಲಿಕ್ ಮಾಡಿ.

ಹಂತ 5: ಬಳಿಕ ಸಾಧನದ ಸ್ಥಳವನ್ನು ಪ್ರವೇಶಿಸಲು ಆಪ್‌ಗೆ ಅನುಮತಿಸಿ.

ಹಂತ 6: ರಾಜ್ಯ ಮತ್ತು ಆಧಾರ್ ವಿವರಗಳು ಮತ್ತು ಫಲಾನುಭವಿಯ ಇತರೆ ವಿವರಗಳನ್ನು ನಮೂದಿಸಿ.

ಹಂತ 7: ಫಲಾನುಭವಿ ಸಿಗದಿದ್ದರೆ, ಆಧಾರ್ OTP ಬಳಸಿ ಇ-ಕೆವೈಸಿ (eKYC) ಪ್ರಕ್ರಿಯೆ ಪೂರ್ಣಗೊಳಿಸಿ.

ಹಂತ 8: ಸ್ವಯಂ ಘೋಷಣೆಯನ್ನು ಭರ್ತಿ ಮಾಡಿ, ಅಗತ್ಯವಿರುವ ಮಾಹಿತಿಯನ್ನು ನಮೂದಿಸಿ.

ಹಂತ 9: ಮತ್ತೆ ನಿಮ್ಮ ಮೊಬೈಲ್ ಸಂಖ್ಯೆ ಮತ್ತು OTP ನಮೂದಿಸಿ.

ಹಂತ 10: ಸಾಮಾಜಿಕ ವರ್ಗ, ಪಿನ್ ಕೋಡ್ ಮತ್ತು ಕುಟುಂಬ ಸದಸ್ಯರ ವಿವರಗಳನ್ನು ಭರ್ತಿ ಮಾಡಿ.

ಹಂತ 11: ಕುಟುಂಬ ಸದಸ್ಯರ ವಿವರಗಳನ್ನು ಸೇರಿಸಿ ಮತ್ತು ಸಲ್ಲಿಸಲು ಮುಂದುವರಿಯಿರಿ.

ಹಂತ 12: ಇ-ಕೆವೈಸಿ ಪೂರ್ಣಗೊಂಡ ನಂತರ, ಅನುಮೋದನೆಯ ನಂತರ ನೀವು ಆಯುಷ್ಮಾನ್ ವೇ ವಂದನಾ ಕಾರ್ಡ್ ಅನ್ನು ಡೌನ್‌ಲೋಡ್ ಮಾಡಬಹುದು.

30,072ಕ್ಕೂ ಹೆಚ್ಚು ಆಸ್ಪತ್ರೆಗಳಲ್ಲಿ ಚಿಕಿತ್ಸೆ

ಹಿರಿಯ ನಾಗರಿಕರು 27 ವಿಶೇಷತೆಗಳಲ್ಲಿ 1,961ಕ್ಕೂ ಹೆಚ್ಚು ವೈದ್ಯಕೀಯ ವಿಧಾನಗಳನ್ನು ಒಳಗೊಂಡಂತೆ ನಗದು ರಹಿತ ಆರೋಗ್ಯ ಸೇವೆಗಳನ್ನು ಪಡೆಯಬಹುದು. ಹೃದಯ, ಕ್ಯಾನ್ಸರ್, ಮೂತ್ರಪಿಂಡ ಚಿಕಿತ್ಸೆಗಳು, ಮೂಳೆ ಮತ್ತು ಕೀಲು ಶಸ್ತ್ರಚಿಕಿತ್ಸೆಗಳು, ಡಯಾಲಿಸಿಸ್, ಕೀಲು ಬದಲಿ, ಆಂಜಿಯೋಗ್ರಾಮ್‌ಗಳು ಮತ್ತು ಪೇಸ್‌ಮೇಕರ್ ಇಂಪ್ಲಾಂಟೇಶನ್ ಸೇರಿದಂತೆ ಇತರೆ ಕೆಲವು ಪ್ರಮುಖ ಚಿಕಿತ್ಸೆಗಳನ್ನು ಸಹ ಪಡೆಯಬಹುದು. ಆಯುಷ್ಮಾನ್ ವೇ ವಂದನ ಕಾರ್ಡ್‌ಗಳ ಫಲಾನುಭವಿಗಳು 13,352 ಖಾಸಗಿ ಆಸ್ಪತ್ರೆಗಳು ಸೇರಿದಂತೆ 30,072ಕ್ಕೂ ಹೆಚ್ಚು ಆಸ್ಪತ್ರೆಗಳ ಮೂಲಕ ಯೋಜನೆಯ ಪ್ರಯೋಜನಗಳನ್ನು ಪಡೆಯಬಹುದು.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.