ಐಬಿಎಫ್‌ಡಬ್ಲ್ಯೂ: ನವವಧುವಿನಂತೆ ಕಣ್ಮನ ಸೆಳೆದ ಅಕ್ಷರ ಹಾಸನ್!

ವಧುವಿಗಾಗಿ ವಿವಿಧ ವಸ್ತ್ರಗಳು

ಇಂದಿನ ಪ್ರದರ್ಶನದಲ್ಲಿ ಹಲವಾರು ನೂತನ ವಿನ್ಯಾಸಗಳನ್ನು ನೋಡಲು ಸಾಧ್ಯವಾಯಿತು. ಒಂದಕ್ಕಿಂತ ಒಂದು ಸುಂದರವಾಗಿದ್ದು ರೀನಾ ಡಾಕಾರವರ ಪ್ರತಿಭೆಯನ್ನು ಮೆರೆಯುತ್ತಿತ್ತು.

ಬಿಳಿ ಹಾಗೂ ಗುಲಾಬಿ ಬಣ್ಣದ ರವಿಕೆ

ದೇಹದ ಕೆಳಭಾಗವನ್ನು ಆವರಿಸಿದ ತೆಳುಗುಲಾಬಿ ಬಣ್ಣದ ಲೆಹೆಂಗಾವನ್ನು ಬಿಳಿ ಮತ್ತು ಗುಲಾಬಿ ಹೂಗಳು ಆಕ್ರಮಿಸಿದ್ದರೆ ರವಿಕೆ ಮಾತ್ರ ತೆಳುಹಳದಿ ಬಣ್ಣದಿಂದ ಕೂಡಿದ್ದು ಪಾರದರ್ಶಕವಾಗಿರುವಂತೆ ಕಾಣಿಸುವ ಜಾಣ್ಮೆ ರೀನಾರದ್ದಾಗಿದೆ.

ತೋಟದಲ್ಲಿರುವ ವಧು!

ಅಪ್ಪಟ ಕೆಂಪು ಬಣ್ಣದ ಉಡುಗೆಯ ಮೇಲೆ ವಿವಿಧ ಬಣ್ಣಗಳ ಹೂ ಮತ್ತು ಎಲೆಗಳಿರುವಂತೆ ವಿನ್ಯಾಸಗೊಳಿಸಿದ ಈ ವಸ್ತ್ರ ತೊಟ್ಟು ಬಂದ ರೂಪದರ್ಶಿ ನವವಧು ಈಗ ತೋಟದಲ್ಲಿ ನಿಂತಿರುವ ಭಾವನೆಯನ್ನು ಹುಟ್ಟಿಸುವಂತಿತ್ತು.

ಹಳದಿ-ಗುಲಾಬಿ ಆಕರ್ಷಣೆ

ಸಾಮಾನ್ಯವಾಗಿ ಹಳದಿ ಮತ್ತು ಗುಲಾಬಿ ಬಣ್ಣಗಳನ್ನು ವಿನ್ಯಾಸಗಾರರು ಜೊತೆಯಲ್ಲಿ ಬಳಸುವುದಿಲ್ಲ. ಏಕೆಂದರೆ ಇವು ಜೊತೆಯಾಗಿದ್ದರೆ ಕೊಂಚ ಮಬ್ಬಾಗಿ ಕಾಣುತ್ತವೆ. ಆದರೆ ರೀನಾರವರು ಗುಲಾಬಿಗೆ ಹೆಚ್ಚು ನೆರಿಗೆ ನೀಡಿ ಕೊಂಚ ಗಾಢವಾಗಿಸಿ ತಿಳಿಹಳದಿ ಬಣ್ಣಗಳ ಹೂವುಗಳನ್ನು ಪ್ರಖರವಾಗಿಸುವ ಮೂಲಕ ಅಧ್ಬುತವಾದ ಕಲಾವಂತಿಕೆಯನ್ನು ಪ್ರದರ್ಶಿಸಿದ್ದಾರೆ.

ಚುಮಕಿಬೊಟ್ಟಿನ ರವಿಕೆ

ತಿಳಿಹಳದಿಬಣ್ಣದ ಅರೆಪಾರದರ್ಶಕ ಸೀರೆಯ ಮೈಯಲ್ಲಿ ಚುಮುಕಿಬೊಟ್ಟುಗಳನ್ನು ಕಲಾವಂತಿಕೆಯಿಂದ ನೇಯ್ದಿದ್ದರೂ ಅಂಗೈಯಗಲವಿರುವ ರವಿಕೆಯಲ್ಲಿ ಮಾತ್ರ ಒಂದು ಚಿಕ್ಕ ಚುಕ್ಕೆಗೂ ಅವಕಾಶವಿಲ್ಲದಂತೆ ಚುಮಕಿಬೊಟ್ಟುಗಳನ್ನು ಉಪಯೋಗಿಸಿ ವಧುವನ್ನು ಪ್ರದರ್ಶಿಸಿದ ರೀನಾರ ವಿನ್ಯಾಸ ಗಮನ ಸೆಳೆಯಿತು.

ತೋಟದಲ್ಲಿರುವ ಸೌಂದರ್ಯ!

ಚಿನ್ನದ ಬಣ್ಣದ ಲೆಹೆಂಗಾದಲ್ಲಿ ಕೆಂಪು ಬಣ್ಣದ ಹೂವುಗಳಿದ್ದರೆ ರವಿಕೆಯಲ್ಲಿ ಮಾತ್ರ ಭಾರೀ ಪ್ರಮಾಣದಲ್ಲಿ ಕೆಂಪು ಹೂವುಗಳನ್ನು ಅಳವಡಿಸಿ, ದುಪಟ್ಟಾ ಮತ್ತು ತಲೆಯ ಕಿರೀಟದಲ್ಲಿಯೂ ಕೆಂಪು ಹೂವುಗಳನ್ನು ಅಳವಡಿಸುವ ಮೂಲಕ ದೂರದಿಂದ ಥಟ್ಟನೇ ನೋಡಿದರೆ ತೋಟದಲ್ಲಿರುವ ಸೌಂದರ್ಯ ಇಲ್ಲಿ ಸಾಕ್ಷಾತ್ಕಾರವಾಗಿರುವಂತೆ ಭಾಸವಾಗುತ್ತದೆ.