ಕೆಂಪು ಬಣ್ಣದ ಲೆಹೆಂಗಾದಲ್ಲಿ 'ಪ್ರೀತಿ ಜಿಂಟಾ' ನಿಜಕ್ಕೂ ಅಪ್ಸರೆ!

ಬಾಲಿವುಡ್ ಬೆಡಗಿ ಪ್ರೀತಿ ಜಿಂಟಾ ಇದೇ ವರ್ಷ ಫೆಬ್ರವರಿ 29 ರಂದು ಗೃಹಸ್ಥಾಶ್ರಮಕ್ಕೆ ಕಾಲಿರಿಸಿದ್ದು, ಅತಿ ಸರಳವಾಗಿ ಬಂಧು ಬಾಂಧವರ ಸಮ್ಮುಖದಲ್ಲಿ ಪ್ರೀತಿ ತಮ್ಮ ಗೆಳೆಯನನ್ನು ವರಿಸಿದ್ದು ನಮಗೆಲ್ಲಾ ಗೊತ್ತಿರುವ ವಿಚಾರ.

ಯಾವುದೇ ಆರ್ಭಾಟವಿಲ್ಲದೆ, ಮಾಧ್ಯಮಗಳ ಕಣ್ಣಿಗೆ ಬೀಳದೆಯೇ ಪ್ರೀತಿ ಕುಟುಂಬ ಸದಸ್ಯರು ಮತ್ತು ಆಪ್ತ ಸ್ನೇಹಿತರ ಒಡಗೂಡಿ ಮದುವೆಯನ್ನು ಮಾಡಿಕೊಂಡಿದ್ದಾರೆ. ಇದುವರೆಗೆ ಮದುವೆಯ ಚಿತ್ರಗಳು ಯಾರಿಗೂ ಸಿಕ್ಕಿರಲಿಲ್ಲ. ಪ್ರೀತಿ ಅಷ್ಟೊಂದು ಕಾಳಜಿಯಿಂದ ಜೋಪಾನವಾಗಿ ವಿವಾಹದ ಸಿದ್ಧತೆಗಳನ್ನು ಮಾಡಿದ್ದಾರೆ.

ಪ್ರೀತಿಯ ಅಭಿಮಾನಿಗಳಿಗೆ ಇದರಿಂದ ಆದ ನಿರಾಶೆ ಅಷ್ಟಿಷ್ಟಲ್ಲ. ಈಗ ಪ್ರೀತಿ ವಿವಾಹಿತೆಯಾಗಿರುವ ಸಂದರ್ಭದ ಚಿತ್ರಗಳು ದೊರಕಿದ್ದು ಅದರಲ್ಲಿ ನವ ವಧುವಿನ ರೂಪದಲ್ಲಿ ಕಂಗೊಳಿಸುತ್ತಿರುವ ಪ್ರೀತಿಯ ಸೌಂದರ್ಯವನ್ನು ಹೊಗಳಲು ಮಾತೇ ಇಲ್ಲ.

ಬಾಲಿವುಡ್‎ನ ಇತರ ವಧುಗಳು ಆರಿಸುವಂತೆಯೇ ಪ್ರೀತಿ ಕೂಡ ಮನೀಶ್ ಮಲ್ಹೋತ್ರಾ ವಿನ್ಯಾಸದ ಲೆಹಂಗಾವನ್ನು ತೊಟ್ಟಿದ್ದರು. ಈ ಲೆಹೆಂಗಾ ಕೆಂಪು ಬಣ್ಣದಲ್ಲಿತ್ತು. ನೆಲಮುಟ್ಟುವಂತಿದ್ದ ಈ ಲೆಹೆಂಗಾ ಮುಘಲ್ ಪ್ರಿಂಟ್‎ಗಳನ್ನು ತನ್ನಲ್ಲಿ ಹೊಂದಿತ್ತು ಮತ್ತು ರವಿಕೆಯ ಕೂಡ ಸುಂದರವಾದ ವಿನ್ಯಾಸವನ್ನು ಹೊಂದಿತ್ತು.

ಪ್ರೀತಿ ಹಣೆಗೆ ಮಾಂಗ್ ಟಿಕ್ಕಾ, ಬೋರ್ಲಾ ಮತ್ತು ನತ್ ಅನ್ನು ತೊಟ್ಟಿದ್ದರು. ಕುಂದನ್ ಆಭರಣ ಆಕೆಯ ಸೌಂದರ್ಯವನ್ನು ಇಮ್ಮಡಿಸಿತ್ತು. ಆದರೆ ಕೇಶಾಲಂಕಾರಕ್ಕೆ ಪ್ರೀತಿ ಹೆಚ್ಚಿನ ಒತ್ತು ಕೊಟ್ಟಿಲ್ಲ.

ಸರಳ ಕೇಶಶೃಂಗಾರವನ್ನು ಮಾಡಿಕೊಂಡಿದ್ದಾರೆ. ಹಾಗಿದ್ದರೆ ತಡಮಾಡದೇ ಪ್ರೀತಿಯ ಸುಂದರ ನೋಟವನ್ನು ನಿಮ್ಮ ಕಣ್ಣುಗಳಲ್ಲಿ ತುಂಬಿಕೊಳ್ಳಿ ಮತ್ತು ನಿಮ್ಮ ಆಯ್ಕೆಯೂ ಇದೇ ಆಗಿರಲಿ.