ಫೇಸ್‌ಮಾಸ್ಕ್ ತುಂಬಾ ಹೊತ್ತು ಇಟ್ಟರೆ ತ್ವಚೆಗೆ ಏನಾಗುತ್ತೆ ಗೊತ್ತಾ?

ಫೇಸ್‌ಮಾಸ್ಕ್ ಏಕೆ ಬಳಸಬೇಕು?

ನೀವು ತ್ವಚೆ ಸೌಂದರ್ಯಕ್ಕಾಗಿ ಈಗಾಗಲೇ ಡೇ ಕ್ರೀಮ್, ನೈಟ್ ಕ್ರೀಮ್ ಅಂತ ಬಳಸುತ್ತಿರುತ್ತೀರಿ, ಮತ್ಯಾಕೆ ಫೇಸ್‌ಮಾಸ್ಕ್‌ ಬೇಕೆಂದು ನೋಡುವುದಾದರೆ ಇತರ ಸೌಂದರ್ಯವರ್ಧಕಗಳಿಗಿಂತ ಇದು ತ್ವಚೆಯನ್ನು ಆಳದಿಂದ ಆರೈಕೆ ಮಾಡುತ್ತದೆ. ಅಲ್ಲದೆ ಫೇಸ್‌ಮಾಸ್ಕ್‌ ಬೇಗನೆ ತ್ವಚೆಯನ್ನು ಆರೈಕೆ ಮಾಡುತ್ತದೆ. ನೀವು ಫೇಸ್‌ಮಾಸ್ಕ್ ಹಾಕಿ ಅರ್ಧ ಗಂಟೆ ಬಿಟ್ಟು ತೊಳೆದ ತಕ್ಷಣ ಮುಖದಲ್ಲಿ ವ್ಯತ್ಯಾಸ ಕಂಡು ಬರುವುದು, ಇದು ತ್ವಚೆಯನ್ನು ಮತ್ತಷ್ಟು ಆರೈಕೆ ಮಾಡುವುದರಿಂದ ವಾರಕ್ಕೊಮ್ಮೆ ಫೇಸ್‌ಮಾಸ್ಕ್ ಹಚ್ಚುವುದು ಒಳ್ಳೆಯದು.

ಈಗ ನಾವು ಫೇಸ್‌ಮಾಸ್ಕ್ ಏಕೆ ತುಂಬಾ ಹೊತ್ತು ಮುಖದಲ್ಲಿ ಇಡಬಾರದು ಎಂದು ನೋಡೋಣ:

ರಂಧ್ರಗಳು ಮುಚ್ಚುವುದು ತ್ವಚೆಗೆ ಆರೋಗ್ಯಕರವಲ್ಲ

ತ್ವಚೆಯಲ್ಲಿ ಚಿಕ್ಕ ರಂಧ್ರಗಳು ಇರುತ್ತವೆ, ಅದು ಮುಚ್ಚಿದರೆ ತ್ವಚೆ ಆರೈಕೆ ಸರಿಯಾದ ರೀತಿಯಲ್ಲಿ ಆಗುವುದಿಲ್ಲ. ಫೇಸ್‌ಮಾಸ್ಕ್ ಹೆಚ್ಚು ಹೊತ್ತು ಇಟ್ಟರೆ ತ್ವಚೆಯ ರಂಧ್ರಗಳಿಗೆ ಉಸಿರಾಡಲು ಸಾಧ್ಯವಾಗುವುದಿಲ್ಲ, ಇದರಿಂದ ಮೊಡವೆ ಸಮಸ್ಯೆ ಹೆಚ್ಚುವುದು. ಆದ್ದರಿಂದ ಫೇಸ್‌ಮಾಸ್ಕ್ ಬಳಸುವಾಗ ಎಷ್ಟು ಸಮಯ ಇಡಬೇಕು ಎಂದು ಅದರ ಮೇಲೆ ಬರೆದಿರುವ ಸೂಚನೆ ನೋಡಿ ಅಷ್ಟೇ ಹೊತ್ತು ಇಡಿ.

