ಹೋಳಿಯಾಟದ ಮುನ್ನ ಹಾಗೂ ನಂತರ ಈ ಟಿಪ್ಸ್ ಅನುಸರಿಸಿದರೆ ಬಣ್ಣದಿಂದ ತ್ವಚೆ, ಕೂದಲಿಗೆ ಹಾನಿಯಾಗಲ್ಲ

ಬಣ್ಣಗಳ ಹಬ್ಬ ಹೋಳಿ, ಹೋಳಿ ಹಬ್ಬದಂದು ಬಣ್ಣಗಳನ್ನು ಎರಚುವ ಮೂಲಕ ಹೋಳಿ ಹಬ್ಬದ ಶುಭಾಶಯ ಕೋರುತ್ತೇವೆ, ಹೋಳಿಯ ಬಣ್ಣದಂತೆ ನಿಮ್ಮ ಬದುಕು ಸುಂದರವಾಗಿರಲಿ, ಸಂತೋಷ, ಸಮೃದ್ಧಿ ತುಂಬಿ ತುಳುಕುವಂತೆ ಆಗಲಿ ಎಂಬುವುದೇ ನಮ್ಮ ಆರೈಕೆ.

ಹೋಳಿ ಹಬ್ಬದಂದು ನಾವು ಬಣ್ಣಗಳನ್ನು ಎರಚಿ ಆಡುವಾಗ ತ್ವಚೆ ಬಗ್ಗೆ ಜಾಗ್ರತೆವಹಿಸಬೇಕು, ಅದರಲ್ಲೂ ತುಂಬಾ ಸೆನ್ಸಿಟಿವ್ ತ್ವಚೆಯವರು ಈ ಹೋಳಿ ಹಬ್ಬದಂದು ತುಂಬಾನೇ ಜಾಗ್ರತೆವಹಿಸಬೇಕು. ನೀವು ಸಾವಯವ ಬಣ್ಣದಿಂದ ಆಡಿದರೂ ಬೇರೆಯವರು ನಿಮ್ಮ ಮೇಲೆ ಎರಚುವ ಬಣ್ಣ ಯಾವ ಗುಣಮಟ್ಟದ್ದು ಹೇಳಲು ಸಾಧ್ಯವಿಲ್ಲ, ಆದ್ದರಿಂದ ತ್ವಚೆಯ ಬಗ್ಗೆ ಜಾಗ್ರತೆವಹಿಸಬೇಕು. ಇನ್ನು ಹೋಳಿ ಬಣ್ಣ ತೊಳೆದಾಗ ಹೋಗದಿದ್ದರೆ ಮಾರನೇಯ ದಿನ ಆಫೀಸ್ ಅಥವಾ ಕಾಲೇಜಿಗೆ ಹೋಗುವಾಗ ಬಣ್ಣ ಹೋಗದಿದ್ದರೆ ಒಂಥರಾ ಮುಜುಗರವಾಗುವುದು.

ಹೋಳಿಗೆ ಮೊದಲು ಹಾಗೂ ಹೋಳಿಯ ನಂತರ ತ್ವಚೆ ಆರೈಕೆ ಹೀಗೆ ಮಾಡಿ, ಯಾವ ಅಲರ್ಜಿ ಉಂಟಾಗುವುದಿಲ್ಲ, ಅಲ್ಲದೆ ನೀವು ಹೋಳಿಗೆ ಮೊದಲು ತ್ವಚೆಯನ್ನು ಈ ರೀತಿ ಆರೈಕೆ ಮಾಡಿದರೆ ಬಣ್ಣ ತೊಳೆಯಲು ಕೂಡ ಸುಲಭವಾಗುವುದು ನೋಡಿ:

ದೇಹಕ್ಕೆ ಎಣ್ಣೆ ಮಸಾಜ್ ಮಾಡಿ
ಹೋಳಿ ಆಡುವ ಮುನ್ನ ದೇಹಕ್ಕೆ ಎಣ್ಣೆ ಮಸಾಜ್ ಮಾಡಿ, ಇದರಿಂದ ತ್ವಚೆ ಬಣ್ಣವನ್ನು ಹೀರಿಕೊಳ್ಳುವುದು ಕಡಿಮೆಯಾಗುವುದು, ಅಲ್ಲದೆ ಈ ರೀತಿ ಎಣ್ಣೆ ಮಸಾಜ್‌ ಮಾಡಿ ಸ್ನಾನ ಮಾಡುವುದರಿಂದ ಬಣ್ಣ ಕೂಡ ಬೇಗ ತೊಳಿಯಬಹುದು, ಅದರೆ ಎಣ್ಣೆ ಹಚ್ಚುವುದು ಒಳ್ಳೆಯದು.

ಕೂದಲಿಗೂ ಎಣ್ಣೆ ಹಚ್ಚಿ
ನೀವು ಹೋಳಿಯಾಡುವಾಗ ಕೂದಲಿಗೆ ಎಣ್ಣೆ ಹಾಕಿ ಸ್ಕಾರ್ಪ್ ಕಟ್ಟುವುದು ಒಳ್ಳೆಯದು, ಕೆಲವೊಂದು ರಾಸಾಯನಿಕಗಳು ಕೂದಲನ್ನು ಒರಟಾಗಿಸುತ್ತದೆ, ಅದೇ ಕೂದಲಿಗೆ ಎಣ್ಣೆ ಹಚ್ಚಿದರೆ ಕೂದಲಿಗೆ ರಾಸಾಯನಿಕ ಬಣ್ಣಗಳು ಅಂಟಿಕೊಳ್ಳುವುದಿಲ್ಲ, ಹೋಳಿ ಆಟದ ಬಳಿಕ ಶ್ಯಾಂಪೂ ಹಚ್ಚಿ ತೊಳೆದರೆ ಸಾಕು ಕೂದಲು ಚೆನ್ನಾಗಿ ಇರುತ್ತದೆ.

