ಡಬಲ್ ಶೇಡ್ ಸೀರೆಯಲ್ಲಿ ಮೆರುಗು ತೋರಿದ ವಿದ್ಯಾ ಬಾಲನ್

ಸೀರೇಲಿ ಹುಡುಗೀರ ನೋಡಲೇ ಬಾರದು ನಿಲ್ಲಲ್ಲ ಟೆಂಪರೇಚರ್ ಎಂಬ ಹಾಡಿನಂತೆ ಸೀರೆಯಲ್ಲಿ ನಾರಿಯರ ಸೊಬಗು ಬೇರೆ ಎಲ್ಲಾ ದಿರಿಸುಗಳಿಗಿಂತಲೂ ತುಸು ವಿಶಿಷ್ಟವಾಗಿ ಕಾಣುತ್ತದೆ ಮತ್ತು ಸೀರೆ ಉಟ್ಟ ನಾರಿಗೆ ಎಂದಿಗೂ ಮನ್ನಣೆ ಪ್ರಶಂಸೆ ತುಸು ಅಧಿಕವೇ. ಹೇಳಿ ಕೇಳಿ ಬಾಲಿವುಡ್‌ನ ಥಳುಕು ಬಳುಕಿನ ಲೋಕದಲ್ಲಿ ಫ್ಯಾಷನ್ ಅಂಶ ಕೊಂಚ ಜಾಸ್ತಿಯೇ ಆಧುನಿಕ ವಸ್ತ್ರ ವಿನ್ಯಾಸಕ್ಕೆ ಪ್ರಾಮುಖ್ಯತೆ ಕೊಡುವ ಇಲ್ಲಿನ ನೀರೆಯರು ಸೀರೆ ಎಂದರೆ ಮೂಗು ಮುರಿಯುವುದೇ ಹೆಚ್ಚು.

ಆದರೂ ಸೀರೆಯನ್ನೇ ಹೆಚ್ಚು ಇಷ್ಟಪಡುವ ಸಿನಿ ತಾರೆಯರು ಮಾತ್ರ ಈ ಮಾತನ್ನು ಅಲ್ಲಗೆಳೆಯುತ್ತಾರೆ. ಇತರ ದಿರಿಸುಗಳಂತೆ ಸೀರೆ ಕೂಡ ದಿರಿಸುಗಳಲ್ಲಿ ಪ್ರಾಮುಖ್ಯತೆಯನ್ನು ಪಡೆದುಕೊಂಡಿದ್ದು ಅದನ್ನು ತೋರ್ಪಡಿಸುವ ರೀತಿಯಿಂದ ನಾವು ಜನಮನ್ನಣೆ ಗಳಿಸಬಹುದು ಎಂಬ ಸಿದ್ಧಾಂತವನ್ನು ಎತ್ತಿ ಹಿಡಿದಿದ್ದಾರೆ. ಈ ಸಾಲಿಗೆ ಸೇರುವ ಸೀರೆಯನ್ನೇ ಹೆಚ್ಚು ಇಷ್ಟಪಡುವ ನಟಿಯಾಗಿದ್ದಾರೆ ವಿದ್ಯಾಬಾಲನ್. ಯಾವುದೇ ಕಾರ್ಯಕ್ರಮದಲ್ಲೂ ತಮ್ಮ ಅಂದ ಚೆಂದದ ಸೀರೆಯಿಂದಲೇ ಈಕೆ ನಾಲ್ಕು ಜನರಲ್ಲಿ ಎದ್ದುಗಾಣುತ್ತಾರೆ ಮತ್ತು ಸ್ಟೈಲಿಶ್ ಆಗಿ ತಮ್ಮನ್ನು ಕಾಣಿಸಿಕೊಳ್ಳುತ್ತಾರೆ.

ವಿದ್ಯಾರ ಸೀರೆ ಆಯ್ಕೆಗಳಲ್ಲಿ ಹತ್ತಿ, ಬನಾರಸ್, ಶಿಫಾನ್ ಮತ್ತು ರೇಷ್ಮೆ ಸೀರೆಗಳಿಗೂ ಪ್ರಾಮುಖ್ಯತೆ ಇದೆ. ತಮ್ಮ ಅನನ್ಯ ಸೀರೆ ಆಯ್ಕೆಗಳಿಂದಲೇ ಆಕೆ ಬಾಲಿವುಡ್ ಅಂಗಳದಲ್ಲಿ ಹೆಸರುವಾಸಿಯಾಗಿದ್ದಾರೆ. ಇತ್ತೀಚೆಗೆ ತಾನೇ ವಿದ್ಯಾ ಬೇಸಿಗೆ ಸಂಗ್ರಹಣೆಯ ಸೀರೆಗಳನ್ನು ಸಾದರ ಪಡಿಸಿದ್ದಾರೆ. ಡಬಲ್ ಶೇಡ್ ಇರುವ ಕಂದು ಬಣ್ಣದ ಸೀರೆಗಳನ್ನು ವಿದ್ಯಾ ಉಟ್ಟಿದ್ದು ಸೀರೆ ಆಕರ್ಷಕ ವಿನ್ಯಾಸಗಳನ್ನು ಪಡೆದುಕೊಂಡಿದೆ.

ಮೂರು ಬಣ್ಣಗಳ ಸ್ಕೂಪ್ ಕುತ್ತಿಗೆ ವಿನ್ಯಾಸವುಳ್ಳ ರವಿಕೆಯನ್ನು ಈ ಸೀರೆಗಾಗಿ ಅವರು ತೊಟ್ಟಿದ್ದರು. ಸೀರೆಗೆ ಇನ್ನಷ್ಟು ಸಾಂಪ್ರದಾಯಕ ನೋಟವನ್ನು ನೀಡುವುದಕ್ಕಾಗಿ ಬಲಕೈಗೆ ಕೆಂಪು ಬಳೆಗಳನ್ನು ಅವರು ಧರಿಸಿಕೊಂಡಿದ್ದರು. ಚಿನ್ನದ ಜುಮುಕಿ ಮತ್ತು ಬೈತಲೆ ಕೇಶಶೃಂಗಾರದೊಂದಿಗೆ ಸೀರೆಯ ಮೆರುಗನ್ನು ವಿದ್ಯಾ ಇನ್ನಷ್ಟು ಹೆಚ್ಚಿಸಿದ್ದಾರೆ. ನಮಗಂತೂ ವಿದ್ಯಾರ ಸೀರೆ ನೋಟ ಇಷ್ಟವಾಗಿದೆ. ನಿಮಗೂ ಇದು ಇಷ್ಟವಾಯಿತು ಅಲ್ಲವೇ?