ತ್ವಚೆ ಮಾಯಿಶ್ಚರೈಸರ್ ಕಡಿಮೆಯಾಗುವುದು

ತುಂಬಾ ಹೊತ್ತು ಫೇಸ್‌ಮಾಸ್ಕ್ ಇಡುವುದರಿಂದ ತ್ವಚೆ ಡ್ರೈಯಾಗುತ್ತದೆ, ಮಾಯಿಶ್ಚರೈಸರ್ ಕಡಿಮೆಯಾದಾಗ ತ್ವಚೆಯ ಹೊಳಪು ಕಳೆಗುಂದುವುದು. ಇದರಿಂದ ನೀವು ಅಂದ ಹೆಚ್ಚಿಸಲು ಬಳಸಿದ ಫೇಸ್‌ಮಾಸ್ಕ್‌ನಿಂದಾಗಿ ಅಂದ ಹಾಳಾಗುವುದು.

ಆಗಾಗ ಫೇಸ್‌ ಮಾಸ್ಕ್ ಬಳಸಬೇಡಿ

ಇನ್ನು ಎರಡು ದಿನಕ್ಕೊಮ್ಮೆ ಅಥವಾ ವಾರದಲ್ಲಿ ಎರಡರಿಂದ ಮೂರು ಬಾರಿ ಫೇಸ್‌ಮಾಸ್ಕ್ ಬಳಸಿದರೆ ತ್ವಚೆ ತುಂಬಾ ಚೆನ್ನಾಗಿರುತ್ತದೆ ಎಂದು ನೀವು ಅಂದುಕೊಂಡಿದ್ದರೆ ಅದು ತಪ್ಪು. ತ್ವಚೆಗೆ ಫೇಸ್‌ಮಾಸ್ಕ್ ವಾರಕೊಮ್ಮೆ ಹಚ್ಚಿದರೆ ಸಾಕು, ತಿಂಗಳಿಗೆ ಒಮ್ಮೆಯಾದರೂ ಅಡ್ಡಿಯಿಲ್ಲ. ಆದರೆ ದಿನ ಬಿಟ್ಟು ದಿನ ಸ್ಕ್ರಬ್ಬರ್ ರೀತಿ ಬಳಸಲು ಹೋಗಬೇಡಿ.

ಸಲಹೆ:

ಈಗ ಗೊತ್ತಾಯ್ತಲ್ಲ ಫೇಸ್‌ಮಾಸ್ಕ್ ಹೇಗೆ ಬಳಸಬೇಕೆಂದು. ಆದ್ದರಿಂದ ಯಾವುದೇ ಫೇಸ್‌ಮಾಸ್ಕ್ ಬಳಸುವುದಾದರೂ ತುಂಬಾ ಹೊತ್ತು ಇಡಬೇಡಿ. ಆದಷ್ಟೂ ನೈಸರ್ಗಿಕವಾದ ಫೇಸ್‌ಮಾಸ್ಕ್ ಬಳಸಿ.

ಕೆಲವೊಂದು ನೈಸರ್ಗಿಕವಾದ ಫೇಸ್‌ಮಾಸ್ಕ್‌

1. ಮೊಟ್ಟೆಯ ಬಿಳಿ+ಮೊಸರು: ಈ ಎರಡು ವಸ್ತು ಮಿಶ್ರ ಮಾಡಿ 15 ನಿಮಿಷದ ಬಳಿಕ ಮುಖ ತೊಳೆಯಿರಿ.

2.ಓಟ್ಸ್_ಜೇನು+ಮೊಸರು: ಈ ಮೂರು ಸಾಮಗ್ರಿ ಮಿಶ್ರ ಮಾಡಿ ಮುಖಕ್ಕೆ ಹಚ್ಚಿ 20 ನಿಮಿಷದ ಬಳಿಕ ಉಗುರು ಬೆಚ್ಚಗಿನ ನೀರಿನಿಂದ ಮುಖ ತೊಳೆಯಿರಿ.