ಸನ್‌ಸ್ಕ್ರೀನ್ ಬಳಸಿ
ನೀವು ಹೋಳಿಯಾಡಲು ಹೋಗುವ ಮುನ್ನ ಸನ್‌ಸ್ಕ್ರೀನ್‌ ಬಳಸಿ. SPF 30 ಇರುವ ಸನ್‌ಸ್ಕ್ರೀನ್‌ ಬಳಸಿ, ಇನ್ನು ಆಲ್ಕೋಹಾಲ್‌ ಫ್ರೀ ಸನ್‌ಸ್ಕ್ರೀನ್‌ ಬಳಸಬೇಕು.

ತುಂಬು ತೋಳಿನ ಸಡಿಲ ಬಟ್ಟೆ ಧರಿಸಿ
ಹೋಳಿಯಾಡಲು ತುಂಬು ತೋಳಿನ ಸಡಿಲ ಬಟ್ಟೆ ಧರಿಸಿ. ಇದರಿಂದ ಮೈಗೆ ಬಣ್ಣ ಮೆತ್ತಿಕೊಳ್ಳುವುದು ಕಡಿಮೆಯಾಗುವುದು. ಮೈ ಮೇಲೆ ನೀರು ಬಿದ್ದಾಗ ಬಟ್ಟೆ ಬೇಗನೆ ಒಣಗುವಂತೆ ಇರಲಿ, ಇಲ್ಲದಿದ್ದರೆ ಬಣ್ಣವೆಲ್ಲಾ ಮೈಗೆ ಅಂಟಿಕೊಳ್ಳುವುದು.

ನೀರು ಕುಡಿಯಿರಿ
ಈ ದಿನ ಬಿಸಿಲಿನಲ್ಲಿ ಆಟ ಆಡುತ್ತೀರಿ, ಸಾಕಷ್ಟು ನೀರು ಕುಡಿಯಿರಿ, ಜ್ಯೂಸ್, ಕಲ್ಲಂಗಡಿ ಹಣ್ಣು ಇವುಗಳನ್ನು ಸೇವಿಸಿ. ದೇಹದಲ್ಲಿ ನೀರಿನಂಶ ಕಡಿಮೆಯಾದರೆ ತುಂಬಾನೇ ಸುಸ್ತುಯಾಗುವುದು.

ಹೋಳಿ ಬಣ್ಣ ತೆಗೆಯುವುದು ಹೇಗೆ?
ನೀವು ಹೋಳಿಯಾಟ ಆಡಿದ ತಕ್ಷಣವೇ ಸ್ನಾನ ಮಾಡಿದರೆ ಒಳ್ಳೆಯದು. ತುಂಬಾ ಹೊತ್ತು ಬಣ್ಣ ಮೆತ್ತಿದ ಬಟ್ಟೆಯಲ್ಲಿ ಇದ್ದರೆ ಚರ್ಮಕ್ಕೆ ಅಂಟಿಕೊಳ್ಳುವುದು. ಆದ್ದರಿಂದ ಬಂದ ತಕ್ಷಣ ನೀರು ಹಾಕಿ, ನಂತರ ಹಳೆಯ ಬಟ್ಟೆಯಿಂದ ಮೈ ಒರೆಸಿ, ಮೈಗೆ ಎಣ್ಣೆ ಹಚ್ಚಿ, ಅದಾಗಿ 10 ನಿಮಿಷ ಬಿಟ್ಟು ಸೋಪು ಹಚ್ಚಿ ಮೈ ತೊಳೆಯಿರಿ, ಹೀಗೆ ಮಾಡಿದರೆ ಬಣ್ಣ ಸಂಪೂರ್ಣ ತೊಳೆದು ಹೋಗುವುದು.

ನಿಮ್ಮ ಕೂದಲನ್ನು ಚೆನ್ನಾಗಿ ತೊಳೆಯಿರಿ
ಚೆನ್ನಾಗಿ ಎಣ್ಣೆ ಹಚ್ಚಿ ಶ್ಯಾಂಪೂ ಹಚ್ಚಿ ತೊಳೆದ ಬಳಿಕ ಕಂಡೀಷನರ್ ಹಾಕಿ. ಹೋಳಿ ಆಟವಾಡಿದ ಒಂದೆರಡು ದಿನದಲ್ಲಿಯೇ ಹೇರ್‌ ಮಾಸ್ಕ್‌ ಬಳಸಿ.

ಸ್ನಾನದ ನಂತರ ಮೈಗೆ ಮಾಯಿಶ್ಚರೈಸರ್ ಹಚ್ಚಿ
ಈ ರೀತಿ ಮಾಡುವುದರಿಂದ ಮೈ ತ್ವಚೆ ಚೆನ್ನಾಗಿರುತ್ತದೆ, ರಾಸಾಯನಿಕ ತಾಗಿ ತ್ವಚೆ ಡ್ರೈಯಾಗುವುದನ್ನು ತಡೆಗಟ್ಟಬಹುದು.